សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា CVEA កំពុងរៀបចំបង្កើតវិទ្យាស្ថានបណ្តុះបណ្តាលជំនាញអចលនទ្រព្យតាមរយៈការរួមបញ្ចូលទុនពីសមាជិក សមាគម និងអ្នកពាក់ព័ន្ធមួយចំនួនទៀត។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកបណ្ឌិត គីម ហ៊ាង បានថ្លែងឲ្យដឹងតាមទូរស័ព្ទកាលពីសប្តាហ៍មុនថា រហូតមកទល់ពេលនេះមានក្រុមហ៊ុនចំនួន ២០ ហើយដែលបានសម្រេចបោះទុនរួមគ្នាដើម្បីបង្កើតវិទ្យាស្ថានបណ្តុះបណ្តាលវិជ្ជាជីវៈអចលនវត្ថុកម្ពុជា។ លោកបានបន្តថា ក្រៅពីក្រុមហ៊ុនទាំង ២០ នេះសមាគមក៏នឹងបើកឲ្យសមាជិកដទៃទៀត និងក្រុមហ៊ុនឯកជននានាអាចចូលថវិកាក្នុងការបើកដំណើរការវិទ្យាស្ថាននេះឲ្យបានផងដែរនៅក្នុងឆ្នាំ ២០១៨ នេះ។
លោកមានប្រសាសន៍ថា៖ «យើងត្រូវការដើមទុនប្រមាណ ២០ ម៉ឺនដុល្លារដើម្បីបើកវិទ្យាស្ថាននេះ ដោយសហការជាមួយ University Of Technology Malaysia (UTM) របស់ប្រទេសម៉ាឡេស៊ី និងជាមួយក្រសួងសេដ្ឋកិច្ច និងហិរញ្ញវត្ថុ ព្រមទាំងក្រសួងអប់រំ យុវជន និងកីឡា»។
បើតាមលោកប្រធានសមាគម វគ្គសិក្សានេះនឹងមានរយៈពេល ១៥០ ម៉ោងសម្រាប់ជំនាញធ្វើជាភ្នាក់ងារអចលនទ្រព្យ និង ១៨០ ម៉ោងសម្រាប់ជំនាញជាភ្នាក់ងារវាយតម្លៃអចលនទ្រព្យ។
កម្មវិធីសិក្សានឹងយកពីប្រទេសថៃម៉ាឡេស៊ី និងសិង្ហបុរីយកមកច្របាច់បញ្ចូលគ្នាដើម្បីប្រើប្រាស់ក្នុងកម្មវិធីសិក្សាដែលមានការទទួលស្គាល់កម្រិតជាតិ និងអន្តរជាតិ។
លោក គីម ហ៊ាង បានប្រាប់ទៀតថាអ្នកដែលបញ្ចប់ការសិក្សាពីវិទ្យាស្ថាននេះនឹងទទួលបានវិញ្ញាបនបត្រមួយ ដើម្បីយកទៅដាក់ពាក្យប្រឡងនៅក្រសួងសេដ្ឋកិច្ច និងហិរញ្ញវត្ថុ ហើយនៅពេលពួកគេប្រឡងជាប់ពួកគេនឹងទទួលបានវិញ្ញាបនបត្រពីក្រសួងទើបអាចធ្វើការងារក្នុងវិស័យនេះបាន។
លោកបន្តថា តាមគម្រោងវគ្គបណ្តុះបណ្តាលនេះនឹងប្រើប្រាស់គ្រូក្នុងស្រុកដែលមានសញ្ញាបត្រ និងបទពិសោធខ្ពស់ចំនួន ៥០ ភាគរយ និងគ្រូបរទេសចំនួន ៥០ ភាគរយ។
លោកបានបន្តថាសាលានេះនឹងត្រូវគ្រប់គ្រងដោយក្រុមប្រឹក្សាភិបាលដែលនឹងត្រូវបង្កើតឡើងដោយមាននាយកម្នាក់ធ្វើការងារដោយឯករាជ្យ។
