ក្រុងប៉េកាំងៈ អាយុជាមធ្យមរបស់អ្នកទិញផ្ទះជនជាតិចិនក្នុងឆ្នាំ ២០១៨ គឺ ២៩,៥ ឆ្នាំដែលជាអាយុមធ្យមក្មេងជាងប្រទេសដទៃទៀតនៅក្នុងពិភពលោក។ នេះបើយោងតាមរបាយការណ៍ថ្មីមួយស្តីពីការសិក្សាស្រាវជ្រាវពីអ្នកទិញផ្ទះជនជាតិចិនក្នុងឆ្នាំ ២០១៨។
របាយការណ៍ដែលចេញដោយគេហទំព័រ research.ke.com របស់វិទ្យាស្ថានស្រាវជ្រាវដែលផ្តោតលើឧស្សាហកម្មអចលនទ្រព្យបានបង្ហាញថា ផ្ទៃក្រឡាអចលនទ្រព្យជាមធ្យមក្នុងមនុស្សម្នាក់នៃអចលនទ្រព្យដែលទិញក្នុងឆ្នាំ ២០១៨ មានទំហំ ២៧,៨ ម៉ែត្រការ៉េ ខណៈដែល ២៤,៣ ភាគរយនៃអចលនទ្រព្យដែលបានទិញមានផ្ទៃក្រឡាតិចជាង ២០ ម៉ែត្រការ៉េ។
របាយការណ៍នេះបានបន្តថា បើធៀបជាមួយក្រុមអាយុដទៃៗ មនុស្សដែលកើតក្នុងទសវត្សរ៍ ៨០ ដែលមានកូនអាយុចូលរៀនថ្នាក់បឋមសិក្សា កាន់កាប់ផ្ទៃក្រឡាអចលនទ្រព្យតិចជាងនេះ ពោលគឺមានផ្ទៃក្រឡាជាមធ្យមក្នុងមនុស្សម្នាក់ ២៧ ម៉ែត្រការ៉េ។
របាយការណ៍នេះបានឲ្យដឹងថា ឧស្សាហកម្មអចលនទ្រព្យចិនបានមើលឃើញកំណើនលក់ផ្ទះមួយទឹក ដោយផ្ទះដែលមានបន្ទប់ដេក ២ មានប្រជាប្រិយបំផុតក្នុងទីផ្សារលក់ផ្ទះមួយទឹក។
របាយការណ៍នេះបន្តថា៖ «៩០ ភាគរយនៃអ្នកទិញផ្ទះលើកដំបូង បានប្រើប្រាស់កម្ចីដើម្បីបង់ថ្លៃផ្ទះក្នុងឆ្នាំ ២០១៨ ដែលជាសមាមាត្រខ្ពស់បំផុតក្នុងចំណោមរាល់អតិថិជនគ្រប់ក្រុមអាយុទាំងអស់»។
ការបង់ប្រាក់ប្រចាំខែរបស់អ្នកទិញផ្ទះលើកដំបូងក្នុងឆ្នាំ ២០១៨ មានជាមធ្យម ៤២,៩ ភាគរយនៃចំណូលរបស់ពួកគេ ខណៈដែលសម្រាប់មនុស្សភាគច្រើន ការបង់សងប្រចាំខែមានជាង ៥០ ភាគរយនៃប្រាក់ខែរបស់ពួកគេ។
របាយការណ៍នេះបានបង្ហាញថា ដោយសារភាគច្រើននៃអ្នកទិញផ្ទះលើកដំបូងគឺជាអ្នកដែលកើតក្រោយទសវត្សរ៍ឆ្នាំ ១៩៨០ និង ១៩៩០ ពួកគេជាច្រើនប្រឈមមុខនឹងសម្ពាធកាន់តែខ្ពស់ទាក់ទងនឹងការបង់ប្រាក់សង ដោយភាគរយជាមធ្យមនៃចំណូលដែលចំណាយលើការបង់សងថ្លៃផ្ទះដោយអ្នកទិញដែលកើតក្នុងទសវត្សរ៍ទាំង ២ នេះ មាន ៤០,៨ ភាគរយ និង ៤៣,៥ ភាគរយរៀងគ្នា។
ជាងនេះទៀត អនុបាតជាមធ្យមរវាងប្រាកចំណូល និងការបង់ប្រាក់សម្រាប់អ្នកទិញផ្ទះនៅក្នុងទីក្រុងលំដាប់ទី៣ និងទី៤ ក្នុងប្រទេស ចិន មាន ៤២,៤ ភាគរយ ពោលគឺខ្ពស់ខ្លាំងជាងអ្នកទិញផ្ទះនៅក្នុងទីក្រុងលំដាប់ខ្ពស់ជាងនេះ។
ស្ថិតក្រោមបទប្បញ្ញត្តិ និងការគ្រប់គ្រងជាប់ជានិច្ចរបស់ចិនទៅលើឧស្សាហកម្មអចលនទ្រព្យ ទីផ្សារនេះមានការ ផ្លាស់ប្តូរដ៏ធំក្នុងឆ្នាំ ២០១៨។
យោងតាមលោក Xu Xiaole ប្រធានអ្នកវិភាគប្រចាំគេហទំព័រ research.ke.com ឲ្យដឹងថា អតុល្យភាពជាក់ស្តែងកើតមានយ៉ាងច្បាស់ក្នុងទីផ្សារអចលនទ្រព្យចិន ដែលនឹងបន្តជាការផ្តោតជាចម្បងសម្រាប់កំណែទម្រង់គោលនយោបាយលំនៅឋានចិន៕ People''s Daily/PS