ក្លាយខ្លួនជាសហគ្រិនវ័យក្មេងដ៏ជោគជ័យ វាជាក្តីស្រមៃរបស់មនុស្សជាច្រើន ប៉ុន្តែក្នុងនាមជាសហគ្រិនវ័យក្មេងវាមិនមែនជារឿងដែលងាយស្រួលនោះទេ គឺវាទាមទារឲ្យមានមហិច្ឆតាខ្ពស់ ភាពឆ្លាតវៃ កម្លាំងចិត្តដើម្បីបង្កើតអ្វីមួយដែលថ្មី និងការប្តេជ្ញាចិត្ត ជម្នះរាល់ឧបសគ្គដើម្បីសម្រេចឲ្យដល់គោលដៅ និងទទួលបានជោគជ័យ ហើយមិនមែនគ្រប់គ្នាសុទ្ធតែអាចធ្វើបាននោះទេ។
ដោយមានចំណង់ចំណូលចិត្តចង់បង្កើតអាជីវកម្មខ្លួនឯង និងមានចំណង់ចំណូលចិត្តធ្វើនំខេកទើបធ្វើឲ្យបងប្អូនស្រី ២ នាក់កំពុងចាប់ដៃគ្នាបើកហាងធ្វើនំខេកជាមួយនឹងចក្ខុវិស័យអាជីវកម្មវែងឆ្ងាយ ដែលបង្កើតបាននូវអាជីវកម្មមួយកំពុងទទួលបានជោគជ័យ។
ចេញពីក្តីស្រឡាញ់ និងការចង់មានអាជីវកម្មផ្ទាល់ខ្លួនបានជំរុញឲ្យបងប្អូនបង្កើត ២ នាក់ បើកហាងនំខេក «ផ្ទះនំខេក &នំប៉័ង» សាខាទី ១ ស្ថិតនៅផ្លូវកម្ពុជាក្រោម រាជធានី-ភ្នំពេញក្នុងឆ្នាំ ២០១៦។ ត្រឹមរយៈពេលដ៏ខ្លី អាជីវកម្មមួយនេះត្រូវបានពង្រីករហូតដល់ ៦ សាខាដោយផ្តល់ឱកាសការងារដល់ប្រជាជនខ្មែរជាង ៦០ នាក់។
ហាងលក់នំខេករបស់ពួកគេមានលក់នំខេកគ្រប់តម្រូវការ សម្រាប់ពិធីខួបកំណើត មង្គលការ និងកម្មវិធីផ្សេងៗទៀតដែលកំពុងទាក់ទាញតម្រូវការពីបណ្តាខេត្តមួយចំនួនដូចជា ខេត្តកណ្តាល កំពង់ស្ពឺ និងខេត្តកោះកុង ជាដើម។
កញ្ញា ធា វួចអេង ជាសហគ្រិនវ័យក្មេង និងជាម្ចាស់អាជីវកម្ម «ផ្ទះនំខេក និងនំប៉័ង» បានឲ្យភ្នំពេញប៉ុស្តិ៍ដឹងថា៖ «ខ្ញុំបើកហាងនំខេកនេះឡើងគឺដោយសារតែខ្ញុំស្រឡាញ់ខាងការរចនាម៉ូដនំខេកស្អាតៗ និងប្លែកៗ ម្យ៉ាងវិញទៀតខ្ញុំអត់ចូលចិត្តធ្វើការឲ្យគេ ខ្ញុំចូលចិត្តរកស៊ីខ្លួនឯង។ ក្នុងឆ្នាំ ២០១៦ បងស្រីខ្ញុំ និងខ្ញុំបានទៅរៀនធ្វើនំខេកបន្ថែមនៅទីក្រុងបាងកក ពីព្រោះខ្ញុំចង់បានបទពិសោធ និងរបៀបធ្វើនំខេកជាក់ស្តែង»។
កញ្ញា វួចអេង និងបងស្រីរបស់គាត់បានក្លាយជាសហគ្រិនស្ត្រីវ័យក្មេងដ៏ជោគជ័យដែលបានបង្កើតយីហោផ្ទាល់ខ្លួន និងទទួលបានឯករាជភាពផ្នែកហិរញ្ញវត្ថុផងដែរ។
យោងតាមគេហទំព័រអន្តរជាតិ Food and Wine ចេញផ្សាយក្នុងខែមីនា ឆ្នាំ ២០១៨ បានឱ្យដឹងថា ៨៥% នៃអ្នកដែលរៀនមុខវិជ្ជា ធ្វើនំខេក នំដុត នៅវិទ្យាស្ថានធ្វើម្ហូបសហរដ្ឋអាមេរិក គឺជាស្ត្រី បើប្រៀបធៀបទៅនឹង ៥០ ភាគរយ នៃអ្នកចុះឈ្មោះចូលរៀនទាំងមូល។
