.jpg)
ការដ្ឋានសំណង់មួយនៅជិតព្រលានយន្តហោះ London City Airport ក្នុងទីក្រុងឡុងដ៍។ រូបថត AFP
ក្រុងឡុងដ៍ៈ ខណៈពេលដែលកាលបរិច្ឆេទកំណត់របស់ចក្រភពអង់គ្លេសដើម្បីចាកចេញពីសហភាពអឺរ៉ុបខិតជិតមកដល់ តម្លៃអចលនទ្រព្យបានថមថយ ឬធ្លាក់ចុះ ជាពិសេសនៅទីក្រុងឡុងដ៍ ដោយអ្នកវិភាគក្នុងវិស័យនេះបានព្រមានថានឹងកាន់តែកើតមានភាពធ្ងន់ធ្ងរ បើអង់គ្លេសចាកចេញពីសហភាពអឺរ៉ុបដោយគ្មានកិច្ចព្រមព្រៀង។
លោកស្រី Beatrice Caboche នាយិកាក្រុមហ៊ុនអចលនទ្រព្យ Barnes UK បានថ្លែងថា៖ «ទីផ្សារស្ថិតនៅទ្រឹង»។
តម្លៃលក់អចលនទ្រព្យជាមធ្យមបានកើនឡើងត្រឹមតែ ០,៧ ភាគរយប៉ុណ្ណោះកាលពីខែកក្កដាដែលជាកំណើនទាបបំផុតក្នុងរយៈពេលជិត ៧ ឆ្នាំ។
ក្រុមអ្នកវិភាគស្តីបន្ទោសថា បញ្ហានេះកើតមានឡើងដោយសារដំណើរការប្រជាមតិចាកចេញរបស់អង់គ្លេសពីសហភាពអឺរ៉ុប (Brexit) កាលពីឆ្នាំ ២០១៦ ។
លោកស្រី Yael Selfin ប្រធានសេដ្ឋវិទូប្រចាំក្រុមហ៊ុន KPMG UK បានថ្លែងថា៖ «ក្នុងរយៈពេល ៣ ឆ្នាំចុងក្រោយនេះមានការថមថយសម្ទុះជាទូទៅក្នុងកំណើនតម្លៃផ្ទះនៅចក្រភពអង់គ្លេសដែលត្រូវបានជំរុញជាចម្បងដោយការធ្លាក់ចុះនៅភាគខាងត្បូង និងភាគខាងកើតទីក្រុងឡុងដ៍»។
វិនិយោគិនជាច្រើនរំពឹងថា ទីផ្សារនឹងធ្លាក់ចុះបន្ថែមទៀតហើយពួកគេមិនចង់ចំណាយខ្ពស់ជ្រុលសម្រាប់អចលនទ្រព្យដែលនឹងមិនសូវសមនឹងតម្លៃ ប្រសិនបើឧទាហរណ៍ ចក្រភពអង់គ្លេសចាកចេញពីសហភាពអឺរ៉ុបដោយគ្មានកិច្ចព្រមព្រៀងណាមួយ។
ម្យ៉ាងវិញទៀតអ្នកលក់ជាញឹកញាប់មានបំណងទុកផ្ទះរបស់ពួកគេឲ្យនៅទំនេរចោលប្រសើរជាងទទួលយកតម្លៃដែលពួកគេគិតថាទាបជ្រុល ពោលគឺជាគោលជំហរមួយដែលហាក់ដូចជាត្រូវបានបន្ថែមចូលទៅក្នុងវិបត្តិផ្ទះសំបែងដែលធ្ងន់ធ្ងររួចទៅហើយនោះ។
តម្លៃទាបក្នុងរយៈពេល ១ ទសវត្សរ៍
ក្នុងទីក្រុងឡុងដ៍ តម្លៃអចលនទ្រព្យបានធ្លាក់ចុះ ៤ ភាគរយនៅត្រីមាសទី ១ ធៀបនឹងកម្រិតតម្លៃកាលពីឆ្នាំមុន។ នេះគឺជាការធ្លាក់ចុះខ្លាំងបំផុតគិតចាប់ពីឆ្នាំ ២០០៩ មកជាពេលដែលកើតមានវិបត្តិហិរញ្ញវត្ថុពិភពលោក។
នៅតំបន់សម្បូរអ្នកមានក្នុងទីក្រុងឡុងដ៍ដូចជាតំបន់ Mayfair, Knightsbridge ឬ South Kensington ការធ្លាក់ចុះតម្លៃផ្ទះគឺជារឿងគួរឲ្យភ្ញាក់ផ្អើលបំផុត ដោយសារតម្លៃបានធ្លាក់ចុះពីកម្រិតខ្ពស់ដែលកើតមានឡើងអស់រយៈពេលជាច្រើនឆ្នាំ។
