ភ្នំពេញ: បន្ទាប់ពីការចាក់ខ្សាច់បំពេញតំបន់ទំនាបនៅក្នុងគម្រោងអភិវឌ្ឍន៍ក្រុងរណបជ្រោយចង្វារ បានបញ្ចប់ ១០០ ភាគរយ និងការសាងសង់ផ្សារ ព្រមទាំងលំនៅឋានមួយចំនួនរួចរាល់នោះ ក្រុមហ៊ុន OCIC កាលពីថ្ងៃពុធម្សិលមិញ បានបើកការដ្ឋានស្ថាបនាផ្លូវបេតុងថ្មីមួយខ្សែ ដែលស្របជាមួយផ្លូវជាតិលេខ ៦ ។
ថ្លែងនៅក្នុងឱកាសបើកការដ្ឋានសាងសង់ផ្លូវបេតុងនៅក្នុងគម្រោងអភិវឌ្ឍន៍ក្រុងរណបជ្រោយចង្វារ លោក ប៉ា សុជាតិវង្ស អភិបាលរាជធានីភ្នំពេញ មានប្រសាសន៍ថា ផ្លូវបេតុងថ្មីដែលបើកការដ្ឋានសាងសង់នាពេលនេះនឹងដើរតួនាទីយ៉ាងសំខាន់ក្នុងការលើកកម្ពស់សម្រស់រាជធានីភ្នំពេញ។ នៅពេលអនាគតតំបន់ជ្រោយចង្វារនឹងមានការអភិវឌ្ឍខ្លាំង ហើយទីនេះអាចនឹងមានការកសាងស្ថានីយរថភ្លើងល្បឿនលឿន (TGV) ផងដែរ។
លោកបានបន្តថា ក្រុងរណបជ្រោយចង្វារ នឹងក្លាយជាក្រុងរណបឈានមុខមួយនៅក្នុងរាជធានីភ្នំពេញ ព្រោះនៅក្នុងផែនការអភិវឌ្ឍន៍គម្រោងនេះក្រុមហ៊ុន OCIC និងសាលារាជធានី បានធ្វើការសិក្សាជាមួយគ្នាយ៉ាងលម្អិតទៅលើការកសាងប្រព័ន្ធហេដ្ឋារចនាសម្ព័ន្ធដែលមានដូចជា ផ្លូវថ្នល់ ប្រព័ន្ធទឹកស្អាត ប្រព័ន្ធចម្រោះទឹកស្អុយ និងការកសាងច្រាំងទន្លេជាដើម។
លោកមានប្រសាសន៍ថា៖ «នៅក្នុងគម្រោងអភិវឌ្ឍន៍ក្រុងរណបជ្រោយចង្វារនេះផ្ទៃដីមិនតិចជាង ៥០ ភាគរយទេ ដែលនឹងត្រូវទុកប្រើប្រាស់ជាតំបន់សាធារណៈដែលមានដូចជា ផ្លូវថ្នល់ លូបង្ហូរទឹក សាលារៀន មន្ទីរពេទ្យ ផ្សារ កន្លែងបម្រើសេវាសាធារណៈ និងតំបន់បៃតងជាដើម»។
ផ្លូវបេតុងថ្មីដែលស្ថាបនានៅពេលនេះនឹងចេញពីគល់ស្ពានជ្រោយចង្វារត្រើយខាងកើតរហូតដល់ផ្លូវបេតុងសម្តេចជាស៊ីម ដោយមានបណ្តោយប្រវែង ៦០០៥ ម៉ែត្រ កាត់ភូមិសាស្រ្តសង្កាត់ជ្រោយចង្វារ ព្រែកលៀប និងសង្កាត់ព្រែកតាសេក នៃខណ្ឌជ្រោយចង្វារ រាជធានីភ្នំពេញ។
លោក ពុង ឃាវសែ អគ្គនាយកក្រុមហ៊ុន OCIC បានថ្លែងថា ចាប់តាំងពីក្រុមហ៊ុនរបស់លោកបានចុះកិច្ចសន្យាជាមួយសាលារាជធានីភ្នំពេញកាលពីថ្ងៃទី ១២ ខែកញ្ញា ឆ្នាំ ២០១១ ដើម្បីអភិវឌ្ឍក្រុងរណបជ្រោយចង្វារ រហូតមកដល់ពេលនេះក្រុមហ៊ុន OCIC បានចំណាយប្រាក់អស់ជិត ១០០ លានដុល្លារហើយ ក្នុងការអភិវឌ្ឍហេដ្ឋារចនាសម្ព័ន្ធនានាមានដូចជា ការចាក់ខ្សាច់ ការកសាងផ្លូវ អគាររដ្ឋបាល លំនៅឋាន និងផ្សារលក់ទំនិញ។
