ការបើកច្រកទេសចរណ៍ទៅកាន់ខេត្តឈៀងរ៉ៃរបស់ប្រទេស ថៃ ចំពោះអ្នកទេសចរកម្ពុជា គឺអាចជំរុញវិស័យទេសចរណ៍ និងពាណិជ្ជកម្មរវាងប្រទេសទាំង ២។ កាលពីឆ្នាំមុន មានភ្ញៀវទេសចរកម្ពុជាប្រមាណជាង ៨០ ម៉ឺននាក់ បានទៅទស្សនាប្រទេស ថៃ និងអ្នកទេសចរថៃប្រមាណ ៣០ ម៉ឺននាក់ បានមកទស្សនាប្រទេស កម្ពុជា។
ប្រទេស ថៃ កំពុងលើកកម្ពស់វិស័យទេសចរណ៍របស់ខ្លួនឲ្យកាន់តែរឹងមាំ។ អាជ្ញាធរទេសចរណ៍ថៃ (TAT) បាន ជ្រើសរើសទិសដៅលេចធ្លោថ្មីចំនួន ៤ នៅទូទាំងប្រទេស ដើម្បីដាក់ចេញជា «គោលដៅទេសចរណ៍លក្ខណៈគ្រួសារ» ដែលជាផ្នែកមួយនៃយុទ្ធសាស្ត្ររបស់ខ្លួនក្នុងការទាក់ទាញទេសចរឲ្យបាន ៤១ លាននាក់នៅក្នុងឆ្នាំនេះ។
ទីក្រុងដែលកំពុងលេចធ្លោថ្មីទាំងនោះមានដូចជាខេត្ត ឈៀងរ៉ៃ ភីតសានុ លោក សុខោទ័យ ត្រាត-ចាន់ថាបុរី និងហាតយ៉ៃ-សាទូន ដែលកំពុងត្រូវបានលើកកម្ពស់ជាគោលដៅទេសចរណ៍លក្ខណៈគ្រួសារ។
ជាទូទៅភ្ញៀវទេសចរស្គាល់ខេត្តឈៀងរ៉ៃ តាមរយៈវត្ត រុង ឃុន (ប្រាសាទពណ៌ស) ប៉ុន្តែឥឡូវនេះ ភ្ញៀវទេសចរអាចទៅទស្សនាសហគមន៍ទេសចរណ៍ដ៏ទាក់ទាញជាច្រើនទៀតនៅក្នុងខេត្តឈៀងរ៉ៃ។
ភ្ញៀវទេសចររវាងប្រទេសទាំង ២ (ថៃ-កម្ពុជា) គឺងាយស្រួលក្នុងការធ្វើដំណើរដោយសារជាប្រទេសជិតខាងគ្នា។ភ្ញៀវទេសចរកម្ពុជាទៅកាន់ប្រទេស ថៃ គឺមានកំណើនជារៀងរាល់ឆ្នាំ ខណៈដែលប្រជាជនកម្ពុជាមានចំណូលកាន់តែខ្ពស់ ដូច្នេះពួកគេមានលទ្ធភាពធ្វើដំណើរទៅក្រៅប្រទេសកាន់តែច្រើន។
លោក Chattan Kunjara Na Ayudhaya អភិបាលរងនៃអាជ្ញាធរទេសចរណ៍ថៃទទួលបន្ទុកទីផ្សារអន្តរជាតិប្រចាំតំបន់អាស៊ី និងប៉ាស៊ីហ្វិកខាងត្បូងបានប្រាប់ភ្នំពេញប៉ុស្តិ៍ថា យើងចង់ឱ្យប្រជាជនកម្ពុជាទៅទស្សនាខេត្តឈៀងរ៉ៃ និងទិសដៅទេសចរណ៍ថ្មីៗជាច្រើនទៀត។
ទន្ទឹមនឹងនេះដែរលោកក៏បានថ្លែងទៅកាន់អ្នកសារព័ត៌មានអន្តរជាតិ និងភ្នាក់ងារទេសចរណ៍អន្តរជាតិជាង ៦០ ដែលបានចូលរួមក្នុងកម្មវិធីរៀបចំដំណើរទស្សនកិច្ចពិសេសមួយ ដែលរៀបចំឡើងដោយ TAT ចាប់ពីថ្ងៃទី ៤ ដល់ថ្ងៃទី ៧ ខែ មេសា ដែលអ្នកចូលរួមទាំងអស់បានធ្វើដំណើរចេញពីទីក្រុងបាងកកទៅកាន់គោលដៅដែលកំពុងលេចធ្លោទាំងនោះ។
