The Phnom Penh Post Search

Search form

Chief Tower កម្ពស់ ​៤០ ​ជាន់​ចាប់​ផ្តើម​សាងសង់​

Content image - Phnom Penh Post
ភ្ញៀវ​កិត្តិយស និង​ថ្នាក់​ដឹកនាំ​ក្រុមហ៊ុន​ធ្វើ​ពិធី​បើក​ការ​ដ្ឋាន​សាង​សង់គម្រោង​ Chief Tower​។ ហឹុន ពិសី

Chief Tower កម្ពស់ ​៤០ ​ជាន់​ចាប់​ផ្តើម​សាងសង់​

ភ្នំពេញៈ ​អគារ​ពាណិជ្ជកម្ម Chief Tower កម្ពស់ ៤០ ​ជាន់​ដែល​ជា​ការ​វិនិយោគ​រួម​គ្នា​រវាង​ JS & Partner និង​ក្រុមហ៊ុន Chief Real Estate Development​ (Cambodia) Ltd បាន​ចាប់​ផ្តើម​ការ​សាងសង់​ហើយ​កាល​​ពី​ថ្ងៃ​ម្សិលមិញ​។

គម្រោង​នេះ​ត្រូវ​បាន​អភិវឌ្ឍ​ស្ថិត​នៅ​ក្រោម​ក្រុមហ៊ុន​ថ្មី​មួយ​ឈ្មោះ JS Property International Co., Ltd ដែល​​​មាន​ទីតាំង​ស្ថិត​​តាម​បណ្តោយ​​មហាវិថី​ព្រះមុនីវង្ស ក្នុង​សង្កាត់​បឹងកេងកង ១។ ទោះ​យ៉ាង​នេះ​ក្តី​គម្រោង​អគារ​ដ៏​ខ្ពស់​នេះ​មិន​បាន​បង្ហាញ​ពី​ទុន​វិនិយោគ​នោះ​ទេ។

សេចក្តី​ប្រកាស​ព័ត៌មាន​របស់​ក្រុមហ៊ុន​បាន​ឲ្យ​ដឹង​ថា អគារ​ដែល​មាន​កម្ពស់​សរុប ១៥៨ ​ម៉ែត្រ​នេះ​នឹង​ប្រើប្រាស់​ចម្រុះ ដែល​មាន​ហាង​ទំនិញ ហាង​អាហារ និង​ភេសជ្ជៈ សណ្ឋាគារ និង​ការិយាល័យ។

លោក សាយ សំអាល់ រដ្ឋមន្រ្តី​ក្រសួង​​បរិស្ថាន ដែល​អញ្ជើញ​ចូលរួម​ក្នុង​ពិធី​បើក​ការដ្ឋាន​សាងសង់​គម្រោង Chief Tower បាន​និយាយ​ថា ការ​វិនិយោគ​លើ​ Chief Tower គឺ​ពិត​ជា​រឿង​ដ៏​ល្អ​ដោយ​វា​នឹង​ជួយ​​ផ្តល់​កន្លែង​សម្រាប់​ការ​​ធ្វើ​ធុរកិច្ច និង​ស្នាក់នៅ​ដ៏​ល្អ​កម្រិត​ស្តង់ដា​នៅ​កម្ពុជា​។ លោក​បាន​បន្ត​ថា អគារ​នេះ​នឹង​ត្រូវ​សាងសង់​ឡើង​ដោយ​គិត​ពី​​បរិស្ថាន​​ជា​ចម្បង​។

លោក​ថ្លែង​ថា៖ ​«​ខ្ញុំ​ជឿ​ថា ក្រុមហ៊ុន JS Property International Co., Ltd នឹង​កសាង​អគារ​ពាណិជ្ជកម្ម​ នេះ​ឲ្យ​​ក្លាយ​ជា​អគារ​គំរូ ដោយ​រួម​បញ្ចូល​នូវ​ទិដ្ឋភាព​សំខាន់ៗ​នៃ​អគារ​ឆ្លាត​វៃ ទាំង​​គុណភាព​បច្ចេកទេស សោភណភាព​ ប្រកប​ដោយ​រចនាប័ទ្ម​ដែល​ឆ្លុះ​បញ្ចាំង​ពី​វប្បធម៌ អរិយធម៌​ខ្មែរ និង​មាន​សុវត្ថិភាព​ប្រកប​ដោយ​ស្តង់ដារ​បរិស្ថាន​ និង​មាន​លម្ហ​បៃតង​​​»។

