.jpg)
មន្ត្រីរបស់ក្រុមហ៊ុន PAL ថតរូបជាមួយលោក Montero (រូបទី ៥ រាប់ពីឆ្វេង) ឯកអគ្គរដ្ឋទូតហ្វីលីពីនប្រចាំកម្ពុជាក្នុងពិធីសម្ពោធជើងហោះហើរជាផ្លូវការ។ post staff
នៅដើមខែមេសាខាងមុខនេះក្រុមហ៊ុនអាកាសចរណ៍ហ្វីលីពីន Philippines Airlines (PAL) នឹងធ្វើការហោះហើរត្រង់លើកដំបូងរបស់ខ្លួនពីទីក្រុងម៉ានីល មកកាន់រាជធានីភ្នំពេញ។
ការតភ្ជាប់ជើងហោះហើរត្រង់របស់ក្រុមហ៊ុន អាកាសចរណ៍ PAL មកកម្ពុជានេះមិនត្រឹមតែផ្តល់ភាពងាយស្រួលដល់ការធ្វើដំណើរទៅវិញទៅមករវាងប្រទេសទាំង ២ ប៉ុណ្ណោះទេ ប៉ុន្តែវាក៏ផ្តល់ភាពងាយស្រួលដល់ការធ្វើដំណើររបស់ពលរដ្ឋហ្វីលីពីនដែលរស់នៅក្នុងរាជធានីភ្នំពេញផងដែរ។ បច្ចុប្បន្នមានជនជាតិហ្វីលីពីនប្រមាណ ៧ ពាន់នាក់កំពុងរស់នៅក្នុងប្រទេសកម្ពុជា ហើយប្រមាណ ៨០ ភាគរយគឺរស់នៅក្នុងទីក្រុងភ្នំពេញ។
កាលពីមុនការធ្វើដំណើរពីប្រទេសហ្វីលីពីនមកប្រទេសកម្ពុជាត្រូវឈប់ប្តូរជើងយន្តហោះនៅប្រទេសមួយផ្សេងទៀតដែលធ្វើឲ្យការធ្វើដំណើរមានរយៈពេលយូរអាចលើសពី ៦ ម៉ោងដែលវាអូសបន្លាយពេលវេលាយ៉ាងច្រើន ប៉ុន្តែតាមរយៈការបើកជើងហោះហើរត្រង់ដំបូងរបស់អាកាសចរណ៍ PAL មកកាន់កម្ពុជានេះ វានឹងធ្វើឲ្យការធ្វើដំណើរត្រូវចំណាយពេលត្រឹមតែ ២ ម៉ោងកន្លះប៉ុណ្ណោះ។
ការភ្ជាប់ជើងហោះហើររបស់ក្រុមហ៊ុនអាកាសចរណ៍ PAL គឺដើម្បីជួយសម្រួលដល់ការធ្វើពាណិជ្ជកម្មរវាងកម្ពុជា និងហ្វីលីពីនដោយក្រុមហ៊ុនមើលឃើញឱកាសសម្រាប់អតិថិជនរបស់ខ្លួនក្នុងការបង្កើនការធ្វើពាណិជ្ជកម្ម និងការធ្វើដំណើរទេសចរណ៍ក៏ដូចជាការបង្កើនការវិនិយោគរវាងប្រទេសទាំង ២ ផងដែរ។
លោក Bautista ថ្លែងនៅក្នុងពិធីសម្ពោធជើងហោះហើរជាផ្លូវការ។ post staff
អនុប្រធានផ្នែកលក់របស់ក្រុមហ៊ុនអាកាសចរណ៍ PAL លោក Ryan T. Uy បានថ្លែងថា៖ «រឿងដែលច្បាស់លាស់បំផុតនោះគឺថាយើងមកកាន់ទីនេះគឺដើម្បីជំរុញដល់កំណើនពាណិជ្ជកម្ម និងទេសចរណ៍រវាងប្រទេសទាំង ២»។
លោក Christopher B. Montero ឯកអគ្គរដ្ឋទូតហ្វីលីពីនប្រចាំកម្ពុជាក៏បានថ្លែងថា៖ «ការបើកជើងហោះហើរត្រង់នេះនឹងជួយបង្កើនការតភ្ជាប់ប្រទេសកម្ពុជាទៅកាន់ពិភពលោកទាំងមូល ហើយយើងបានរៀបចំខ្លួនរួចជាស្រេចដើម្បីជួយបង្កើនចំនួនភ្ញៀវទេសចរក៏ដូចជាការផ្លាស់ប្តូរសេដ្ឋកិច្ច។ យើងដឹងថាព្រះរាជាណាចក្រកម្ពុជាគឺជាប្រទេសមួយដ៏ស្រស់ស្អាតដែលមានតំបន់ទេសចរណ៍ដ៏សម្បួរបែបហើយរាជធានីភ្នំពេញគឺជាមជ្ឈមណ្ឌលសេដ្ឋកិច្ចដែលកំពុងរីកលូតលាស់»។
ជាមួយនឹងការព្យាករដ៏វិជ្ជមានក្រុមហ៊ុនអាកាសចរណ៍ PAL ចាត់ទុកថានេះជាឱកាសដ៏ល្អមួយសម្រាប់ទំនាក់ទំនងសេដ្ឋកិច្ច និងការអភិវឌ្ឍ ហើយក្រុមហ៊ុនរំពឹងថាការភ្ជាប់ជើងហោះហើរត្រង់មកកម្ពុជានេះនឹងទទួលបានការគាំទ្រខ្លាំងពីអតិថិជន។
