ក្រុងចុងឈីងៈ ក្នុងទីក្រុងជាច្រើនរបស់ប្រទេស ចិន ការរឹតបន្តឹងរបស់រដ្ឋាភិបាលបានបន្ទាបតម្លៃទីផ្សារអចលនទ្រព្យដែលធ្លាប់តែសកម្ម ប៉ុន្តែនៅទីក្រុងចុងឈីង (Chongqing) ដែលស្ថិតនៅភាគនិរតីប្រទេស ចិន ការសាងសង់កំពុងកើនឡើង ហើយការលក់កំពុងស្ទុះងើប ដោយសារតែក្រុមវិនិយោគិនប្រញាប់ប្រញាល់វិនិយោគ។
ភ័ស្ដុតាងដែលជឿជាក់បំផុត គឺជាការបន្ថែមគម្រោងសាងសង់មួយក្នុងចំណោមគម្រោងថ្មីបំផុតជាច្រើនសម្រាប់ការសាងសង់អគារខ្ពស់ៗរបស់ទីក្រុងនេះ ដែលជាគម្រោងដ៏ធំមួយក្នុងចំណោមអគារខ្ពស់នៅពេលអនាគតចំនួន ៨ ក្នុងនោះអគារ ៦ ត្រូវបានតភ្ជាប់គ្នាដោយស្ពានអាកាសខ្ពស់បំផុត។
គម្រោង Raffles City Chongqing លេចឡើងជារាងកោងនៅមាត់ទន្លេ Jialing ជាទីដែលទឹកទន្លេពណ៌បៃតងចាស់របស់ទន្លេនេះជួបគ្នាជាមួយចរន្តទឹកល្បាប់ភក់របស់ទន្លេ Yangtze។
អគារកម្ពស់ ៧៣ ជាន់ ដែលជាផ្នែកមួយនៃគម្រោងសាងសង់តម្លៃ ៤,៨ ពាន់លានដុល្លារ នេះ គឺជាភ័ស្ដុតាងដ៏ច្បាស់លាស់ដែលបង្ហាញថា ការថមថយការលក់ដែលបានមើលឃើញកើតមាននៅទូទាំងប្រទេសមិនបានកើតមាននៅ ទីក្រុង Chongqing ទេ។
ក្នុងរយៈពេលប៉ុន្មានឆ្នាំថ្មីៗនេះ ទីក្រុងប៉េកាំងបានហាមឃាត់ការយកមូលធនចេញក្រៅប្រទេស ដោយទប់ស្កាត់ការវិនិយោគក្នុងគម្រោងបរទេសនានា ដូចជាការអភិវឌ្ឍសំណង់ប្រណីត ដែលបានសាងសង់ដោយក្រុមហ៊ុនអភិវឌ្ឍរបស់ប្រទេស ចិន នៅម៉ាឡេស៊ីជាដើម។
អាជ្ញាធរនានារបស់ចិនបានរឹតបន្តឹងបទប្បញ្ញត្តិនៅក្នុងទីក្រុងសំខាន់ៗរបស់ប្រទេសនេះ ដែលតម្រូវឲ្យអ្នកទិញត្រូវបានបង្ហាញភ័ស្ដុតាងលំនៅឋានមុនពេលទិញផ្ទះ។
ច្បាប់ទាំងនោះបានផ្ដល់អត្ថប្រយោជន៍ដល់កន្លែងជាច្រើនដូចជាទីក្រុង Chongqing ដែលជាកន្លែងឡូជីស្ទិកដ៏សំខាន់មួយនៅក្នុងគំនិតផ្ដួចផ្ដើមខ្សែក្រវាត់ និងផ្លូវ។
ទីក្រុងនេះ គឺជាទីផ្សារឈានមុខគេរបស់ប្រទេស ចិន ទាក់ទងនឹងផ្ទៃក្រឡាអាផាតមិនលំនៅឋានដែលបានលក់ ពោលគឺប្រហែលជា ៣១,២៣ ម៉ែត្រក្រឡា (៣៣៦ លានម៉ែត្រហ្វីត) នៃលំនៅឋានថ្មី ត្រូវបានលក់កាលពីឆ្នាំ ២០១៨ ដោយការលក់លំនៅឋានថ្មីៗកើនឡើង ៦៤,៣ ភាគរយ កាលពីខែមីនាធៀបនឹងការធ្លាក់ ០,៦ នៅទូទាំងប្រទេស។
