.jpg)
Yellow Tower ជាអគារមួយដែលហ៊ុមព័ទ្ធទៅដោយរុក្ខជាតិពណ៌បៃតង និងមានការតុបតែងផ្នែកខាងក្នុងជាការិយាល័យធ្វើការដែលមានបំពាក់ប្រព័ន្ធបច្ចេកវិទ្យាដ៏ទំនើបៗ។
អគារដែលមានកម្ពស់ ៧ ជាន់នេះគឺជាការិយាល័យដ៏ស្រស់ស្អាតមួយក្នុងរាជធានីភ្នំពេញ។ វល្លិ និងរុក្ខជាតិដែលវារតោងពីក្រោមដល់លើនោះបានធ្វើឲ្យអគារមួយនេះហាក់ពួនសំងំក្នុងម្លប់ធម្មជាតិដ៏ត្រឈៃ។
ជាន់ដំបូល និងរានខាងមុខគ្រប់ជាន់ទាំងអស់ផ្តល់នូវទេសភាពដ៏ត្រកាលតាមបណ្តោយឆ្នេរទន្លេក្នុងតំបន់ជ្រោយចង្វារ។ គ្រប់ជាន់ទាំងអស់សុទ្ធតែមានការតុបតែង និងមុខងារផ្សេងៗពីគ្នាយ៉ាងពិសេសព្រមទាំងមានបរិយាកាសខ្យល់ និងពន្លឺចេញចូលបានល្អទៀតផង។
គ្រឿងសង្ហារិមដែលប្រើសម្រាប់ការតុបតែងក៏មានភាពទំនើបទាន់សម័យផងដែរសម្រាប់កន្លែងធ្វើការដែលប្រកបដោយភាពស្ងប់ស្ងាត់ សុខុដុមរមនា និងផ្តល់នូវបរិយាកាសបែបច្នៃប្រឌិតដល់អ្នកមកធ្វើការនៅទីនេះ។ មានតុធំៗ និងតាបស្នូឃ័រ សាឡុងអង្គុយ និងសៀវភៅជាច្រើនក្បាលសម្រាប់អាន និងកន្លែងអង្គុយទទួលទានសុរាលម្ហែអារម្មណ៍ផងដែរ។ ជាន់នីមួយៗក៏មានផ្ទះបាយទុកសម្រាប់ពេលចម្អិនម្ហូបអាហារ ។
គ្រប់គ្រងដោយក្រុមហ៊ុន Outpost អគារការិយាល័យធ្វើការអង្គុយរួមគ្នានេះ មាននូវកន្លែងអង្គុយជាច្រើន និងមានតុធ្វើការព្រមទាំងមានបន្ទប់ធ្វើការមានម៉ាស៊ីនត្រជាក់ដាច់ដោយឡែកពីគេផងដែរ ដោយរួមមានទាំងសេវាអ៊ីនធឺណិតផ្តល់ជូនជាស្រេច និងបន្ទប់ IT គ្រប់ជាន់ទាំងអស់។ ជ្រើសរើសកន្លែងធ្វើការតាមអារម្មណ៍របស់អ្នក៖ អង្គុយធ្វើការក្នុងបន្ទប់ម៉ាស៊ីនត្រជាក់ដាច់ដោយឡែកពីគ្នា ឬអង្គុយជាមួយគេឯងក្នុងកន្លែងធ្វើការដែលពោរពេញទៅដោយបរិយាកាសគួរឲ្យចាប់អារម្មណ៍។
អ្នកក៏អាចជួលបន្ទប់ដោយឡែកពីគេតាមតម្រូវការដោយមានដល់ទៅ ៨ បន្ទប់ ហើយបន្ទប់នីមួយៗមានទំហំធំទូលាយ និងតុបតែងយ៉ាងល្អប្រណីត៕
