.jpg)
ភ្នំពេញៈ កម្ពុជានឹងធ្វើជាម្ចាស់ផ្ទះនៃកិច្ចប្រជុំ ARENA Convention & Expo 2018 (ACE 18) ដែលនឹងប្រព្រឹត្តទៅចាប់ពីថ្ងៃទី ២៤-២៥ ខែសីហានេះដោយមានក្រុមអ្នកជំនាញក្នុងវិស័យអចលនទ្រព្យមកពីជាង ១០ ប្រទេសចូលរួម។
ACE 18 គឺជាការជួបជុំប្រចាំឆ្នាំរបស់បណ្តាញអ្នកជំនាញអចលនទ្រព្យនៅតំបន់អាស៊ានព្រមទាំងមានការចូលរួមពីក្រុមហ៊ុនអចលនទ្រព្យដែលមានអាជ្ញាប័ណ្ណមកពីប្រទេស ជប៉ុន កូរ៉េខាងត្បូង អូស្ត្រាលី អឺរ៉ុប និងអាមេរិក។
ARENA គឺជាបណ្តាញនៃក្រុមអ្នកជំនាញអចលនទ្រព្យក្នុងតំបន់អាស៊ាន ដែលបច្ចុប្បន្នមានសមាជិក ៨ ប្រទេសរួមមាន កម្ពុជា ម៉ាឡេស៊ី ហ្វីលីពីន ថៃ សិង្ហបុរី ឥណ្ឌូនេស៊ី វៀតណាម និងប្រទេសមីយ៉ាន់ម៉ា។
លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងជាប្រធាន ARENA សម្រាប់ឆ្នាំ ២០១៨ នេះបាននិយាយថា កម្មវិធីនេះរៀបចំឡើងក្នុងគោលបំណងដើម្បីជាការជួបគ្នារវាងបណ្តាញអ្នកជំនាញអចលនទ្រព្យទាំងអស់នៅក្នុងតំបន់អាស៊ាន។ ការជួបជុំគ្នានេះនឹងធ្វើឲ្យអន្តរជាតិស្គាល់ពីសក្តានុពលរបស់វិស័យអចលនទ្រព្យកម្ពុជាកាន់តែច្រើន។
លោកមានប្រសាសន៍ថា៖ «កម្មវិធីនេះនឹងក្លាយជាវេទិកានៃការផ្លាស់ប្តូរបទពិសោធ និងចំណេះដឹងរវាងអ្នកជំនាញក្នុងវិស័យអចលនទ្រព្យទាំងក្នុងតំបន់ និងមកពីបណ្តាប្រទេសផ្សេងៗទៀត»។
កម្មវិធីនេះត្រូវបានរៀបចំឡើងជារៀងរាល់ឆ្នាំចាប់តាំងពីឆ្នាំ ២០១២ មកដោយកាលពីឆ្នាំ ២០១៧ បានរៀបចំនៅប្រទេសម៉ាឡេស៊ី។
អត្ថន័យសំខាន់សម្រាប់ ACE 18 គឺបង្កើត និងបង្កើនទំនាក់ទំនងអាជីវកម្មផ្នែកអចលនទ្រព្យនៅក្នុងប្រទេសតំបន់អាស៊ាន ទ្វីបអាស៊ី និងលើគ្រប់ប្រទេសទូទាំងពិភពលោក៕
