.jpg)
Kerry Wordbridge កំពុងស្ថិតនៅក្នុងទីតាំងដ៏ល្អនៅក្នុងវិស័យដែលកំពុងរីកចម្រើននេះ។ រូបថត SUPPLIED
សម្រាប់ក្រុមហ៊ុន Kerry Worldbridge Logistics Ltd (KWB) ដែលជាក្រុមហ៊ុនផ្តល់សេវាកម្មដឹកជញ្ជូនទំនិញឈានមុខមួយនៅកម្ពុជាបានមើលឃើញពីកំណើននៃការផ្តល់សេវាកម្មដឹកទំនិញទៅកាន់អតិថិជនគោលដៅចុងក្រោយ (last-mile delivery) ដែលធ្វើឱ្យក្រុមហ៊ុនធ្វើការផ្តោតឡើងវិញអំពីយុទ្ធសាស្ត្រអាជីវកម្មរបស់ខ្លួនឱ្យកាន់តែប្រសើរ។
«ការផ្ទុះឡើងជំងឺកូវីដ១៩ បង្ហាញថាយើងត្រូវផ្លាស់ប្តូរដំណើរការអាជីវកម្មរបស់យើង និងវិធីដែលយើងត្រូវធ្វើការងារ ដើម្បីឆ្លើយតបទៅនឹងតម្រូវការដែលកំពុងផ្លាស់ប្តូររបស់អតិថិជន»។
«ជាមួយនឹងវិធានការរក្សាគម្លាតសង្គម ដោយសារតែការផ្ទុះឡើងនៃជំងឺរាតត្បាតនេះ វាបានធ្វើឱ្យការទិញទំនិញតាមអនឡាញកើនឡើង ដូច្នេះតម្រូវការសេវាកម្មដឹកទំនិញក៏កើនឡើងដែរ ហើយជាលទ្ធផលការផ្តោតរបស់យើងដែលផ្តោតលើប្រសិទ្ធភាពនៃសេវាកម្មបានក្លាយជាកត្តាជំរុញសម្រាប់បំពេញតាមការផ្លាស់ប្តូរទីផ្សារ»។
«យើងផ្តល់សេវាកម្មជាច្រើនដូចជាដឹកជញ្ជូនទំនិញពីឃ្លាំងរហូតដល់ការដឹកទំនិញចេញ-ចូល។ សេវាកម្មដ៏សំខាន់មួយរបស់យើងគឺដឹកជញ្ជូនទំនិញទៅកាន់អតិថិជនគោលដៅ ចុងក្រោយ (last-mile delivery) ពីព្រោះវាធ្វើឱ្យយើងមានទំនាក់ទំនងច្រើនជាមួយអតិថិជនចុងក្រោយ»។
ក្រុមហ៊ុនបានវិនិយោគយ៉ាងច្រើនលើឃ្លាំងនិង IT។
លោក Dickson Pang ប្រធានគ្រប់គ្រងក្រុមហ៊ុន Kerry Express នៅកម្ពុជាបានបន្តថា៖ «ការពេញចិត្តរបស់អតិថិជន គឺជាចំណុចស្នូលនៃប្រតិបត្តិការប្រចាំថ្ងៃរបស់យើង។ ដែលវាឆ្លុះបញ្ចាំងនៅក្នុងការខិតខំប្រឹងប្រែងឥតឈប់ឈរ ដើម្បីផ្តល់សេវាកម្មដឹកទំនិញឱ្យបានល្អបំផុត។ យើងផ្តោតលើសេវាកម្មនេះ ពីព្រោះវាគឺជាអ្វីដែលធ្វើឱ្យយើងលេចធ្លោនៅក្នុងចំណោមដៃគូប្រកួតប្រជែងរបស់យើង»។
