.jpg)
លោក Yu (រូបទី ៣ រាប់ពីឆ្វេង) និងលោកស្រី Fion Ng នាយកធនាគារពាណិជ្ជ ឈីហ្វ ប្តូរឯកសារអំឡុងពេលចុះហត្ថលេខា។
ក្រុមហ៊ុនធានារ៉ាប់រងអាយុជីវិត ហ្គ្រេន ឆាយណា ឡាយហ្វ៍ អ៊ិនសូរេន ចាប់ដៃគូជាមួយធនាគារពាណិជ្ជ ឈីហ្វ (ខេមបូឌា) ម.ក ដើម្បីពង្រីកអាជីវកម្មធានារ៉ាប់រងរបស់ខ្លួននៅកម្ពុជា។
ភាគីទាំង ២ បានចុះហត្ថលេខាលើអនុស្សរណៈយោគយល់គ្នាក្នុងរាជធានីភ្នំពេញកាលពីថ្ងៃទី ១៣ ខែធ្នូកន្លងទៅក្នុងគោលបំណងដើម្បីអភិវឌ្ឍវិស័យធានារ៉ាប់រងរបស់ប្រទេសកម្ពុជា កំពុងបង្ហាញនូវសញ្ញារីកចម្រើនដែលជំរុញដោយការយល់ដឹងកាន់តែច្រើនអំពីសារៈសំខាន់នៃធានារ៉ាប់រងអាយុជីវិត និងប្រាក់ចំណូលដែលកំពុងកើនឡើង។
លោកឧកញ៉ាបណ្ឌិត សឿង ម៉ូរ៉ារិទ្ធ ប្រធាននាយកប្រតិបត្តិធនាគារពាណិជ្ជ ឈីហ្វ (ខេមបូឌា) ម.ក ថ្លែងនៅក្នុងពិធីចុះ MoU នោះថា៖ «ក្រុមហ៊ុនធានារ៉ាប់រងអាយុជីវិត ហ្គ្រេន ឆាយណា ឡាយហ្វ៍ មានបទពិសោធច្រើននៅក្នុងវិស័យធានារ៉ាប់រងអាយុជីវិត ដូច្នេះយើងជឿជាក់លើក្រុមជំនាញ និងបច្ចេកវិទ្យារបស់ពួកគេ ហើយវានឹងទទួលបានជោគជ័យនៅក្នុងទីផ្សារក្នុងស្រុករបស់យើង។ អតិថិជនអាចទិញធានារ៉ាប់រងនៅធនាគារ ដើម្បីធានាបាននូវគុណភាព»។
ក្រុមហ៊ុនធានារ៉ាប់រងអាយុជីវិតអន្តរជាតិកំពុងមានចំណាប់អារម្មណ៍ខ្លាំងចំពោះវិស័យធានារ៉ាប់រងរបស់ប្រទេសកម្ពុជាដែលកំពុងបង្ហាញសក្តានុពលនៃកំណើនដ៏ខ្លាំងក្លា។ យោងតាមក្រសួងសេដ្ឋកិច្ច និងហិរញ្ញវត្ថុបានឲ្យដឹងថា កំណើនប្រចាំឆ្នាំរបស់វិស័យនេះជាមធ្យមគឺ ៣៥ ភាគរយក្នុងរយៈពេល ៥ ឆ្នាំចុងក្រោយនេះ ហើយរំពឹងថានឹងមានកំណើនចំនួន ៣២ ភាគរយនៃបុព្វលាភដុលក្នុងឆ្នាំនេះ។
«ចំណូលជាមធ្យមសម្រាប់មនុស្សម្នាក់បានកើនឡើងគួរឲ្យកត់សម្គាល់ ដែលធ្វើឲ្យអំណាចនៃការទិញទំនិញ និងសេវាកម្មរួមទាំងធានារ៉ាប់រងក៏កើនឡើងផងដែរ។
ចំណូលជាមធ្យមសម្រាប់មនុស្សម្នាក់របស់ប្រទេសកម្ពុជាមានត្រឹមតែ ២៨៨ ដុល្លារប៉ុណ្ណោះក្នុងឆ្នាំ ២០០០ និងកើនឡើងដល់ ៨៣០ ដុល្លារក្នុងឆ្នាំ ២០១០ និងឈានដល់ ១ ៥៤៨ ដុល្លារក្នុងឆ្នាំ ២០១៨»។
លោកបណ្ឌិត ម៉ូរ៉ារិទ្ធ បានបន្ថែមថា៖ «ប្រជាជនមានការយល់ដឹងកាន់តែច្រើនអំពីសារៈសំខាន់នៃសេវាកម្មធានារ៉ាប់រង ដូច្នេះពួកគាត់អាចផ្ទេរហានិភ័យដែលអាចកើតមានទៅឱ្យក្រុមហ៊ុនធានារ៉ាប់រងក្នុងតម្លៃសមរម្យ»។
ធនាគារពាណិជ្ជ ឈីហ្វ មានសាខាចំនួន ៣ នៅទីក្រុងភ្នំពេញ ហើយបានបើកដំណើរការនៅក្នុងប្រទេសកម្ពុជាចាប់តាំងពីឆ្នាំ ២០១៣ មក។
