ភ្នំពេញៈ គម្រោងសាងសង់អគារ Vue Aston កម្ពស់ ១៤៥ ម៉ែត្រមាន ៣៩ ជាន់ ដែលជាការវិនិយោគរួមគ្នារវាងក្រុមហ៊ុនមកពីប្រទេស ចិន Sino-Cambodia Investment និងក្រុមហ៊ុន Mingda International Group ក្នុងតម្លៃសរុប ១០០ លានដុល្លារ នឹងចាប់ផ្តើមសាងសង់នៅក្នុងត្រីមាសទី ៤ ឆ្នាំ ២០១៩ នេះដោយគ្រោងនឹងបញ្ចប់ក្នុងឆ្នាំ ២០២២។
អគារ Vue Aston នឹងសាងសង់លើផ្ទៃដីជាង ៤ ០០០ ម៉ែត្រការ៉េ និងមានផ្ទៃអគារសរុបជាង ៧៨ ០០០ ម៉ែត្រការ៉េ នៅពេលសាងសង់រួច។ អគារដែលមានទីតាំងស្ថិតក្នុងសង្កាត់និរោធ ខណ្ឌច្បារអំពៅ (ទល់មុខកោះពេជ្រ) នេះនឹងត្រូវប្រើប្រាស់ធ្វើជាសណ្ឋាគារ ខុនដូ ដែលមាន ៨៩៥ យូនីត ភោជនីយដ្ឋាន និងកន្លែងហាត់ប្រាណជាដើម។
លោកស្រី Deng Wanfang នាយិកាប្រតិបត្តិក្រុមហ៊ុន The Pennisula Capital ដែលជាក្រុមហ៊ុនអភិវឌ្ឍន៍របស់គម្រោង Vue Aston បានថ្លែងកាលពីម្សិលមិញថា គម្រោងនេះនឹងសាងសង់ឡើងក្នុងទីតាំងជាប់មាត់ទន្លេដ៏ល្អបំផុតក្នុងរាជធានីភ្នំពេញដែលនឹងផ្តល់ជូននូវកន្លែងរស់នៅមួយប្រកបដោយផាសុកភាព និងមានភាពទំនើបបំផុត ខណៈបច្ចុប្បន្នតំបន់នៅកណ្តាលក្រុងភ្នំពេញពោរពេញទៅដោយមនុស្សរស់នៅយ៉ាងច្រើន ចរាចរណ៍ណែនតាន់តាប់ និងបរិយាកាសអាប់អួរ។
លោកស្រីមានប្រសាសន៍ថា៖ «បច្ចុប្បន្ននៅកណ្តាលក្រុងភ្នំពេញកំពុងប្រឈមនឹងការកកស្ទះចរាចរណ៍ និងបរិស្ថានមួយចំនួន ខណៈគម្រោងនឹងមានភាពល្អពិសេស ព្រោះនៅជាប់មាត់ទន្លេដែលមានខ្យល់អាកាសបរិសុទ្ធ និងអាចមើលឃើញទិដ្ឋភាពនៅក្នុងរាជធានីភ្នំពេញទៀតផង»។
លោកស្រីប្រាប់ទៀតថា អគារ Vue Aston នេះមានតម្លៃខ្ពស់ខ្លាំងមួយផ្នែកដោយសារតម្លៃដី ហើយសម្រាប់មួយផ្នែកទៀត ការសាងសង់គម្រោងនេះនឹងផ្តោតជាចម្បងលើគុណភាព។
ប្លង់រចនាគម្រោងនេះត្រូវគូរដោយក្រុមហ៊ុនដែលមានមូលដ្ឋាននៅអាមេរិក HKS Architects ដែលជាក្រុមហ៊ុនកំពូលផ្នែកជំនាញឌីហ្សាញនៅទូទាំងពិភពលោក។ នេះបើតាមលោកស្រី Deng។
លោក ប៉ែន សុភា អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានីភ្នំពេញបាននិយាយថា ភាពល្អប្រសើរនៃទំនាក់ទំនងការទូត ពិសេសគោលនយោបាយខ្សែក្រវាត់ ១ ផ្លូវ ១ របស់ប្រទេសចិនបានធ្វើឲ្យមានវិនិយោគិនចិនជាច្រើនចូលមកវិនិយោគនៅកម្ពុជា។ លោកបន្តថា ច្បារអំពៅ ជាខណ្ឌមួយដែលមានដីធំច្រើនសម្រាប់ការអភិវឌ្ឍ ហេតុនេះវានឹងមានសក្តានុពលកាន់តែខ្ពស់នៅថ្ងៃអនាគត។