ដោយមានស្នាក់ការកណ្តាលនៅទីក្រុងហុងកុង ហើយការិយាល័យប្រចាំតំបន់នៅក្នុងប្រទេសថៃ និងវៀតណាម ក្រុមហ៊ុន KWB បានចាប់ផ្តើមប្រតិបត្តិការនៅកម្ពុជាក្នុងឆ្នាំ ២០១៥ ហើយលោក Pang បានមើលឃើញថា ក្រុមហ៊ុនផ្តល់សេវាកម្មដឹកជញ្ជូនមួយនេះកំពុងនៅក្នុងទីកន្លែងល្អឥតខ្ចោះ ដើម្បីទទួលបាននូវអត្ថប្រយោជន៍ពីកំណើននៃវិស័យនេះ។
ការស្រាវជ្រាវរួមគ្នាកាលពីពេលថ្មីៗដែលធ្វើឡើងដោយ Google, Temasek និង Bain & Company បានបង្ហាញថា មានអ្នកប្រើប្រាស់អ៊ីនធឺណិតតាមទូរស័ព្ទដៃប្រមាណ ៣៦០ លាននាក់នៅអាស៊ីអាគ្នេយ៍ដោយវិស័យពាណិជ្ជកម្មតាមប្រព័ន្ធអេឡិចត្រូនិកក្នុងតំបន់រំពឹងថានឹងឈានដល់ ១៥០ ពាន់លានដុល្លារនៅត្រឹមឆ្នាំ ២០២៥ ពោលគឺកើនពី ៣៨ ពាន់លានដុល្លារក្នុងឆ្នាំ ២០១៩។
ហើយទីផ្សារដឹកជញ្ចូនទំនិញនៅកម្ពុជារំពឹងថានឹងឈានដល់ ២,២៥ ពាន់លានដុល្លារនៅត្រឹមឆ្នាំ ២០២៣ នេះបើយោងតាមរបាយការណ៍របស់ MarketReportsWorld.com ដែលនឹងធ្វើឱ្យការដឹកជញ្ជូនទំនិញក្លាយជាវិស័យលេចធ្លោមួយទៀតនៅកម្ពុជា។
ជាមួយនឹងការរំពឹងទុកនៃកំណើន ជាពិសេសនៅក្នុងសេវាកម្មដឹកជញ្ជូនដល់ដៃអតិថិជនចុងក្រោយ KWB បានពន្លឿនផែនការរបស់ខ្លួនដើម្បីក្លាយជាអ្នកផ្តល់សេវាកម្ម (one-stop service) ឱ្យបានគ្របដណ្តប់នៅទូទាំងប្រទេស។
«ខណៈបច្ចុប្បន្ននេះ យើងផ្តល់សេវាដឹកជញ្ជូននៅទូទាំងប្រទេសតាមរយៈបណ្តាញសាខាចំនួន ៥០ យើងក៏មានផែនការពង្រីកប្រតិបត្តិការបន្ថែមដើម្បីឱ្យសេវាកម្មយើងគ្របដណ្តប់ទៅដល់តំបន់ជនបទដាច់ស្រយាលបំផុត នៅក្នុងប្រទេសកម្ពុជា»។
«ដើម្បីបង្កើនការគ្របដណ្ដប់ឱ្យកាន់តែទូលំទូលាយសម្រាប់អតិថិជន យើងក៏បានបង្កើតកន្លែងដាក់ទំនិញដែលមានភាពងាយស្រួលក្នុងភាពជាដៃគូជាមួយបណ្តាញខ្សែចង្វាក់ដូចជា Aeon, Circle K, PTT និងទីតាំងជាច្រើនទៀតដែលប្រតិបត្តិការទាំងនៅក្នុងទីក្រុង និងតំបន់ជនបទ។ ឆ្នាំនេះយើងគ្រោងនឹងបង្កើនចំណុចទាំងនេះឱ្យដល់ជាង ៣០០ ទីតាំង»។
«យើងកំពុងកែលម្អហេដ្ឋារចនាសម្ព័ន្ធឃ្លាំងស្តុកទំនិញរបស់យើង និងបង្កើនសមត្ថភាពសេវាកម្មដឹកជញ្ជូនទំនិញ ស្របតាមតម្រូវតាមសីតុណ្ហភាព (cold-chain logistics) ដើម្បីឆ្លើយតបនឹងតម្រូវការកើនឡើង។
