.jpg)
ក្នុងដំណើរលើខ្សែពួចម្ងាយ៥០០ម៉ែត្រមានតែបក្សីហោះហើរនិងកន្ត្រកខ្សែកាបនៅក្បែររូបលោក។ AFP ហេង ជីវ័ន
វត្ថុដំបូងដែលអ្នកគ្រប់គ្នានឹងមើលឃើញនៅពេលចូលទៅកាន់ក្រុមហ៊ុន សុខគា ហ្គាឌិន ដែលជាក្រុមហ៊ុនមានឯកទេសផ្នែកទេសភាពនៅក្នុងខណ្ឌសែនសុខគឺជាដើមវល្លិ៍ទឹកដែលមានអាយុកាលយ៉ាងហោចណាស់ ១០ ឆ្នាំ។ នៅលើផ្ទៃដីទំហំ ២០០០ ម៉ែត្រការ៉េមានពោរពេញទៅដោយដើមឈើ និងផ្កាជាអម្បូរក្នុងតំបន់ត្រូពិកជាច្រើន។ ទីតាំងបែបនេះកម្រនឹងរកឃើញណាស់នៅក្នុងរាជធានីភ្នំពេញដែលពោរពេញដោយមនុស្ស ហើយសម្រាប់មនុស្សជាច្រើនវាមើលទៅដូចជាព្រៃជាជាងក្រុមហ៊ុនដែលផ្តល់នូវទស្សនីយភាពដ៏ស្រស់ស្អាតដល់ទីកន្លែងល្បីៗជាច្រើននៅក្នុងប្រទេសកម្ពុជា។
នៅលើផ្លូវដីតភ្ជាប់ផ្លូវថ្នល់ជាមួយនឹងអគារការិយាល័យតូចមួយដែលមានទីតាំងស្ថិតនៅជ្រៅក្នុងបរិវេណនោះលោក ឡាវ ណាំគាង ជានាយកប្រតិបត្តិ និងជាស្ថាបនិកក្រុមហ៊ុន សុខគា ហ្គាឌិន វ័យ ៣៩ ឆ្នាំកំពុងរកមើលកាកសំណល់នានានៅក្នុងអាងត្រីធ្វើពីថ្មមួយ បន្ទាប់ពីភ្លៀងធ្លាក់មួយមេដ៏ធំ ក៏ដូចជាការខូចខាតដែលភ្លៀងអាចបង្កឡើងលើរុក្ខជាតិរបស់លោក។ នៅ ក្បែររូបលោកគឺជាប្រពន្ធរបស់លោកអ្នកស្រី ហុក សុខគា ដែលក្រុមហ៊ុនរបស់លោកត្រូវបានដាក់ឈ្មោះតាម។
លោក ណាំគាង និយាយថា៖ «ទឹកអាចផ្តល់ជីវិតដល់ពួកវា ប៉ុន្តែទឹកច្រើនពេកក៏អាចបំផ្លាញវាបានដែរ។ រុក្ខជាតិទាំងនេះមានសារៈសំខាន់ខ្លាំងណាស់ព្រោះជាបេះដូងនៃអាជីវកម្មរបស់ខ្ញុំ»។
កាលពីច្រើនឆ្នាំមុននៅពេលដែលលោក ណាំគាង នៅជាយុវជនដែលមានបទពិសោធតិចតួចពីពិភពខាងក្រៅ និងមានដើមកំណើតនៅស្រុកកោះសូទិន ខេត្តកំពង់ចាម លោកតែងតែចង់ក្លាយជាសិល្បករ ១ រូបពិសេសសិល្បកររូបចម្លាក់ និងគំនូរដែលលោកមានដុងពីកំណើត។ លោកបានចូលរួមវគ្គបណ្តុះបណ្តាលសិល្បៈដែលរៀបចំឡើងដោយវិទ្យាស្ថានភាសាបារាំងនៃកម្ពុជា។
លោកថែមទាំងបានបង្ហាញស្នាដៃសិល្បៈរបស់លោកដែលជារូបចម្លាក់ធ្វើពីឫស្សី និងត្រឡោកដូងនៅក្នុងពិព័រណ៍មួយដែលមានឈ្មោះថា «ពន្លឺ» ហើយលោកត្រូវបានគេផ្តល់អាហារូបករណ៍ឲ្យទៅសិក្សានៅសាលាសិល្បៈមួយនៅប្រទេសបារាំង ប៉ុន្តែលោកបានបដិសេធព្រោះមិនចង់ចាកចេញពីគ្រួសារ។