យោងតាមក្រុមហ៊ុនប្រមូលទិន្នន័យអចលនទ្រព្យ LonRes បានឲ្យដឹងថា៖ «ប្រតិបត្តិការទិញលក់ផ្ទះតម្លៃថ្លៃក្នុងភាគកណ្តាលទីក្រុងឡុងដ៍កាលពីឆ្នាំមុនបានធ្លាក់ចុះដល់កម្រិតទាបបំផុតក្នុងរយៈពេល ១ ទសវត្សរ៍»។ ក្រុមហ៊ុន LonRes បានឲ្យដឹងថា ទីផ្សារស្ថិតក្នុងសម្ពាធរួចទៅហើយពីការផ្លាស់ប្តូរពន្ធប្រថាប់ត្រា។
លោកស្រី Caboche នាយិកាក្រុមហ៊ុន Barnes UK បានថ្លែងថា អចលនទ្រព្យមួយដែលដាក់លក់នៅលើទីផ្សារតម្លៃ ១៤ លានផោន (១៧,២ លានដុល្លារ) កាលពី ៤ ឆ្នាំមុននៅពេលនេះអាចលក់បានត្រឹមតែ ៩ លានផោនប៉ុណ្ណោះ។
លោកស្រីថ្លែងថា វាមិនត្រឹមតែទីផ្សារផ្ទះតម្លៃខ្ពស់ប៉ុណ្ណោះទេ ដែលកំពុងរងគ្រោះ ប៉ុន្តែផលប៉ះពាល់របស់ Brexit ក៏កំពុងកើតមានលើផ្ទះតម្លៃថោកជាងនេះផងដែរ និងនៅទូទាំងប្រទេសដែលប្រហែលជាមានផលប៉ះពាល់យូរជាងពេលមានវិបត្តិហិរញ្ញវត្ថុទៅទៀត។
លោកស្រីបានមានប្រសាសន៍ថា៖ «នៅពេលនេះតម្លៃបាននិងកំពុងធ្លាក់ចុះយឺតៗបន្ថែមទៀត ប៉ុន្តែការធ្លាក់ចុះនេះកើតមានជាបន្តបន្ទាប់ ហើយយើងមិនមើលឃើញមានសញ្ញាស្ទុះងើបឡើងវិញនៅពេលខាងមុខឡើយ»។
ទីផ្សាររបស់អ្នកទិញ
ទន្ទឹមនឹងនេះដែរ កម្រៃជើងសាបានពីការលក់ដែលប្រមូលដោយទីភ្នាក់ងារអចលនទ្រព្យ បាននិងកំពុងធ្លាក់ចុះ ខណៈចំនួនប្រតិបត្តិការថមថយ។
ប៉ុន្តែមានរូបភាពរងគ្រោះមួយផ្សេងទៀតដែលកើតមានចំពោះអ្នកលក់ និងភ្នាក់ងារលក់ នោះគឺអ្នកទិញមួយចំនួនកំពុងយល់ឃើញថា ទីផ្សារអចលនទ្រព្យដែលមានតម្លៃខ្ពស់ជាយូរមកហើយនោះជាថ្មីម្តងទៀតអាចមានលទ្ធភាពទិញបាន។
លើសពីនេះទៀត អត្រាការប្រាក់ទាបជាប្រវត្តិសាស្ត្រគឺជាចំណុចដ៏ទាក់ទាញសម្រាប់មនុស្សគ្រប់គ្នាដែលស្វែងរកកម្ចីទិញផ្ទះ។
ទន្ទឹមនឹងនេះដែរការធ្លាក់ចុះតម្លៃប្រាក់ផោនដែលធ្លាក់ចុះប្រហែល ២០ ភាគរយធៀបនឹងប្រាក់ដុល្លារធៀបនឹងមុនពេលធ្វើប្រជាមតិ Brexit បានបង្កើនអំណាចទិញយ៉ាងខ្លាំងរបស់វិនិយោគិនមិនមែនពលរដ្ឋអង់គ្លេសដែលកំពុងសម្លឹងមើលទ្រព្យនៅទីក្រុងឡុងដ៍។
លោកស្រី Caboche មានប្រសាសន៍ថា៖ «វាជាទីផ្សាររបស់អ្នកទិញ»៕ KC
