ភ្នំពេញៈ អគារពហុមុខងារតម្លៃ ១៥០ លានដុល្លារដែលជាការវិនិយោគរួមរវាងក្រុមហ៊ុនក្នុងស្រុក និងក្រុមហ៊ុនសណ្ឋាគារដ៏ល្បីរបស់អាមេរិក បានចាប់ផ្តើមសាងសង់ហើយកាលពីថ្ងៃម្សិលមិញដោយគ្រោងនឹងបើកដំណើរការក្នុងឆ្នាំ ២០២២។
អគារកម្ពស់ ៤៥ ជាន់ដែលរួមមានទាំងសណ្ឋាគារលំដាប់ផ្កាយ ៣ Fairfield by Marriott Phnom Penh ស្ថិតតាមបណ្តោយមហាវិថីសហព័ន្ធរុស្ស៊ីក្បែរស្ពានអាកាស ៥ មករានេះ គឺជាការវិនិយោគរួមគ្នារវាងក្រុមហ៊ុនក្នុងស្រុក រ៉ូយ៉ាល់ ហ្វៀល ឌីវេឡុបម៊ិន (Royal Field Development Company Limited) ដែលជាបុត្រសម្ព័ន្ធរបស់ក្រុមហ៊ុន ជីប ម៉ុង គ្រុប ជាមួយក្រុមហ៊ុន Marriott មកពីអាមេរិក។
លោក លាង ឃុន ប្រធានក្រុមហ៊ុន រ៉ូយ៉ាល់ ហ្វៀល ឌីវេឡុបម៊ិន បានឲ្យដឹងថា ការចាប់ដៃគូជាមួយក្រុមហ៊ុនសណ្ឋាគារលំដាប់អន្តរជាតិ គឺជាចរន្តមួយដែលកើតមានឡើងស្របតាមភាពរីកចម្រើនរបស់សេដ្ឋកិច្ច និងទេសចរណ៍។
លោកបានថ្លែងថា៖ «ការសាងសង់អគារពាណិជ្ជកម្មចម្រុះលំដាប់អន្តរជាតិ និងសណ្ឋាគារ Fairfield នឹងចូលរួមចំណែកយ៉ាងសំខាន់ក្នុងការបំពេញសេចក្តីត្រូវការផ្នែកពាណិជ្ជកម្ម និងទេសចរណ៍នៅកម្ពុជា»។
លោក Simon Dell ប្រធានជាន់ខ្ពស់ផ្នែកសណ្ឋាគារ និងបដិសណ្ឋារកិច្ចក្រុមហ៊ុន ជីប ម៉ុង គ្រុប បានប្រាប់ថា មូលហេតុដែលក្រុមហ៊ុន Royal Fields Development ជ្រើសរើសយក Marriott International Inc. ជាដៃគូ ព្រោះក្រុមហ៊ុននេះគឺជាក្រុមហ៊ុនលំដាប់អន្តរជាតិល្បីឈ្មោះ ដែលមានសាខានៅក្នុងប្រទេសជាច្រើនក្នុងពិភពលោក។
លោកថ្លែងថា៖ «យើងជឿថា កិច្ចសហការនេះនឹងមានភាពល្អប្រសើរ និងមិនមានហានិភ័យនោះទេ»។
អគារនេះនឹងមានផ្សារទំនើប ៥ ជាន់ អគារការិយាល័យ និងរោងភាពយន្ត ចំណែកចាប់ពីជាន់ទី ១៥ ដល់ជាន់ទី ៤៥ ជាសណ្ឋាគារ Fairfield។
លោក Karl Hudson អនុប្រធានក្រុមហ៊ុន Marriott International Inc. ប្រចាំប្រទេស កម្ពុជា វៀតណាម ថៃ និងមីយ៉ាន់ម៉ា ថ្លែងថា សណ្ឋាគារ Fairfield by Marriott Phnom Penh នឹងផ្តោតទៅលើក្រុមប្រជាជនដែលមានប្រាក់ចំណូលមធ្យម។
លោកថ្លែងថា៖ «Fairfield by Marriott Phnom Penh នឹងជួយបំពេញនូវចន្លោះខ្វះខាតកន្លែងស្នាក់នៅលំដាប់មធ្យមនៅកម្ពុជា»។
Marriott គឺជាក្រុមហ៊ុនសណ្ឋាគារលំដាប់អន្តរជាតិ ដែលបានបង្កើតឡើងជិត ៩០ ឆ្នាំមកហើយ និងកំពុងប្រតិបត្តិការសណ្ឋាគារជាច្រើននៅជាង ១១០ ប្រទេសទូទាំងពិភពលោក។
លោកស្រី ឆាយ ស៊ីវលីន ប្រធាន សមាគមទីភ្នាក់ងារទេសចរណ៍កម្ពុជា បានឲ្យដឹងថា កំណើនភ្ញៀវទេសចរ និងការមកដល់នៃក្រុមហ៊ុនសណ្ឋាគារលំដាប់អន្តរជាតិ គឺជាការបង្ហាញពីទំនុកចិត្ត និងភាពរីកចម្រើនរបស់កម្ពុជា ហើយវាគឺជាសារមួយផ្ញើទៅកាន់វិនិយោគិនអន្តរជាតិផ្សេងទៀតពីឱកាសក្នុងការចូលមកវិនិយោគនៅកម្ពុជាផងដែរ។
លោកស្រីថ្លែងថា៖ «ក្នុងនាមវិស័យទេសចរណ៍ ខ្ញុំពិតជាចង់ឲ្យមានការវិនិយោគពីអន្តរជាតិបែបនេះកាន់តែច្រើនបន្ថែមទៀត»។
ទោះជាយ៉ាងណា លោកស្រីលើកឡើងថា៖ «ទន្ទឹមនឹងកំណើននៃការចូលមកវិនិយោគពីក្រុមហ៊ុនលំដាប់អន្តរជាតិបែបនេះ កម្ពុជាក៏គួរតែពង្រឹកការអភិវឌ្ឍធនធានមនុស្សរបស់ខ្លួនឲ្យបានកាន់តែច្រើន និងមានគុណភាពបន្ថែមទៀតដែរ»៕ LA