The Phnom Penh Post Search

Search form




Logo of Phnom Penh Post newspaper Phnom Penh Post - Royal Group បើក​ការដ្ឋាន​សាងសង់​ខុនដូ ២៨ ជាន់

Royal Group បើក​ការដ្ឋាន​សាងសង់​ខុនដូ ២៨ ជាន់

Content image - Phnom Penh Post
ទិដ្ឋភាពនៃការបើកការដ្ឋានសាងសង់ខុនដូ Royal Platinum ដែលស្ថិតនៅក្នុងខណ្ឌ​ទួលគោក កាលពីថ្ងៃម្សិលមិញ។ សហការី

Royal Group បើក​ការដ្ឋាន​សាងសង់​ខុនដូ ២៨ ជាន់

ភ្នំពេញៈ គម្រោង​អភិវឌ្ឍន៍ Royal Platinum Condominium កម្ពស់ ២៨ ​ជាន់ ដែល​​ជា​ការ​វិនិយោគ​រួម​គ្នា​រវាង​ក្រុមហ៊ុន Royal Group របស់​លោក​ គិត ម៉េង ជាមួយ​ក្រុមហ៊ុន​មក​ពី​​សិង្ហបុរី Hong Lai Huat Group Limited បាន​ចាប់​ផ្តើម​​សាងសង់​ហើយ​កាល​ពី​ថ្ងៃ​ម្សិលមិញ ដោយ​គ្រោង​នឹង​បញ្ចប់​នៅ​ចុង​ឆ្នាំ ​២០២១។

Royal Platinum Condominium ដែល​មាន​ទីតាំង​ក្នុង​សង្កាត់​បឹងកក់​១ ខណ្ឌ​ទួល​គោក​នេះ ​រួមមាន​បន្ទប់​ស្នាក់​​នៅ​សរុប​ ៨៥១​ យូនីត និង​មាន​ហាង​អាជីវកម្ម​​ ៥០ ​យូនីត​។ ទោះ​យ៉ាង​ណា​តម្លៃ​វិនិយោគ​នៃ​គម្រោង​នេះ ​មិន​ត្រូវ​បាន​ក្រុមហ៊ុន​ប្រកាស​ឲ្យ​ដឹង​នោះ​ទេ​។​

លោក គួច លេងឃាង ប្រធាន​​ផ្នែក​យុទ្ធសាស្រ្ត​ទីផ្សារ​ក្រុមហ៊ុន Royal Hong Lai Huat One Company Limited បាន​និយាយ​ថា Royal Platinum ត្រូវ​បាន​រចនា​ឡើង​ដោយ​ក្រុមហ៊ុន​ស្ថាបត្យកម្ម​ល្បី​​​មួយ​របស់​សិង្ហបុរី ហើយ​​គម្រោង​នេះ​នឹង​សាងសង់​ឡើង​ដោយ​គោរព​តាម​ស្តង់ដា​ប្រណីត​របស់​ប្រទេស ​សិង្ហបុរី។​

លោក​បាន​​ថ្លែង​ថា៖​ «​Royal Platinum អាច​និយាយ​ថា ជា​គម្រោង​ដ៏​ល្អ​សម្រាប់​ការ​រស់​នៅ​ ព្រោះ​ក្រុមហ៊ុន​នឹង​ផ្តោត​ជា​ចម្បង​លើ​គុណភាព និង​បរិស្ថាន បន្ថែម​ពី​លើ​ភាព​អំណោយ​ផល​នៃ​ទីតាំង​​ដែល​នៅ​ចំ​ចំណុច​ប្រសព្វ​ផ្លូវ​ធំៗ​ចំនួន​ ៣»។​

បើ​តាម​លោក លេងឃាង Royal Platinum គឺ​ជា​គម្រោង​​ទី​២ ដែល​ក្រុមហ៊ុន Hong Lai Huat Group Limited វិនិ​យោគ​នៅ​ប្រទេស កម្ពុជា បន្ទាប់​​ពី​គម្រោង D'Seaview Condominium ដែល​ស្ថិត​នៅ​ក្នុង​ខេត្ត​ព្រះសីហនុ។​

