ធនាគារ ស្ថាបនា ត្រូវបានទទួលស្គាល់ចំពោះភាពជឿនលឿនដ៏ខ្លាំងក្លារបស់ខ្លួនគិតចាប់តាំងពីបានក្លាយជាធនាគារពាណិជ្ជក្នុងឆ្នាំ ២០១៦ ដោយក្នុងនោះទទួលបានពានរង្វាន់អន្តរជាតិជាច្រើនជាមួយនឹងកិត្យានុភាពជាច្រើនទៀត ដែលរាប់បញ្ចូលទាំងកម្មវិធីធនាគារលើទូរស័ព្ទដៃ Sathapana Mobile របស់ខ្លួនផងដែរ។
លោក លឹម អូន ប្រធាននាយកប្រតិបត្តិនៃធនាគារ ស្ថាបនា បានឱ្យកាសែតភ្នំពេញប៉ុស្តិ៍ដឹងអំពីសារៈសំខាន់នៃពានរង្វាន់ទាំងនោះ និងការបន្តប្រកាន់យកនូវបច្ចេកវិទ្យាហិរញ្ញវត្ថុ ក៏ដូចជាផែនការនាពេលអនាគតរបស់ធនាគារ ស្ថាបនា។
ការទទួលពានរង្វាន់ទាំងនេះគឺជាព្រឹត្តិការណ៍ដ៏សំខាន់នៅក្នុងការអភិវឌ្ឍ ធនាគារ ស្ថាបនា ឱ្យក្លាយជាធនាគារពាណិជ្ជឈានមុខគេ និងជាអ្នកដើរតួនាទីយ៉ាងសំខាន់នៅក្នុងសេដ្ឋកិច្ចឌីជីថលរបស់ប្រទេសកម្ពុជា។ តើវាមានអត្ថន័យយ៉ាងដូចម្តេចចំពោះលោក?
ពិតណាស់ យើងពិតជារីករាយដែលទទួលបានពានរង្វាន់ទាំងនេះ ហើយក៏រីករាយចំពោះការទទួលស្គាល់អំពីភាពច្នៃប្រឌិតនៃប្រព័ន្ធឌីជីថល ដែលយើងបានផ្តល់ជូនអតិថិជន តាមរយៈ Sathapana Mobile។ ខ្ញុំសូមកោតសរសើរខ្ពស់ចំពោះកិច្ចខិតខំប្រឹងប្រែង និងការលះបង់របស់ក្រុមការងារដែលមានទស្សនវិស័យរួមក្នុងការវិវឌ្ឍអាជីវកម្មរបស់យើង សម្រាប់សតវត្សរ៍ទី ២១ នេះ។
យើងបានក្លាយខ្លួនពីស្ថាប័នហិរញ្ញវត្ថុខ្នាតតូចដែលប្រតិបត្តិការនៅក្នុងប្រទេសកម្ពុជាគិតចាប់តាំងពីឆ្នាំ ១៩៩៥ មករហូតដល់ក្លាយជាធនាគារឌីជីថលឈានមុខគេមួយដែលកំពុងគាំទ្រដល់ការអភិវឌ្ឍសេដ្ឋកិច្ចឌីជីថលរបស់ប្រទេសកម្ពុជា។ ប៉ុន្តែដំណើរនេះវាគ្រាន់តែជាការចាប់ផ្តើមប៉ុណ្ណោះ ហើយយើងកំពុងរិះរកវិធីផ្សេងទៀតដែលក្នុងនោះបច្ចេកវិទ្យាអាចកែលម្អសេវាកម្ម និងប្រតិបត្តិការរបស់យើងឱ្យកាន់តែមានប្រសិទ្ធភាពសម្រាប់អតិថិជន។
យើងបានឮយ៉ាងច្រើនអំពី “ការផ្លាស់ប្តូរប្រព័ន្ធឌីជីថល” និងការលើកឡើងដែលទាក់ទងគ្នា។ ប៉ុន្តែតើវាមានន័យដូចម្តេចចំពោះអតិថិជនរបស់លោក?