លោក លាង មុនីរិទ្ធ រដ្ឋលេខាធិការ​ក្រសួង​រៀបចំ​ដែនដី នគរូបនីយកម្ម និង​​សំណង់​បាន​និយាយ​ថា Chief Tower នឹង​ក្លាយ​ជា​សមិទ្ធផល​ថ្មី​មួយ​ទៀត​ដែល​វិស័យ​ឯកជន​បាន​ចូលរួម​ចំណែក​នៅ​ក្នុង​ការ​ជួយ​លើក​កម្ពស់​មុខ​​មាត់​របស់​វិស័យ​អចលន​ទ្រព្យ​នៅ​កម្ពុជា​ទៅ​កាន់​ពិភព​លោក។

លោក​ថ្លែង​ថា៖ ​«គម្រោង​សាងសង់​អគារ Chief Tower មិន​ត្រឹម​តែ​ជួយ​លើក​មុខ​មាត់​វិស័យ​សំណង់​នៅ​កម្ពុជា​​ប៉ុណ្ណោះ​ទេ តែ​តាម​រយៈ​នេះ​វា​ក៏​នឹង​ជួយ​បង្កើត​ការងារ​សម្រាប់​ប្រជា​ពលរដ្ឋ​ខ្មែរ​ដែរ»។

លោក​បន្ត​ថា៖​ «​ក្រសួង​សង្ឃឹម​ថា ក្រុមហ៊ុន​សាងសង់​នឹង​អនុវត្ត​ការងារ​សាងសង់​ដោយ​គោរព​តាម​គោល​ការណ៍​របស់​រដ្ឋាភិបាល ជាមួយ​​នឹង​ការ​ប្រើប្រាស់​បច្ចេកវិទ្យា​ទំនើបៗ​កម្រិត​ស្តង់ដា»។

បើ​តាម​លោក មុនីរិទ្ធ ក្នុង​រយៈពេល ​២ ​ខែ ដើម​ឆ្នាំ ​២០១៩ នេះ​​ការ​វិនិយោគ​​វិស័យ​សំណង់​នៅ​កម្ពុជា​​មាន​តម្លៃ​ជាង​ ១ ៣៨៤ លាន​ដុល្លារ កើន​ឡើង​ជាង​ ​២ ​ដង បើ​ធៀប​នឹង​រយៈពេល​ដូច​គ្នា​ក្នុង​ឆ្នាំ ​២០១៨។​

លោក សន សៀប នាយក​ក្រុមហ៊ុន​អចលន​ទ្រព្យ ឃី រៀលអ៊ីស្ទេត បាន​ឲ្យ​​ដឹង​ថា សំណង់​ធំៗ​បាន​លេច​ឡើង​ជា​បន្ត​បន្ទាប់​នៅ​ក្នុង​តំបន់​បឹង​កេងកង ដែល​ជា​តំបន់​មាន​សក្តានុពល​ខ្លាំង​ក្នុង​​រាជធានី​ភ្នំពេញ​។ លោក​បន្ត​ថា បច្ចុប្បន្ន​​​ការ​វិនិយោគ​ទៅ​លើ​សណ្ឋាគារ​​​កំពុង​មាន​ទីផ្សារ​ល្អ ខណៈ​ចំនួន​ភ្ញៀវ​ទេសចរ​​កាន់​តែ​កើន​ឡើង។

តាម​លោក សៀប បច្ចុប្បន្ន​​ដី​នៅ​ទីតាំង​ខាង​លើ​​មាន​តម្លៃ​​​ពី ​៥ ០០០-៦ ០០០ ​ដុល្លារ​ក្នុង ​១ ​ម៉ែត្រ​ការ៉េ​៕​lA

អត្ថបទគួរចាប់អារម្មណ៍