.jpg)
China Airlines ដឹកជញ្ជូនអ្នកដំណើរបានប្រមាណ៣៤០០០នាក់កាលពីឆ្នាំមុនហើយរំពឹងថា ឆ្នាំនេះនឹងកើនឡើងខ្ពស់។ សហការី
ក្រុមហ៊ុនអាកាសចរណ៍ចិន China Airlines មានគម្រោងបង្កើនជើងហោះហើរឲ្យបានជារៀងរាល់ថ្ងៃ ដោយបច្ចុប្បន្នមានតែ ៥ ជើងប៉ុណ្ណោះក្នុង ១ សប្តាហ៍ ដើម្បីតភ្ជាប់ទីក្រុងភ្នំពេញ និងទីក្រុងតៃប៉ិដែលជាផ្នែក ១ នៃផែនការពង្រីកសេវាកម្មរបស់ខ្លួននៅក្នុងឆ្នាំនេះ។
លោក Charles Hsu ប្រធានគ្រប់គ្រងទូទៅរបស់ក្រុមហ៊ុនប្រចាំកម្ពុជាបានឲ្យដឹងថាការបង្កើនជើងហោះហើរញឹកញាប់នេះនឹងចាប់ផ្តើមពីខែមីនាតទៅដែលវានឹងជួយបង្កើនបរិមាណដឹកជញ្ជួនរបស់ខ្លួនដែលជាមធ្យមមានកំណើនប្រមាណ ៨៣ ភាគរយជារៀងរាល់ឆ្នាំ។
លោកបានថ្លែងប្រាប់កាសែតភ្នំពេញ ប៉ុស្តិ៍ ថា៖ «តាមរយៈការបង្កើនជើងហោះហើរប្រចាំថ្ងៃនេះយើងរំពឹងថា អ្នកដំណើរនឹងកើនឡើងចន្លោះពី ៣០ ទៅ ៤០% រវាងទីក្រុងតៃប៉ិនិងទីក្រុងភ្នំពេញ។ ហើយវាមានសមត្ថភាពជួយដល់កំណើនភ្ញៀវទេសចរដែលចាប់អារម្មណ៍មកទស្សនាប្រទេស កម្ពុជា ជាពិសេសខេត្ត សៀមរាប»។
ទីស្នាក់ការក្រុមហ៊ុន China Airlines នៅទីក្រុងតៃប៉ិបានឲ្យដឹងថាក្រុមហ៊ុនអាកាសចរណ៍នេះបានដឹកជញ្ជូនអ្នកដំណើរប្រមាណ ៣៤ ០០០ នាក់ រវាងគោលដៅទាំង ២ កាលពីឆ្នាំមុន ហើយនៅក្នុងឆ្នាំ ២០១៩ នេះក្រុមហ៊ុនសង្ឃឹមថា ជាឆ្នាំដែលមានកំណើនខ្ពស់សម្រាប់ក្រុមហ៊ុនអាកាសចរណ៍មួយនេះដែលបានប្រតិបត្តិការហោះហើរមកកាន់កម្ពុជាចាប់តាំងពីឆ្នាំ ២០០៦ មកនោះ។
អ្នកដំណើរប្រមាណ ៥៥% មកពីកោះតៃវ៉ាន់ គឺជាភ្ញៀវទេសចរ (ភាគច្រើនធ្វើដំណើរជាក្រុម) ហើយប្រមាណ ២៥% ជាអ្នកជំនួញ ក្រៅពីនោះ គឺអ្នកធ្វើដំណើរមកលេងសាច់ញាតិបងប្អូន ឬមិត្តភក្តិ។ ប៉ុន្តែទោះបីជាយ៉ាងណាក៏ដោយមានតែ ១០ ភាគរយប៉ុណ្ណោះដែលធ្វើដំណើរចេញពីកម្ពុជាទៅតៃវ៉ាន់វិញ។
ក្រុមហ៊ុនប្រើយន្តហោះប្រភេទ 737-800 ដែលមានកៅអីប្រភេទ Economic Class ចំនួន ១៥០ កៅអី និងកៅអីប្រភេទជំនួញ Business Class ចំនួន ៨ កៅអី។
