ក្រុមហ៊ុនភេសជ្ជៈធំជាងគេបំផុតរបស់ពិភពលោកបានបង្វែរថវិកាផ្សាយពាណិជ្ជកម្មរបស់ខ្លួនសម្រាប់បុព្វហេតុដ៏អស្ចារ្យ គឺដើម្បីចូលរួមគាំទ្រដល់កិច្ចខិតខំប្រឹងប្រែងក្នុងការប្រយុទ្ធប្រឆាំងជំងឺកូវីដ១៩ ដែលជាជំងឺរាតត្បាតសកល។
យោងតាមតួលេខរបស់ក្រុមហ៊ុនបានឱ្យដឹងថា ខ្លួនបានត្រៀមថវិកាជាង ១០០ លានដុល្លាររួចជាស្រេច ដើម្បីគាំទ្រដល់កិច្ចខិតខំប្រឹងប្រែងដើម្បីទប់ស្កាត់ជំងឺកូវីដ១៩នៅក្នុងប្រទេសជាង ១០០ ដែលនឹងផ្តល់អត្ថប្រយោជន៍ដល់ប្រជាជនជាង ២២ លាននាក់នៅជាង ១០០ ប្រទេស។
លោក David Wigglesworth អគ្គនាយកក្រុមហ៊ុន Cambodia Beverage Company Ltd ដែលជាក្រុមហ៊ុនបុត្រសម្ព័ន្ធទាំងស្រុងរបស់ក្រុមហ៊ុនកូកាកូឡាបានឲ្យកាសែតភ្នំពេញប៉ុស្តិ៍ដឹងថា ក្រុមហ៊ុនបានបង្វែរថវិកាចំនួន ២០ ម៉ឺនដុល្លារសម្រាប់ការផ្តល់ជូននូវសម្ភារ និងឧបករណ៍ការពារផ្សេងៗ ដើម្បីជួយដល់កិច្ចខិតខំប្រឹងប្រែងរបស់ប្រទេសកម្ពុជា។
គំនិតផ្តួចផ្តើមរបស់ក្រុមហ៊ុនកូកាកូឡាកម្ពុជានេះនឹងផ្តោតនៅតាមទីផ្សារ វត្តអារាម គ្រួសារខ្វះខាត មន្ទីរពេទ្យ និងទីកន្លែងដាក់ឲ្យនៅដាច់ដោយឡែក ក្នុងខេត្តក្រុងចំនួន ២១ ដោយមានការគាំទ្រពីអង្គការក្រៅរដ្ឋាភិបាល និងវិស័យសាធារណៈ។
លោក Wigglesworth ថ្លែងថា៖ «ការកម្ចាត់វីរុសនេះតម្រូវឲ្យមានកិច្ចខិតខំប្រឹងប្រែងជាសកល ប៉ុន្តែយើងជឿជាក់ថា ការតស៊ូ និងភាពរឹងមាំរបស់ប្រជាជនកម្ពុជានឹងជួយយើងឱ្យយកឈ្នះលើស្ថានភាពនេះ។ មិនដែលមានការប្តេជ្ញាចិត្តរបស់យើងចំពោះប្រទេសកម្ពុជា និងប្រជាជនកម្ពុជាខ្លាំងជាងពេលនេះទេ ពីព្រោះយើងរួមគ្នាដើម្បីប្រយុទ្ធប្រឆាំងការរីករាលដាលជំងឺកូវីដ១៩ដែលរាតត្បាតជាសកលនេះ»។
ក្រុមហ៊ុនភេសជ្ជៈអាមេរិកដ៏ល្បីល្បាញមួយនេះបានសហការជាមួយក្រសួងសុខាភិបាល និងសាលារាជធានីភ្នំពេញ និងសហភាពសហព័ន្ធយុវជនកម្ពុជាដើម្បីផ្តល់ការអប់រំវិធីរក្សាសុវត្ថិភាពក្នុងអំឡុងពេលផ្ទុះវីរុសនេះ។
ក្រុមហ៊ុនក៏កំពុងសហការជាមួយសាលារាជធានីភ្នំពេញ និងក្រសួងសុខាភិបាលក៏ដូចជាសមាគមគ្រូពេទ្យស្ម័គ្រចិត្តយុវជនសម្តេចតេជោដើម្បីផ្តល់ជូនដល់បុគ្គលិកសុខាភិបាលជួរមុខ និងមណ្ឌលដាក់នៅដាច់ដោយឡែកនូវឧបករណ៍ និងសម្ភារវេជ្ជសាស្ត្រដូចជាម៉ាស់ ជែលលាងដៃ ឧបករណ៍វាស់កម្តៅ អាល់កុលលាងដៃ សាប៊ូ និងភេសជ្ជៈជាដើម។
