ភ្នំពេញៈ ការបើកដំណើរការសាងសង់ និងកែលម្អផ្លូវចំនួន ៣៨ ខ្សែក្នុងក្រុងសៀមរាប ដោយលោកនាយករដ្ឋមន្ត្រី ហ៊ុន សែន កាលពីសប្តាហ៍មុនត្រូវបានអ្នកជំនាញក្នុងវិស័យអចលនទ្រព្យអះអាងថា កំពុងចូលរួមចំណែកយ៉ាងសំខាន់ក្នុងការជំរុញឱ្យទីផ្សារអចលនទ្រព្យនៅទីនោះមានសម្ទុះកាន់តែខ្លាំង។
លោក ហ៊ុន សែន កាលពីថ្ងៃចន្ទបានធ្វើជាគណៈអធិបតីក្នុងពិធីបើកការដ្ឋានសាងសង់ និងកែលម្អផ្លូវទាំង ៣៨ ខ្សែក្នុងក្រុងសៀមរាបដែលមានប្រវែងសរុប ១០៨,៧៤ គីឡូម៉ែត្រដោយប្រើប្រាស់ថវិកាជាតិប្រមាណ ១៥០ លានដុល្លារ ក្នុងនោះថវិកា ៩ លានដុល្លារសម្រាប់ការរៀបចំស្ថាបនាប្រព័ន្ធលូបង្ហូរទឹកភ្លៀង និងទឹកកខ្វក់។ គម្រោងនេះនឹងត្រូវបញ្ចប់នៅចុងឆ្នាំ ២០២១។
លោក ហ៊ុន សែន បាននិយាយថា ការសាងសង់ និងកែលម្អផ្លូវទាំងអស់គឺជាការរួមចំណែកអភិវឌ្ឍសេដ្ឋកិច្ចជាតិ ជាពិសេសក្រុងសៀមរាបតាមរយៈការប្រែក្លាយសៀមរាបឱ្យក្លាយទៅជាទីក្រុងទំនើប និងទេសចរណ៍ដ៏មានសក្តានុពល ខណៈខេត្តសៀមរាបត្រូវបានរដ្ឋាភិបាលកម្ពុជាកំណត់ថា ជាប៉ូលសេដ្ឋកិច្ចមួយក្នុងចំណោមប៉ូលសេដ្ឋកិច្ចទាំង ៣ របស់កម្ពុជា រួមមាន រាជធានីភ្នំពេញ ក្រុងព្រះសីហនុ និង ខេត្តសៀមរាប។
លោកបន្តថា ការរៀបចំអភិវឌ្ឍហេដ្ឋារចនាសម្ព័ន្ធនៅពេលនេះគឺបានគិតគូរពីការពារ និងកែលម្អបរិស្ថាន ផាសុកភាពរបស់ប្រជាពលរដ្ឋ និងការរៀបចំអភិវឌ្ឍទីក្រុងឆ្លាតវៃ (Smart City) ផងដែរ។
លោកបន្ថែមថា ក្រោយពីបញ្ចប់ការសាងសង់គម្រោងនេះនឹងដើរតួជាហេដ្ឋារចនាសម្ព័ន្ធប្រទាក់ក្រឡាគ្នាតភ្ជាប់ទីប្រជុំជនទៅជាយក្រុង និងទៅតំបន់ទេសចរណ៍សំខាន់ៗ ព្រមទាំងបណ្តាញខ្សែផ្លូវជាតិនានាសំដៅកាត់បន្ថយការកកស្ទះចរាចរណ៍ក្នុងទីក្រុង ជំរុញកំណើនដឹកជញ្ជូន ទាក់ទាញវិនិយោគិន ធុរជន និងភ្ញៀវទេសចរ ជាពិសេសបន្ទាប់ពីវិបត្តិការឆ្លងរាលដាលជំងឺកូវីដ១៩ ត្រូវបញ្ចប់។
លោក សំ សុខនឿន ប្រធានសមាគមអចលនទ្រព្យសកលបានប្រាប់ភ្នំពេញប៉ុស្តិ៍កាលពីថ្ងៃពុធថា សៀមរាបគឺជាខេត្តដែលមានសក្តានុពលលើវិស័យអចលនទ្រព្យស្រាប់ហើយ ដូច្នេះនៅពេលមានការរៀបចំជួសជុល និងអភិវឌ្ឍផ្លូវបន្ថែមនោះ វិស័យអចលនទ្រព្យប្រាកដជានឹងស្ទុះឡើងជាមិនខាន ជាពិសេសអចលនទ្រព្យនៅតាមតំបន់មុខព្រួញសម្រាប់បម្រើដល់វិស័យទេសចរណ៍។
លោកបានបន្តថា តម្រូវការអចលនទ្រព្យនៅសៀមរាបនឹងកើនឡើងច្រើនពេលដែលការសាងសង់ហេដ្ឋារចនាសម្ព័ន្ធរួចរាល់ និងពិភពលោកអាចគ្រប់គ្រងជំងឺកូវីដ- ១៩ បានដោយជោគជ័យ។