ច្បាស់ណាស់ដែលថាមានការលើកឡើងជាច្រើនទាក់ទងនឹងការផ្លាស់ប្តូរប្រព័ន្ធឌីជីថល ប៉ុន្តែខ្ញុំជឿជាក់ថាការផ្លាស់ប្តូររបស់យើងក្លាយទៅជាធនាគារផ្តោតសំខាន់លើឌីជីថល គឺមានលើសពីការនិយាយ ហើយយើងសង្កេតឃើញនូវការផ្លាស់ប្តូរជាច្រើនដែលកំពុងនាំចូលទៅក្នុងជីវិតរស់នៅរបស់មនុស្សគ្រប់រូប។
ឧទាហរណ៍ជាក់ស្តែងមួយគឺការបើកគណនីធនាគារដែលធ្លាប់តែចំណាយពេលវេលាច្រើន ដែលលោកអ្នកត្រូវទៅកាន់សាខាធនាគារដោយផ្ទាល់ ដើម្បីបំពេញឯកសារ ឬក្រដាសស្នាមជាច្រើន មុនពេលបើកគណនីថ្មីមួយបាន។ ប៉ុន្តែបច្ចុប្បន្នជាមួយ Sathapana Mobile លោកអ្នកអាចបើកគណនីធនាគារមួយបានដោយផ្ទាល់ពីទូរស័ព្ទដៃ ហើយក្នុងរយៈពេលតែប៉ុន្មាននាទីនឹងអាចចាប់ផ្តើមដំណើរការបានដែលអាចបង់វិក្កយបត្រនានា ផ្ទេរប្រាក់ ឬបញ្ចូលទឹកប្រាក់ទូរស័ព្ទដៃ បានទាំងអស់តាមរយៈកម្មវិធីនេះ។ ដូច្នេះវាសន្សំពេលវេលា ផ្តល់ភាពងាយស្រួល និងសុវត្ថិភាព ហើយការប្រើប្រាស់បច្ចេកវិទ្យានេះគឺផ្តល់អត្ថប្រយោជន៍យ៉ាងច្រើនសម្រាប់អតិថិជនរបស់យើង។
នៅក្នុងប្រទេសកំពុងអភិវឌ្ឍន៍ដូចជាប្រទេសកម្ពុជា មនុស្សជាច្រើនហាក់នៅតែស្ទាក់ស្ទើរក្នុងការទទួលយកបច្ចេកវិទ្យាឌីជីថល ហើយនៅតែចូលចិត្តប្រើប្រាស់សាច់ប្រាក់។ តើលោកកំពុងព្យាយាមផ្លាស់ប្តូរចំណុចនេះដោយរបៀបណា?
វាជាការពិតនៅគ្រប់ទីកន្លែងក្នុងពិភពលោកនេះ សូម្បីតែនៅក្នុងប្រទេសដែលមានសេដ្ឋកិច្ចអភិវឌ្ឍន៍បំផុតដូចជាសហរដ្ឋអាមេរិក ដំណោះស្រាយនៃការទូទាត់ដោយគ្មានសាច់ប្រាក់ ទើបតែទទួលបានការផ្តល់តម្លៃ និងចាប់ផ្តើមប្រើប្រាស់ អំឡុងពេលផ្ទុះជំងឺកូវីដ១៩។ រហូតមកដល់ឆ្នាំនេះ ប្រជាជនអាមេរិកនៅតែមានការស្ទាក់ស្ទើរយ៉ាងខ្លាំងក្នុងការប្រើប្រាស់ប្រព័ន្ធដែលមានសុវត្ថិភាព និងភាពងាយស្រួលនេះ ពីព្រោះសាច់ប្រាក់គឺនៅតែសំខាន់នៅឡើយ។
នៅក្នុងប្រទេសកម្ពុជា យើងបានឈានដល់ចំណុចនេះគឺដោយសារតែកិច្ចខិតខំប្រឹងប្រែងយ៉ាងខ្លាំងពីសំណាក់ក្រុមហ៊ុនឯកជន ក៏ដូចជារដ្ឋាភិបាល និងធនាគារជាតិនៃកម្ពុជាដែលសម្របយ៉ាងឆាប់រហ័សទៅនឹងដំណោះស្រាយទូទាត់ដោយគ្មានសាច់ប្រាក់ និងធនាគារឌីជីថល។