លោកបន្តថា តាមរយៈការអភិវឌ្ឍនារយៈពេលប៉ុន្មានឆ្នាំកន្លងមកនេះ គេសង្កេតឃើញថា ស្ថានភាពលំនៅឋាន និងជីវភាពប្រជាជនដែលរស់នៅក្នុងតំបន់អភិវឌ្ឍន៍ខាងលើបានរីកចម្រើនជាលំដាប់។
ខណៈការដោះស្រាយជាមួយម្ចាស់ដីមួយចំនួនដែលទទួលផលប៉ះពាល់ពីគម្រោងអភិវឌ្ឍន៍ខាងលើនៅមិនទាន់ចប់ ១០០ ភាគរយនោះ លោកអគ្គនាយកក្រុមហ៊ុន OCIC បានថ្លែងថា៖ «ខ្ញុំសូមសំណូមពរឲ្យម្ចាស់ដីទាំងអស់ចូលរួមសហការជាមួយក្រុមហ៊ុន និងសាលារាជធានី ដើម្បីធ្វើឲ្យការអភិវឌ្ឍមានដំណើរការទៅមុខដោយរលូន និងទទួលផលចំណេញទាំងអស់គ្នា»។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូន រាជធានីភ្នំពេញ បានប្រាប់ថា ដោយសារផ្លូវជាតិលេខ ៦ មានភាពមមាញឹកនោះសាលារាជធានីភ្នំពេញ បានប្រាប់ឲ្យមន្ទីរសាធារណការ និងដឹកជញ្ជូន រាជធានីភ្នំពេញ ធ្វើការសិក្សាពីការធ្វើផ្លូវថ្មីមួយខ្សែ។
លោកបានបន្តថា ការស្ថាបនាផ្លូវបេតុងនេះនឹងត្រូវចំណាយពេលសាងសង់ ១០ ខែ ដោយផ្លូវនេះអាចទ្រទម្ងន់បាន ៣០ តោន និងមានអាយុកាលប្រើប្រាស់ ២០ ឆ្នាំ។ នៅសងខាងផ្លូវថ្មីនេះមានលូបង្ហូរទឹកដែលមានមុខកាត់ ១,៥ ម៉ែត្រ និងមានដាក់បង្គោលភ្លើងជាច្រើនផងដែរ។
លោក ពិសិដ្ឋ បញ្ជាក់ថា៖ «បន្ទាប់ពីសាងសង់រួច ផ្លូវនេះនឹងដើរតួនាទីយ៉ាងសំខាន់ក្នុងការកាត់បន្ថយភាពកកស្ទះចរាចរណ៍នៅតាមបណ្តោយផ្លូវជាតិលេខ ៦ បានយ៉ាងច្រើន»។
ក្រុងរណបជ្រោយចង្វារ ឬទីក្រុងនៃអនាគត គ្របដណ្តប់លើផ្ទៃដីទំហំ ៣៨៧ ហិកតា ក្នុងសង្កាត់ចំនួនបីរបស់ខណ្ឌជ្រោយចង្វារ រួមមាន សង្កាត់ជ្រោយចង្វារ ព្រែកលៀប និងសង្កាត់ព្រែកតាសេក។
គម្រោងអភិវឌ្ឍន៍ក្រុងរណបជ្រោយចង្វារ ត្រូវបានសាលារាជធានីភ្នំពេញផ្តល់ឲ្យក្រុមហ៊ុន OCIC អភិវឌ្ឍធ្វើជាក្រុងរណបកាលពីអំឡុងខែកញ្ញា ឆ្នាំ ២០១១ ក្នុងទឹកប្រាក់ ១៦០០ លានដុល្លារអាមេរិក ដោយគ្រោងនឹងបញ្ចប់ការអភិវឌ្ឍ ក្នុងឆ្នាំ ២០២៦ ៕
