កាលីហ្វ័រនីញ៉ាៈ ក្នុងរយៈពេល ១០ ខែចុងក្រោយនេះអ្នកស្រី Bei Qin ភ្នាក់ងារអចលនទ្រព្យម្នាក់នៅតំបន់បច្ចេកវិទ្យា Silicon Valley រដ្ឋកាលីហ្វ័រនីញ៉ា មិនទទួលបានអតិថិជនណាម្នាក់មកពីប្រទេស ចិន ឡើយ ដែលជាទីផ្សារមួយធ្លាប់ជាប្រភពដ៏ចម្បងនៃអាជីវកម្មរបស់គាត់។
អ្នកស្រី Qin ប្រធានក្រុមហ៊ុន ACEQ Investment Group នៅទីក្រុង Cupertino រដ្ឋកាលីហ្វ័រនីញ៉ាបានថ្លែងថា៖ «យើងមានអាជីវកម្មដ៏ល្អប្រសើរបំផុតនៅឆ្នាំ ២០១៦ និង ២០១៧។ រាល់ថ្ងៃយើងមានការសាកសួរព័ត៌មានពីអតិថិជនចិន ហើយរៀងរាល់សប្តាហ៍ គណនី WeChat របស់យើងមានអ្នកចុះឈ្មោះថ្មីច្រើនជាង ១០ នាក់»។ អ្នកស្រីបានថ្លែងបន្តថា៖ «បច្ចុប្បន្នថ្ងៃល្អទាំងនោះបានកន្លងផុតទៅហើយ»។
បន្ទាប់ពី ១ ទសវត្សរ៍នៃការកើនឡើងការវិនិយោគដោយជនជាតិចិនដែលមានប្រាក់ច្រើនក្នុងការទិញអចលនទ្រព្យលំនៅឋាននៅសហរដ្ឋអាមេរិក ការវិនិយោគរបស់ជនជាតិចិនដែលជាចំណែកដ៏ធំនៃអតិថិជនអន្តរជាតិសម្រាប់រយៈពេល ៧ ឆ្នាំជាប់គ្នាមកនោះបានធ្លាក់ចុះ ៥៦ ភាគរយ ក្នុងរយៈពេល ១២ ខែគិតត្រឹមខែមីនា។ នេះបើយោងតាមរបាយការណ៍មួយដែលចេញផ្សាយដោយសមាគមភ្នាក់ងារអចលនទ្រព្យជាតិ (NAR)។
ក្នុងអំឡុងពេលនោះ អតិថិជនចិនបានទិញអចលនទ្រព្យនៅអាមេរិកមានតម្លៃ ១៣,៤ ពាន់លានដុល្លារ ធៀបនឹង ៣០,៤ ពាន់លានដុល្លារ នៅឆ្នាំកន្លងទៅ។ អតិថិជនដែលជាប់ចំណាត់ថ្នាក់ទី ២ គឺជនជាតិកាណាដាដែលបានចំណាយប្រាក់សរុប ៨ ពាន់លានដុល្លារ សម្រាប់ការទិញផ្ទះនៅអាមេរិក។ នេះបើយោងតាមរបាយការណ៍នេះ។
លោក Lawrence Yun ប្រធានសេដ្ឋវិទូប្រចាំសមាគម NAR បានមានប្រសាសន៍ថា៖ «កត្តាសេដ្ឋកិច្ចរួមទាំងការឡើងថ្លៃប្រាក់ដុល្លារ ការថមថយកំណើនសេដ្ឋកិច្ចក្នុងប្រទេស ចិន និងការគ្រប់គ្រងមូលធនគឺជាកត្តាដែលទប់ស្កាត់អតិថិជនដោយគ្មានអ្វីដែលគួរឲ្យសង្ស័យ»។
លោកមានប្រសាសន៍ថា៖ «ប៉ុន្តែការកើនឡើងវោហារស័ព្ទភាពតានតឹងពាណិជ្ជកម្មក៏អាចបង្កផលប៉ះពាល់ដល់ទំនុកចិត្តចំពោះការទិញផ្ទះអាមេរិកផងដែររួមជាមួយនឹងភាពមិនប្រាកដប្រជាជុំវិញថាតើការរឹតបន្តឹងការធ្វើដំណើរនឹងត្រូវបានអនុវត្តដែរឬយ៉ាងណានៅថ្ងៃអនាគត»។
គេហទំព័រ Juwai ដែលគេហទំព័រអចលនទ្រព្យអន្តរជាតិធំបំផុតរបស់ចិនបានព្យាករថា និន្នាការធ្លាក់ចុះក្នុងចំណោមការទិញផ្ទះពីសំណាក់ជនជាតិចិននៅសហរដ្ឋអាមេរិកនឹងបន្តកើតមាននៅឆ្នាំក្រោយដោយមានការប៉ាន់ប្រមាណថានឹងធ្លាក់ចុះដល់ ១០ ទៅ ១២ ពាន់លានដុល្លារ គិតត្រឹមខែមីនា ឆ្នាំ ២០២០។