នៅមានកិច្ចការជាច្រើនទៀតដែលត្រូវធ្វើ ប៉ុន្តែខ្ញុំយល់ឃើញពីការប្តេជ្ញាចិត្តពិតប្រាកដនៅក្នុងវិស័យសាធារណៈ និងឯកជនក្នុងការគាំទ្រដល់ការអភិវឌ្ឍសេដ្ឋកិច្ចឌីជីថល ហើយបច្ចុប្បន្នមានក្រុមហ៊ុនបច្ចេកវិទ្យាហិរញ្ញវត្ថុឆ្នើមៗជាច្រើន ដែលកំពុងវិវឌ្ឍខ្លួននៅក្នុងប្រទេសកម្ពុជា ដើម្បីឆ្លើយតបនឹងតម្រូវការប្រចាំថ្ងៃរបស់មនុស្សគ្រប់គ្នា។
នៅធនាគារ ស្ថាបនា យើងបានដាក់ចេញសេវាកម្មទូទាត់ឌីជីថល ដើម្បីគាំទ្រដល់កិច្ចខិតខំប្រឹងប្រែងរបស់រដ្ឋាភិបាល។ ឧទាហរណ៍ជាមួយ Sathapana Mobile អតិថិជន របស់យើងអាចទូទាត់ប្រាក់បានយ៉ាងងាយស្រួល និងមានសុវត្ថិភាព តាមរយៈលេខកូដ QR ។ ក្រៅពីនេះការផ្ទេរប្រាក់ត្រូវបានធ្វើឡើងយ៉ាងងាយស្រួលតាមរយៈកូដ QR ឬការប្រើប្រាស់លេខទូរស័ព្ទរបស់អ្នកទទួល។
លើសពីនេះទៀត ជាមួយនឹង Sathapana Mobile អតិថិជនអាចបង់ថ្លៃអគ្គិសនី បង់ថ្លៃទឹក បង់ថ្លៃសំរាម និងបង់ថ្លៃវិក្កយបត្រផ្សេងៗបានគ្រប់ពេលវេលា និងគ្រប់ទីកន្លែង។
យើងកំពុងលើកទឹកចិត្តឱ្យធ្វើការបង់ប្រាក់ដោយមិនប្រើសាច់ប្រាក់តាមរយៈ Sathapana Mobile។ អតិថិជនអាចធ្វើការទូទាត់ផ្សេងៗ ដោយមិនចាំបាច់កាន់សាច់ប្រាក់ ឬប៉ះពាល់ដោយផ្ទាល់។
លោកលើកឡើងថានៅមានការងារច្រើនទៀតដែលត្រូវធ្វើ ...តើវិធានការបែបណាដែលត្រូវធ្វើដើម្បីឲ្យមនុស្សកាន់តែច្រើនចូលមកក្នុងសេដ្ឋកិច្ចឌីជីថលនេះ?
វាទាក់ទងនឹងចំណេះដឹងហិរញ្ញវត្ថុ និងការអប់រំដល់ប្រជាជនរបស់យើងអំពីអត្ថប្រយោជន៍នៃការចូលទៅក្នុងវិស័យហិរញ្ញវត្ថុផ្លូវការតាមរយៈគណនីធនាគារ Mobile Wallets និងផ្សេងទៀត។ តាមរយៈការធ្វើបែបនេះ ពួកគាត់មានពេលវេលា និងឱកាសសន្សំប្រាក់ដែលខុសប្លែកពីរបៀបសន្សំតាមបែបសាច់ប្រាក់សុទ្ធ។
ការប្រើប្រាស់ទូរស័ព្ទដៃកំពុងកើនឡើងខ្ពស់ ហើយបណ្តាញទូរស័ព្ទចល័តគ្របដណ្តប់ពេញផ្ទៃប្រទេស ជាមួយនឹងអត្រាទិន្នន័យដែលមានការប្រកួតប្រជែងខ្លាំង ដែលវាជាសក្តានុពលដ៏ល្អសម្រាប់ហិរញ្ញវត្ថុឌីជីថល។ ដូច្នេះភាគីពាក់ព័ន្ធទាំងអស់នៅក្នុងរដ្ឋាភិបាល និងវិស័យឯកជនចាំបាច់ត្រូវបន្តកិច្ចខិតខំប្រឹងប្រែងដើម្បីផ្សាភ្ជាប់ទំនាក់ទំនងជាមួយអតិថិជន និងបង្ហាញពីគុណសម្បត្តិនៃសេវាកម្មហិរញ្ញវត្ថុឌីជីថល។
