ក្រុមហ៊ុនគ្រប់គ្រងកម្មវិធី Kilat កំពុងធ្វើឱ្យប្រសើរឡើងនូវវិធីដែលឧស្សាហកម្មមួយនេះប្រតិបត្តិការជាមួយកន្លែងនិម្មិតប្រកបដោយភាពច្នៃប្រឌិតដែលបង្កើនតម្លៃនៃការរៀបចំកម្មវិធីឲ្យកាន់តែរស់រវើក។
«កន្លែងនិម្មិត (Virtual Venue ) គឺជាការច្នៃប្រឌិតថ្មីមួយដែលអនុញ្ញាតឱ្យយើងបន្តក្តីស្រលាញ់របស់យើងចំពោះកម្មវិធី ដោយអនុវត្តតាមវិធានការណ៍ការពារជំងឺកូវីដ១៩។ វាគឺជាដំណោះស្រាយកម្មវីធីបែបឌីជីថលចុងក្រោយដែលអាចបំពេញតម្រូវការសម្រាប់គ្រប់កម្មវិធីទាំងអស់»។
លោក Alex Dance ប្រធានផ្នែកនៃក្រុមហ៊ុន Kilat មានប្រសាសន៍ថា៖ «ភាពបត់បែននៃកន្លែងនិម្មិតអនុញ្ញាតឱ្យវាសម្របខ្លួនទៅនឹងកម្មវិធីធំៗដូចជាកម្មវិធីសន្និសីទ ពិធីប្រកួតលេងហ្គេមតាមអនឡាញ ការប្រគំតន្ត្រី ពិធីសម្ពោធផលិតផល និងព្រឹត្តិការណ៍ធំៗជាច្រើនទៀត។ ភាពស្រស់ស្អាតនៃកន្លែងនិម្មិតគឺបានទៅដល់ទស្សនិកជនយ៉ាងច្រើនក្នុងតម្លៃទាបជាងព្រឹត្តិការណ៍ដែលធ្វើនៅក្នុងសាល»។
លោក Dance បន្តថា៖ «Kilat រីកចម្រើននៅក្នុងឧស្សាហកម្មដែលកំពុងមានការប្រកួតប្រជែងកាន់តែខ្លាំងមួយនេះដោយការច្នៃប្រឌិតថ្មីៗ»។
«ស្មារតីរបស់យើងគឺជួយលើកស្ទួយអតិថិជនរបស់យើងជានិច្ច។ ប្រសិនបើអតិថិជននិយាយថា «យើងចង់បាននេះ» នោះយើងនឹងឆ្លើយថា «មិនអីទេអ្នកអាចបានវា ប៉ុន្តែចំពោះវិធីនេះ ហេតុអីយើងមិនធ្វើឲ្យវាធំជាងនេះ»។ ចូរធ្វើអ្វីមួយដែលមិនធ្លាប់មានពីមុននៅកម្ពុជា»។
លោកបញ្ជាក់ថា៖ «យើងខិតខំឲ្យក្លាយជាអ្នកដំបូងគេដែលធ្វើអ្វីៗទាំងនេះតាមរយៈការនាំមកនូវបច្ចេកវិទ្យាផ្សេងៗគ្នា ហើយយើងពិតជាមានមោទនភាពចំពោះខ្លួនឯងដែលយើងបានក្លាយជាក្រុមហ៊ុនរៀបចំកម្មវិធីដ៏រឹងមាំបំផុតមួយនៅក្នុងប្រទេសកម្ពុជា»។
Kilat ជាភាសាម៉ាឡេមានន័យថា «ផ្លេកបន្ទោរ» ហើយអាចត្រូវបានប្រើដើម្បីពិពណ៌នាអំពីអ្វីមួយដែលត្រូវបានធ្វើជាមួយឧត្តមភាពបែបនេះ ដែលពិបាកសម្រាប់អ្នកដទៃធ្វើតាម។ ជាមួយនឹងស្មារតីនេះ ក្រុមហ៊ុន Kilat បានទាក់ទាញអតិថិជនដែលជាម៉ាកល្បីៗជាច្រើន។
ក្នុងនោះមានដូចជា H&M, Manulife ហុងកុង, ស្រាបៀរ Tiger, អាកាសចរណ៍ Emirates រថយន្ត Chevrolet និងទូរស័ព្ទ Oppo ដែលជាអតិថិជនរបស់ខ្លួន។ Kilat ក៏មានផ្តល់សេវាកម្មដល់អតិថិជនដូចជា Smart និងគាំទ្រដល់សិល្បករអន្តរជាតិល្បីៗដែលពួកគេបានមកសម្តែងនៅប្រទេសកម្ពុជាក្នុងនោះរួមមានតារាចំរៀងអាមេរិកលោក Charlie Puth និង Demi Lovato ក៏ដូចជាតារាកូរ៉េលោក Rain ជាដើម។
លោក Dance ថ្លែងថា៖ «យើងត្រូវបានអ្នកនៅក្នុងឧស្សាហកម្មធំៗជាច្រើនបានទាក់ទង ដោយសារតែយើងមានបណ្តាញធំទូលាយនៅក្នុងឧស្សាហកម្មរៀបចំកម្មវិធីអាស៊ានយើងក៏ផ្តល់សេវាកម្មជូនអតិថិជនអន្ដរជាតិដែលប្រតិបត្តិការនៅកម្ពុជាផងដែរ»។
ខណៈប្រទេសកម្ពុជាកំពុងចូលទៅក្នុង «បទដ្ឋានថ្មី» ក្រុមហ៊ុន Kilat បន្ទាប់ពីទទួលបានកំណត់ត្រាដ៏ល្អក្នុងឆ្នាំ ២០១៩ ក្រុមហ៊ុនក៏កំពុងរក្សានូវភាពរឹងមាំរបស់ខ្លួននៅក្នុងទីផ្សារតាមរយៈទំនុកចិត្ត និងភាពបត់បែន។
