The Phnom Penh Post Search

Search form




Logo of Phnom Penh Post newspaper Phnom Penh Post - អ័រគីដេ វីឡា ចាប់ផ្តើម​គម្រោង​ទី​២ លើ​ផ្ទៃដី​ជាង​៣៦​ហិកតា

អ័រគីដេ វីឡា ចាប់ផ្តើម​គម្រោង​ទី​២ លើ​ផ្ទៃដី​ជាង​៣៦​ហិកតា

សកម្មភាព​គ្រឿងចក្រ​កំពុង​បុក​គ្រឹះ​សាងសង់​គម្រោង​អភិវឌ្ឍន៍​លំនៅឋាន​របស់​ក្រុមហ៊ុន អ័រគីដេ វីឡា ។
សកម្មភាព​គ្រឿងចក្រ​កំពុង​បុក​គ្រឹះ​សាងសង់​គម្រោង​អភិវឌ្ឍន៍​លំនៅឋាន​របស់​ក្រុមហ៊ុន អ័រគីដេ វីឡា ។ ហឹុន ពិសី

អ័រគីដេ វីឡា ចាប់ផ្តើម​គម្រោង​ទី​២ លើ​ផ្ទៃដី​ជាង​៣៦​ហិកតា

ដោយ​មើល​ឃើញ​អំពី​សន្ទុះ​នៃ​វិស័យ​អចលនទ្រព្យ ក្រុមហ៊ុន​អភិវឌ្ឍន៍​លំនៅឋាន​អ័រគីដេ វីឡា កាលពី​ពេល​ថ្មីៗ​នេះ​បាន​ចាប់ផ្តើម​អភិវឌ្ឍន៍​គម្រោង​ទី​២​របស់​ខ្លួន​ជា​បន្ត​ទៀត​ហើយ ក្រោម​ទឹកប្រាក់​វិនិយោគ​ជាច្រើន​រយ​លាន​ដុល្លារ​អាមេរិក​ដើម្បី​អភិវឌ្ឍ​ផ្ទះ វីឡា និង​ខុនដូ ដែល​មាន​រហូត​ដល់​ជាង ​១០០០ ​យូនីត​។

កាលពី​ដើម​ខែ​មករា​នេះ​ក្រុមហ៊ុន​អ័រគីដេ វីឡា បាន​បើក​សម្ពោធ​ដាក់​ឲ្យ​ដំណើរការ​ជា​ផ្លូវការ​នូវ​គម្រោង​ទី​២​របស់​ខ្លួន​មួយ​ដែល​មាន​ឈ្មោះ​ថា The Royal។

នាយិកា​ប្រតិបត្តិ​នៃ​ក្រុមហ៊ុន អ័រគីដេវីឡា លោកស្រី ខៀវ សស៊ីលៀប បាន​និយាយ​ថា គម្រោង​អភិវឌ្ឍន៍​លំនៅឋាន​ដ៏ប្រណីត​មួយ​នេះ​ត្រូវ​បាន​ប្រសិទ្ធនាម​ថា​«ជីវិត​រស់នៅ​ដ៏ប្រណីត»​។

លោកស្រី​បន្ត​ថា គម្រោង The Royal មាន​បី​ផ្នែក​ដែល​មាន​ប្រភេទ​ផ្សេងៗ​គ្នា ផ្នែក​ទី​១​មាន​លក្ខណៈ​ជា​ផ្ទះ​អាជីវកម្ម ដែល​បង្ក​លក្ខណៈ​ងាយស្រួល​ដល់​ការ​ប្រកប​អាជីវកម្ម និង​ការ​រស់នៅ ផ្នែក​ទី​២​ខុនដូ​ដែល​មាន​ចំនួន​៦​អគារ និង​មាន​បន្ទប់​សរុប​ជាង​ ១ ០០០ ​យូនីត មាន​បំពាក់​គ្រឿង​បរិក្ខារ​ទំនើបៗ កន្លែង​ហាត់ប្រាណ និង​មាន​សេវាកម្ម​ដ៏សម្បូរ​បែប​ដូចជា ផ្សារទំនើប តំបន់​កម្សាន្ត ហាង​លក់​ទំនិញ ហាង​លក់​ម្ហូបអាហារ និង​ភេសជ្ជៈ ព្រមទាំង​មាន​កន្លែង​ចត​រថយន្ត​ធំ​ទូលាយ​ទៀត​ផង។ រីឯ ​ផ្នែក​ធំ​ទី​៣ ជា​តំបន់​សហគមន៍​លំនៅឋាន​ឯកជន ដែល​មាន​ចែកចេញ​ជា​៤ ប្រភេទ​ផ្សេងៗ​គ្នា​រួមមាន King Orchid, Queen Orchid, Orchid Twin និង Orchid Link​។

