The Phnom Penh Post Search

Search form

Logo of Phnom Penh Post newspaper Phnom Penh Post - អាផាតមិន​កាន់តែ​ច្រើន​លេច​ឡើង​នៅ​បឹងព្រលឹត




អាផាតមិន​កាន់តែ​ច្រើន​លេច​ឡើង​នៅ​បឹងព្រលឹត

អគារ​ការិយាល័យ Phnom Penh Tower ដែល​ស្ថិត​នៅក្នុង​តំបន់​បឹងព្រលឹត ។
អគារ​ការិយាល័យ Phnom Penh Tower ដែល​ស្ថិត​នៅក្នុង​តំបន់​បឹងព្រលឹត ។ ហុង មិនា

អាផាតមិន​កាន់តែ​ច្រើន​លេច​ឡើង​នៅ​បឹងព្រលឹត

ខណៈ​អចលនទ្រព្យ​នៅ​តំបន់​បឹងកេងកង​១ មាន​តម្លៃ​កាន់តែ​ថ្លៃ និង​ពិបាក​ស្វែងរក​ទីតាំង​ទំនេរ​នោះ បាន​ធ្វើឲ្យ​អ្នកវិនិយោគ​លើ​វិស័យ​អចលនទ្រព្យ និង​សំណង់​ជាច្រើន​ងាក​ទៅ​ចាប់​អារម្មណ៍​នៅ​តំបន់​បឹងព្រលឹត​វិញ​។

បច្ចុប្បន្ន​សង្កាត់​បឹងព្រលឹត​ត្រូវ​បាន​គេ​ដឹង​ថា ជា​តំបន់​មួយ​ដែល​មាន​សក្តានុពល​ខ្លាំង​សម្រាប់​ទីផ្សារ​អាផាតមិន ព្រោះ​ទី​នោះ​មាន​មនុស្ស​រស់នៅ​ច្រើន ស្ថានភាព​ដីខ្ពស់ នៅ​ចំ​ចំណុច​ប្រសព្វ​នៃ​មហាវិថី​ព្រះមុនីវង្ស និង​មហាវិថី​ព្រះសីហនុ ព្រមទាំង​នៅ​ជិត​ផ្សារ​អូឫស្សី ផ្សារអូឡាំពិក និង​ពហុកីឡដ្ឋាន​ជាតិ​អូឡាំពិក​ផង​ដែរ​។

លោក ច្រឹក សុខនីម អគ្គនាយក​ក្រុមហ៊ុន Century 21 VTrust បាន​និយាយ​ថា បឹងព្រលឹត បាន​ក្លាយ​ជា​កន្លែង​ដែល​មាន​សក្កានុពល​ខ្លាំង​លើ​ផ្នែក​អចលនទ្រព្យ​លំដាប់​ទី​ ២ នៅក្នុង​រាជធានី​ភ្នំពេញ​បន្ទាប់ពី​តំបន់​បឹងកេងកង​១ ខណៈ​ដី​នៅ​តំបន់​បឹងកេងកង​១ នា​ពេល​នេះ​អាច​មាន​តម្លៃ​រហូត​ដល់​ជាង ៧០០០ ​ដុល្លារ​ក្នុង ​១ ​ម៉ែត្រការ៉េ។ នៅ​តំបន់​បឹងព្រលឹត នា​ពេល​នេះ​មាន​សំណង់​អគារ​ខ្ពស់ៗ​ជាច្រើន​កំពុង​លេច​រូបរាង​ជា​បន្តបន្ទាប់ ពិសេស​សំណង់​អាផាតមិន​។

លោក​បាន​បន្ត​ថា មាន​អាផាតមិន​ជាច្រើន ត្រវ​បាន​សាងសង់​នៅ​ទី​នោះ ព្រោះ​ទីនោះ​នៅ​ជិត​តំបន់​បឹងកេងកង​១ ជា​តំបន់​មាន​អចលនទ្រព្យ​ថ្លៃ​ជាង​គេ​ក្នុង​រាជធានី​ភ្នំពេញ​។

លោក​បាន​ថ្លែង​ថា​៖ «​បឹងព្រលឹត​ជា​កន្លែង​ដែល​មាន​គម្រោង​សាងសង់​អាផាតមិន​ច្រើន ព្រោះ​មាន​អតិថិជន​ជាច្រើន​ចូលចិត្ត​ទៅ​ស្វែងរក​កន្លែង​ស្នាក់​នៅក្នុង​តំបន់​បឹងព្រលឹត ដោយសារ​តម្លៃ​ជួល​នៅ​ទីនោះ​ថោក​ជាង​នៅ​តំបន់​បឹងកេងកង​១ ហើយ​ទី​នោះ​មិន​លិច​ទឹក​ទេ​។ ជាក់ស្តែង​អាផាតមិន​ជួល​របស់​ក្រុមហ៊ុន វីត្រាស់ ដែល​មាន​ទីតាំង​នៅក្នុង​សង្កាត់​បឹងព្រលឹត​មាន​អត្រា​ប្រើប្រាស់​រហូត​ដល់​៩៥​ភាគរយ​»។