កាលពីឆ្នាំមុនភ្ញៀវទេសចរបរទេសប្រមាណ ១៧០,០០០ នាក់ បានទៅទស្សនាខេត្តឈៀងរ៉ៃ។
ប្រទេស កម្ពុជា និងថៃ មានទំនាក់ទំនងទ្វេភាគីយ៉ាងជិតស្និទ្ធហើយពាណិជ្ជកម្មទ្វេភាគីរវាងប្រទេសទាំង ២ បានឈានដល់ ៨,៤ ពាន់លានដុល្លារ កាលពីឆ្នាំមុន បើប្រៀបធៀបនឹង ឆ្នាំ ២០១៧ មានចំនួន ៦,១ ពាន់លានដុល្លារ។
ពាណិជ្ជកម្មទ្វេភាគីបានកើនឡើងក្នុងអត្រាជាមធ្យម ១៥ ភាគរយប្រចាំឆ្នាំក្នុងរយៈពេល ៥ ឆ្នាំ ចុងក្រោយនេះ ហើយគេរំពឹងថានឹងកើនឡើងដល់ ១៥ ពាន់លានដុល្លារនៅ ឆ្នាំ ២០២០។
ខេត្តឈៀងរ៉ៃ ភាគខាងជើងប្រទេស ថៃ ដែលមានចម្ងាយប្រហែល ៧៨៥ គីឡូម៉ែត្រពីទីក្រុងបាងកកបច្ចុប្បន្ន ត្រូវបានចាត់ទុកថាតំបន់ទាក់ទាញភ្ញៀវទេសចរដ៏សំខាន់មួយ ដោយសារតែធនធានទេសចរណ៍ដ៏សម្បូរបែប ដូចជាទេសភាពធម្មជាតិ ព្រៃភ្នំ ប្រាសាទបុរាណ និងកុលសម្ព័ន្ធជនជាតិភាគតិចជាដើម។
ខេត្តឈៀងរ៉ៃមានប្រជាជនប្រមាណ ១,២ លាននាក់ ដោយភាគខាងជើងមានព្រំប្រទល់ជាប់រដ្ឋសាននៃប្រទេស មីយ៉ាន់ម៉ា ភាគខាងកើតមានព្រំប្រទល់ជាប់ខេត្តបូរកែវ ប្រទេស ឡាវ ខាងត្បួងជាប់ខេត្ត Phayao ភាគនិរតីជាប់ខេត្ត Lampang និងភាគខាងលិចមានព្រំប្រទល់ជាប់ខេត្តឈៀងម៉ៃ។
តំបន់ទេសចរណ៍ដ៏ទាក់ទាញមួយចំនួន នៅខេត្តឈៀងរ៉ៃមានដូចជា៖
ព្រះរាជដំណាក់ Doi Tung Royal Villa និងសួន Mae Fah Luang Garden
Royal Villa ត្រូវបានសាងសង់ឡើង ជាព្រះរាជដំណាក់រដូវក្តៅសម្រាប់ព្រះមហាក្សត្រី Srinagarindra (Princess Mother) និងជាដំណាក់ដែលដាក់តាំងបង្ហាញអំពីស្នាព្រះហស្តរបស់ទ្រង់ ដើម្បីលើកកម្ពស់គុណភាពជីវិតរបស់ប្រជាជនកុលសម្ព័ន្ធនៅក្នុងតំបន់នោះ។ ចំណែកឯសួនឧទ្យាន Mae Fah Luang គឺមានទីតាំងនៅក្បែរព្រះរាជដំណាក់ Royal Villa។ សួនច្បារ Doi Tung មានផ្ការាប់រយប្រភេទ រីកគ្រប់រដូវ ដ៏ស្រស់បំព្រងរង់ចាំស្វាគមន៍ភ្ញៀវ ទេសចរ មកពីគ្រប់ទិសទី។
វត្ត រុងឃុន (ប្រាសាទពណ៌ស)
