.jpg)
លោក Sakchai Pattarapreechakul, ប្រធានក្រុមហ៊ុន NCC ។
ក្រុមហ៊ុនគ្រប់គ្រង និងអភិវឌ្ឍន៍ N.C.C. Management & Development Co., Ltd. (NCC) មានទំនុកចិត្តខ្ពស់ ចំពោះការរីកចម្រើនដ៏ខ្លាំងក្លានៃ អាជីវកម្មរបស់ខ្លួននៅក្នុងឆ្នាំនេះ បើ ទោះបីជាមានភាពមិនប្រាកដប្រជាផ្នែកនយោបាយក្នុងស្រុក និងភាពតានតឹងពាណិជ្ជកម្មជាសកលក្តី។
ក្រុមហ៊ុនដែលគ្រប់គ្រងមជ្ឈមណ្ឌលសន្និសីទ Queen Sirikit National Convention Center ចាប់តាំងពីបានបើកដំណើរការនៅឆ្នាំ ១៩៩១ បានរៀបចំការតាំងពិព័រណ៍លក្ខណៈអន្ដរជាតិចំនួន ១០ លើក នៅក្នុងឆ្នាំ ២០១៨ កន្លងទៅ ហើយនៅក្នុងឆ្នាំនេះគ្រោងនឹងរៀបចំព្រឹត្តិការណ៍ចំនួន ១៣។
លោក Sakchai Pattarapreechakul ប្រធានក្រុមហ៊ុន NCC បានផ្តល់បទសម្ភាសដល់កាសែតភ្នំពេញប៉ុស្តិ៍នៅក្នុងទីក្រុងបាងកកថា៖ «ការព្យាកររបស់យើងនៅក្នុងឆ្នាំនេះគឺកើនឡើងចន្លោះពី ២០ ទៅ ៣០ ភាគរយហើយគោលនយោបាយរបស់ក្រុមហ៊ុនគឺដើម្បីលើកកម្ពស់ការតាំងពិព័រណ៍ពាណិជ្ជកម្មថ្មី។ យើងនឹងផ្តោតការយកចិត្តទុកដាក់បន្ថែមលើការរៀបចំ និងតាំងពិព័រណ៍បែបវិទ្យាសាស្ត្រ។ ប្រទេសថៃនឹងធ្វើជាម្ចាស់ផ្ទះកិច្ចប្រជុំកំពូលអាស៊ាន នៅខែវិច្ឆិកា ដូច្នេះមានសន្និសីទជាច្រើននឹងត្រូវរៀបចំឡើង»។
ដោយមានអគារលំដាប់ពិភពលោក កន្លែងស្នាក់នៅមានប្រកបដោយគុណភាព និងការ តភ្ជាប់ផ្លូវអាកាសយ៉ាងច្រើនទៅពាសពេញពិភពលោក ប្រទេសថៃដែលត្រូវបានគេស្គាល់ថាជាប្រទេសដែលមានវិស័យទេសចរណ៍ដ៏រស់រវើកនិងពេញនិយមបំផុតនោះ ក៏ជាប្រទេសដែលទទូលរៀបចំកិច្ចប្រជុំ MICE ធំៗនៅក្នុងតំបន់ផងដែរ។
យោងតាមសមាគមសន្និបាត និងសន្និសីទអន្តរជាតិបានឲ្យដឹងថា ប្រទេសថៃ ជាប់ចំណាត់ ថ្នាក់ទី ៦ នៅក្នុងតំបន់អាស៊ីប៉ាស៊ីហ្វិក បន្ទាប់ពីប្រទេសនេះបានរៀបចំកិច្ចប្រជុំចំនួន ១៦៣ លើក នៅក្នុងឆ្នាំ ២០១៧ គឺច្រើនជាងប្រទេសសិង្ហបុរី ដែលរៀបចំកិច្ចប្រជុំតែ ១៦០ ប៉ុណ្ណោះ។
វិស័យរៀបចំកិច្ចប្រជុំ សន្និបាត ការតាំងពិព័រណ៍ និងព្រឹត្តិការណ៍នានា (MICE) របស់ព្រះរាជាណាចក្រថៃគឺកំពុងមានកំណើន។ យោងតាមការិយាល័យពិព័រណ៍ និងសន្និបាតថៃបានឲ្យដឹងថា ថៃទទួលបានកំណើន ១៣ ភាគរយនៃកិច្ចប្រជុំ MICE នៅពាក់កណ្តាលឆ្នាំ ២០១៨ ។
ខណៈប្រាក់ចំណូលដែលទទួលបានពី MICE មានចំនួនរហូតដល់ ២១៩ ពាន់លានបាត (៦,៩ពាន់លានដុល្លារ) ដែលទាក់ទាញភ្ញៀវចូលរួមទាំងជាតិ និងអន្តរជាតិចំនួន ៣៤ លាននាក់។
លោក Sakchai លើកឡើងថា វាមិនប៉ះពាល់ពីលក្ខខណ្ឌនយោបាយទូទៅនៅក្នុងប្រទេសថៃបន្ទាប់ពីការបោះឆ្នោតកាលពីខែមីនាកន្លងទៅ និងការបង្កើតរដ្ឋាភិបាលថ្មីដែលនៅមិន ទាន់ចេញជារូបរាងនោះទេ។