ទោះបីជាយ៉ាងណាការស្នើសុំអាជ្ញាប័ណ្ណ ដើម្បីបង្កើតសាលានេះនៅក្រសួងអប់រំ យុវជន និងកីឡា និងក្រសួងសេដ្ឋកិច្ច និងហិរញ្ញវត្ថុរហូតមកដល់ពេលនេះមិនទាន់បានធ្វើនៅឡើយទេ។
លោកបណ្ឌិត គីម ហ៊ាង បានបញ្ជាក់ថា៖ «គោលដៅនៃការបើកវិទ្យាស្ថាននេះមិនមែនដើម្បីប្រាក់ចំណេញទេ ប៉ុន្តែដើម្បីពង្រឹងធនធានមនុស្ស និងទ្រទ្រង់ឧស្សាហកម្មសំណង់ និងអចលនវត្ថុនៅកម្ពុជាឲ្យមានការរីកចម្រើនប្រកបដោយនិរន្តរភាព»។ លោកបន្តថា៖ «ប្រសិនបើយើងបង្កើតសាលានេះបានក្នុងកម្រិតអាស៊ានវាពិតជាប្រសើរណាស់ ព្រោះយើងនឹងអាចទាក់ទាញអ្នកសិក្សាមកពីបណ្តាប្រទេសក្នុងតំបន់បាននាពេលអនាគត»។
អ្នកជំនាញអចលនទ្រព្យអន្តរជាតិ និងជានាយកប្រតិបត្តិក្រុមហ៊ុន Century21 Fortuna Investment លោក វ៉ា វីរៈ ដែលបានចូលរួមវិនិយោគដើម្បីបង្កើតវិទ្យាស្ថានចំណុះឲ្យ CVEA បានថ្លែងថា ការបើកសាលានេះគឺមានភាពចាំបាច់បំផុតសម្រាប់ស្ថានភាពបច្ចុប្បន្នព្រោះនៅកម្ពុជាមិនទាន់មានសាលាបណ្តុះបណ្តាលជំនាញអចលនទ្រព្យបែបនេះទេ គឺមានតែសាលាជំនាញផ្សេងៗ។
លោកបន្តថា ក្រុមហ៊ុនអចលនទ្រព្យដែលចុះបញ្ជីជាផ្លូវការនៅកម្ពុជាមានប្រមាណ ១៥០ និងមានភ្នាក់ងារទាំងអស់ប្រមាណ ១០០០ នាក់ ព្រមទាំងភ្នាក់ងារមិនផ្លូវការមានរាប់រយនាក់ទៀត ដូច្នេះនៅពេលពួកគាត់មកផ្តល់សេវាកម្មក្នុងវិស័យនេះធ្វើឡើងដោយគ្មានវិជ្ជាជីវៈវានឹងធ្វើឲ្យប៉ះពាល់ដល់ផ្នែកអចលនទ្រព្យនៅក្នុងប្រទេសកម្ពុជា។
លោកបន្តថា៖ «ខ្ញុំគិតថាសាលានេះនឹងទទួលបានការគាំទ្រពិសេសក្រុមហ៊ុនភ្នាក់ងារអចលនទ្រព្យនៅកម្ពុជា ព្រោះក្រុមហ៊ុនសព្វថ្ងៃគាត់ចង់បានបុគ្គលិកល្អ និងមានជំនាញបទពិសោធ»។ លោកបន្តថា៖ «កន្លងមកនៅពេលចង់បានបុគ្គលិកបែបនេះពួកគេមិនដឹងរើសយកពីណា ព្រោះមិនមានការបណ្តុះបណ្តាលច្បាស់លាស់»។
ទោះជាយ៉ាងណាបច្ចុប្បន្ននេះក្រុមហ៊ុន Century21 Cambodia ក៏មានបណ្តុះបណ្តាលជំនាញនេះដែរហេតុនេះការបើកសាលារបស់សមាគមអ្នកវាយតម្លៃ និងភ្នាក់ងារអចលនវត្ថុកម្ពុជាអាចជាការប្រកួតប្រជែងគ្នា ឬយ៉ាងណា?