លោក Yu ៖ ប្រជាជនកម្ពុជាកាន់តែច្រើនបានវិនិយោគ លើធានារ៉ាប់រង ដោយសារមានការយល់ដឹងច្រើន។
ថ្លែងនៅក្នុងព្រឹត្តិការណ៍ដដែលនោះដែរលោក Yu Li Qun អគ្គនាយកក្រុមហ៊ុនធានារ៉ាប់រងអាយុជីវិត ហ្គ្រេន ឆាយណា បានថ្លែងថា ចាប់តាំងពីក្រុមហ៊ុននេះចូលមកក្នុងទីផ្សារកម្ពុជាកាលពី ២ ឆ្នាំកម្លងមកនេះឃើញថា ប្រជាជនកម្ពុជាកាន់តែច្រើន កំពុងវិនិយោគទៅលើធានារ៉ាប់រង ដោយសារតែពួកគេយល់ដឹងកាន់តែច្រើនអំពីអត្ថប្រយោជន៍នៃធានារ៉ាប់រង។
«យើងមានអតិថិជនកម្ពុជាច្រើន ហើយការលក់របស់យើងកំពុងកើនឡើងជារៀងរាល់ថ្ងៃពីព្រោះប្រជាជនកាន់តែច្រើនបានយល់ដឹងអំពីអត្ថប្រយោជន៍នៃធានារ៉ាប់រង។ ការទិញធានារ៉ាប់រងគឺជាការចែករំលែកហានិភ័យជាមួយក្រុមហ៊ុន។ ក្រុមហ៊ុនរបស់យើងត្រូវបានបង្កើតឡើងនៅកម្ពុជាក្នុង ឆ្នាំ ២០១៨ ហើយយើងបានធ្វើការស្រាវជ្រាវយ៉ាងហ្មត់ចត់ ដូច្នេះយើងដឹងច្បាស់ពីតម្រូវការរបស់ប្រជាជនកម្ពុជា»។
លោកបន្ថែមថា៖ «បច្ចុប្បន្នយើងមានអតិថិជនជាង ២ ០០០ នាក់ហើយភាគច្រើននៃអតិថិជនរបស់យើងជាប្រជាជនកម្ពុជា ហើយផលិតផលរបស់យើងមានទាំងសម្រាប់បុគ្គលសម្រាប់គ្រួសារ និងសម្រាប់សហគ្រាសផងដែរ។ វិស័យធានារ៉ាប់រងរបស់ប្រទេសកម្ពុជាបច្ចុប្បន្នគឺប្រហាក់ប្រហែលនឹងវិស័យធានារ៉ាប់រងរបស់ប្រទេសចិនក្នុងឆ្នាំ ១៩៩៣។ ខណៈសេដ្ឋកិច្ចកំពុងរីកចម្រើន ឧស្សាហកម្មធានារ៉ាប់រងក៏រីកចម្រើនដូចគ្នាដែរ។ ខ្ញុំជឿជាក់ថានៅពេលអនាគត វិស័យធានារ៉ាប់រងនឹងរីកចម្រើនកាន់តែខ្លាំង»។
លោកឧកញ៉ា បណ្ឌិត ម៉ូរ៉ារិទ្ធ៖ បច្ចុប្បន្នមានការយល់ដឹងច្រើនអំពីអត្ថប្រយោជន៍នៃសេវាកម្មធានារ៉ាប់រង ។
លោក Yu Li Qun បញ្ជាក់ថាក្រុមហ៊ុនមានយុទ្ធសាស្ត្រយូរអង្វែងក្នុងការផ្ទេរជំនាញធានារ៉ាប់រងអាយុជីវិតមកកាន់ទីផ្សារកម្ពុជា និងបណ្តុះបណ្តាលអ្នកជំនាញក្នុងស្រុកដើម្បីគាំទ្រដល់ឧស្សាហកម្មដែលកំពុងរីកចម្រើននេះ។
«ផ្អែកលើចំណងមិត្តភាពដ៏ជិតស្និទ្ធរវាងកម្ពុជា-ចិន ក្រុមហ៊ុនរបស់យើងគ្រោងនឹងនាំយកអ្វីៗដែលល្អៗមកកាន់ប្រទេសកម្ពុជា ហើយយើងនឹងជួយបណ្តុះបណ្តាលប្រជាជនកម្ពុជាអំពីវិស័យនេះ»។
លោក Yu Li Qunz បន្ថែមថា៖ «នៅពេលអនាគតខ្ញុំជឿជាក់ថា ផ្នែកគ្រប់គ្រងរបស់ក្រុមហ៊ុន និងបុគ្គលិកទាំងគឺសុទ្ធតែជាជាជនជាតិខ្មែរ ហើយក្នុងរយៈពេល ៣ ឆ្នាំខាងមុខក្រុមហ៊ុននឹងជួយបណ្តុះបណ្តាលប្រជាជនកម្ពុជាកាន់តែច្រើនអំពីធានារ៉ាប់រង»៕
