ក្រុងបាងកកៈ តម្រូវការខុនដូពីសំណាក់ជនជាតិចិននៅតែរឹងមាំ ដោយសារខុនដូដែលមានទីតាំងនៅជិតគ្រឹះស្ថានអប់រំ និងសេវាវេជ្ជសាស្ដ្រទាក់ទាញអ្នកទិញថ្មីៗជាច្រើន។ នេះបើយោងតាមទីភ្នាក់ងារអចលនទ្រព្យក្នុងប្រទេស ថៃ។
លោក Thitiwat Teerakulthanyaroj ប្រធានអភិវឌ្ឍន៍ផ្នែកពាណិជ្ជកម្មប្រចាំក្រុមហ៊ុន Century 21 Thailand បានប្រាប់កាសែតបាងកកប៉ុស្តិ៍ថា ការអប់រំ និងការបង្កកំណើតកូនក្នុងកែវ (IVF) គឺជានិន្នាការចុងក្រោយបំផុតដែលជំរុញឲ្យជនជាតិចិនទៅទិញខុនដូនៅទីក្រុងបាងកក។
លោកថ្លែងថា៖ «ទីក្រុងបាងកកមានភាពពេញនិយមសម្រាប់ឪពុកម្ដាយជាជនជាតិចិន ដែលបញ្ជូនកូនរបស់ពួកគេមកសិក្សានៅទីនេះ»។ លោកបន្តថា៖ «អន្តេវាសិកដា្ឋន ដែលមានទីតាំងចម្ងាយ ១ គីឡូម៉ែត្រ នៃគ្រឹះស្ថានអប់រំ ជាកន្លែងដែលការសិក្សារបស់ជនជាតិចិនជាច្រើនអាចចុះកិច្ចព្រមព្រៀងជួលរយៈពេល ១០ ឆ្នាំ»។
លោក Thitiwat បញ្ជាក់ថា គ្រួសារមានប្រាក់ចំណូលមធ្យមចង់បញ្ជូនកូនៗរបស់ពួកគេមកសិក្សាក្នុងប្រទេស ថៃ ជំនួសឲ្យអឺរ៉ុប ដោយសារប្រទេសមានទីតាំងជិតជាង ការដាក់ពាក្យសុំទិដ្ឋាការងាយស្រួលជាង និងថ្លៃសិក្សាទាបជាង ខណៈរក្សាស្ដង់ដាល្អ»។
យោងតាមកាសែតបាងកកប៉ុស្តិ៍ បានឲ្យដឹងថា គ្រឹះស្ថានអប់រំថៃជាង ១០ បានធ្វើដៃគូជាមួយសមភាគីចិន ដែលជួយឲ្យនិស្សិតជនជាតិចិនកើនឡើងចំនួនច្រើន។
និស្សិតភាគច្រើន គឺមកពីខេត្តភាគខាងត្បូងដូចជា ខេត្តក្វាងស៊ី ខេត្តក្វាងទុង និងខេត្តយូណាន។ មានការធានាថា រកការងារឲ្យធ្វើបន្ទាប់ពីការរៀនចប់ និងមានប្រាក់ខែខ្ពស់ជាងនៅភាគខាងត្បូងប្រទេស ចិន។
យោងតាមកាសែត South China Morning Post និងគេហទំព័រ www.admissionpremium.com ជាគេហទំព័រព័ត៌មានចុះឈ្មោះចូលរៀនជាភាសាថៃ និងចិន ចំនួននិស្សិតជនជាតិចិនបានកើនឡើង ២ ដងពី ១ ម៉ឺននាក់ ដល់ប្រហែល ២ ម៉ឺននាក់ ក្នុងពេល ១ ទសវត្សរ៍កន្លងមក។
សាកលវិទ្យាល័យសាធារណៈក្នុងប្រទេស ចិន អាចទទួលនិសិ្សតបានតែពី ២ ទៅ ២,៥ លាននាក់ប៉ុណ្ណោះ ទោះបីជាប្រទេសនេះមានទារកកើតពី ៦ ទៅ ៧ លាននាក់ ក្នុង ១ ឆ្នាំក្តី។
លោក Thitiwat បានឲ្យដឹងថា ការបង្កកំណើតកូនក្នុងកែវក្នុងប្រទេស ថៃ កំពុងមានការទាក់ទាញកាន់តែខ្លាំងក្នុងចំណោមប្ដីប្រពន្ធជនជាតិចិន ដោយសារមានតម្លៃទាបជាងនៅអាមេរិក សិង្ហបុរី ម៉ាឡេស៊ី ឬនៅឥណ្ឌា។ អត្រាទទួលបានជោគជ័យមានកម្រិតខ្ពស់។
លោកមានប្រសាសន៍ថា៖ «មានប្ដីប្រពន្ធជនជាតិចិនជិត ១០០ លាននាក់ មានបំណងយកកូនទី២»។ លោកបន្ថែមថា៖ «ការចំណាយរបស់ពួកគេ គឺប្រហែល ៥០០ ០០០ បាត (ប្រហែល ១៥ ០០០ ដុល្លារ) ក្នុងគ្រួសារមួយ»។
អតិថិជនដែលជាវសេវាបង្កកំណើតកូនក្នុងកែវ ជាធម្មតានឹងចំណាយរយៈពេលពី ៣០ ទៅ ៤៥ ថ្ងៃសម្រាប់រយៈពេលមុន និងក្រោយពេលទទួលសេវា។ ពួកគេនឹងស្វែងរកយូនីតនៅជិតមន្ទីរពេទ្យ ឬមជ្ឈមណ្ឌលបង្កកំណើតកូនក្នុងកែវ ដើម្បីជួល ជាពិសេសនៅតំបន់ Ploenchit តំបន់ Sukhumvit និង Rama IX។
លោក Thitiwat លើកឡើងថា៖ «មានតម្រូវការថ្មីសម្រាប់ការជួលផ្ទះគ្រួសារតូច និងផ្ទះក្នុងក្រុង (townhouses) រយៈពេលវែងដែលយើងកំពុងស្ថិតក្នុងការចរចាជាមួយក្រុមវិនិយោគិន»។
គេហទំព័រអចលនទ្រព្យ Juwai.com របស់ចិន បានរាយការណ៍ កាលពីឆ្នាំមុនថា ប្រទេស ថៃ បានជាប់ចំណាត់ថ្នាក់ទី៤ ក្នុងចំណោមអ្នកទិញជាជនជាតិចិន និងក្រុមវិនិយោគិនជនជាតិចិន ដែលស្វែងរកឱកាសវិនិយោគនៅបរទេសដែលមានតម្លៃ ២,៣ ពាន់លានដុល្លារ៕ LA