ទោះជាយ៉ាងនេះក្តីគ្រួសាររបស់លោក ណាំគាង ចង់ឲ្យលោកដើរតាមគន្លងរបស់ឪពុកលោកដែលជាអ្នកជំនួញហើយនោះជាមូលហេតុដែលលោកទៅសិក្សាផ្នែកជំនួញនៅសាកលវិទ្យាល័យន័រតុន។ នៅពេលមុខជំនួញរបស់ឪពុកលោកជួបបញ្ហាដុនដាបនៅឆ្នាំ ១៩៩៨ ហើយលោកមិនអាចមានលទ្ធភាពបង់ថ្លៃសិក្សាបានទេ ដូច្នេះលោកក៏សម្រេចចិត្តឈប់រៀនបន្ទាប់ពីសិក្សាបាន ១ ឆ្នាំដើម្បីស្វែងរកអាហារូបករណ៍នៅតាមមហាវិទ្យាល័យ។ បន្ទាប់ពីរយៈពេល ២-៣ ខែលោកបានទទួលអាហារូបករណ៍សិក្សាផ្នែករចនាប្លង់ខាងក្នុងនៅសាកលវិទ្យាល័យភូមិន្ទវិចិត្រសិល្បៈ។
លោក ណាំគាង និយាយថា៖ «ខ្ញុំមិនដែលមានផែនការសិក្សាមុខជំនាញនេះទេ ហើយខ្ញុំមានការភ័យខ្លាចនៅពេលខ្ញុំឈានចូលថ្នាក់រៀន។ ទោះបីជាយ៉ាងណាក្រោយមកខ្ញុំបានរកឃើញថា ទេពកោសល្យ និងជំនាញសិល្បៈរបស់ខ្ញុំ បានជួយខ្ញុំយ៉ាងច្រើនក្នុងការសិក្សា ខណៈដែលទំនាក់ទំនងជិតស្និទ្ធរវាងសិល្បៈដែលខ្ញុំចូលចិត្ត និងការរចនាធ្វើឱ្យខ្ញុំរីករាយរៀនសូត្រជាខ្លាំង»។
ការលំបាកផ្នែកសេដ្ឋកិច្ចរបស់គ្រួសារមិនបានអនុញ្ញាតឱ្យលោក ណាំគាង ផ្តោតតែទៅលើការសិក្សាតែមួយមុខនោះទេ។ នៅពេលរៀនដល់ឆ្នាំទី ៣ លោកចាប់ផ្តើមធ្វើការងារក្រៅម៉ោងដែលភាគច្រើនជាការរចនាឆាកសម្រាប់ការប្រគំតន្ត្រី។ ប៉ុន្មានខែក្រោយបញ្ចប់ការសិក្សានៅឆ្នាំ ២០០០ លោក ណាំគាង បានទទួលនូវគម្រោងធំបំផុតក្នុងអាជីពវ័យក្មេងរបស់លោក ជាគម្រោងរចនារមណីយដ្ឋានគិរីរម្យ។
នៅក្នុងគម្រោងនេះលោកបានរចនាផ្ទះ និងបាងហ្គាឡូសម្រាប់អ្នកទេសចរ ប៉ុន្តែផ្នែកដែលលោកចូលចិត្ត គឺជាឧទ្យានដ៏ធំមួយដែលលោកបានដាក់រុក្ខជាតិកម្រ និងវត្ថុតុបតែងប្លែកៗជាច្រើនដែលលោកបានធ្វើខ្លួនឯងដូចជារូបចម្លាក់ Brachiosaurus កម្ពស់ ១៧ ម៉ែត្រ និងរូបសំណាកសត្វល្មូនសម័យបុរេប្រវត្តិជាច្រើនទៀត។
ហេង ជីវ័ន
លោកនិយាយថា៖ «គឺពេលនោះហើយដែលខ្ញុំត្រូវបានទាក់ទាញ និងភ្ជាប់ខ្លួនទៅនឹងការរចនាទេសភាព និងសួនច្បារ»។ ពីមុនមកខ្ញុំធ្លាប់បានធ្វើការតែលើការរចនាក្នុងអគារតែប៉ុណ្ណោះ ហើយខ្ញុំក៏មិនដែលដឹងថាទេសភាពជាពិសេសសួនច្បារអាចជាការបន្ថែមលម្អ និងគួរឲ្យមនោរម្យយ៉ាងនេះសោះ។ ទន្ទឹមនឹងនេះដែរការតុបតែងផ្នែករឹង គឺជាការបង្កើតការងារសិល្បៈដែលខ្ញុំស្រឡាញ់ខ្លាំងណាស់»។