លោកបន្ថែមថា៖ «យើងមានសុទិដ្ឋិនិយមចំពោះការបោះឆ្នោតនៅក្នុងប្រទេសថៃ វានឹងកសាងរូបភាពល្អរបស់ប្រទេស វាគឺជាលទ្ធិប្រជាធិបតេយ្យនិងផ្តល់ផលល្អសម្រាប់ការ វិនិយោគដោយ ផ្ទាល់ពីបរទេស (FDI)។
លោក Mr. Ajinveat Vhongthong, ប្រធានគ្រប់គ្រងគម្រោងជាន់ខ្ពស់ក្រុមហ៊ុន NCC ។
លោកបន្តថា ហើយទោះបីជាមានជម្លោះពាណិជ្ជកម្មរវាងចិន-អាមេរិកក្តី ក៏វាមិនបានធ្វើឲ្យរាំងស្ទះដល់ការរីកចម្រើននៃវិស័យការតាំងពិព័រណ៍ដែរ។
លោកលើកឡើងថា៖ «មានក្រុមហ៊ុនជាច្រើនមកពីប្រទេសចិន និងអឺរ៉ុបកំពុងពង្រីកខ្លួនមកកាន់តំបន់នេះ ដោយសារតែប្រទេស CLMVT (កម្ពុជា ឡាវ មីយ៉ាន់ម៉ា វៀតណាម និងថៃ) ជាទីផ្សារដែលកំពុងរីកចម្រើន ហើយពួកគេត្រូវការបច្ចេកវិទ្យាដើម្បីបង្កើនផលិតភាព និងការលក់ផលិតផលរបស់ខ្លួននៅក្នុងតម្លៃថោក»។
វិស័យកសិកម្ម ការកែច្នៃចំណីអាហារ ការផលិតកាហ្វេពីប្រទេសឥណ្ឌូនេស៊ី និងវៀតណាម គឺជាវិស័យផ្តោតសំខាន់ៗសម្រាប់ក្រុមហ៊ុនដែលមកតាំងពិព័រណ៍នៅក្នុងប្រទេសថៃ។
លោក Sakchai បន្ថែមថា៖ «ផលិតផលសរីរាង្គកំពុងទទួលបានការគាំទ្រខ្លាំងនៅក្នុងតំបន់ពីព្រោះប្រជាជនមានការព្រួយបារម្ភខ្លាំងអំពីបញ្ហាសុខភាពរបស់ពួកគេ ដូច្នេះហើយពួកគេស្វែងរកអាហារដែលមានគុណភាពល្អសម្រាប់សុខភាព»។
លោក Ajinveat Vhonthong ប្រធានរៀបចំការតាំងពិព័រណ៍របស់ក្រុមហ៊ុន N.C.C Exhibition Organizer Co.,Ltd បានថ្លែងថាទីផ្សារសំណង់របស់អាស៊ាន ត្រូវបានគេរំពឹងថានឹងមានកំណើនជាមធ្យម ៥,២ ភាគរយ ចន្លោះពី ឆ្នាំ ២០១៤ ដល់ឆ្នាំ ២០២០។
លោកថ្លែងថា៖ «ក្នុងរយៈពេល ៥ ឆ្នាំខាងមុខ ការវិនិយោគនៅក្នុងឧស្សាហកម្មសំណង់ត្រូវបានគេប៉ាន់ប្រមាណថានឹងមានតម្លៃរហូតដល់ ២,៩ ពាន់ពាន់លានដុល្លារ ជាពិសេសទីផ្សារសំណង់របស់ប្រទេសថៃបានកើនឡើង ៥ ភាគរយនៅឆ្នាំ ២០១៨ ហើយរំពឹងថានឹងកើនឡើងរហូតដល់ ៧ ភាគរយនៅឆ្នាំ ២០១៨ ដល់ ២០២០។
លោក Vhonthong ក៏ជាប្រធានគ្រប់គ្រងគម្រោងការតាំងពិព័រណ៍ស្ថាបត្យកម្ម ២០១៩ ត្រូវធ្វើឡើងនៅទីក្រុងបាងកកចាប់ពីថ្ងៃទី ៣០ ខែមេសារហូតដល់ថ្ងៃទី ៥ ខែឧសភាផងដែរនោះបានបន្ថែមថា៖ «បច្ចុប្បន្នអគារបៃតងបានទទួលការការចាប់អាមរ្មណ៍កាន់តែច្រើន គឺកើនចំនួន ១៣ ភាគរយជារៀងរាល់ឆ្នាំរហូតដល់ឆ្នាំ ២០២០។
ដោយមានបទពិសោធដ៏រឹងមាំអស់រយៈពេល ២ ទសវត្សរ៍ នៅក្នុងការរៀបចំព្រឹត្តិការណ៍លំដាប់ពិភពលោក និងការតាំងពិព័រណ៍នានា ក្រុមហ៊ុន NCC ផ្តល់ជូននូវសេវាកម្មដ៏ល្អឥតខ្ចោះដល់អតិថិជន និងឧស្សាហកម្មនានាដែលរួមមានទាំងការតាំងបង្ហាញផលិតផលម្ហូបអាហារ និងភេសជ្ជៈ ការរចនា និងសាងសង់ស្តង់ ការតាំងពិព័រណ៍សំណង់ ក៏ដូចជាអ្នក រៀបចំសន្និសីទដែលមានជំនាញច្បាស់លាស់ (PCO) និងជាអ្នករៀបចំសេវាកម្មពិព័រណ៍ដែលមានជំនាញវិជ្ជាជីវៈ (PEO) ដែលទទួលបានការគាំទ្រទាំងក្នុងប្រទេស និងអន្តរជាតិ៕