លោកស្រី សស៊ីលៀប មាន​ប្រសាសន៍​ថា​៖​«​ទាំងនោះ​គឺជា​អ្វី​ដែល​អតិថិជន​ប្រាថ្នា​ចង់​បាន​ដូចជា ការ​រស់នៅ​មាន​លក្ខណៈ​ឯកជន មាន​ភាព​ស្ងៀមស្ងាត់ ប្រកប​ដោយ​ភាព​សប្បាយ​រីករាយ មាន​សុវត្ថិភាព សុភមង្គល និង​គ្មាន​ក្តីបារម្ភ​បញ្ហា​សន្តិសុខ»។

លោកស្រី​បន្ត​ថា​៖​«​គម្រោង​អ័រគីដេវីឡា​ជំហាន​ទី​១ លក់​ផ្ទះ​អស់​ជាង​៩០​ភាគរយ​ហើយ​រហូត​មក​ទល់​ពេល​នេះ ដោយសារ​តែ​បទដ្ឋាន​សំណង់​ប្រកប​ដោយ​គុណភាព និង​ការ​រចនា​ម៉ូដ​ផ្ទះ​ពោរពេញ​ដោយ​ភាព​ទាក់ទាញ​»។

នាយិកាប្រតិបត្តិ​នៃ​ក្រុមហ៊ុន​ខាងលើ បាន​ប្រាប់​ទៀត​ថា ការ​ពង្រីក​គម្រោង​អ័រគីដេវីឡា គឺជា​យុទ្ធសាស្រ្ត​អភិវឌ្ឍន៍​របស់​ក្រុមហ៊ុន​ដើម្បី​ធ្វើ​យ៉ាង​ណា​ឲ្យ​គម្រោង​របស់​ក្រុមហ៊ុន​អ័រគីដេ វីឡា ឈាន​មុខ​គេ​ក្នុង​ការ​អភិវឌ្ឍ​អចលនទ្រព្យ​បែប​ប្រណីត​នៅ​ក្រុង​ភ្នំពេញ។

ប្រធាន​ក្រុមហ៊ុន​អចលនទ្រព្យ ខ្មែរ លោក គីម ហ៊ាង បាន​ថ្លែង​ថា គម្រោង​អភិវឌ្ឍន៍​លំនៅឋាន​របស់​ក្រុមហ៊ុន​អ័រគីដេ វីឡា គឺជា​គម្រោង​ដ៏ធំ​ដែល​មាន​ផ្ទៃដី​ប្រមាណ​ ៣៦ ​ហិកតា ស្ថិត​តាម​បណ្តោយ​ផ្លូវ​លេខ​ ២០០៤ រាជធានី​ភ្នំពេញ។ វា​ជា​គម្រោង​អភិវឌ្ឍន៍​ដែល​មាន​បន្ទប់​ស្នាក់នៅ​ក្នុង​ខុនដូ រហូត​ដល់​ជាង​ ១០០០ ​យូនីត និង​មាន​ផ្ទះវីឡា ឧទ្យាន​កម្សាន្ត និង​ផ្សារទំនើប​។ បើ​គម្រោង​នេះ​ទទួល​ជោគជ័យ​វា​នឹង​ជួយ​លើក​កម្ពស់​មុខមាត់​រាជធានី​ភ្នំពេញ​បន្ថែម​ទៀត​។ បើ​តាម​ការ​គិត​របស់​លោក​វា​គ្មាន​រឿង​អ្វី​ថា​មិន​ជោគជ័យ​នោះ​ទេ។

លោក​បាន​បន្ត​ថា The Royal ជា​គម្រោង​អភិវឌ្ឍន៍​រយៈពេល​វែង ព្រោះ​គម្រោង​នេះ​ធំ​ដែល​ចំណាយ​ពេល​សាងសង់​យ៉ាង​ហោច​ណាស់​ ៧ ​ឆ្នាំ​ទើប​ចប់​ប្រសិន បើ​អ្វីៗ​ដំណើរការ​ទៅ​ដោយ​រលូន។

