ក្រុងបាងកកៈ ធនាគារ Kasikornbank (KBank) មានបំណងទទួលបានកំណើនកម្ចីទិញផ្ទះក្នុងអត្រា ២ ខ្ទង់កម្រិតទាបនៅឆ្នាំនេះ ដែលជំរុញដោយក្រុមអតិថិជនជាអ្នកលក់អនឡាញ និងអ្នកប្រកបការងារឯករាជ្យ (Freelancer) ដែលផ្ដល់ឱកាសអាជីវកម្មដ៏ធំ និងការប្រកួតប្រជែងទាប។
លោក Surat Leelataviwat អនុប្រធានប្រតិបត្តិធនាគារ KBank បានឲ្យដឹងថា បុគ្គលិកដែលធ្វើការងារបម្រើខ្លួនឯង (self-employed) មួយចំនួន ជាពិសេសអ្នកសរសេរអនឡាញអ្នកបង្កើតមាតិកា អ្នកផលិតវីដេអូតាមយូធូប និងអ្នកបង្ហោះវីដេអូខ្លីតាម vlog កំពុងកើនឡើងយ៉ាងខ្លាំងស្របជាមួយគ្នានឹងការផ្លាស់ប្តូររបៀបរស់នៅរបស់មនុស្សជំនាន់ថ្មី និងភាពជឿនលឿនផ្នែកបច្ចេកវិទ្យា។
មានអ្នកលក់តាមអនឡាញប្រហែល ២,៥ លាននាក់ដែលអ្នកខ្លះក្នុងចំណោមពួកគេគឺជាបុគ្គលិកដែលទទួលបានប្រាក់ខែ ប៉ុន្តែធ្វើការងាររកប្រាក់ចំណេញបន្ថែមពីការលក់តាមអនឡាញ។
លោក Surat បន្តថា បុគ្គលិកបម្រើដោយខ្លួនឯងជាច្រើននៅតែពិបាកទទួលបានប្រាក់កម្ចីធនាគារ ដោយសារតែកង្វះរបាយការណ៍ធនាគារ។
ភាពរីកចម្រើននៃការវិភាគដែលជំរុញដោយទិន្នន័យរបស់ KBank គួរតែបើកចំហឱកាសបន្ថែមទៀតដើម្បី ផ្តល់កម្ចីទៅកាន់ផ្នែកអតិថិជននេះចំពេលការប្រកួតប្រជែងនៅក្នុងផ្នែកនេះមានកម្រិតទាប។
លោក Surat ថ្លែងថា៖ «ជាមួយនឹងការបង្កើតការវិភាគទិន្នន័យនេះ យើងប្រើប្រាស់ឧបករណ៍ នវានុវត្តន៍មួយចំនួនគួបផ្សំជាមួយនឹងវិធីសាស្ដ្របែបប្រពៃណី ដើម្បីវិភាគហានិភ័យឥណទានក្នុងផ្នែកទីផ្សារថ្មីនេះ»។ លោកបន្តថា៖ «យើងបានកែតម្រូវការផ្ដល់ពិន្ទុឥណទាន និងប្រព័ន្ធផ្ដល់ពិន្ទុប្រតិបត្តិការ ស្របជាមួយនឹងប្រវត្ដិហានិភ័យរបស់ពួកគេ»៕ LA