៨ ឆ្នាំក្រោយមកពោលគឺបន្ទាប់ពីការរៀបអាពាហ៍ពិពាហ៍លោកបានផ្លាស់ប្តូរការផ្តោតក្នុងអាជីពទាំងស្រុងពីការរចនាក្នុងអគារទៅជាការរចនាទេសភាព និងសួនច្បារ ហើយលោក និងភរិយាបានប្រមូលផ្តុំបង្កើតក្រុមអ្នករចនាវ័យក្មេងកម្ពុជា ១ ក្រុមដើម្បីប្រកបរបរក្នុងវិស័យនេះ។ នៅឆ្នាំ ២០១៣ ក្រុមហ៊ុននេះបានចុះបញ្ជីជាមួយក្រសួងពាណិជ្ជកម្មជាផ្លូវការ។
លោក ណាំគាង បានថ្លែងថា៖ «មានហេតុផលជាច្រើនដែលជំរុញខ្ញុំឲ្យប្រែក្លាយក្រុមតូច ១ ទៅជាក្រុមហ៊ុន ១ ប៉ុន្តែ អ្វីដែលសំខាន់នោះគឺការបង្កើនការផ្តោតក្នុងចំណោមម្ចាស់អាជីវកម្ម និងអ្នកវិនិយោគទៅលើលក្ខណៈទេសភាពរចនាសម្ព័ន្ធអគារ។ ទន្ទឹមនឹងនេះដែរការធ្វើការជាមួយការរចនានៅក្នុងផ្ទះធ្វើឲ្យខ្ញុំស្ត្រេសជាខ្លាំង ព្រោះខ្ញុំជាមនុស្សដែលចូលចិត្តចេញមកខាងក្រៅ ដូច្នេះខ្ញុំចាំបាច់ត្រូវធ្វើការងារជាមួយធម្មជាតិដែលនៅពេលជាមួយគ្នានេះដែរអាចអនុញ្ញាតឱ្យខ្ញុំប្រើជំនាញ និងទេពកោសល្យសិល្បៈរបស់ខ្ញុំ»។
សុខគា ហ្គាឌិន ផ្តល់ជូននូវសេវាជាច្រើនរួមមានការរចនា និងការសាងសង់លក្ខណៈទេសភាព ការងារស៊ីវិល រចនាសម្ព័ន្ធទឹក ការងារជួសជុល និងថែទាំ សម្រាប់ទាំងក្នុងអគារ និងខាងក្រៅអគារ។ ក្នុងរយៈពេលប្រហែល ៥ ឆ្នាំនៃប្រតិបត្តិការ ក្រុមហ៊ុនបានរីកចម្រើនយ៉ាងឆាប់រហ័សដោយទទួលបានគម្រោងជាច្រើនពីវិនិយោគិន និងក្រុមហ៊ុនធំៗ។
ឧទាហរណ៍ខ្លះនៃគម្រោងទាំងនោះរួមមានសួនច្បារនៅរោងចក្រក្រុមហ៊ុន Cambodia Beverage Company ដែលក្នុងនោះលោកបានសាងសង់ស្រះ ១ ដែលមានរាងដូចដបភេសជ្ជៈ Coca Cola គម្រោងរចនាទេសភាពសម្រាប់សាខាទី ១ និងទី ២ នៃផ្សារទំនើបអ៊ីអនម៉ល និងសួនច្បារចំហៀងផ្លូវនៅ Phnom Penh City Center។
គម្រោងដែលពិបាកបំផុតសម្រាប់លោក ណាំគាង គឺការចូលរួមក្នុងការរចនា និងសាងសង់សួនច្បារនៅវាលព្រះមេនរុ ជាទីកន្លែងបូជាព្រះសពនៃអតីតព្រះមហាក្សត្រនរោត្តម សីហនុ ដែលលោកមានពេលតិចជាង ១ ខែដើម្បីធ្វើវាមុនពេលកំណត់។
លោកនិយាយថា៖ «សូម្បីតែខ្ញុំមិនអាចជឿថាយើងអាចកសាងកេរ្តិ៍ឈ្មោះសម្រាប់ខ្លួនយើង និងផ្តល់សេវាកម្មសម្រាប់ក្រុមហ៊ុនធំៗជាច្រើន និងសូម្បីតែព្រះបរមរាជវាំងដូច្នេះឡើយ។ អតិថិជនរបស់យើងពេញចិត្តនឹងការងាររបស់យើង»។
តាមលោក ណាំគាង គន្លឹះចំពោះប្រតិបត្តិការប្រកបដោយជោគជ័យរបស់ក្រុមហ៊ុនលោកគឺការផ្តោតទៅលើការបង្កើតទេសភាពដែលសមនឹង «អត្តសញ្ញាណ» របស់អចលនទ្រព្យ។