ការសាកសួរព័ត៌មានដោយជនជាតិចិនអំពីអចលនទ្រព្យនៅអាមេរិកបានធ្លាក់ចុះ ២៧,៥ ភាគរយ នៅត្រីមាសទី ១ ធៀបនឹងរយៈពេលដូចគ្នាកាលពីឆ្នាំមុន និងបានធ្លាក់ចុះ ៤ ត្រីមាសក្នុងរយៈពេល ៥ ត្រីមាសចុងក្រោយ។ នេះបើយោងតាមគេហទំព័រនេះ។
រដ្ឋកាលីហ្វ័រនីញ៉ា ដែលជាទិសដៅកំពូលសម្រាប់ការវិនិយោគលំនៅឋានរបស់ជនជាតិចិននៅអាមេរិកកំពុងទទួលរងផលប៉ះពាល់។
លោក Oscar Wei សេដ្ឋវិទូជាន់ខ្ពស់ និងជាប្រធានផ្នែកស្រាវជ្រាវនៅសមាគមភ្នាក់ងារអចលនទ្រព្យទីក្រុងកាលីហ្វ័រនីញ៉ា (CAR) បានថ្លែងថា និន្នាការនៅក្នុងរដ្ឋនេះមិនខ្លាំងដូចដែលរបាយការណ៍របស់ NAR បានលើកឡើងនោះទេ។ លោកបានមានប្រសាសន៍ថា៖ «សមាមាត្ររបស់អ្នកទិញជនជាតិចិនក្នុងចំណោមអ្នកទិញអន្តរជាតិបានធ្លាក់ចុះតិចតួចធៀបនឹងឆ្នាំមុន»។
លោកឲ្យដឹងទៀតថា ភាពមិនប្រាកដប្រជាដែលបង្កឡើងដោយភាពតានតឹងពាណិជ្ជកម្មរវាងចិន និងអាមេរិករួមជាមួយនឹងការកើនឡើងតម្លៃផ្ទះដោយសារការធ្លាក់ចុះថ្លៃប្រាក់យន់បានដើរតួនាទីក្នុងការធ្លាក់ចុះការទិញផ្ទះនេះ។
រដ្ឋាភិបាលអាមេរិកបានគំរាមដកហូតពន្ធលើទំនិញនាំចូលដែលផលិតនៅប្រទេសចិនទាំងអស់រួមទាំងទំនិញនាំចូលតម្លៃ ៣០០ ពាន់លានដុល្លារបន្ថែម លើពន្ធ ២៥ ភាគរយ ដែលបានដកហូតរួចហើយលើទំនិញតម្លៃ ២៥០ ពាន់លានដុល្លារ ពីប្រទេស ចិន។ ប៉ុន្តែរដ្ឋាភិបាលអាមេរិកបានពន្យារពេលដកហូតពន្ធមួយចំនួនរហូតដល់ខែក្រោយ ដោយសារក្តីបារម្ភអំពីផលប៉ះពាល់ផ្នែកសេដ្ឋកិច្ច។
លោក Wei ថ្លែងថា៖ «ពន្ធនឹងឈានទៅរកការកើនឡើងតម្លៃទំនិញប្រើប្រាស់។ ជាចុងក្រោយនៅពេលអ្នកជួបប្រទះអតិផរណា វានឹងប៉ះពាល់ដល់តម្លៃជារួមមិនមែនត្រឹមតែតម្លៃទំនិញប្រើប្រាស់ឡើយ ប៉ុន្តែថែមទាំងតម្លៃសម្រាប់សាងសង់ផ្ទះផងដែរ។ វានឹងប៉ះពាល់ដល់ចំណង់របស់មនុស្សក្នុងការទិញអចលនទ្រព្យ»។
លោកបន្ថែមថា ក្តីបារម្ភជុំវិញការធ្លាក់ចុះតម្លៃអចលនទ្រព្យអាចបង្អាក់អតិថិជនចិនដែលមានសក្តានុពល ហើយបណ្តាលឲ្យពួកគេរង់ចាំរហូតទាល់តែកិច្ចព្រមព្រៀងពាណិជ្ជកម្មត្រូវបានដោះស្រាយ។
ក្នុងពេលជាមួយគ្នានេះដែរការឡើងថ្លៃប្រាក់ដុល្លារបានធ្វើឲ្យផ្ទះអាមេរិកមានតម្លៃថ្លៃជាងមុនសម្រាប់អតិថិជនចិន។ ក្នុងអំឡុងពេល ១២ ខែគិតចាប់ពីខែមីនាឆ្នាំមុនមក ប្រាក់ដុល្លារបានឡើងថ្លៃ ១ ភាគរយ ធៀបនឹងប្រាក់យន់ចិន។ នេះបើយោងតាមរបាយការណ៍របស់ NAR៕ People''s Daily/KC