នាយិកាសាកលវិទ្យាល័យ Century21 Cambodia បានបដិសេធមិនអត្ថាធិប្បាយទាក់ទងនឹងផែនការបើកវិទ្យាស្ថានថ្មីនេះឡើយ។
ទោះជាយ៉ាងណាលោក វ៉ា វីរៈ ដែលជាសមាជិកគ្រួសារ Century21 Cambodia បានថ្លែងថា ការបណ្តុះបណ្តាលក្នុងក្របខណ្ឌរបស់ក្រុមហ៊ុន Century21 Cambodia ពួកគេអញ្ជើញគ្រូជំនាញៗពីបរទេសមកបណ្តុះបណ្តាល។
ប្រធានក្រុមប្រឹក្សាភិបាលក្រុមហ៊ុន Huttons CPL លោកឧកញ៉ា ចេង ខេង បានថ្លែងថា លោកគាំទ្រឲ្យមានការបង្កើតវិទ្យាស្ថាននេះឡើង ព្រោះនៅប្រទេសគេមានសាលាអស់ហើយនៅតែប្រទេសរបស់យើងប៉ុណ្ណោះ។ ហេតុនេះសមាគមត្រូវការទុនប៉ុន្មាន ដើម្បីបង្កើតវិទ្យាស្ថាននេះលោកនឹងចូលរួមតាមការចង់បាន។
លោកបន្តថា៖ «អ្វីៗធ្វើឡើងដោយតម្លាភាពតាមភាគហ៊ុនកំណត់ហេតុនេះយើងមិនគិតរកប្រាក់ចំណេញទេអ្វីសំខាន់ខ្ញុំចង់ឲ្យមានសាលានេះ និងបង្កើតវាឲ្យបានលឿន»។
លោកថា៖ «បង្កើតសាលានេះឲ្យបានពិតជាល្អណាស់ ហើយខ្ញុំនឹងបញ្ជូនបុគ្គលិកខ្ញុំទៅចូលរៀនដែរ»។
រដ្ឋមន្ត្រីក្រសួងអប់រំ យុវជន និងកីឡាលោក ហង់ ជួនណារ៉ុន មានប្រសាសន៍ថា ក្រសួងស្វាគមន៍ចំពោះការបណ្តុះបណ្តាលជំនាញនេះដោយសារវិស័យនេះកំពុងមានភាពរីកចម្រើននៅកម្ពុជា ប៉ុន្តែការងារនេះត្រូវឆ្លងនាយកដ្ឋានជំនាញនៃក្រសួងសេដ្ឋកិច្ច និងហិរញ្ញវត្ថុ ជាមុន។
លោកស្រី អ៊ុយ ច័ន្ទនិមល អនុប្រធាននាយកដ្ឋានគ្រប់គ្រងអាជីវកម្ម អចលនវត្ថុ បញ្ចាំ និងប្រាតិភោគដោយអនុប្បទាននៃក្រសួងសេដ្ឋកិច្ច និងហិរញ្ញវត្ថុកាលពីថ្ងៃចន្ទបាននិយាយថា លោកស្រីបានឮពីព័ត៌មាននៃការចង់បើកវិទ្យាស្ថានបណ្តុះបណ្តាលជំនាញអចលនទ្រព្យរបស់សមាគមអ្នកវាយតម្លៃ និងភ្នាក់ងារអចលនវត្ថុកម្ពុជាដែរ ប៉ុន្តែរហូតមកដល់ពេលនេះក្រសួងនៅមិនទាន់ទទួលបានឯកសារស្នើសុំណាមួយនោះទេ។
លោកស្រីមានប្រសាសន៍ថា ៖ «យើងស្វាគមន៍ប្រសិនបើ CVEA ពិតជារៀបចំបង្កើតវិទ្យាស្ថាននេះមែន។ ការបង្កើតឱ្យមានវិទ្យាស្ថានដែលមានលក្ខណៈស្តង់ដារដើម្បីបណ្តុះបណ្តាលធនធានមនុស្សនឹងជួយឲ្យវិស័យអចលនទ្រព្យនៅកម្ពុជាកាន់តែមានភាពរឹងមាំបន្ថែមទៀត»។
បើតាមលោកស្រី ច័ន្ទនិមល នាពេលកន្លងមកក្រសួងសេដ្ឋកិច្ច និងហិរញ្ញវត្ថុ ក៏ធ្លាប់បានធ្វើ MOU រួចមកហើយជាមួយសាកលវិទ្យាល័យសេដ្ឋកិច្ច និងហិរញ្ញវត្ថុដើម្បីបើកបង្រៀនលើមុខវិជ្ជាទាក់ទងនឹងវិស័យអចលនទ្រព្យ៕