លោកថ្លែងថា៖ «តាមរយៈគម្រោង Vue Aston ខ្ញុំសង្ឃឹមថា អ្នកវិនិយោគអន្តរជាតិនឹងធ្វើការសហការគ្នាឲ្យបានល្អក្នុងការជួយលើកស្ទួយដំណើរការអភិវឌ្ឍន៍រាជធានីភ្នំពេញ ព្រមទាំងចែករំលែកផលប្រយោជន៍ឲ្យបានទៅដល់ប្រជាជនខ្មែរគ្រប់គ្នា»។
លោក ហ៊ឹម សីហា នាយកផ្នែកស្រាវជ្រាវក្រុមហ៊ុនអចលនទ្រព្យ Vtrust Appraisal ដែលបានសិក្សាស្រាវជ្រាវ និងចងក្រងសៀវភៅ Phnom Penh 2030s-10 Predictions for the Real Estate Sector បានប្រាប់ភ្នំពេញ ប៉ុស្តិ៍ ថា បើតាមការសិក្សានៅឆ្នាំ ២០៣០ ខាងមុខតំបន់ជាប់មាត់ទន្លេក្នុងខណ្ឌច្បារអំពៅនឹងមានគម្រោងអភិវឌ្ឍន៍លំនៅឋាន និងអគារប្រណីតធំៗជាច្រើនលេចឡើង។
លោកបន្តថា តំបន់ច្បារអំពៅមានសក្តានុពលខ្ពស់សម្រាប់ការអភិវឌ្ឍជាតំបន់ដែលមានខ្យល់អាកាសល្អប្រសើរ។
លោកថ្លែងថា៖ «ដីជាប់មាត់ទន្លេភាគច្រើនសុទ្ធតែមានគម្រោងវិនិយោគធំៗអស់ហើយ គ្រាន់តែខ្លះមិនទាន់ចាប់ផ្តើមសាងសង់។ តំបន់នេះនឹងមានផ្លាស់ប្តូរមុខមាត់ឆាប់រហ័ស ប្រសិនបើមានស្ពានឆ្លងទន្លេភ្ជាប់ពីក្រុងកោះពេជ្រទៅកាន់ទីនោះ»។
ទោះយ៉ាងណាលោកបញ្ជាក់ថា រហូតមកដល់ពេលនេះលោកមិនទាន់មានព័ត៌មានពីផែនការកសាងស្ពានភ្ជាប់ពីកោះពេជ្រទៅកាន់ទីនោះទេ។
សក្តានុពលចំណុចប្រសព្វទន្លេចតុមុខបានធ្វើឲ្យតម្លៃដីក្នុងតំបន់ច្បារអំពៅ មានការប្រែប្រួលយ៉ាងឆាប់រហ័សក្នុងរយៈពេល ៣ ទៅ ៤ ឆ្នាំចុងក្រោយនេះ។
របាយការណ៍ស្រាវជ្រាវតម្លៃដីប្រចាំឆមាសទី ១ ឆ្នាំ ២០១៩ របស់ក្រុមហ៊ុនអចលនទ្រព្យ ឃី រៀលអ៊ីស្ទេត បានរកឃើញថា ដីក្នុងសង្កាត់និរោធ ខណ្ឌច្បារអំពៅមានតម្លៃចាប់ពី ៤០០ ទៅដល់ជាង ២ ០០០ ដុល្លារក្នុង ១ ម៉ែត្រការ៉េ។ ដោយឡែកដីក្នុងសង្កាត់ច្បារអំពៅ ១ និង ២ អាចមានតម្លៃរហូតដល់ជាង ៣ ០០០ ដុល្លារ។
ទិន្នន័យក្រសួងរៀបចំដែនដី នគរូបនីយកម្ម និងសំណង់បានឲ្យដឹងក្នុងរយៈពេល ៦ ខែ ឆ្នាំ ២០១៩ ទុនវិនិយោគវិស័យសំណង់នៅកម្ពុជាមានតម្លៃ ៣ ៣៩២ លានដុល្លារ កើនឡើងចំនួន ៥៧,៥៧ ភាគរយ បើធៀបនឹងរយៈពេលដូចគ្នាក្នុងឆ្នាំ ២០១៨៕ LA