ជាមួយនឹងឃ្លាំងស្តុកទំនិញដ៏ទំនើបរបស់យើង រួមជាមួយរថយន្ដដឹកទំនិញថ្មី និងរថយន្តដែលមានស្រាប់ គឺយើងអាចរក្សាសីតុណ្ហភាពក្នុងចន្លោះពី ០ អង្សា ទៅដក ២០ អង្សាសេដែលបំពេញបានតាមស្តង់ដាអន្តរជាតិខ្ពស់បំផុត»។
លោក Pang បន្តថា៖ «ខណៈពេលបច្ចុប្បន្ន ភាគច្រើនគឺផ្តោតលើផ្នែកអាជីវកម្មទៅអាជីវកម្ម ប៉ុន្តែយើងកំពុងពិភាក្សាជាមួយក្រុមហ៊ុនមួយចំនួន ដើម្បីពង្រីកអាជីវកម្មទៅដល់អតិថិជនផ្ទាល់។ ខ្សែចង្វាក់ (cold chain) គ្រោងនឹងបញ្ចប់ទាំងស្រុងនៅត្រីមាសទី ៣ ក្នុងឆ្នាំនេះ»។
លោក Dickson Pang
លោកបន្ថែមថា ជាមួយនឹងតម្លៃប្រកួតប្រជែងរួមនឹងការគ្រប់គ្រងការដឹកទំនិញ ឃ្លាំងស្តុក និងការដឹកជញ្ជូនផលិតផលផ្សេងៗសម្រាប់អតិថិជនដែលជាក្រុមហ៊ុនជាង ២០០ ក្រុមហ៊ុន KWB ផ្តល់សេវាដឹកជញ្ជូនទំនិញជាមធ្យម ៤ ០០០ កញ្ចប់ជារៀងរាល់ថ្ងៃ។
«កាលពីឆ្នាំមុន យើងបានវិនិយោគរាប់លានដុល្លារទៅលើឃ្លាំងស្តុក ឧបករណ៍ និងបច្ចេកវិទ្យា IT ដើម្បីពន្លឿនដំណើរការវេចខ្ចប់។ ប៉ុន្តែនេះមិនមានន័យថា យើងឈប់ជួលកម្លាំងមនុស្សនោះទេ។
ផ្តល់ការងារ គឺជួយជំរុញកំណើន សេដ្ឋកិច្ច និងបង្កើនគុណភាពនៃសេវាកម្មរបស់យើងនៅលើទីផ្សារ»។
«ការវិនិយោគឥតឈប់ឈររបស់យើងទៅលើហេដ្ឋារចនាសម្ព័ន្ធដឹកជញ្ជូន រួមជាមួយការអភិវឌ្ឍបុគ្គលិកក្នុងស្រុក យើងមានបុគ្គលិកខ្មែរចំនួន ៩៩,៨ ភាគរយនៃកម្លាំងពលកម្មរបស់យើងប្រមាណ ៥០០ នាក់ដែលបានជួយឱ្យយើងគ្របដណ្តប់សេវាកម្មបាន ៨៥ ភាគរយនៃការចែកចាយនៅទូទាំងប្រទេស។
លោកបានបន្ថែមថា៖ «យើងមានដំណោះស្រាយស្វ័យប្រវត្តិកម្ម ប៉ុន្តែនេះនឹងមិនជំនួសកម្លាំងមនុស្សទេ យើងមិនមានចេតនាប្រើយន្តហោះ ដ្រូន ឬបច្ចេកវិទ្យាផ្សេងដើម្បីជំនួសកម្លាំងមនុស្សទេ ពីព្រោះយើងជឿជាក់ថា មូលដ្ឋាននីយកម្មគឺជាអាថ៌កំបាំងដើម្បីទទួលបានជោគជ័យក្នុងការផ្តល់ការដឹកជញ្ជូនទំនិញទៅដល់ដៃអតិថិជន»៕
