.jpg)
តំបន់ទេសចរណ៍ដ៏ទាក់ទាញមួយនៅលើកោះនេះគឺ តំបន់ទេសចរណ៍វប្បធម៌ Hainan Binglang Gulimao Cultural Tourist Zone។ រូបថត កែវ ពុទ្ធី
ខណៈដែលគំនិតផ្តួចផ្តើម «ខ្សែក្រវាត់មួយផ្លូវមួយ»កំពុងក្លាយជាចំណុចស្នូល នៃពាណិជ្ជកម្មនៅក្នុងតំបន់នោះ អាជ្ញាធរទេសចរណ៍ខេត្តហៃណាន នៃប្រទេស ចិន និងខេត្តព្រះសីហនុ បានដាក់ចេញនូវគោលការណ៍គ្រឹះដើម្បីកែលម្អវិស័យទេសចរណ៍រវាងគោលដៅទាំង ២ ឱ្យឈាន ដល់កម្រិតថ្មីមួយ។
ក្រុមហ៊ុនអាកាសចរណ៍ Hainan Airlines បានចាប់ផ្តើមដំណើរការជើងហោះហើររវាងខេត្តព្រះសីហនុ និងទីក្រុងហៃខូវនៃខេត្តហៃណាន កាលពីថ្ងៃទី ១៥ ខែ កក្កដាកន្លងទៅ ដែលជាផ្នែកមួយនៃយុទ្ធសាស្ត្ររបស់ពួកគេក្នុងការលើកកម្ពស់វិស័យទេសចរណ៍។
លោក Zhang Kunrong អនុប្រធានការិយាល័យទេសចរណ៍ វប្បធម៌ ការផ្សព្វផ្សាយ និងកីឡានៃទីក្រុងហៃខូវ បានថ្លែងថា ទីក្រុងហៃខូវ និងខេត្តព្រះសីហនុ គឺជាដៃគូយុទ្ធសាស្ត្រដ៏សំខាន់ក្នុងការលើកកម្ពស់គំនិតផ្តួចផ្តើម «ខ្សែក្រវាត់មួយផ្លូវមួយ» ដែលជារបៀបវារៈអភិវឌ្ឍន៍ពាណិជ្ជកម្មអន្តរជាតិត្រូវបានលើកកម្ពស់យ៉ាងសកម្មដោយទីក្រុងប៉េកាំង។
លោក Zhang បន្ថែមថា៖ «ការបើកផ្លូវហោះហើររវាងទីក្រុងហៃខូវ-ក្រុងព្រះសីហនុ នឹងធ្វើឱ្យកិច្ចសហប្រតិបត្តិការ និងទំនាក់ទំនងកាន់តែស៊ីជម្រៅថែមមួយកម្រិតទៀត រវាងទីក្រុងហៃខូវ និងខេត្តព្រះសីហនុដែលជួយជំរុញដល់ការអភិវឌ្ឍសេដ្ឋកិច្ច និងសង្គមនៃតំបន់ទាំង ២»។
ជាមួយការបើកជើងហោះហើររវាងខេត្តហៃណាន និងខេត្តព្រះសីហនុ វិស័យទេសចរណ៍នៃគោលដៅទេសចរណ៍ដ៏ទាក់ទាញទាំង ២ ត្រូវបានរំពឹងនឹងកើនឡើង។ រូបថត កែវ ពុទ្ធី
អាជ្ញាធរខេត្តហៃណានបានរៀបចំសន្និសីទដើម្បីផ្សព្វផ្សាយ និងជំរុញវិស័យទេសចរណ៍ក៏ដូចជាជើងហោះហើររវាងទីក្រុងហៃខូវ-ខេត្តព្រះសីហនុ កាលពីថ្ងៃទី ១៨ ខែ កក្កដា ដើម្បីស្វែងយល់ឲ្យកាន់តែស៊ីជម្រៅអំពីធនធានដែលទាក់ទងទៅនឹងវិស័យទេសចរណ៍ ផលិតផលទេសចរណ៍ និងការអភិវឌ្ឍឧស្សាហកម្មមួយនេះនៅក្នុងខេត្តហៃណាន ដែលមានទីតាំងស្ថិតនៅភាគខាងត្បូងប្រទេស ចិន។
លោក Fu Fenghua អនុប្រធានមន្ទីរទេសចរណ៍ វប្បធម៌ វិទ្យុ ទូរទស្សន៍ និងកីឡានៃខេត្តហៃណាន បានមានប្រសាសន៍ថា៖ «ឆ្នាំ ២០១៩ គឺជាឆ្នាំវប្បធម៌ និងទេសចរណ៍រវាងប្រទេស ចិន និងកម្ពុជាហើយសន្និសីទនេះគឺជាដំណើរវិវឌ្ឍន៍ដ៏សំខាន់មួយដើម្បីលើកកម្ពស់សកម្មភាពទេសចរណ៍ នៅក្នុងចំណោមគោលដៅទេសចរណ៍ទាំង ២»។
