កំណើនសេដ្ឋកិច្ចដ៏ឆាប់រហ័សនិងស្ថិរភាពនយោបាយបានធ្វើឱ្យកម្ពុជាទទួលបានការវិនិយោគថ្មីៗជាបន្តបន្ទាប់ជាក់ស្តែង កាលពីចុងសប្តាហ៍កន្លងមក ក្រុមហ៊ុនមួយរបស់ ជប៉ុន បានបញ្ចេញទុនវិនិយោគចំនួន ៦៥ លានដុល្លារ ដើម្បីសាងសង់មជ្ឈមណ្ឌលពាណិជ្ជកម្មលំដាប់ពិភពលោកនៅក្នុងរាជធានីភ្នំពេញ ដែលមានឈ្មោះថា World Trade Center Phnom Penh។
លោក Kazuya Urata អគ្គនាយកក្រុមហ៊ុន WTCPP Management Co., Ltd ដែលជាម្ចាស់គម្រោងអភិវឌ្ឍន៍អគារ World Trade Center Phnom Penh(WTC Phnom Penh) បានប្រាប់ ប៉ុស្តិ៍ អចលនទ្រព្យ នៅការិយាល័យរបស់លោកកាលពីសប្តាហ៍មុនថា នៅពេលលោកមករាជធានីភ្នំពេញ លើកដំបូងលោកមានគោលបំណងត្រឹមតែជួយបណ្តុះបណ្តាលជនជាតិខ្មែរឲ្យចេះសាងសង់អគារខ្ពស់ៗ កម្រិតស្តង់ដារអន្តរជាតិតែប៉ុណ្ណោះ ប៉ុន្តែជាក់ស្តែងពេលមកដល់រាជធានីភ្នំពេញលោកឃើញមានជនជាតិជប៉ុនច្រើនបានចូលមកវិនិយោគនិងរស់នៅក្នុងប្រទេសកម្ពុជាហើយនៅកម្ពុជាក៏មិនទាន់ឃើញមានមជ្ឈមណ្ឌលពាណិជ្ជកម្មដែលសាងសង់ឡើងតាមស្តង់ដារជប៉ុននៅឡើយ ហេតុនេះទើបលោកសម្រេចចិត្តវិនិយោគគម្រោងមជ្ឈមណ្ឌលពាណិជ្ជកម្មនេះឡើងដើម្បីផ្តល់នូវអ្វីដែលជាស្តង់ដារជប៉ុនសម្រាប់ជនជាតិជប៉ុនដែលមករស់នៅ និងប្រកបរបររកស៊ីនៅកម្ពុជា ព្រមទាំងសម្រាប់ប្រជាជនខ្មែរ និងភ្ញៀវអន្តរជាតិដទៃទៀតផងដែរ។
ទោះយ៉ាងណា លោកបន្តថា៖«គោលដៅធំរបស់ខ្ញុំ គឺការជួយបណ្តុះបណ្តាលជនជាតិខ្មែរឲ្យមានសមត្ថភាពសាងសង់អគារខ្ពស់ ដោយខ្លួនឯង»។
លោកបន្តថា ៖«World Trade Center Phnom Penh នឹងធ្វើឡើងតាមស្តង់ដាររបស់ជប៉ុន និង មានស្ថាបត្យកម្មចម្រុះកម្ពុជា ជប៉ុន»។
World Trade Center Phnom Penh មានកម្ពស់ ២៣ ជាន់ និងក្រោមដីចំនួន ៤ ជាន់ជាចំណតរថយន្ត។ គម្រោងនេះសាងសង់នៅលើផ្ទៃដីទំហំ ៣ ៣៧៤ ម៉ែត្រការ៉េ និងផ្ទៃអគារទាំងមូល មានទំហំ ៤៣ ៧២៤ ម៉ែត្រការ៉េ។
