.jpg)
សកម្មភាពក្រុមកម្មករកំពុងរៀបចំដាក់ពុម្ភ មុនពេលចាប់ផ្តើមចាក់បេតុងក្នុងការដ្ឋានមួយកន្លែង នាទីក្រុងរីយ៉ាដ ប្រទេសអារ៉ាប៊ីសាអូ៊ឌីត កាលពីពេលថ្មីៗនេះ។ រូបថត AFP
ក្រុងរីយ៉ាដៈ ប្រទេស អារ៉ាប៊ី សាអ៊ូឌីត កំពុងបង្កើតផែនការកសាងទីក្រុងដ៏ធំបំផុតនៅពេលអនាគតជាមួយនឹងការសន្យាអំពីមនុស្សយន្តចេះនិយាយ និងតាក់ស៊ីអាកាស ប៉ុន្តែសម្រាប់មនុស្សជាច្រើនសែននាក់ រួមទាំងលោកសាស្ដ្រាចារ្យ Abdullah វាគ្រាន់តែជាក្ដីសុបិនមួយដែលពិបាកយល់តែប៉ុណ្ណោះ។
លំនៅឋាន គឺជារឿងមួយដែលមិនសប្បាយចិត្តរបស់សាធារណជននៅក្នុងប្រទេសមួយនេះ។
អស់រយៈពេលជាច្រើនទសវត្សរ៍មកហើយប្រទេសនាំចេញប្រេងមួយនេះបានផ្ដល់កម្ចីទិញផ្ទះដល់ប្រជាជនខ្លួនដោយមិនគិតការប្រាក់។
ប៉ុន្តែពេលនេះប្រទេស អារ៉ាប៊ី សាអ៊ូឌីត កំពុងជំរុញការផ្ដល់កម្ចីទិញផ្ទះនៅក្នុងការផ្លាស់ប្តូរគោលនយោបាយដែលមានភាពចម្រូងចម្រាស និងកំពុងធ្វើការរឹតបន្តឹងចំពោះប្រជាជនដែលមានប្រាក់ចំណូលមធ្យម តាមរយៈការកាត់បន្ថយជាបណ្ដើរៗនូវការធានារបស់រដ្ឋចំពោះប្រជាពលរដ្ឋទាក់ទងនឹងបញ្ហាសុខុមាលភាព ខណៈដែលតម្លៃប្រេងធ្លាក់ចុះទាប។
សម្រាប់មនុស្សជាច្រើនដូចជាលោក Abdullah ដែលជាឪពុកមានវ័យ ៣៩ ឆ្នាំ និងមានកូន ៣ នាក់ កំពុងរស់នៅក្នុងអាផាតមិនជួលមួយកន្លែងក្នុងទីក្រុងរីយ៉ាដ បញ្ហានេះបានពន្យារក្ដីសុបិននៃការសាងសង់ផ្ទះផ្ទាល់ខ្លួនរបស់លោក នៅជាយទីក្រុងនេះ។
បន្ទាប់ពីរយៈពេលជាង ១ ទសវត្សរ៍ នៅលើបញ្ជីរង់ចាំសម្រាប់កម្ចីមិនគិតការប្រាក់ពីមូលនិធិអភិវឌ្ឍន៍អចលនទ្រព្យរបស់ប្រទេស អារ៉ាប៊ី សាអ៊ូឌីត លោក Abdullah ឲ្យដឹងថា មូលនិធិនេះបានបញ្ជូនឈ្មោះគាត់ទៅធនាគារពាណិជ្ជដើម្បីទទួលយកកម្ចីទិញផ្ទះតម្លៃ ៤៤៥ ០០០ រីយ៉ាល់ស៍ (១១៩ ០០០ ដុល្លារ)។
លោកបានប្រើប្រាក់នេះដើម្បីចាប់ផ្ដើមការសាងសង់ផ្ទះនៅដីឡូត៍មួយមានតម្លៃ ៣៥០ ០០០ រីយ៉ាល់ស៍ ដែលលោកបានយកកម្ចីពីធនាគារដាច់ដោយឡែកមួយផ្សេងទៀត ប៉ុន្តែការសាងសង់ត្រូវបញ្ឈប់កាលពីខែឧសភា បន្ទាប់ពីលោកអស់ប្រាក់។
បង្កើតឡើងកាលពីឆ្នាំ ១៩៧៤ មូលនិធិនេះ គឺជាស្ថាប័នរដ្ឋ ដែលមានទំនាក់ទំនងជាមួយក្រសួងលំនៅឋាន និងគ្របដណ្ដប់ប្រហែល ១ ភាគ ៤ នៃការទូទាត់កម្ចីទិញផ្ទះប្រចាំខែរបស់លោក Abdullah។
លោក Abdullah ឲ្យដឹងថា លោកនៅតែជម្នះក្នុងការសងកម្ចីទាំង ២ ដែលប្រើប្រាស់ប្រហែលពាក់កណ្ដាលនៃប្រាក់ចំណូលប្រចាំខែរបស់លោកចំនួន ២០ ០០០ រីយ៉ាល់ស៍ (៥ ៣០០ ដុល្លារ) ចំពេលការកើនឡើងការចំណាយលើការរស់នៅ។