«កាលពីដើមឆ្នាំនេះយើងបានពង្រីកបន្ថែមដោយបង្កើតផ្នែកទីផ្សារឌីជីថល និងផ្នែកស្រាវជ្រាវ និងអភិវឌ្ឍន៍ឌីជីថលដែលមានយុវជនកម្ពុជាមានទេពកោសល្យចូលរួម។ ផ្នែកទាំងនេះគឺទទួលខុសត្រូវចំពោះខ្លឹមសារ LED របស់យើង។ ថ្មីៗនេះក្រុមបានបង្កើតវីដេអូ EDM Virtual Venue និម្មិតគំរូ ដោយពីមុនយើងជួលគេធ្វើមកពីក្រៅ ប៉ុន្តែពេលនេះយើងអាចធ្វើបានដោយខ្លួនឯង»។
លោក Dance លើកឡើងថាដោយសារទីផ្សារនៅក្មេងខ្ចីបើធៀបនឹងប្រទេសជិតខាង ក្រុមហ៊ុនគ្រប់គ្រងកម្មវិធីនានានៅកម្ពុជា ធ្វើការលើគ្រប់ផ្នែកទាំងអស់។
«ក្រៅពីពិធីអាពាហិពិពាហ៍ គ្មានក្រុមហ៊ុនគ្រប់គ្រងកម្មវិធីណាមួយធ្វើតែមួយផ្នែកនោះទេ គឺមានច្រើនផ្នែកដូចជាកម្មវិធីសន្និសីទ ការប្រគំតន្ត្រី និងពិធីរាត្រីសមោសរ ជាដើម។ រៀបចំការប្រគំតន្ត្រីគឺជាជំនាញឯកទេសរបស់យើងពីព្រោះយើងមានឧបករណ៍គ្រប់ប្រភេទទាំងអស់ដូចជាឧបករណ៍ប្រព័ន្ធសំឡេង ភ្លើងបំភ្លឺអេក្រង់ និងអ្នករៀបចំកម្មវិធីដែលមានពិសោធន៍ខ្ពស់ យើងអាចរៀបចំកម្មវិធីធំៗបាន។ យើងមានកេរ្តិ៍ឈ្មោះល្បីល្បាញក្នុងចំណោមក្រុមហ៊ុនស្តង់ដាអន្តរជាតិជាច្រើន ហើយនេះគឺជាអ្វីដែលយើងចង់នាំយកមកកាន់ប្រទេសកម្ពុជា»។
បុរសសញ្ជាតិអង់គ្លេសរូបនេះថ្លែងថា៖ «កម្មវិធី Kilat Events គឺមានលក្ខណពិសេសប្លែកពីគេ ដោយសារតែយើងមានផ្នែកបច្ចេកទេសដែលមានមុខងារពេញលេញជាមួយនឹងឧបករណ៍ផ្ទាល់ខ្លួនដែលអនុញ្ញាតឱ្យយើងនាំមកនូវគំនិតច្នៃប្រឌិត និងកំណត់ស្តង់ដាបច្ចេកទេសឲ្យកាន់តែខ្ពស់»។
កម្មវិធីនិម្មិតរបស់ Kilat កំពុងបន្តជាមួយនឹងគំនិតផ្តួចផ្តើមគួរឱ្យចាប់អារម្មណ៍ជាច្រើនដែលត្រូវបានដាក់ឱ្យដំណើរការតាមអនឡាញដូចជាកម្មវិធី «Tech Talk with Kevin » និងមាតិកាក៏ដូចជាកម្មវិធីផ្សេងទៀត ខណៈកម្មវិធី Battle of the Bands ដ៏មានប្រជាប្រិយភាពគ្រោងនឹងវិលត្រលប់មកកាន់កញ្ចក់ទូរទស្សន៍ក្នុងព្រះរាជាណាចក្រកម្ពុជាវិញនៅខែតុលាខាងមុខគឺនឹងមានផ្សាយលើកញ្ចក់ទូរទស្សន៍ប៉ុស្តិ៍ MyTV។
«ច្បាស់ណាស់ការផ្លាស់ប្តូរឆ្ពោះទៅរកពិភពឌីជីថលបានកើតឡើងរួចហើយ ដូច្នេះយើងដឹងថាកម្មវិធីនានានឹងនៅតែបន្តមាន។ ការផ្សាយបន្តផ្ទាល់ និងយុទ្ធនាការទីផ្សារចម្រុះទំនងនឹងធ្វើឡើងនៅពេលអនាគត។ កម្មវិធីរូបវ័ន្តជាក់ស្តែងនឹងនៅតែបន្តមាន បើទោះបីជាមានវិធានការរឹតត្បិតដើម្បីការពារសុវត្ថិភាពសុខភាពក្តី»។
លោក Dance បានបន្តថា៖ «យើងត្រូវតែមានភាពបត់បែន និងសម្របខ្លួនទៅនឹងការផ្លាស់ប្តូរសង្គមដូចឧស្សាហកម្មដទៃទៀតដែរ។ ការតស៊ូរបស់យើងបានជំរុញឱ្យមានការច្នៃប្រឌិត ហើយបច្ចុប្បន្នយើងអាចផ្តល់ជូននូវសេវាកម្មទីផ្សារឌីជីថលបន្ថែមលើកន្លែងនិម្មិត។ យើងនឹងបន្តអភិវឌ្ឍគំនិតផ្តួចផ្តើមថ្មីៗ និងបន្តកិច្ចខិតខំប្រឹងប្រែងសម្រាប់អនាគតកាន់តែត្រចេះ ត្រចង់»៕