«ចាប់តាំងពីការប្រកាស ការកសាងតំបន់ពាណិជ្ជកម្មសេរីដោយប្រធានាធិបតីចិន លោក ស៊ី ជិនភីងមក វិស័យទេសចរណ៍បានក្លាយជាឧស្សាហកម្មដ៏សំខាន់ទីមួយនៅក្នុងខេត្តហៃណាន»។
លោកបន្ថែមថា ខេត្តហៃណាន បានយកចិត្តទុកដាក់យ៉ាងខ្លាំងក្នុងការអភិវឌ្ឍទីផ្សារទេសចរណ៍កម្ពុជា ពិសេសខេត្តព្រះសីហនុ ជាខេត្តដែលវិស័យទេសចរណ៍ត្រូវបានអភិវឌ្ឍ។ បន្ទាប់ពីផ្លូវហោះហើររវាងខេត្តទាំង ២ (ហៃណាន-ព្រះសីហនុ) ត្រូវបានបើកដំណើរការ ការផ្លាស់ប្តូរទេសចរណ៍ និងកិច្ចសហប្រតិបត្តិការរវាងគោលដៅទាំង ២ នឹងបន្តកាន់តែស៊ីជម្រៅថែមទៀត។
ថ្លែងនៅក្នុងពិធីនោះដែរ លោក តាំង សុចិត្តគ្រឹស្នា ប្រធានមន្ទីរទេសចរណ៍ខេត្តព្រះសីហនុបានមានប្រសាសន៍ថា ៨៨ ភាគរយ នៃប្រជាជនរស់នៅក្នុងខេត្តព្រះសីហនុ សរុបចំនួន ២២០,០០០ នាក់ គឺជាអ្នកកាន់ព្រះពុទ្ធសាសនា ដូច្នេះហើយខេត្តអាចទាក់ទាញភ្ញៀវទេសចរមកពីខេត្តហៃណានបានច្រើន។
លោកបន្ថែមថា៖ «ខេត្តព្រះសីហនុ គឺជាខេត្តទេសចរណ៍ដ៏សំខាន់មួយនៅក្នុងប្រទេស កម្ពុជា។ ថ្មីៗនេះឧស្សាហកម្មទេសចរណ៍ នៅក្នុងខេត្តព្រះសីហនុមានការរីកចម្រើន ដោយទទួលបានភ្ញៀវទេសចរបរទេសចំនួន ៥០០,០០០ នាក់ នៅក្នុង ១ ឆ្នាំ ហើយភ្ញៀវទេសចរចិនមានចំនួនច្រើនជាងគេ»។
លោក Ding Jiabin ប្រធានក្រុមហ៊ុនអាកាសចរណ៍ Hainan Airlines ថ្លែងថា ខេត្តហៃណាន និងខេត្តព្រះសីហនុមានធនធានទេសចរណ៍ស្រដៀងគ្នា។
លោកបញ្ជាក់ថា៖ «ខេត្តទាំង ២ គឺជាតំបន់អភិវឌ្ឍន៍សេដ្ឋកិច្ចដ៏សំខាន់ និងមានកំពង់ផែពាណិជ្ជកម្មដ៏ធំ។ ជាមួយនឹងការស្ថាបនាគម្រោងខ្សែក្រវាត់មួយផ្លូវមួយ និងការបង្កើតតំបន់ពាណិជ្ជកម្មសេរីនៅខេត្តហៃណាន ខេត្តទាំង ២ នឹងក្លាយជាដៃគូសហប្រតិបត្តិការកាន់តែជិតស្និទ្ធ»។
លោកបន្ថែមថា៖ « ខ្ញុំសង្ឃឹមថា ការបើកផ្លូវហោះហើររវាងទីក្រុងហៃខូវ និងខេត្តព្រះសីហនុនេះ អាចជំរុញដល់ការផ្លាស់ប្តូរ និងកិច្ចសហប្រតិបត្តិការរវាងតំបន់ទាំង ២ លើវិស័យវប្បធម៌ សេដ្ឋកិច្ច ពាណិជ្ជកម្ម ទេសចរណ៍ និងដឹកជញ្ជូន»។
កាលពីពេលថ្មីៗនេះ មន្ត្រីក្រសួងទេសចរណ៍ខេត្តព្រះសីហនុ ភ្នាក់ងារទេសចរណ៍ និងអ្នកសារព័ត៌មាន ប្រមាណ ២០ រូប បានធ្វើដំណើរទស្សនកិច្ចទៅកាន់ខេត្តហៃណាន រយៈពេល ៥ ថ្ងៃ ដែលរៀបចំឡើងដោយក្រុមហ៊ុនអាកាសចរណ៍ Hainan Airlines ៕