យោងតាមសាជីវកម្មហិរញ្ញវត្ថុអន្តរជាតិដែលជាផ្នែកមួយនៃធនាគារពិភពលោកបានរាយការណ៍ថា៖ «ស្វែងយល់ពីឱកាសសម្រាប់សហគ្រាសខ្នាតតូច និងមធ្យមដែលគ្រប់គ្រងដោយស្ត្រីនៅកម្ពុជា» ភាគច្រើននៃអាជីវកម្មបែបនេះត្រូវបានដំណើរការដោយស្ត្រី។
របាយការណ៍ឆ្នាំ ២០១៩ បានបង្ហាញថា៖ «ការពិតស្ត្រីដែលជាម្ចាស់អាជីវកម្មភាគច្រើននៅក្នុងប្រទេស (មាន ៦១ ភាគរយ) ខ្ពស់ជាងបណ្តាប្រទេសអាស៊ានជាច្រើន»។
បច្ចុប្បន្ននេះ ស្ត្រីវ័យក្មេងកម្ពុជាកំពុងចាប់ផ្តើមប្រកួតប្រជែងនឹងវិជ្ជាជីវៈដែលគ្រប់គ្រងដោយបុរស និងក្លាយជាសហគ្រិនដូចជាកញ្ញា វួចអេង ជាដើម ហើយមិនត្រឹមតែដើម្បីជោគជ័យប៉ុណ្ណោះទេ ប៉ុន្តែថែមទាំងដើម្បីពង្រីកអំណាចស្ត្រីផងដែរ។
កញ្ញា វួចអេង ថ្លែងថា៖ «តាមពិតទៅខ្ញុំមិនចូលចិត្តធ្វើការឲ្យគេទេ គឺខ្ញុំចូលចិត្តមានអាជីវកម្មផ្ទាល់ខ្លួន។ មុនពេលខ្ញុំចាប់ផ្តើមអាជីវកម្មធ្វើនំខេកនេះ គឺខ្ញុំមានតូបមួយលក់កាហ្វេ និងតែបៃតង»។
កញ្ញាបន្ថែមថា៖ «នំខេករបស់ខ្ញុំផ្តោតសំខាន់លើរសជាតិ ម៉ូដ និងតម្លៃ ប៉ុន្តែអ្វីដែលពិសេសបំផុតសម្រាប់នំខេករបស់ខ្ញុំគឺរសជាតិនៅខាងក្នុង។ ហើយចំពោះម៉ូដវិញគឺខ្ញុំតែងតែមានម៉ូដថ្មីៗជានិច្ច។ ហាងនំខេករបស់ខ្ញុំមាន ៤ រសជាតិគឺតយដូង សូកូឡា ទុរេន និងស្ត្រប៊េរី ហើយរសជាតិដែលទទួលបានការគាំទ្រច្រើនជាងគេគឺរសជាតិតយដូង»។
«ហាងខ្ញុំមានលក់នំខេកគ្រប់ទំហំ ដែលមានតម្លៃចាប់ពី ៥ ដុល្លារឡើងទៅ ហើយនំធំបំផុតដែលយើងធ្លាប់ធ្វើជូនអតិថិជនគឺមានទម្ងន់ប្រហែល ៣០ គីឡូក្រាម។ ចំពោះតម្លៃវិញគឺសមរម្យដែលមានចាប់ពីតម្លៃ ៥ ដុល្លារឡើងទៅ»។
បច្ចុប្បន្នតម្រូវការនំខេកកំពុងតែពេញនិយម ម្យ៉ាងគឺដោយសារប្រាក់ចំណូលគ្រួសារមានការកើនឡើងដែរ ខណៈមានការកើនឡើងនៃអ្នកប្រើប្រាស់បណ្តាញសង្គម និងការធ្វើពាណិជ្ជកម្មតាមអ៊ីនធឺណិតបានធ្វើឱ្យអាជីវកម្មរបស់កញ្ញា វួចអេង កាន់តែមានការរីកចម្រើន។
កញ្ញាបានលើកឡើងថា៖ «បច្ចុប្បន្នប្រជាជនកម្ពុជាមានការពេញនិយម នំខេកច្រើនធៀបនឹងរយៈពេល ១០ ឆ្នាំមុន ខ្ញុំមើលឃើញថា មានភាពខុសគ្នាខ្លាំង ជាពិសេសនំខេកសម្រាប់កម្មវិធីខួបកំណើត»។
«ខ្ញុំក៏តែងតែឡាយលក់តាមហ្វេសប៊ុកដែរ ហើយអតិថិជនប្រមាណ ៥០ ភាគរយស្គាល់ហាងរបស់ខ្ញុំតាមរយៈការឡាយរបស់ខ្ញុំ»។
កញ្ញា វួចអេង បានលើកឡើងថា៖ «ជីវភាពប្រជាជនកាន់តែប្រសើរ និងមានកម្មវិធីផ្សេងៗកាន់តែច្រើន ជាពិសេសពិធីខួបកំណើត ដែលសុទ្ធតែមានតម្រូវការនំខេក។ ជាទូទៅកម្មវិធីអ្វីមួយ បើមាននំខេកនឹងធ្វើឲ្យពិធីនោះកាន់តែរីករាយ និងពិសេសទ្វេឡើង»៕