ក្រុមហ៊ុន សាន់ & មូន គ្រុប (SUN & MOON Group Co., LTD) ដែលជាក្រុមហ៊ុនជំនាញខាងវិនិយោគលើគម្រោងសណ្ឋាគារប្រណីតៗ អគារខុនដូ និងសំណង់ផ្ទះល្វែងទំនើបៗទាន់សម័យបាននិងកំពុងហក់ចូលក្នុងវិស័យពាណិជ្ជកម្មបោកអ៊ុតមួយទៀតគឺ សាន់ & មូន ឡនឌ្រី (SUN & MOON Commercial Laundry) ដែលគ្រោងនឹងបើកដំណើរការបម្រើអតិថិជននៅត្រីមាសទី ២ ក្នុងឆ្នាំ ២០២០ នេះ។
ជាមួយនឹងម៉ាស៊ីនបោកអ៊ុតទំនើបខ្នាតធំចំនួន ៨ គ្រឿងដែលម៉ាស៊ីននីមួយៗមានសមត្ថភាពបោកអ៊ុតបានរហូតដល់ ១០០ គីឡូក្រាម ហើយ សាន់ & មូន ឡនឌ្រី នឹងផ្តល់សេវាកម្មបោកអ៊ុតសម្រាប់វិស័យជាច្រើននៅទូទាំងព្រះរាជាណាចក្រកម្ពុជាដោយចាប់ផ្តើមពីវិស័យបដិសណ្ឋារកិច្ច។
លោក រ៉ាត់ ដារ៉ារ័ត្ន អគ្គនាយករងក្រុមហ៊ុន សាន់ & មូន គ្រុប (SUN & MOON Group Co., LTD) បានឲ្យកាសែតភ្នំពេញប៉ុស្តិ៍ដឹងថា ក្រុមហ៊ុននឹងប្រើប្រាស់ឧស្សាហកម្មសណ្ឋាគារដែលកំពុងរីកចម្រើនយ៉ាងឆាប់រហ័សនេះ ជាកន្លែងចាប់ផ្តើមពង្រីកសេវាកម្មរបស់ខ្លួន ដើម្បីផ្គត់ផ្គង់ទៅដល់វិស័យជាច្រើនទៀតនៅទូទាំងព្រះរាជាណាចក្រកម្ពុជា។
«អាជីវកម្មស្នូលរបស់យើងបានចាប់ផ្តើមពីឧស្សាហកម្មបដិសណ្ឋារកិច្ចទៅទីផ្សារគោលដៅដំបូងរបស់យើងគឺ សណ្ឋាគារ។ ផ្អែកលើរបាយការណ៍ចុងឆ្នាំរបស់ក្រុមហ៊ុនអចលនទ្រព្យ Knight Frank បានឲ្យដឹងថា បច្ចុប្បន្នសណ្ឋាគារមានជាង ១១ ០០០ បន្ទប់ ក្នុងរាជធានីភ្នំពេញដោយផ្អែកលើកំណើន ៧.៥ ភាគរយ ក្នុង ១ ឆ្នាំ។
លោក ដារ៉ារ័ត្ន បានថ្លែងថា៖ «បន្ទប់នីមួយៗមានកម្រោលពូក កម្រាលខ្នើយដែលតម្រូវឱ្យមានការបោកសម្អាត ដូច្នេះចក្ខុវិស័យសម្រាប់សេវាកម្មបោកអ៊ុតនៅក្នុងវិស័យសណ្ឋាគារតែមួយគឺកំពុងកើនឡើង។ យើងបានដឹងច្បាស់អំពីអ្វីដែលអតិថិជនចង់បាន ពីព្រោះយើងចេញមកពីឧស្សាហកម្មបដិសណ្ឋារកិច្ចនេះដោយផ្ទាល់»។
ដើម្បីជួយដល់ប្រតិបត្ដិការបោកអ៊ុតរបស់សាន់ & មូន ឡនឌ្រី (SUN & MOON Commercial Laundry) ក្រុមហ៊ុនបានសម្រេចជ្រើសរើសលោក កែ កំសាន្ត ធ្វើជាប្រធានគ្រប់គ្រងទូទៅ។
