ភ្នំពេញៈ The Point កម្ពស់ ៦ ជាន់ ដែលវិនិយោគក្នុងទឹកប្រាក់ ៧ លានដុល្លារ ស្ថិតតាមបណ្តោយមហាវិថីម៉ៅសេទុងបានបើកការដ្ឋានសាងសង់ហើយកាលពីម្សិលមិញ ដោយគ្រោងនឹងបញ្ចប់ការសាងសង់នៅដំណាច់ឆ្នាំ ២០១៩។
The Point សាងសង់លើ ផ្ទៃដីទំហំជាង ១ ហិកតានឹងត្រូវប្រើប្រាស់ជាផ្សារសហគមន៍ និងអគារការិយាល័យជួល ដោយផ្សារសហគមន៍មានផ្ទៃក្រឡា ២,២០០ ម៉ែត្រការ៉េ និងអគារការិយាល័យកម្រិត B មានទំហំ ៩,២០០ម៉ែត្រការ៉េ។
The Point ត្រូវបានរចនាឡើងដោយក្រុមហ៊ុនក្នុងស្រុក Re-Edge ហើយនឹងត្រូវប្រើប្រាស់ជាកន្លែងលក់ទំនិញ និងភោជនីយដ្ឋាននៅផ្នែកខាងក្រោម ខណៈចាប់ពីជាន់ទី ២ ទៅលើជាអគារការិយាល័យ។
លោកស្រី ថុង សុវណ្ណរង្សីយ៍ ម្ចាស់ភាគហ៊ុនក្រុមហ៊ុន 3DS Property Management Co., Ltd ដែលជាក្រុមហ៊ុនវិនិយោគ The Point បានឲ្យដឹងថា បច្ចុប្បន្ននៅភ្នំពេញមានអគារការិយាល័យជាច្រើន តែអគារភាគច្រើនមិនមានកន្លែងសម្រាកលម្ហែ កន្លែងលក់ទំនិញ និងចំណតធំទូលាយទេ។
លោកស្រីថ្លែងថា៖ «យើងនឹងធ្វើឲ្យ The Point ក្លាយជាកន្លែងនៅចន្លោះកន្លែងស្នាក់នៅ និងកន្លែងធ្វើការ ដោយនៅពេលចេញពីធ្វើការគេអាចចូលទិញទំនិញ ឬដើរលម្ហែ មុនពេលបន្តដំណើរទៅផ្ទះ»។
លោកស្រីបន្តថា គម្រោងនេះនឹងសាងសង់ឡើងដោយគិតពីបរិស្ថានជាចម្បង និងដើម្បីឆ្លើយតបនឹងតម្រូវការចាំបាច់សម្រាប់ការរស់នៅបែបស៊ីវិល័យនាពេលបច្ចុប្បន្ន តាមរយៈការបំពាក់នូវបច្ចេកវិទ្យាទំនើបៗ និងមានសុវត្ថិភាពខ្ពស់។
ការប្រកាសចាប់ផ្តើមសាងសង់ The Point បានធ្វើឡើងស្របពេលដែលអគារការិយាល័យដ៏ធំនៅក្បែរនោះ (The Parkway) គ្រោងនឹងបិទដើម្បីសាងសង់អគារថ្មីផងដែរ។
លោកស្រី អាន សុធីតា នាយិកានៃក្រុមហ៊ុនអចលនទ្រព្យ CBRE Cambodia បានលើកឡើងថា កំណើនសេដ្ឋកិច្ច បានធ្វើឲ្យទីផ្សារអគារការិយាល័យកម្រិត B មានទីផ្សារល្អណាស់នាពេលនេះ។សម្រាប់ទីតាំងរបស់ The Point អាចនិយាយថានឹងងាយទទួលបានជោគជ័យបំផុត។
លោកស្រីថ្លែងថា៖ «ខ្ញុំគិតថាភាពជោគជ័យសម្រាប់ The Point គឺមានច្រើន ព្រោះនៅពេលនេះគេពិបាករកផ្សារសហគមន៍ និងអគារការិយាល័យតាមផ្លូវម៉ៅសេទុង»។
របាយការណ៍ស្រាវជ្រាវរបស់ក្រុមហ៊ុនអចលនទ្រព្យ CBRE Cambodia រកឃើញថា គិតត្រឹមដំណាច់ត្រីមាសទី ៣ ឆ្នាំ ២០១៨ អគារការិយាល័យសរុបក្នុងរាជធានីភ្នំពេញមានទំហំប្រមាណ ៣៦០,០០០ ម៉ែត្រការ៉េ ដោយកើនឡើង ៤,៧ ភាគរយ បើធៀបនឹងត្រីមាសទី ២ ឆ្នាំ ២០១៨។ តាមការព្យាករនៅដំណាច់ឆ្នាំ ២០១៨ នេះទំហំអគារការិយាល័យសរុបនៅរាជធានីភ្នំពេញ នឹងកើនឡើងដល់ជិត ៤០០,០០០ ម៉ែត្រការ៉េ។
របាយការណ៍បានឲ្យដឹងទៀតថា អត្រាប្រើប្រាស់សម្រាប់ការិយាល័យកម្រិត A មានប្រហែល ៦៨ ភាគរយ កម្រិត B មានប្រហែល ៩០ ភាគរយ និងកម្រិត C មានអត្រាប្រើប្រាស់ ៩២ ភាគរយ។ សម្រាប់តម្លៃជួល គឺកម្រិត A មានតម្លៃចន្លោះពី ២៨-៣៨ ដុល្លារក្នុង ១ ម៉ែត្រការ៉េ សម្រាប់រយៈពេល ១ ខែកម្រិត B តម្លៃពី ១៨-២៨ ដុល្លារ និងកម្រិត C តម្លៃពី ១០-១៨ ដុល្លារ៕