ឧទាហរណ៍ ជាមួយ Sathapana Mobile របស់ធនាគារ ស្ថាបនា ការផ្ទេរប្រាក់ ការទូទាត់វិក្កយបត្រ ការបញ្ចូលទឹកប្រាក់ទូរស័ព្ទ និងលក្ខណៈពិសេសជាច្រើននៃកម្មវិធីនេះ គឺអាចធ្វើប្រតិបត្តិការដោយឥតគិតថ្លៃ។ ដូច្នេះបើអ្នកប្រៀបធៀបការចំណាយពេលវេលា និងប្រាក់ទៅសាខា ធនាគារ ឬភ្នាក់ងារផ្ទេរប្រាក់ផ្សេងៗគឺវាផ្តល់អត្ថប្រយោជន៍យ៉ាងច្រើន ហើយយើងចង់ធ្វើឱ្យប្រាកដថាប្រជាជនដឹងអំពីរឿងនេះនៅគ្រប់ទីកន្លែងក្នុងប្រទេសកម្ពុជា។
តើលោកបានសម្រួលប្រតិបត្តិការរបស់លោកយ៉ាងដូចម្តេចខ្លះ ដើម្បីជាការឆ្លើយតបទៅនឹងជំងឺរាតត្បាតកូវីដ១៩ នេះ?
ជាការពិត ជំងឺកូវីដ ១៩ បានផ្លាស់ប្តូររបៀបដែលយើងមើលទៅពិភពលោកជុំវិញខ្លួន ហើយនៅធនាគារ ស្ថាបនា យើងបានផ្តោតលើការធានាសុវត្ថិភាពបុគ្គលិក និងអតិថិជនរបស់យើងដោយប្រកាន់ខ្ជាប់នូវគោលការណ៍អនាម័យនិងការរក្សាគម្លាត នៅតាមការិយាល័យ និងសាខារបស់យើងនៅទូទាំងប្រទេស។
ការងារធំជាងនេះ គឺការគាំទ្រអតិថិជនរបស់យើងនៅក្នុងពេលមានវិបត្តិសេដ្ឋកិច្ច ហើយយើងបានចូលរួមយ៉ាងសកម្មក្នុងការភ្ជាប់ទំនាក់ទំនងជាមួយអតិថិជន ដើម្បីស្វែងយល់អំពីបញ្ហាប្រឈម ដែលពួកគេជួបប្រទះ និងស្វែងរកដំណោះស្រាយដែលអាចជួយទ្រទ្រង់អាជីវកម្ម និងក្រុមគ្រួសារពួកគេក្នុងគ្រាដ៏លំបាក។
ថ្វីត្បិតតែ Sathapana Mobile មិនត្រូវបានបង្កើតឡើងដោយផ្តោតជាក់លាក់លើការរក្សាគម្លាត គោលបំណងសំខាន់ និងចេតនានៃការបង្កើតកម្មវិធីឈានមុខគេនេះ គឺដើម្បីអនុញ្ញាតឱ្យប្រជាជនមានភាពងាយស្រួលគ្រប់គ្រងហិរញ្ញវត្ថុរបស់ពួកគេនៅគ្រប់ទីកន្លែង ដោយមិនចាំបាច់ទៅកាន់សាខាធនាគារ ឬកាន់សាច់ប្រាក់ដោយផ្ទាល់។
លក្ខណៈពិសេសភាគច្រើននៅក្នុង Sathapana Mobile គឺការធ្វើប្រតិបត្តិការដោយឥតគិតថ្លៃ ហើយវាក៏ជាវិធីមួយដើម្បីបង្ហាញការគាំទ្រដល់អតិថិជនរបស់យើង ដោយកាត់បន្ថយការចំណាយរបស់ពួកគេ សូម្បីតែតិចតួចក្តី៕