ការលក់បានកើតមានឡើង ទោះបីជាសេដ្ឋកិច្ចរបស់ទីក្រុង Chongqing កំពុងបាត់បង់ថាមពលបន្ទាប់ពីកើនឡើង ២ ខ្ទង់អស់រយៈពេលជាច្រើនឆ្នាំក៏ដោយ ដោយកំណើនផលិតផលក្នុងស្រុកសរុបរបស់ទីក្រុងនេះសម្រេចបានត្រឹមតែ ៥,៣ ភាគរយ កាលពីឆ្នាំ ២០១៨ ដែលនៅក្រោមអត្រាកំណើនសេដ្ឋកិច្ចរបស់រដ្ឋាភិបាលកណ្តាល។
ទំហំនៃការសាងសង់មានភាពរហ័សខ្លាំង ដែលតម្លៃបានចាប់ផ្ដើមធ្លាក់ចុះ ដោយសារតែការផ្គត់ផ្គង់កើនឡើង ប៉ុន្តែតម្លៃកាន់តែទាបកំពុងជួយទាក់ទាញក្រុមអ្នកទិញ។
លោក Andrew Deng នាយកគ្រប់គ្រងទទួលបន្ទុកប្រទេស ចិន ភាគខាងលិចប្រចាំក្រុមហ៊ុនពិគ្រោះយោបល់អចលនទ្រព្យ CBRE បានថ្លែងថា៖ «នៅពេលនេះ ទីក្រុង Chongqing កំពុងស្ថិតក្នុងចំណុចដែលមានការផ្គត់ផ្គង់ច្រើន ហើយទីក្រុងនេះកំពុងស្ថិតក្នុងដំណាក់កាលនៃការកែតម្រូវតម្លៃរបស់ទីផ្សារ»។ លោកបន្ថែមថា៖ «វាជាទីផ្សាររបស់អ្នកទិញ ហើយមនុស្សជាច្រើនកំពុងទាញយកផលប្រយោជន៍ពីការកែតម្រូវតម្លៃនោះ»។
តម្លៃសម្រាប់យូនីតបន្ទប់មួយទំហំ ៩៨ ម៉ែត្រក្រឡា នៅអគារ Raffles City ចាប់ផ្ដើមក្នុងតម្លៃ ៤ លានយន់ (៥៨០ ០០០ ដុល្លារ) ហើយក្រុមហ៊ុនអភិវឌ្ឍន៍បានឲ្យដឹងថា ៣ ភាគ ៤ នៃលំនៅឋានចំនួន ១ ៤០០ យូនីត របស់គម្រោងនេះត្រូវបានលក់អស់។
ក្រុមអ្នកទិញដែលមានសក្ដានុពលត្រូវបានរាយការណ៍ថារួមមានទាំងមន្ត្រីបេសកកម្មការទូត ក្រុមហ៊ុនបច្ចេកវិទ្យា និងក្រុមហ៊ុនហិរញ្ញវត្ថុផងដែរ។
ប៉ុន្តែសម្រាប់ប្រជាជនក្នុងស្រុកជាច្រើន ដែលប្រាក់ខែប្រចាំខែជាមធ្យមរបស់ពួកគេកាលពីឆ្នាំ ២០១៦ មានចំនួន ៦ ១០០ យន់ (៨៨០ ដុល្លារ) នោះ អចលនទ្រព្យជាច្រើនដូចជាអគារ Raffles City តំណាងឲ្យផ្នែកមួយផ្សេងទៀតនៃទីក្រុងដែលពួកគេមិនអាចឈោងទៅដល់។
លោក Wang Mingjun ដែលជាប្រជាជនក្នុងស្រុកបានថ្លែងថា៖ «ខ្ញុំគិតថា នឹងមានឥទ្ធិពលមួយចំនួនលើតម្លៃលំនៅឋាននៅក្បែរៗនោះ ដែលនឹងប្រហែលជាកើនឡើងដែរ»។
លោកបានកត់សម្គាល់ថា ក្រុមអ្នកលីសែងអីវ៉ាន់ពីមុនដែលធ្វើការងារនៅកំពង់ផែនានានៅតាមដងទន្លេនៅតំបន់នេះ ត្រូវបានគេបណ្ដេញចេញពីកន្លែងនោះក្នុងអំឡុងការអភិវឌ្ឍរបស់អចលនទ្រព្យនេះ។
លោកបន្ថែមថា៖ «ប្រជាជនមួយចំនួនគិតថា វាទំនើបពេក ហើយវាធ្វើឲ្យខូចវប្បធម៌កំពង់ផែប្រពៃណី»៕ AFP/LA