ទាក់ទងការជ្រើសរើសទីតាំង លោក Kazuya Urata បញ្ជាក់ថា ទួលទំពូងជាតំបន់ពាណិជ្ជកម្មដ៏រស់រវើក និងសម្បូរដោយអាផាតមិន និងខុនដូព្រមទាំងមានមនុស្សរស់នៅជាច្រើន ប៉ុន្តែរហូតមកដល់ពេលនេះ ទីនោះនៅមិនទាន់មានអគារពាណិជ្ជកម្មកម្រិតស្តង់ដារអន្តរជាតិនៅឡើយទេ។ នេះជាហេតុផលចម្បងដែលលោកជ្រើសរើសយកតំបន់នេះសម្រាប់វិនិយោគ ហើយគិតថាងាយនឹងទទួលបានជោគជ័យ។
លោក Kazuya Urata បានបន្តថាវិស័យអចលនទ្រព្យនៅកម្ពុជា នឹងមានភាពរីកចម្រើនបន្តទៀតនាពេលអនាគត ដោយសារកំណើនសេដ្ឋកិច្ច និងកំណើនប្រាក់ចំណូលរបស់ប្រជាពលរដ្ឋខ្មែរ។
លោកបានបន្តថា ហេតុផលដែលលោកសម្រេចចិត្តវិនិយោគនៅកម្ពុជាដោយសារកត្តាមួយចំនួនដូចជា ទី ១ ប្រទេសកម្ពុជាចាយប្រាក់ដុល្លារដែលជាមូលដ្ឋានដ៏ល្អផ្តល់ទំនុកចិត្តដល់អ្នកវិនិយោគ ទី២ ការផ្ញើសាច់ប្រាក់ពីកម្ពុជាទៅបរទេសមានភាពងាយស្រួល និងទី៣ កម្ពុជាផ្តល់សិទ្ធិឲ្យជនបរទេសបោះទុន ១០០ ភាគរយ លើក្រុមហ៊ុនរបស់ខ្លួនឯងបាន។
គម្រោង WTC Phnom Penh នឹងសាងសង់ដោយក្រុមហ៊ុន URATA S.E Cambodia Co, Ltd ដែលនឹងចាប់ផ្តើមសាងសង់នៅខែមេសាខាងមុខ និងគ្រោងបញ្ចប់នៅខែមីនា ឆ្នាំ២០២១ ហើយនឹងបើកដំណើរការក្នុងខែមិថុនាឆ្នាំ២០២១។
ទាក់ទងនឹងបរិយាកាសវិនិយោគនៅកម្ពុជា លោក Kazuya Arata បានប្រាប់ថា លោកសង្កេតឃើញបរិយាកាសនយោបាយនៅកម្ពុជា មានភាពល្អប្រសើរ ហើយការបោះឆ្នោតជាតិនាឆ្នាំនេះក៏មិនមានអ្វីគួរឲ្យព្រួយបារម្ភទេ ព្រោះនៅប្រទេសណាក៏ដោយពេលកៀកនឹងការបោះឆ្នោតតែងមានការប្រែប្រួលបន្តិចបន្តួច ប៉ុន្តែក្រោយការបោះឆ្នោតបញ្ចប់ទៅអ្វីៗនឹងដំណើរការដោយរលូន។
គម្រោង WTC Phnom Penh ស្ថិតតាមបណ្តោយផ្លូវលេខ ៤៣០ ក្នុងសង្កាត់ទួលទំពូងទី ២ ខណ្ឌចំការមន រាជធានីភ្នំពេញ។ តាមគម្រោងចាប់ពីជាន់ផ្ទាល់ដីដល់ជាន់ទី៣ នឹងត្រូវប្រើប្រាស់ជាហាងលក់ទំនិញចាប់ពីជាន់ទី៤ ដល់ជាន់ទី១១ ជាការិយាល័យជួលពីជាន់ទី១២ដល់ជាន់ទី២២ ប្រើប្រាស់ជាសណ្ឋាគារដែលមានចំនួន ២២០ បន្ទប់ និងជាន់លើបំផុត មានអាងហែលទឹក និង Skybar។
ទេសរដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា បានមានប្រសាសន៍ថា គម្រោងនេះនឹងចូលរួមចំណែកក្នុងការអភិវឌ្ឍសេដ្ឋកិច្ចកម្ពុជា ក៏ដូចជាជួយពង្រឹងចំណងទាក់ទងផ្នែកសេដ្ឋកិច្ច វប្បធម៌ រវាងព្រះរាជាណាចក្រកម្ពុជា និងជប៉ុនពិសេសនឹងផ្តល់ឱកាសដល់យុវជនខ្មែរក្នុងការទទួលបានការងារធ្វើកាន់តែច្រើន។
ស្ថាបនិក និងជាអគ្គនាយកក្រុមហ៊ុន Mekong Properties លោក ថាច ចាន់នី បានថ្លែងថា តំបន់ទួលទំពូងភាគច្រើនមានការអភិវឌ្ឍលំនៅឋាន និងអាផាតមិនសម្រាប់ជួលច្រើនដោយសារតម្លៃដីធ្លីនៅតំបន់នេះនៅទាបជាងតំបន់បឹងកេងកង ១ និងបឹងកេងកង ២។ ហេតុនេះបើមានការវិនិយោគគេអាចជួលបានក្នុងតម្លៃពី ១២ ទៅ ១៣ ដុល្លារ ធៀបទៅនឹងតំបន់បឹងកេងកង ១ ដែលមានតម្លៃ ១៨ ដុល្លារឡើងទៅក្នុង ១ ម៉ែត្រការ៉េ។
លោកបន្តថា ៖ «គម្រោងរបស់ក្រុមហ៊ុន ជប៉ុន ដែលវិនិយោគនៅតំបន់នេះ នឹងធ្វើឲ្យតំបន់នេះមានភាពទាក់ទាញដែលប្រៀបដូចជាមេដែកឆក់មូយដែលនឹងជួយឲ្យតំបន់នេះមានតម្លៃបន្ថែម»។
លោកបានបន្តថា ៖ «បើយើងពិនិត្យមើលខណ្ឌសែនសុខ ប្រសិនបើមិនមានផ្សារទំនើប Aeon Mall2 និងផ្សារ Makro តំបន់នេះមិនទាក់ទាញបែបនេះទេ»។ លោកប្រាប់ទៀតថា ៖ «ការវិនិយោគរបស់ជប៉ុនលើមជ្ឈមណ្ឌលពាណិជ្ជកម្មធំបែបនេះខ្ញុំគិតថាវានឹងទទួលបានជោគជ័យ»។
លោក ខាត់ សុវណ្ណ អគ្គនាយកក្រុមហ៊ុន Camtop Property Group បានថ្លែងថា បច្ចុប្បន្នតំបន់ទួលទំពូងរីកចម្រើនទាំងវិស័យលំនៅឋាន និងមជ្ឈមណ្ឌលពាណិជ្ជកម្មពិសេសហាងល្បីៗកំពុងបាញ់ឆ្ពោះទៅកាន់តំបន់នេះ។
លោកបន្តទៀតថា អាផាតមិននៅតំបន់ទួលទំពូងក៏មានដំណើរការល្អដែរ ដោយសារវាមានតម្លៃសមរម្យហើយទួលទំពូងជាតំបន់ដែលជនបរទេសស្គាល់ច្រើន និងមានហេដ្ឋារចនាសម្ព័ន្ធល្អ។
លោកមានប្រសាសន៍ថា ៖ «គម្រោងវិនិយោគ WTC Phnom Penh ទទួលជោគជ័យ ឬអត់វាអាស្រ័យលើគាត់សិក្សាពីទីផ្សារបែបណា និងការឌីហ្សាញ ព្រមទាំងការគ្រប់គ្រង។
លោកបានបញ្ជាក់ថា ៖«ខ្ញុំទទួលស្គាល់គុណភាព និងការដេគ័ររបស់ជប៉ុនល្អ តែការចំណាយច្រើនក៏ធ្វើឲ្យតម្លៃវិនិយោគខ្ពស់ ដែលធ្វើឲ្យតម្លៃសេវាកម្មកើនខ្ពស់ ហេតុនេះអ្នកវិនិយោគគួរសិក្សារកចំណុចកណ្តាលមួយ»៕