លោកថ្លែងថា៖ «យើងមិនទាន់ទទួលបានប្រាក់ចំណេញទេក្នុងរយៈពេល ១៣ ឆ្នាំចុងក្រោយនេះ វាគឺជាជំនួញមួយដ៏តានតឹង។យើងសង្ឃឹមថានឹងទទួលបានចំណូលរួចខ្លួនក្នុងរយៈពេល ១ ឬ ២ ឆ្នាំទៀត ហើយនៅពេលខាងមុខយើងសង្ឃឹមថានឹងទទួលបានប្រាក់ចំណេញ។ ខ្ញុំមានសុទិដ្ឋិនិយមខ្លាំងណាស់ចំពោះទស្សនវិស័យមួយនេះ ដោយសារតែអត្រាកំណើនសេដ្ឋកិច្ចខ្ពស់ ហើយជាទូទៅ គឺវាមានកម្រិតខ្ពស់បំផុតនៅក្នុងតំបន់អាស៊ីដែលប្រជាជនមានកម្រិតជីវភាពមធ្យមក៏កាន់តែមានចំនួនច្រើន»។
លោកបន្ថែមថា៖ «ខ្ញុំជឿជាក់ថា ចរាចរណ៍ផ្លូវអាកាសចេញចូលកម្ពុជានឹងកើនឡើងចន្លោះពី ១០ ទៅ ២០ ភាគរយក្នុង ១ ឆ្នាំ»។
យោងតាមការចេញផ្សាយរបស់កាសែត Taiwan News ដែលបានដកស្រង់សម្តីការិយាល័យទេសចរណ៍តៃវ៉ាន់ បានឲ្យដឹងថាពលរដ្ឋតែវ៉ាន់ចំនួន ៨២ ០០០ នាក់បានមកទស្សនាប្រទេស កម្ពុជា កាលពីឆ្នាំ ២០១៧ ហើយបើគិតត្រឹមខែកក្កដាឆ្នាំមុនពលរដ្ឋតៃវ៉ាន់ចំនួន ៥៥ ០០០ នាក់បានមកទស្សនាកម្ពុជា។
យោងតាមកាសែតដដែលបានឲ្យដឹងទៀតថាជាមធ្យមអ្នកទេសចរតៃវ៉ាន់ចំនួន ២៥ ០០០ នាក់បានមកទស្សនាប្រាសាទអង្គរវត្តជារៀងរាល់ឆ្នាំ ដែលជាតំបន់ទេសចរណ៍ទាក់ចំណាប់អារម្មណ៍ពលរដ្ឋតៃវ៉ាន់ដ៏សំខាន់។
ក្រុមហ៊ុនអាកាសចរណ៍នេះក៏ដឹកជញ្ជូនទំនិញប្រហែល ២ តោនពីកម្ពុជាតាមជើងហោះហើរនីមួយៗផងដែរហើយបរិមាណត្រូវបានគេព្យាករថា នឹងកើនឡើងនៅក្នុងឆ្នាំនេះ។
លោក Hsu បញ្ជាក់ថា៖ «យើងរំពឹងថា វានឹងមានកំណើនចន្លោះពី ៣០ ទៅ ៤០ ភាគរយនៅក្នុងឆ្នាំនេះបើធៀបនឹងឆ្នាំមុន»។
លោក Hsu (រូបកណ្ដាល) ថា ក្រុមហ៊ុននឹងទទួលបានចំណូលរួចដើមនៅក្នុងរយៈពេល១ឬ២ឆ្នាំខាងមុខ។សហការី
ក្រុមហ៊ុនអាកាសចរណ៍ China Airlines កំពុងប្រកួតប្រជែងនៅក្នុងទីផ្សារដ៏តូចចង្អៀតមួយនេះជាមួយក្រុមហ៊ុនអាកាសចរណ៍ ៣ ផ្សេងទៀតដែលប្រតិបត្តិការនៅក្នុងវិស័យនេះ ក្នុងនោះរួមមានក្រុមហ៊ុនអាកាសចរណ៍តៃវ៉ាន់ EVA Air ក្រុមហ៊ុន JC (Cambodia) និងក្រុមហ៊ុនអាកាសចរណ៍ Cambodia Airways ដែលសុទ្ធតែបម្រើសេវាកម្មមួយនេះដូចគ្នា។
ក្រុមហ៊ុនអាកាសចរណ៍នេះ គឺជាផ្នែកមួយនៃសម្ព័ន្ធ Sky Team Alliance ដែលភ្ជាប់ទៅកាន់ ១៦១ គោលដៅ ក្នុង ២៩ ប្រទេស។