លោក Uy ថ្លែងថា៖ «ជាថ្មីម្តងទៀតប្រសិនបើយើងមើលឃើញថាតម្រូវការមានការកើនឡើងខ្លាំង នោះយើងនឹងប្តូរទៅប្រើប្រាស់យន្តហោះប្រភេទ A321 វិញ ដែលវាជាប្រភេទយន្តហោះមានកៅអីអង្គុយកាន់តែច្រើន»។
នៅក្នុងប្រទេសកម្ពុជាក្រុមហ៊ុនអាកាសចរណ៍ PAL មើលឃើញអំពីឱកាសរីកចម្រើនជាច្រើន។ វិស័យអាកាសចរណ៍នៅកម្ពុជាកំពុងរីកលូតលាស់ ជាមួយគ្នានេះដែរអនុសញ្ញាទីក្រុង Cape Town នៅក្នុងវិស័យមួយនេះវាក៏នឹងធ្វើឱ្យវិស័យអាកាសចរណ៍កម្ពុជាកាន់តែទទួលបានផលប្រយោជន៍ច្រើន និងកាន់តែមានភាពងាយស្រួល ខណៈនៅខេត្តសៀមរាបក៏ត្រូវបានគេមើលឃើញអំពីការរីកចម្រើនដ៏ខ្លាំងក្លាផងដែរ។
លោក Ryan T Uy ថ្លែងស្វាគមន៍ភ្ញៀវកិត្តិយសដែលបានចូលរួមនៅក្នុងពិធី។
លោក Uy បានធ្វើការកត់សម្គាល់ថា៖ «យើងតែងតែសិក្សាអំពីផ្លូវហោះហើររបស់យើង ហើយសម្រាប់ពេលនេះគឺយើងដើរ ១ ជំហានម្តងៗតាមរយៈការហោះហើរត្រង់មកកាន់ទីក្រុងភ្នំពេញ។ ច្បាស់ណាស់យើងដឹងអំពីតម្រូវការខ្ពស់នៅខេត្តសៀមរាប ហើយយើងកំពុងពិនិត្យមើលលទ្ធភាពជាក់លាក់ណាមួយសម្រាប់ការតភ្ជាប់ជើងហោះហើរនាពេលអនាគត» ។
លោក Uy បន្តថាប៉ុន្តែសក្តានុពលនៃកំណើនដែលក្រុមហ៊ុនអាកាសចរណ៍ PAL មើលឃើញនៅក្នុងប្រទេសកម្ពុជាគឺមិនមែនមានតែនៅខេត្តសៀមរាបប៉ុណ្ណោះទេ យើងក៏មើលឃើញគោលដៅជាច្រើនទៀតនៅក្នុងព្រះរាជាណាចក្រកម្ពុជាផងដែរក្រៅពីខេត្តសៀមរាបដោយផ្លូវហោះហើរទាំងនោះកំពុងស្ថិតនៅក្នុងដំណាក់កាលពិនិត្យ និងពិចារណាហើយចំពោះទិសដៅលេចធ្លោជាងគេគឺខេត្តព្រះសីហនុ។
ទាក់ទងវិស័យពាណិជ្ជកម្ម និងទេសចរណ៍នៅក្នុងប្រទេសហ្វីលីពីនវិញ ចេញពីទីក្រុងម៉ានីល ក្រុមហ៊ុនអាកាសចរណ៍ PAL មានជើងហោះហើរក្នុងស្រុកទៅកាន់គោលដៅទេសចរណ៍ជាច្រើននៅក្នុងប្រទេសហ្វីលីពីន ជាពិសេសមានជើងហោះហើរភ្ជាប់ទៅកាន់ទីក្រុងធំៗដែលផ្តល់ភាពងាយស្រួលដល់ភ្ញៀវទេសចរពីប្រទេសកម្ពុជា ពួកគាត់អាចទៅកម្សាន្តនៅតំបន់កោះ និងឆ្នេរសមុទ្រដ៏ស្រស់ស្អាត និងសម្បួរបែបដែលជាតំបន់ទេសចរណ៍ដ៏ល្បីល្បាញរបស់ប្រទេសហ្វីលីពីនបានដោយងាយស្រួល។
លោក Montero បានចង្អុលបង្ហាញថា ក្នុងនាមជាប្រទេសក្នុងតំបន់អាស៊ាន ភ្ញៀវទេសចរកម្ពុជាអាចស្នាក់នៅក្នុងប្រទេសហ្វីលីពីនបានរហូតដល់ ៣០ ថ្ងៃ ដោយមិនត្រូវការទិដ្ឋាការពីព្រោះគោលនយោបាយបើកទូលាយរបស់អាស៊ាន។ លោក Jamie Bautista ប្រធាននិងជានាយកប្រតិបត្តិនៃក្រុមហ៊ុនអាកាសចរណ៍ PAL បានបន្ថែមថា៖ «យើងសង្ឃឹមថាការបើកជើងហោះហើរនេះនឹងជួយពង្រឹងចំណងមិត្តភាពនៃប្រទេសយើងទាំង ២ ឲ្យកាន់តែរឹងមាំក៏ដូចជាពង្រឹងសាមគ្គីភាពរបស់អាស៊ានផងដែរ»៕