លោកនិយាយថា៖ «អត្តសញ្ញាណនេះសំដៅទៅលើអ្វីដែលអតិថិជនចង់បានឲ្យអគាររបស់ពួកគាត់ក្លាយទៅជាអ្វីមួយ។ តើវាគឺជាកន្លែងសម្រាកលម្ហែកាយ ឬកន្លែងធ្វើការមានរចនាប័ទ្មទំនើប ឬបុរាណនៅបែបខាងអាស៊ី ឬបច្ចិមប្រទេស ប៉ុន្តែរឿងមួយដែលច្បាស់បំផុតនោះគឺទាំងអស់នេះត្រូវតែបានធ្វើឡើងតាមរយៈធម្មជាតិ ឬវត្ថុសិល្បៈតុបតែងខាងក្រៅធ្វើដោយដៃ»។
លោក ណាំគាង បន្ថែមទៀតថាមុនពេលកសាងរូបភាពនៃការច្នៃប្រឌិត លោកតែងតែគូររូបទេសភាពដំបូងហើយដាក់នៅក្នុងផ្ទាំងគំនូរនោះនូវការបន្ថែមតាមការស្រមើស្រមៃរបស់លោក។ លោកបានធ្វើដំណើរទៅកាន់ប្រទេសជាច្រើនដើម្បីទទួលបាននូវការបំផុសគំនិតក៏ដូចជាដើម្បីស្វែងរកពូជរុក្ខជាតិនានានាំត្រឡប់មកប្រទេសកម្ពុជាវិញសម្រាប់គម្រោងរបស់លោក។
កត្តាសំខាន់មួយទៀតសម្រាប់ភាពជោគជ័យរបស់ សុខគា ហ្គាឌិន គឺសមត្ថភាពដែលអាចបំពេញបាននូវការចង់បានរបស់អតិថិជនតាមរយៈការយល់ដឹងច្បាស់លាស់អំពីបំណងប្រាថ្នារបស់អតិថិជន និងវិធានការកាត់បន្ថយចំណាយ។
«រឿងមួយដែលយើងតែងតែបញ្ជាក់ឱ្យបានច្បាស់លាស់នោះគឺធ្វើឲ្យក្តីសុបិនពិតប្រាកដរបស់អតិថិជនក្លាយជាការពិតដោយមិនធ្វើឱ្យខូចគុណភាពនៃការងាររបស់យើង។ យើងតែងតែយកចិត្តទុកដាក់លើភាពខុសគ្នានៅក្នុងការចំណាយ ឧទាហរណ៍រវាងការទិញស្មៅសិប្បនិម្មិត និងការដាំស្មៅដើម្បីធ្វើឱ្យប្រាកដថាអតិថិជនរបស់យើងមិនចំណាយច្រើនពេកស្របពេលដែលយើងទទួលបានប្រាក់ចំណេញ»។
ដូចក្រុមហ៊ុនក្នុងស្រុកជាច្រើននាពេលបច្ចុប្បន្ននេះដែរ សុខគា ហ្គាឌិន កំពុងប្រឈមនឹងការប្រកួតប្រជែងខ្លាំងជាមួយក្រុមហ៊ុនបរទេស ជាពិសេស នៅក្នុងលក្ខខណ្ឌនៃគុណភាពរចនា និងការកំណត់តម្លៃនៅក្នុងការដេញថ្លៃ។ ទោះជាយ៉ាងណាក៏ដោយលោក ណាំគាង ក្នុងនាមជានាយកប្រតិបត្តិមានជំនឿលើការដឹកនាំរបស់លោកក៏ដូចជាបុគ្គលិករបស់លោកដែលលោកបានហ្វឹកហ្វឺនអស់ជាច្រើនឆ្នាំ។
លោកនិយាយថា៖ «បេសកកម្មរបស់យើងគឺធ្វើឲ្យអ្នកវិនិយោគនឹកដល់យើងមុនគេ នៅពេលពួកគេគិតពីការតុបតែងរចនា។ ក្តីសុបិនធំបំផុតរបស់ខ្ញុំគឺមានរមណីយដ្ឋាន ១ កន្លែងដែលរចនាដោយខ្លួនឯង ហើយដែលខ្ញុំលម្ហែកាយបាន ឬ បន្ទាប់ពីខ្ញុំចូលនិវត្ដន៍នៅពេលដែលកូនៗ និងបុគ្គលិកវ័យក្មេងរបស់ខ្ញុំអាចកាន់កាប់មុខជំនួញខ្ញុំបាន»៕