ក្រុមហ៊ុនមានយន្តហោះចំនួន ៨៨ គ្រឿងក្នុងនោះយន្តហោះដឹកអ្នកដំណើរមាន ៧០ គ្រឿងនិងយន្តហោះដឹកទំនិញមាន ១៨ គ្រឿង។
ក្រុមហ៊ុនអាកាសចរណ៍ក្នុងស្រុកចំនួន ៨ ដែលកំពុងប្រតិបត្តិការនៅក្នុងទីផ្សារមួយនេះជាមួយក្រុមហ៊ុនអាកាសចរណ៍អន្តរជាតិជាច្រើនទៀតកំពុងតភ្ជាប់ប្រទេស កម្ពុជា ទៅគោលដៅអន្តរជាតិជាច្រើន។
អាកាសយានដ្ឋានអន្តរជាតិទាំង ៣ របស់កម្ពុជា រួមមានអាកាសយានដ្ឋានអន្តរជាតិភ្នំពេញ អាកាសយានដ្ឋានអន្តរជាតិខេត្តព្រះសីហនុ និងអាកាសយានដ្ឋានអន្តរជាតិខេត្តសៀមរាប ទទួលអ្នកដំណើរចំនួន ១០ លានកាលពីឆ្នាំមុន។
ប្រទេស កម្ពុជា រំពឹងថានឹងទទូលបានភ្ញៀវទេសចរជាង ៦ លាននាក់នៅក្នុងឆ្នាំនេះនិងកំណត់គោលទៅទទួលភ្ញៀវទេសចរឲ្យបាន ៧ លាននាក់នៅឆ្នាំ ២០២០។
កាលពីខែវិច្ឆិកាកន្លងទៅ កម្ពុជា និងនេប៉ាល់បានចុះហត្ថលេខាលើកិច្ចព្រមព្រៀងពាក់ព័ន្ធនឹងវិស័យដឹកជញ្ជូន តាមផ្លូវអាកាស (ASA) ដែលនឹងអនុញ្ញាតឱ្យក្រុមហ៊ុនអាកាសចរណ៍អាចប្រតិបត្តិការហោះហើររវាងប្រទេសទាំង ២។
ក្រុមហ៊ុនអាកាសចរណ៍ហ្វីលីពីន Philippine Airlines (PAL) ចាប់ផ្តើមជើងហោះហើរថ្មីនៅក្នុងតំបន់អាស៊ីអាគ្នេយ៍ពីទីក្រុងម៉ានីល ដែលនឹងចាប់ផ្តើមប្រតិបត្តិការនៅថ្ងៃទី ៣១ ខែមីនា។
យោងតាមការប្រមើលមើលទីផ្សារពាណិជ្ជកម្ម របស់ក្រុមហ៊ុន Boeing ចន្លោះពីឆ្នាំ ២០១៨ ដល់ ឆ្នាំ ២០៣៧ បានឲ្យដឹងថា វិស័យអាកាសចរណ៍នៅតំបន់អាស៊ីអាគ្នេយ៍ត្រូវបានគេរំពឹងថានឹងមានកំណើនដ៏ខ្លាំងក្លា ដោយសារតែប្រជាជនដែលមានកម្រិតជីវភាពមធ្យមកើនឡើងខ្ពស់នៅក្នុងបណ្តាប្រទេសដែលកំពុងអភិវឌ្ឍន៍។
របាយការណ៍របស់ក្រុមហ៊ុន Boeing បានគូសបញ្ជាក់ថា៖ «នៅក្នុងរយៈពេលមួយទសវត្សរ៍ចុងក្រោយនេះតំបន់អាស៊ីអាគ្នេយ៍បានក្លាយទៅជាទីផ្សារអាកាសចរណ៍ធំបំផុតមួយនៅក្នុងតំបន់អាស៊ីប៉ាស៊ីហ្វិក។ មូលហេតុគឺដោយសាតែការអភិវឌ្ឍសេដ្ឋកិច្ចដ៏រឹងមាំ កំណើនពលរដ្ឋមានជីវភាពមធ្យមកើនឡើង ការចំណាយរបស់អតិថិជននៅក្នុងវិស័យសេវាកម្មកើនឡើងទាំងនេះហើយគឺជាទិដ្ឋភាពរួមដែលធ្វើឲ្យទីផ្សារអាកាសចរណ៍ក្នុងតំបន់អាស៊ីអាគ្នេយ៍មានកំណើនខ្ពស់» ៕