គម្រោង​ដែល​មាន​ផ្ទៃ​អគារ​ទំហំ​ ១០ ម៉ឺន​ម៉ែត្រ​ការ៉េ​នេះ នឹង​មាន​អាង​ហែល​ទឹក សួន​ច្បារ កន្លែង​ក្មេង​លេង ភោជនីយដ្ឋាន និង​ចំណត​រថយន្ត​​ធំ​ទូលាយ​​។

លោក Hanna Mark នាយក​​ផ្នែក​ហិរញ្ញវត្ថុ​របស់​ក្រុមហ៊ុន​ Royal​ Group​ បាន​និយាយ​ថា​ Royal Platinum នឹង​ចូលរួម​ចំណែក​ធ្វើ​ឲ្យ​តំបន់​ទួលគោក​កាន់​​តែ​​ទាក់ទាញ និង​សម្បូរ​​បែប។ លោក​បន្ត​ថា​៖ «គម្រោង​នេះ​នឹង​ផ្តល់​​នូវ​កន្លែង​រស់​នៅ​ដ៏​ល្អ និង​ទំនើប​​ដល់​អតិថិជន​ ជាមួយ​នឹង​ទីកន្លែង​កម្សាន្ត និង​​ហាង​ទំនិញ​ជា​ច្រើន​»។​

បច្ចុប្បន្ន​នេះ​ក្រុមហ៊ុន​ Royal Group កំពុង​វិនិយោគ​លើ​អគារ​​ស្នាក់​នៅ​រួម​ចំនួន​ ២ ​កន្លែង​​​នៅ​ក្នុង​រាជធានី​ភ្នំពេញ គឺ North Park និង​ Royal One​។

លោក នួន រិទ្ធី នាយក​ក្រុមហ៊ុន​អចលនទ្រព្យ Khmer Foundation Appraisals បាន​ប្រាប់​ថា ទីតាំង​នៃ​គម្រោង Royal Platinum ​អាច​និយាយ​ថា​មាន​សក្តានុពល​ខ្លាំង​ក្នុង​ការ​ទាក់ទាញ​​អតិថិជន​ឲ្យ​ចង់​ទៅ​រស់​នៅ ព្រោះ​បច្ចុប្បន្ន​​​តំបន់​ទួល​គោក និង​ទួលទំពូង​ កំពុង​វិវឌ្ឍ​ទៅ​​​ជា​កន្លែង​ដែល​​ល្អ​បំផុត​សម្រាប់​រស់​នៅ​ ខណៈ​​តំបន់​​បឹង​កេងកង បាន​ចាប់​ផ្តើម​​ក្លាយ​ជា​តំបន់​ពាណិជ្ជកម្ម​ ​មាន​ភាព​អ៊ូអរ និង​មិន​សូវ​អំណោយ​ផល​សម្រាប់​ការ​រស់​នៅ​។​

លោក​ថ្លែង​ថា៖ «ដោយសារ​គម្រោង​នេះ​ស្ថិត​នៅ​ទីតាំង​ល្អ ហើយ​ការ​រចនា និង​សង់​ឡើង​តាម​បែប​ប្រទេស ​សិង្ហបុរី ​នោះ ខ្ញុំ​​ជឿ​ថា គម្រោង​នេះ​នឹង​អាច​ទាក់ទាញ​អតិថិជន​បាន​ច្រើន​ក្នុង​រយៈពេល​ដ៏​ខ្លី»។​

តាម​លោក រិទ្ធី បច្ចុប្បន្ន​ដី​នៅ​ទីតាំង Royal Platinum អាច​មាន​តម្លៃ​ចន្លោះ​ពី​​ ៣ ៥០០ ​ដុល្លារ ​ទៅ​ដល់​ ៤ ៥០០ ​​ដុល្លារ ​ក្នុង​ ១ ​ម៉ែត្រ​​​ការ៉េ​៕​ LA

អត្ថបទគួរចាប់អារម្មណ៍