ក្រុងហុងកុងៈ តម្រូវការខ្ពស់ និងតម្លៃថ្លៃខ្លាំងបំផុតមិនធ្លាប់មានសម្រាប់អាផាតមិននៃខុនដូរបស់ក្រុមហ៊ុន Sun Hung Kai Properties ក្នុងទីក្រុងហុងកុង កាលពីខែមិថុនាបានបង្ហាញថា ទីផ្សារអចលនទ្រព្យនៅមិនទាន់ថយចុះនៅឡើយទេ បន្ទាប់ពីមេដឹកនាំទីក្រុងហុងកុងបានដាក់ចេញការយកពន្ធលើអាផាតមិនដែលទំនេរ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Bloomberg។
ទីភ្នាក់ងារព័ត៌មាន Bloomberg បានរាយការណ៍ថា ក្រុមហ៊ុនអភិវឌ្ឍន៍លំនៅឋានមួយនេះបានលក់ផ្ទះល្វែងអាផាតមិនបានចំនួន ៤៤ យូនីតក្នុងចំណោម ៤៥ យូនីតនៅតំបន់ North Point កាលពីខែមុនដែលមានអាផាតមិនប្រភេទផ្សេងៗរាប់ចាប់ពីប្រភេទអាផាតមិនស្ទូឌីយោរហូតដល់អាផាតមិន ២ បន្ទប់។
តម្លៃមានចាប់ពី ១០,២៥ លានដុល្លារហុងកុង (១,៣ លានដុល្លារអាមេរិក) ដល់ ២១,៨៧ លានដុល្លារហុងកុងដោយផ្អែកលើការចុះភាគរយអតិបរមាដែលត្រូវបានផ្តល់ជូនទៅឲ្យអតិថិជន។
វិធានការដកហូតពន្ធលើអាផាតមិនដែលទំនេរដែលស្នើដោយលោក Carrie Lam ប្រធានមន្ត្រីប្រតិបត្តិទីក្រុងហុងកុងកាលពីខែមុនគឺជាការប៉ុនប៉ងមួយផ្សេងទៀតដើម្បីបន្ធូរបន្ថយកំណើនទីផ្សារអចលនទ្រព្យនៅទីក្រុងនេះដែលបានកើនឡើងជាង ៥០ ភាគរយក្នុងរយៈពេល ៥ ឆ្នាំចុងក្រោយនេះដែលបន្ថែមហានិភ័យនៃការផ្ទុះភ្លាមៗរបស់វិស័យនេះ។
ទីភ្នាក់ងារព័ត៌មាន Bloomberg បានរាយការណ៍បន្តថា ការលក់អាផាតមិននៅតំបន់ North Point បង្ហាញបញ្ហាប្រឈមដោយសារតម្លៃសម្រាប់អាផាតមិនស្ទូឌីយោដែលមានទំហំ ២៨៦ ហ្វីតការ៉េ (២៦,៥៧ ម៉ែត្រការ៉េ) លក់ក្នុងតម្លៃ ១០,២៥ លានដុល្លារហុងកុងដែលជាតម្លៃខ្ពស់បំផុតមួយសម្រាប់តំបន់នេះ។ នេះបើយោងតាមក្រុមហ៊ុន Midland Realty Services។
មិនត្រឹមតែប៉ុណ្ណោះក្រុមហ៊ុន Sun Hung Kai Properties បានដំឡើងតម្លៃសម្រាប់អាផាតមិនបន្ទាប់ចំនួន ៣៦ ដែលនឹងត្រូវដំឡើងតម្លៃជាមធ្យម ១០ ភាគរយថែមទៀតផង។
លោក Louis Chan អនុប្រធានប្រចាំតំបន់អាស៊ីប៉ាស៊ីហ្វិក និងជាអនុប្រធានប្រតិបត្តិផ្នែកលំនៅឋានរបស់ក្រុមហ៊ុន Centaline Property Agency បានថ្លែងថា៖ «ក្រុមហ៊ុនអភិវឌ្ឍន៍នានាកំពុងធ្វើការងារដោយសហការជាមួយនឹងច្បាប់ពន្ធថ្មីនេះ។ ការដាក់លក់យូនីតថ្មីៗធ្វើឡើងកាន់តែលឿនជាងមុន»។
គម្រោងអាផាតមិនគឺជាផ្នែកនៃគម្រោងលំនៅឋានទំនើប Victoria Harbour របស់ក្រុមហ៊ុន Sun Hung Kai ដែលធ្លាប់ជាទីតាំងលំនៅឋានសាធារណៈធំបំផុតក្នុងស្រុកភាគខាងកើតរបស់ទីក្រុងនេះ។ តម្លៃជាមធ្យមគឺប្រហែល ៥០ ៣៦៨ ដុល្លារអាមេរិកក្នុងមួយម៉ែត្រការ៉េ បន្ទាប់ពីបូកបញ្ចូលការលក់ចុះភាគរយសម្រាប់អតិថិជនចំនួន ១៩ ភាគរយ។
កាលពីពាក់កណ្តាលខែកក្កដាក្រុមហ៊ុនអភិវឌ្ឍន៍លំនៅឋាននេះបានដាក់លក់អាផាតមិន ១៦៨ យូនីតនៃគម្រោង St Martin របស់ខ្លួនដែលស្ថិតនៅតំបន់តៃប៉ូក្នុងទីក្រុងហុងកុងដែលលើសពីផែនការដែលមានតែ ១២៨ យូនីត៕ KC