អគ្គនាយក​ក្រុមហ៊ុន​ខាងលើ​បាន​ប្រាប់​ទៀត​ថា បច្ចុប្បន្ន​នេះ​ដី​នៅ​តំបន់​បឹងព្រលឹត​មាន​តម្លៃ​ចាប់ពី​ជាង​ ២ ០០០ ​រហូត​ដល់​ជិត​ ៤ ០០០ ​ដុល្លារ​ក្នុង ​១ ​ម៉ែត្រការ៉េ​។

លោក​បាន​លើក​ឡើង​ថា៖​«​ចាប់​តាំងពី​ដើម​ខែ​ធ្នូ ឆ្នាំ​២០១៤ មក​ម្ចាស់​អចលនទ្រព្យ​នៅ​តំបន់​បឹងព្រលឹត​ចាប់ផ្តើម​ដំឡើង​តម្លៃ​អចលនទ្រព្យ​របស់​គេ​យ៉ាងច្រើន ដោយ​កន្លែង​ខ្លះ​បាន​ដំឡើង​ថ្លៃ​រហូត​ដល់​ ៤០​ ភាគរយ​»។

លោក ឌឹត ចណ្ណា ប្រធាន​គ្រប់គ្រង​ទូទៅ​ក្រុមហ៊ុន​អចលនទ្រព្យ វីអឹមស៊ី បាន​ថ្លែង​ថា ដី​នៅ​សង្កាត់​បឹងព្រលឹត ពិតជា​មាន​សក្តានុពល ព្រោះ​វា​ស្ថិត​នៅ​ចំ​កណ្តាល​រាជធានី​ ភ្នំពេញ ព្រមទាំង​មាន​ប្រព័ន្ធ​ហេដ្ឋារចនាសម្ព័ន្ធ​ខ្វាត់ខ្វែង​ទៀត​ផង។

ស្ថានភាព​ដី​ទី​នោះ​មាន​កម្ពស់​ខ្ពស់​មិន​សូវ​មាន​បញ្ហា​ទឹកលិច​ទេ ជាពិសេស​នៅ​ទី​នោះ​មាន​ទីតាំង​នៅ​ជិត​ផ្សារ​ធំៗ​ចំនួន ២ គឺ​ផ្សារអូរឫស្សី និង​ផ្សារ​អូឡាំពិក។

លោក​ប្រាប់​ទៀត​ថា ដី​នៅ​តំបន់​ខាង​ក្នុង​សង្កាត់​បឹងព្រលឹត អាច​មាន​តម្លៃ​ចាប់ពី ២០០០-៣០០០ ដុល្លារ​ក្នុង ១ ម៉ែត្រការ៉េ។

លោក​អះអាង​ថា៖ «ដី និង​អចលនទ្រព្យ​នៅ​បឹងព្រលឹត នា​ពេល​នេះ​មាន​តម្លៃ​មិន​ចាញ់​តំបន់​បឹងកេងកង​១​ទេ បើ​ទោះបី​ជា​នៅ​ទី​នោះ​គេ​ពិបាក​រក​ដី​ដែល​មាន​ទំហំ​ធំ​ក៏ដោយ»។ លោក​បន្ត​ថា៖ «នា​ពេល​ខាង​មុខ​ឆាប់ៗ​នេះ​ខ្ញុំ​គិតថា អចលនទ្រព្យ​នៅ​សង្កាត់​បឹងព្រលឹត នឹង​មាន​ភាព​ទាក់ទាញ​កាន់តែ​ខ្លាំង​»។

របាយការណ៍​សិក្សា​តម្លៃ​ទីផ្សារ​អចលនទ្រព្យ​នៅក្នុង​រាជធានី​ភ្នំពេញ​របស់​ក្រុម ស៊ីអិល រៀលធី ដែល​ទើប​បាន​ចេញ​ផ្សាយ​កាលពី​ពេល​ថ្មីៗ​នេះ​បាន​បង្ហាញ​ថា ដី​នៅក្នុង​សង្កាត់​បឹងព្រលឹត តាម​មណ្តោយ​ផ្លូវ​ធំ​មាន​តម្លៃ​ចន្លោះ​ពី ​៣៦០០-៤៦០០​ ដុល្លារ​ក្នុង​ ១​ម៉ែត្រការ៉េ ខណៈ​តាម​ផ្លូវ​តូច​មាន​តម្លៃ​ចន្លោះ​ពី​២៥០០-៣៥០០​ដុល្លារ​៕

អត្ថបទគួរចាប់អារម្មណ៍