ភ្នំពេញៈ គម្រោងអភិវឌ្ឍន៍លំនៅឋានតម្លៃសមរម្យ «លំនៅឋានទីក្រុងរណបសិរីមង្គល» របស់ក្រុមហ៊ុន Worldbridge Homes Co.,Ltd ដែលមានតម្លៃប្រមាណ ៧៣ លានដុល្លារ លើផ្ទៃដីសរុប ២៣ ហិកតានៅក្នុងស្រុកស្អាង ខេត្ដកណ្ដាលនឹងត្រូវបញ្ចប់នៅចុងឆ្នាំនេះ ឬយ៉ាងយូរនៅដើមឆ្នាំ ២០២១ ខាងមុខ។
គម្រោងដែលចាប់ផ្តើមសាងសង់កាលពីដើមឆ្នាំ ២០១៧ នេះត្រូវបានអភិវឌ្ឍដោយក្រុមហ៊ុន Worldbridge Homes Co., Ltd ជាបុត្រសម្ព័ន្ធរបស់ Worldbridge Group ដែលជាក្រុមហ៊ុនក្នុងស្រុកដ៏ធំកំពុងគ្រប់គ្រងលើអគារ The Bridge និង The Peak ជាដើម។ លំនៅឋានក្នុងគម្រោងនេះមានតម្លៃពី ២៥ ០០០ ដុល្លារ ទៅដល់ ៣០ ០០០ ដុល្លារ។
លោក យក់ សុធីរិទ្ធ ប្រធានគ្រប់គ្រងទូទៅនៃក្រុមហ៊ុន Worldbridge Homes Co., Ltd បានប្រាប់ភ្នំពេញប៉ុស្តិ៍កាលពីថ្ងៃពុធថា ការសាងសង់រហូតមកដល់ពេលនេះសម្រេចបានប្រមាណ ៩០ ភាគរយ ហើយដោយក្នុងជំហានទី ១ ដែលមានផ្ទះ ៦០៣ បានបញ្ចប់ការសាងសង់ទាំងស្រុង និងគ្រោងបើកឲ្យអតិថិជនចូលស្នាក់នៅនៅមុនពិធីបុណ្យចូលឆ្នាំខ្មែរនេះ។
លោកថ្លែងថា៖ «តាមគម្រោងក្រុមហ៊ុននឹងប្រគល់ផ្ទះក្នុងជំហានទី ១ នៅអំឡុងដើមខែមេសាខាងមុខ ខណៈការសាងសង់បានរួចរាល់ ១០០ ភាគរយ ដោយនៅសល់តែការភ្ជាប់អគ្គិសនី និងទឹកតែប៉ុណ្ណោះ»។
បើតាមលោក សុធីរិទ្ធ ការសាងសង់គម្រោងនេះត្រូវបានចែកចេញជា ២ ដំណាក់កាលដោយដំណាក់កាលទី ១ ការសាងសង់រួចរាល់ហើយចំណែកដំណាក់កាលទី ២ សាងសង់បានប្រមាណ ៣០ ភាគរយ។
ក្នុងពេលចុះពិនិត្យការដ្ឋានរបស់ក្រុមហ៊ុន Worldbridge Homes កាលពីចន្ទ លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បាននិយាយថា រដ្ឋាភិបាលលើកទឹកចិត្តចំពោះវិស័យឯកជនក្នុងការចូលរួមវិនិយោគលើការសាងសង់លំនៅឋានតម្លៃសមរម្យ ដើម្បីផ្តល់នូវកន្លែងរស់នៅសមរម្យសម្រាប់ប្រជាជន។
លោកថ្លែងថា៖ «នេះជាការចូលរួមរវាងក្រុមហ៊ុន និងរដ្ឋាភិបាល ដើម្បីបំពេញសេចក្តីត្រូវការជូនបងប្អូនប្រជាពលរដ្ឋដែលមានប្រាក់ចំណូលទាប និងមធ្យមក្នុងការមានលទ្ធភាពទិញលំនៅឋានតម្លៃសមរម្យ ដើម្បីរស់នៅផ្ទាល់ខ្លួន»។
លោក សំ សុខនឿន អគ្គនាយកក្រុមហ៊ុនអចលនទ្រព្យ KW សែនសុខ បាននិយាយថា ការកើនឡើងនៃចំនួនប្រជាជនចូលមករស់នៅ និងធ្វើការក្នុងរាជធានីភ្នំពេញបានធ្វើឲ្យមានតម្រូវការលំនៅឋានជាច្រើន ពិសេសលំនៅឋានតម្លៃសមរម្យ។
លោកបន្តថា ការវិនិយោគលើលំនៅឋានតម្លៃសមរម្យនឹងទទួលបានជោគជ័យឆាប់រហ័ស ប្រសិនបើទីតាំងនោះនៅមិនឆ្ងាយពីក្រុងដែលជាកន្លែងប្រមូលផ្តុំដោយសាលារៀន កន្លែងធ្វើការ មន្ទីរពេទ្យ មជ្ឈមណ្ឌលពាណិជ្ជកម្ម និងសេវាកម្មចម្រុះជាច្រើនទៀត។
លោកនិយាយថា៖ «គម្រោងអភិវឌ្ឍន៍របស់ Worldbridge Homes Co., Ltd ល្អ តែការលក់អាចមិនបានលឿននោះទេ ព្រោះវាហាក់នៅឆ្ងាយបន្តិចពីភ្នំពេញ និងមិនបានបើកទូលាយសម្រាប់ការលក់ទៅឲ្យប្រជាជនទូទៅនោះទេ»។
លោកលើកឡើងទៀតថា ទោះយ៉ាងណាដោយសារតែតំបន់នៅកណ្តាលក្រុង អចលនទ្រព្យមានតម្លៃខ្ពស់នោះ ហេតុនេះការសាងសង់លំនៅឋានតម្លៃសមរម្យ (ផ្ទះជាប់ដី) មិនមានទេក្នុងពេលនេះ ដោយមានតែជាប្រភេទអគារស្នាក់នៅរួម (Arakawa Residence) តែប៉ុណ្ណោះ។
សេចក្តីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃទី ១៧ ខែ កុម្ភៈ ឆ្នាំ ២០២០ ឲ្យដឹងថា គិតរហូតមកដល់ពេលនេះ ក្រុមហ៊ុន Worldbridge Homes Co., Ltd បានលក់ផ្ទះអស់ចំនួន ១ ០៨៨ ដែលស្មើនឹង ៤៤ ភាគរយ នៃចំនួនផ្ទះសរុបទាំង ២ ៤៥៧ ខ្នង។ ក្នុងនោះអតិថិជនដែលបានទិញលំនៅឋានក្នុងគម្រោងនេះមាន ២៣ ភាគរយជាមន្ត្រីរាជការ។
របាយការណ៍បូកសរុបលទ្ធផលការងារឆ្នាំ ២០១៩ និងទិសដៅការងារឆ្នាំ ២០២០ របស់ក្រសួងរៀបចំដែនដី នគរូបនីយកម្ម និងសំណង់បានឲ្យដឹងថា មកដល់ពេលនេះនៅកម្ពុជាមានគម្រោងអភិវឌ្ឍន៍លំនៅឋានតម្លៃសមរម្យចំនួន ៥ ដែលស្មើនឹងបន្ទប់ស្នាក់នៅសរុប ៨ ៣៣១ ខ្នងផ្ទះ និងចំនួន ៧ ២៥៦ យូនីត ក្នុងនោះ ២ នៅភ្នំពេញ ២ នៅខេត្តកណ្តាល និង ១ នៅខេត្តបន្ទាយមានជ័យ៕LA