វត្ត រុង ឃុន ជាទូទៅត្រូវបានគេស្គាល់ថា ប្រាសាទពណ៌ស ដែលត្រូវសាងសង់ឡើងជាពិសេសមានបិទដោយកញ្ចក់តូចៗដ៏ស្រស់ស្អាតដែលឆ្លុះបញ្ចាំងពីភាពបរិសុទ្ធនៃព្រះពុទ្ធអង្គ ។ ប្រាសាទដ៏ល្បីល្បាញនេះត្រូវបានសាងសង់ឡើងនៅក្នុង ឆ្នាំ ១៩៩៧ ដែលមានទីតាំងនៅភូមិបានរុងឃុន ស្រុកតាំមប៊ូនប៉ាអូដនឆៃ តាមបណ្តោយផ្លូវផាហួនីយូថិន ដែលមានចម្ងាយប្រហែល ១២ គីឡូម៉ែត្រពីទីក្រុងឈៀងរ៉ៃ។ ប្រាសាទនេះត្រូវបានរចនា និងសាងសង់ដោយស្ថាបត្យករថៃលោក Achan Chaloemchai Khositphiphat។
តំបន់ត្រីកោណមាស
តំបន់ត្រីកោណមាស គឺជាតំបន់មួយដែលធ្លាប់ត្រូវបានគេស្គាល់ថាជាតំបន់ជួញដូរគ្រឿងញៀនដ៏ធំ ប៉ុន្តែបច្ចុប្បន្នតំបន់នេះត្រូវបានអភិវឌ្ឍជាតំបន់គោលដៅទេសចរណ៍ដ៏ទាក់ទាញ។ តំបន់ត្រីកោណមាសមានព្រំប្រទល់ជាប់ប្រទេស ថៃ ភូមា និងឡាវ។ ភ្ញៀវទេសចរអាចជិះទូកទេសចរណ៍កម្សាន្តតាមដងទន្លេមេគង្គ ដើម្បីគយគន់ទេសភាពដ៏ស្រស់ត្រកាល។ តំបន់នេះត្រូវបានអភិវឌ្ឍជាតំបន់ទេសចណ៍ដ៏ទាក់ទាញ។
ទីក្រុងប្រវត្តិសាស្ត្រ Chiang Saen
ទីក្រុង Chiang Saen មានទីតាំងស្ថិតនៅលើច្រាំងខាងលិចនៃទន្លេមេគង្គនៅក្នុងស្រុកឈៀងសែននៃខេត្តឈៀងរ៉ៃ។ ទីក្រុងប្រវត្តិសាស្រ្ត Chiang Saen នេះត្រូវបានគេស្គាល់ថាជាតំបន់ដែលបង្កប់ដោយរឿងរ៉ាវប្រវត្តិសាស្ត្រដ៏ចំណាស់ ដែលមានវត្តអារាម និងប្រាសាទបុរាណជាច្រើន ជាពិសេសជាតំបន់ដែលរក្សាបាននូវបរិស្ថានបៃតង។
ឧស្យាន Singha Park
ឧស្យាន Singha Park នៅខេត្តឈៀងរ៉ៃ គឺជាសួនអេកូទេសចរណ៍ដ៏ពេញនិយមបំផុតមួយនៅក្នុងខេត្តភាគខាងជើងមួយនេះ ដែលមានទំហំជាង ១,៣៧៥ ហិចតា និងព័ទ្ធជុំវិញដោយចម្ការតែដ៏ខៀវស្រងាត់ធំល្វីងល្វើយ។ ឧទ្យាននេះ គឺជាកន្លែងដ៏ពេញនិយមបំផុតសម្រាប់ភ្ញៀវទេសចរដែលមកទស្សនាខេត្តឈៀងរ៉ៃ។ លើសពីនេះទៀត ភ្ញៀវទេសចរក៏អាចទៅទស្សនាសហគមន៍ Baan Pha Hi និង Pang Ha ផងដែរ។
Baan Pha Hi គឺមានភាពល្បីល្បាញចំពោះកាហ្វេសេរីរាង្គដ៏ឆ្ងុយឆ្ងាញ់ និងមាន គុណភាពខ្ពស់ ចំណែកឯ Pang Ha គឺមានភាពល្បីល្បាញចំពោះម៉ាស់មិទមុខធ្វើពីសូត្រដង្កូវនាងព័រណ៌មាស ដែលធ្វើឲ្យផ្ទៃមុខរបស់លោកអ្នកទន់ សភ្លឺរលោង និងក្មេងជាងវ័យ ហើយលោកអ្នកក៏អាចរចនារូបភាពលើក្រដាស Saa papper តាមការចង់បានផងដែរ៕