លោក កំសាន្ត ដែលធ្លាប់ដឹកនាំប្រតិបត្តិការបោកអ៊ុតនៅតាមសណ្ឋាគារល្បីៗមួយចំនួននៅកម្ពុជាក៏បានចែករំលែកអំពីចក្ខុវិស័យរបស់លោកចំពោះក្រុមហ៊ុនបោកអ៊ុតមួយនេះដែលមានទីតាំងស្ថិតនៅលើផ្ទៃដីទំហំ ៤ ៩០០ m2 នៅសង្កាត់ព្រែកឯង ខណ្ឌច្បារអំពៅ រាជធានីភ្នំពេញដែរ។
លោក កំសាន្ត បានថ្លែងថា ជាបន្តបន្ទាប់ក្រុមហ៊ុននឹងសម្លឹងទៅដល់វិស័យបម្រើសេវាកម្មម្ហូបអាហារ ភេសជ្ជៈ ស្ប៉ា កន្លែងហាត់ប្រាណ និងផ្នែកឯកសណ្ឋានក្រុមហ៊ុន ហើយសំខាន់បំផុតទៀតនោះគឺ «ការបោកអ៊ុតបែបជីវសាស្ត្រ» ដូច្នេះការបោកអ៊ុតសម្រាប់មន្ទីរពេទ្យនឹងគោរពទៅតាមស្តង់ដាអន្តរជាតិ។
យោងតាមលោក កំសាន្ត បានឲ្យដឹងទៀតថា បច្ចុប្បន្នសេវាកម្មបោកអ៊ុតនៅមិនទាន់បែងចែកសម្លៀកបំពាក់ និងកម្រាលពូកខ្នើយសម្រាប់អតិថិជនរបស់ខ្លួននៅឡើយទេ ដូច្នេះអ្វីៗត្រូវបានធ្វើជាមួយគ្នា។
លោក កំសាន្ត លើកឡើងថា៖ «បច្ចុប្បន្នគម្រោងនេះបានបញ្ចប់ ៧០ ភាគរយហើយ។ ពេលវេលានឹងត្រូវបានបែងចែកសម្រាប់ការសាកល្បង ហើយដំណើរការសាកល្បងគ្រោងនឹងចាប់ផ្តើមនៅខែទី ១ នៃត្រីមាសទី ២ ហើយប្រតិបត្តិការពេញលេញគ្រោងនឹងចាប់ផ្តើមនៅត្រីមាសទី ៣»។ ការបោកអ៊ុត សម្ងួត បត់ នឹងត្រូវធ្វើឡើងតាមខ្នាតនៃឧស្សាហកម្មនីមួយៗ។
ក្រុមហ៊ុនគ្រោងជួលបុគ្គលិកប្រមាណ ៣០ នាក់ នៅដំណាក់កាលដំបូងនៃប្រតិបត្តិការរបស់ខ្លួន ហើយចំនួននេះនឹងកើនឡើងជាលំដាប់នៅពេលសាខាត្រូវបានពង្រីកទាំងទីផ្សារក្នុងស្រុក និងអន្តរជាតិ។
លោក ដារ៉ារ័ត្ន បានបញ្ជាក់ថា ក្រុមហ៊ុនគ្រោងនឹងចូលរួមក្នុងកិច្ចខិតខំប្រឹងប្រែងជាសកលដើម្បីកាត់បន្ថយផលប៉ះពាល់បរិស្ថានផងដែរ។
លោកលើកឡើងថា ក្រុមហ៊ុនក៏កំពុងធ្វើការជាមួយក្រុមហ៊ុនផ្គត់ផ្គង់ និងក្រុមហ៊ុនគីមីដើម្បីអភិវឌ្ឍប្រព័ន្ធបោកអ៊ុតដែលការពារដល់បរិស្ថាន។
លោក ដារ៉ារ័ត្ន បន្តថា៖ «សាន់ & មូន ឡន ឌ្រី គឺផ្តល់សេវាកម្មបោកអ៊ុតសម្រាប់ឧស្សាហកម្មទាំងអស់។ បេសកកម្មរបស់យើងគឺផ្តល់សេវាកម្មបោកអ៊ុតសម្រាប់សម្លៀកបំពាក់ ស្រោមពូក ខ្នើយ និងក្រណាត់គ្រប់ប្រភេទ និងធានាថារក្សាបាននូវគុណភាពល្អ និងធន់បានយូរ»៕