លោក​អះអាង​ថា​៖​«​គម្រោង​នេះ​នឹង​ដំណើរការ​ទៅ​មុខ​ដោយ​រលូន ព្រោះ​ម្ចាស់​គម្រោង​នេះ​មាន​លុយ​ច្រើន មាន​កេរ្តិ៍ឈ្មោះ​ល្អ ដែល​ធ្វើឲ្យ​អតិថិជន​មាន​ទំនុកចិត្ត​ខ្ពស់»។

លោក ម៉ៅ ប៉ូលីន អគ្គនាយក​ក្រុមហ៊ុន Great Home Real Estate បាន​និយាយ​ថា សម្រាប់​ទីតាំង​បុរីអ័រគីដេ មិន​មាន​បញ្ហា​អ្វី​ឡើយ ប៉ុន្តែ​ អតិថិជន​ដែល​ទិញ​លំនៅឋាន​នៅក្នុង​បុរី​នេះ​អាច​មាន​ការ​ព្រួយ​បារម្ភ​ខ្លះ​អំពី​ការ​លិចទឹក​នៅពេល​មាន​ភ្លៀង​ធំៗ​។ ប្រសិន​បើ​រដ្ឋាភិបាល និង​ក្រុមហ៊ុន​ដែល​យក​លុយ​ពី​ផ្លូវ​នេះ ព្រមទាំង​អ្នក​អភិវឌ្ឍន៍​បុរី​អ័រគីដេ វីឡា រៀបចំ​ប្រព័ន្ធ​ហេដ្ឋារចនាសម្ព័ន្ធ​បាន​ល្អ​ដើម្បី​បញ្ចៀស​ការ​លិចលង់​នោះ ការ​លក់​ផ្ទះ​ក្នុង​បុរី​នេះ​នឹង​ទទួល​ជោគជ័យ​ជា​មិន​ខាន​។

លោក​បន្ត​ថា បើ​និយាយ​ពី​ទីផ្សារ គឺ​មាន​ទីផ្សារ​ក្នុង​ស្រុក និង​ទីផ្សារ​ក្រៅ​ស្រុក ដូច្នេះ​ប្រសិន​បើ​អ្នក​អភិវឌ្ឍន៍​សាងសង់​ខុនដូ​សម្រាប់​ទីផ្សារ​ក្នុង​ស្រុក និង​លក់​ក្នុង​តម្លៃ​សមរម្យ​វា​អាច​ទៅ​មុខ​បាន ប៉ុន្តែ​ បើ​ផ្តោត​លើ​ទីផ្សារ​ក្រៅ​ស្រុក​វា​ហាក់​លំបាក​ក្នុង​ការ​លក់​បន្តិច។ ការ​ផ្តោត​លើ​ទីផ្សារ​ក្នុង​ស្រុក និង​ដាក់​តម្លៃ​លក់​សមរម្យ​ពិតជា​ជោគជ័យ ព្រោះ​បច្ចុប្បន្ន​នេះ​ដី​នៅ​តំបន់​នោះ​មាន​តម្លៃ​ចន្លោះ​ពី​ ៨០០ ​ទៅ ​១០០០ ​ដុល្លារ​អាមេរិក​ប៉ុណ្ណោះ​ក្នុង​មួយ​ម៉ែត្រ​ការ៉េ។

អភិបាល​រាជធានី​ភ្នំពេញ លោក ប៉ា សុជាតិវង្ស កាលពី​ពេល​ថ្មី​ៗ​នេះ​ធ្លាប់​មាន​ប្រសាសន៍​ថា គិត​ត្រឹម​ឆ្នាំ​ ២០១៤ សំណង់​បុរី​នៅក្នុង​រាជធានី​ភ្នំពេញ​មាន​ចំនួន​ ៧៤​ កន្លែង និង​មាន​គម្រោង​សាងសង់​ផ្សេង​ទៀត​សរុប​ចំនួន​ ៣៧៦ គម្រោង​ដែល​មាន​តម្លៃ​ជាង​ ១​ ពាន់​លាន​ដុល្លារ​នៅលើ​ផ្ទៃដី​ទំហំ​ជាង​ ៣​ លាន​ម៉ែត្រការ៉េ​៕

អត្ថបទគួរចាប់អារម្មណ៍