ខណៈអ្នកដែលឆ្លងវីរុសនេះមានតែ ១២២ ករណីនោះ ប្រទេសកម្ពុជានៅតែមានការប្រុងប្រយ័ត្នខ្ពស់ចំពោះវីរុសនេះ ហើយទោះយ៉ាងណាសេដ្ឋកិច្ច និងបុគ្គលិកសុខាភិបាលរបស់កម្ពុជាប្រឈមនឹងការបារម្ភស្រដៀងគ្នាដូចប្រទេសអាស៊ានជិតខាងដែរ ដែលជំរុញឱ្យមានការសហការពីក្រុមហ៊ុននានា និងវិស័យសាធារណៈ។
កាលពីដើមខែនេះ ក្រុមហ៊ុនកូកាកូឡាកម្ពុជាបានសហការជាមួយកម្មវិធីហៅរថយន្តជិះ Grab និងសាលារាជធានីភ្នំពេញចែកកញ្ចប់ការពារជាង ៥ ០០០ កញ្ចប់ក្នុងនោះមានម៉ាស់ ជែលលាងដៃ និងភេសជ្ជៈដល់អ្នក បើកបរម៉ូតូកង់បីដែលភាគច្រើនមានបញ្ហាហិរញ្ញវត្ថុដោយសារការធ្លាក់ចុះអតិថិជនជិះ Grab។
លោក Wigglesworth បានសង្កត់ធ្ងន់ថា ក្រុមហ៊ុនមានមោទនភាពចំពោះសមត្ថភាពរបស់ខ្លួនក្នុងការបង្កើតភាពជាដៃគូ ដែលអាចមានឥទ្ធិពលយូរអង្វែងនៅក្នុងសហគមន៍របស់ខ្លួន។ ចាប់តាំងពីបានបើករោងចក្រដំបូងរបស់ខ្លួននៅកម្ពុជាក្នុងឆ្នាំ ១៩៩៣ ក្រុមហ៊ុននេះបានចូលរួមកម្មវិធីជាច្រើន ក្នុងនោះរួមមានគំនិតផ្តួចផ្តើមទឹកស្អាត កម្មវិធីពង្រឹងអំណាចសេដ្ឋកិច្ចស្ត្រី និងគម្រោងពិភពលោកគ្មានកាកសំណល់ជាដើម។
លោក Wigglesworth លើកឡើងថា៖ «យើងធ្វើរឿងនេះ ពីព្រោះវាជារឿងត្រឹមត្រូវដែលត្រូវធ្វើ ហើយពីព្រោះយើងដឹងថា ការសហការគ្នាយើងអាចធ្វើឱ្យមានការខុសប្លែក។ សម្រាប់ពេលនេះសុវត្ថិភាព និងសន្តិសុខរបស់ប្រជាជនគឺជាអាទិភាពទី ១ របស់យើង។ វិធីសាស្ត្ររបស់យើងគឺផ្អែកទៅលើគោលបំណងរបស់ក្រុមហ៊ុនដែលធានាថាយើងបន្តខិតខំដើម្បីធ្វើឱ្យមានការផ្លាស់ប្តូរសម្រាប់ប្រជាជននៅក្នុងសហគមន៍ និងនៅកន្លែងធ្វើការរបស់យើង»។
លោក Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជាបានកោតសរសើរចំពោះក្រុមហ៊ុនកូកាកូឡាកម្ពុជាក្នុងការឆ្លើយតបចំពោះជំងឺរាតត្បាតមួយនេះ ដោយលោកបានថ្លែងថា វាស្ថិតនៅក្នុងចំណោម «ឧទាហរណ៍ជាច្រើនដែលក្រុមហ៊ុន និងអង្គការរបស់អាមេរិកចូលរួមជាមួយដៃគូដ៏យូរអង្វែងរវាងទីភ្នាក់ងារសុខភាពរដ្ឋាភិបាលសហរដ្ឋអាមេរិក និងសមភាគីកម្ពុជាដែលបានផ្តល់ដល់ព្រះរាជាណាចក្រកម្ពុជា និងធ្វើការជាមួយគ្នាដើម្បីប្រយុទ្ធប្រឆាំងជំងឺកូវីដ១៩។
លោក Murphy ថ្លែងប្រាប់កាសែតភ្នំពេញប៉ុស្តិ៍តាមរយៈអ៊ីមែលថា៖ «ខ្ញុំមានមោទនភាពដែលបានឃើញជនជាតិអាមេរិក និងក្រុមហ៊ុនអាមេរិកដើរតួនាទីជួយប្រទេសកម្ពុជាដើម្បីបញ្ឈប់ការរីករាលដាលជំងឺកូវីដ១៩។ ក្រុមហ៊ុនកូកាកូឡាគឺជាឧទាហរណ៍មួយដែលបានបរិច្ចាគថវិកាចំនួន ២០ ម៉ឺនដុល្លារ ដើម្បីជួយអ្នកដែលនៅជួរមុខឲ្យមានសុវត្ថិភាព និងសុខភាពល្អ ក្នុងអំឡុងពេលកំពុងប្រយុទ្ធប្រឆាំងជំងឺរាតត្បាតមួយនេះ»៕