លោកបានប្រាប់ទីភ្នាក់ងារព័ត៌មាន AFP នៅក្រៅផ្ទះដែលបញ្ចប់ការសាងសង់ត្រឹមពាក់កណ្ដាលរបស់លោកថា៖ «ប្រព័ន្ធកម្ចីទិញផ្ទះនឹងបំផ្លាញប្រជាជនមានប្រាក់ចំណូលមធ្យម វានឹងធ្វើឲ្យយើងស្លាប់»។
ភាពតានតឹងទ្វេដង
សម្ពាធនេះត្រូវបានគេគិតថារឹតតែខ្លាំង ដោយលោក Majid ដែលជាបុគ្គលិករដ្ឋាភិបាលអាយុ ៤១ ឆ្នាំ ដែលរកប្រាក់បានច្រើនជាងបន្តិចបើធៀបនឹងប្រាក់ចំណូលប្រចាំខែ។ ប្រាប់ចំណូលរបស់លោកមានប្រមាណ ១៤ ៨២០ រីយ៉ាល់ស៍ (៣ ៩៥០ ដុល្លារ)។
ប្រជាពលរដ្ឋដែលមានប្រាក់ចំណូលមធ្យមទាបបែបនោះ កំពុងជួបការពិបាករួចទៅហើយ ដោយសារតែរដ្ឋាភិបាលកាត់បន្ថយការឧបត្ថម្ភធន ការកើនឡើងថ្ងៃទឹក អគ្គិសនី តម្លៃប្រេងសាំង និងការហូតពន្ធបន្ថែម (VAT) ៥ ភាគរយ។
លោក Majid ដែលស្ថិតនៅក្នុងចំណោមប្រជាជនប្រហែល ៥០០ ០០០ នាក់ បានឲ្យដឹងថា ឈ្មោះរបស់លោកនៅលើបញ្ជីរង់ចាំរបស់មូលនិធិនេះ សម្រាប់កម្ចីដែលមិនគិតការប្រាក់ ជាមួយនឹងការសម្រេចចិត្តចុងក្រោយដែលរំពឹងត្រឹមឆ្នាំ ២០២០។
មូលនិធិនេះ និងក្រសួងលំនៅឋាន មិនបានឆ្លើយតបនឹងការស្នើសុំរបស់ AFP សម្រាប់ផ្តល់ព័ត៌មាននោះទេ។
លោក Najah al-Otaibi អ្នកជំនាញរបស់ប្រទេស អារ៉ាប៊ី សាអ៊ូឌីត បានប្រាប់ AFP ថា៖ «គន្លឹះសំខាន់ក្នុងការដោះស្រាយវិបត្តិលំនៅឋាននៅប្រទេស អារ៉ប៊ី សាអ៊ូឌីត គឺត្រូវលើកទឹកចិត្តដល់ការផ្ដល់មូលនិធិរបស់វិស័យឯកជន និងកាត់បន្ថយការពឹងផ្អែករយៈពេលយូរលើការឧបត្ថម្ភធនរបស់រដ្ឋាភិបាល»។
ប៉ុន្តែទាំងអស់នេះ គឺជាវិបត្តិចំពោះប្រជាជនអារ៉ាប៊ីសាអ៊ូឌីត ដែលរស់នៅជាច្រើនទសវត្សរ៍មកហើយចំពោះកម្ចីការប្រាក់ទាប និងការរស់នៅដោយមិនមានការបង់ពន្ធ។
នេះជាការបង្ហាញពីបញ្ហាប្រឈមរបស់ប្រទេសផលិតប្រេងមួយនេះ ក្នុងការកាត់ផ្ដាច់ប្រជាពលរដ្ឋរបស់ខ្លួនពីការឧបត្ថម្ភធនពីសំណាក់រដ្ឋាភិបាល ចំពេលមានឱនភាពសារពើពន្ធដែលព្យាករថា នឹងកើនឡើងដល់ ៣៥ ពាន់លានដុល្លារ ក្នុងឆ្នាំ ២០១៩ ឬ ៤,២ ភាគរយ នៃផលិតផលក្នុងស្រុកសរុប (GDP)។
លោកស្រី Karen Young មកពីវិទ្យាស្ថានសហគ្រាសអាមេរិក បានប្រាប់ AFP ថា៖ «ក្នុងប្រទេស អារ៉ាប៊ី សាអ៊ូឌីត ពេលនេះមានភាពតានតឹងទ្វេដង គឺទី១ ការផ្ដល់លំនៅឋានតម្លៃទាបសម្រាប់យុវជនវ័យក្មេង ដែលមិនសូវមានប្រាក់ ដោយសារការចំណាយលើការរស់នៅកាន់តែខ្ពស់ ស្របពេលមានការកាត់បន្ថយការឧបត្ថម្ភធន និងភាពគ្មានការងារធ្វើ និងទី២ គឺត្រូវពង្រីកសេវាហិរញ្ញវត្ថុ ដើម្បីបង្កើនឥណទាន»។
ប្រទេសនាំចេញប្រេងឈានមុខគេរបស់ពិភពលោកមួយនេះ បានឲ្យដឹងថា ខ្លួនកំពុងស្វែងរកដៃគូឯកជនក្នុងការចំណាយរាប់ពាន់លានដុល្លារ ដើម្បីសង់លំនៅឋានតម្លៃទាបប្រហែល ១,៥ លានខ្នង នៅក្នុងរយៈពេលជាច្រើនឆ្នាំខាងមុខ៕ AFP/LA