លោកថ្លែងថា៖ «កន្លែងណាមានការរៀបចំហេដ្ឋារចនាសម្ព័ន្ធកន្លែងនោះនឹងមានទីផ្សារអចលនទ្រព្យរស់រវើកដោយស្វ័យប្រវត្តិ ពិសេសខេត្តសៀមរាបដែលមានសក្តានុពលទីផ្សារអចលនទ្រព្យរួចទៅហើយ»។
លោកបានបន្ថែមថា៖ «ការអភិវឌ្ឍផ្លូវថ្នល់ មិនត្រឹមតែទាក់ទាញភ្ញៀវទេសចរឱ្យទៅសម្រាកកម្សាន្តក្នុងខេត្តប៉ុណ្ណោះទេ ប៉ុន្តែវាក៏នឹងទាក់ទាញអ្នកវិនិយោគឱ្យទៅបណ្តាក់ទុននៅទីនោះផងដែរ»។
លោកបន្តថា នៅកម្ពុជាបច្ចុប្បន្នបើគេដករាជធានីភ្នំពេញ និងខេត្តព្រះសីហនុចេញ ខេត្តសៀមរាបគឺជាកន្លែងដែលវិស័យអចលនទ្រព្យមានទីផ្សារល្អជាងគេ។
យោងតាមលោក សុខនឿន បច្ចុប្បន្នដីនៅតំបន់ពាណិជ្ជកម្មល្អបំផុតក្នុងក្រុងសៀមរាបមានតម្លៃរហូតដល់ ៤ ០០០ ដុល្លារក្នុង ១ ម៉ែត្រការ៉េ។
អគ្គនាយកក្រុមហ៊ុនអចលនទ្រព្យ KFA លោក នួន រិទ្ធី បាននិយាយថា នេះជាសញ្ញាវិជ្ជមានបន្ថែមទៀតក្នុងវិស័យអចលនទ្រព្យនៅក្រុងសៀមរាប បន្ថែមលើគម្រោងអភិវឌ្ឍន៍ព្រលានយន្តហោះថ្មី និងគម្រោងរៀបចំទីក្រុងចិន (China Town) ដែលទើបបានប្រកាសកាលពីពេលថ្មីៗ។ លោកបន្តថា នៅពេលមានផ្លូវកាន់តែច្រើន ការធ្វើដំណើរពីកន្លែងមួយទៅកន្លែងមួយក៏កាន់តែងាយស្រួល ហើយពេលនេះតម្រូវការអចលនទ្រព្យសម្រាប់អភិវឌ្ឍលំនៅឋាន ឬកន្លែងប្រកបអាជីវកម្មក៏មានច្រើនដែរ។
លោកនិយាយថា៖ «នេះជាសញ្ញាវិជ្ជមានសម្រាប់វិស័យអចលនទ្រព្យក្នុងក្រុងសៀមរាប ព្រោះទីណាមានផ្លូវល្អ និងទឹក ភ្លើងអគ្គិសនីគ្រប់គ្រាន់ អចលនទ្រព្យនឹងកើនឡើងគ្រាន់តែការកើនឡើងនោះក៏អាស្រ័យទៅលើទីតាំងភូមិសាស្រ្តជាក់ស្តែងដែរ»។
ទោះយ៉ាងណាលោក រិទ្ធី បញ្ជាក់ថា ដោយសារខេត្តសៀមរាបពឹងផ្អែកខ្លាំងលើវិស័យទេសចរណ៍ ហេតុនេះអត្រាកំណើនតម្លៃអចលនទ្រព្យក៏អាស្រ័យលើកំណើននៃភ្ញៀវទេសចរផងដែរ។
អចលនទ្រព្យក្នុងក្រុងសៀមរាបនាពេលនេះ តំបន់ពាណិជ្ជកម្មមមាញឹក (ផ្សារកណ្តាល) មានតម្លៃពី ៣ ០០០-៤ ០០០ ដុល្លារក្នុង ១ ម៉ែត្រការ៉េ តំបន់លំនៅឋានក្បែរផ្សារកណ្តាលមានតម្លៃពី ៨០០-១ ៥០០ ដុល្លារ តំបន់តាមបណ្តោយផ្លូវជាតិលេខ ៦ មានតម្លៃ ៣០០-១ ៥០០ ដុល្លារ តំបន់លំនៅឋានក្នុងក្រុងតម្លៃពី ៣០០-៥០០ ដុល្លារ តំបន់ជាយក្រុងតម្លៃពី ៧០-១៥០ ដុល្លារ និងតំបន់ក្បែរក្រវាត់ក្រុងមានតម្លៃពី ១៥-២៥ ដុល្លារ។ នេះបើតាមលោក នួន រិទ្ធី៕ LA