ទីផ្សារឧបករណ៍និស្សន្ទនៅកម្ពុជាដែលមានតម្លៃប្រមាណ ១០០ លានដុល្លារ ពិតជាកំពុងមានកំណើនទៅមុខយ៉ាងរលូន ទោះបីស្ថិតនៅក្នុងអំឡុងពេលនៃការរីករាលដាលជំងឺកូវីដ១៩ ដែលបានបង្អាក់ដល់ការរីកចម្រើនចំពោះឧស្សាហកម្មមួយនេះបន្តិចក្តី។
ប្រជាជនកម្ពុជាកាន់តែច្រើនកំពុងទាញយកអត្ថប្រយោជន៍ពីភាពងាយស្រួលនៃការធ្វើពាណិជ្ជកម្មលើឧបករណ៍និស្សន្ទតាមរយៈកម្មវិធីឌីជីថលមួយនេះ ហើយបានចាប់ផ្ដើមសាកល្បងជំនាញវិនិយោគរបស់ពួកគេ ដើម្បីរកប្រាក់បន្ថែមដែលវាកំពុងបន្តជំរុញដល់កំណើននៅក្នុងឧស្សាហកម្មមួយនេះដែលកំពុងមានសម្ទុះយ៉ាងខ្លាំង។
លោក ជា សុធា នាយកប្រតិបត្តិនៃក្រុមហ៊ុនហ្គោលដេន អេហ្វ អិកស៍ លីង ឃែភីថល (Golden FX Link Capital Co Ltd ) មានប្រសាសន៍ថា ជាមួយនឹងការធ្វើពាណិជ្ជកម្មភាគច្រើនដែលផ្អែកតាមប្រព័ន្ធអេឡិចត្រូនិក និងការធ្វើអាជីវកម្មនៅក្នុងទីផ្សារនេះបានកើនឡើងយ៉ាងឆាប់រហ័ស បើទោះបីវារងផលប៉ះពាល់បន្តិចពីការផ្ទុះឡើងនៃវីរុសកូរ៉ូណាក្តី។
«ទីផ្សារឧបករណ៍និស្សន្ទកំពុងរីកចម្រើនជាលំដាប់ និងមានសុខភាពល្អ។ យោងតាមគណៈកម្មការមូលបត្រកម្ពុជា (គ.ម.ក) បានឱ្យដឹងថានៅក្នុងឆ្នាំ ២០១៧ ទំហំពាណិជ្ជកម្មទីផ្សារឧបករណ៍និស្សន្ទមានតម្លៃត្រឹមតែ ៥ លានដុល្លារប៉ុណ្ណោះ ប៉ុន្តែវាបានកើនឡើងដល់ ១០០ លានដុល្លារកាលពីឆ្នាំមុន។ រហូតមកដល់ក្នុងឆ្នាំ ២០២០នេះ យើងសម្រេចបាន ៨០ ភាគរយនៃទំហំទីផ្សារអាជីវកម្មឧបករណ៍និស្សន្ទដែលសម្រេចបានក្នុងឆ្នាំ ២០១៩»។
លោក សុធា បានបន្តថា៖ «យើងប្រាកដថា នៅក្នុងឆ្នាំនេះតួលេខនឹងអាចកើនលើសតួលេខឆ្នាំ ២០១៩។ ដោយសារវាជាអាជីវកម្មតាមប្រព័ន្ធអេឡិចត្រូនិក ដែលអាចអនុញ្ញាតឱ្យសាធារណជនអាចធ្វើការវិនិយោគបាន ២៤ ម៉ោងក្នុង ១ ថ្ងៃ និង ៥ ថ្ងៃក្នុង ១ សប្តាហ៍។ ពួកគេអាចធ្វើអាជីវកម្មដោយប្រើប្រាស់កុំព្យូទ័រ ថេប្ល៊ិត ឬសូម្បីតែតាមទូរស័ព្ទដៃរបស់ពួកគេ។ នេះគឺជាអត្ថប្រយោជន៍ដ៏ធំនៃអាជីវកម្មទីផ្សារឧបករណ៍និស្សន្ទមួយនេះ»។
បន្ទាប់ពីក្រុមហ៊ុន ខេមបូឌាន ដេរីវ៉េទីវ អ៊ិចឆេង (CDX) ត្រូវបានបង្កើតឡើងក្នុងឆ្នាំ ២០១៦ ការជួញដូរ មាស រូបិយប័ណ្ណ និងប្រេងឆៅនាពេលបច្ចុប្បន្នកំពុងបង្ហាញនូវប្រជាប្រិយភាពខ្លាំងក្នុងចំណោមវិនិយោគិនកម្ពុជា ហើយការជួញដូរឧបករណ៍ និស្សន្ទនៅកម្ពុជាកំពុងទាក់ទាញឱ្យមានចំណាប់អារម្មណ៍យ៉ាងខ្លាំងទៅលើឧបករណ៍ហិរញ្ញវត្ថុតាមរយៈការជួញដូរទៅលើកិច្ចសន្យាអនាគត និងជម្រើសផ្សេងៗតាមរយៈក្រុមហ៊ុនសមភាគីកណ្តាលផ្សេងៗដែលទទួលបានអាជ្ញាប័ណ្ណពី គ.ម.ក។
ក្រុមហ៊ុន ហ្គោលដេន អេហ្វ អិកស៍ លីង ឃែភីថល ដែលចាប់ផ្តើមប្រតិបត្តិការក្នុងឆ្នាំ ២០១៦ គឺជាអ្នកដើរតួយ៉ាងសំខាន់នៅក្នុងទីផ្សារឧបករណ៍និស្សន្ទដែលកំពុងរីកចម្រើននេះ។ យោងតាមរបាយការណ៍ប្រចាំត្រីមាសទី ១ របស់ គ.ម.ក បានឱ្យដឹងថា ក្រុមហ៊ុននេះបានក្លាយជាក្រុមហ៊ុនឈ្មួញជើងសាឧបករណ៍និស្សន្ទឈានមុខគេនៅក្នុងព្រះរាជាណាចក្រកម្ពុជាដោយផ្អែកលើទំហំពាណិជ្ជកម្ម ស្របពេលដែលមានក្រុមហ៊ុនឈ្មួញជើងសាឧបករណ៍និស្សន្ទចំនួន ៣០ ដែលកំពុងធ្វើប្រតិបត្ដិការក្នុងវិស័យនេះ។
លោក សុធា បន្ថែមថា៖ «ចំនួនសរុបនៃប្រតិបត្តិការជួញដូរនៅតែបន្តកើនឡើងពី ១ ខែទៅ ១ ខែ។ ចំនួនប្រតិបត្តិការកាន់តែខ្ពស់មានន័យថាចំណេះដឹងកាន់តែកើន ហើយការចូលរួមកាន់តែមានច្រើនពីអ្នកជួញដូរទីផ្សារ ជាពិសេសពាណិជ្ជករ និងវិនិយោគិន។ វាល្អសម្រាប់ឧស្សាហកម្មមួយនេះ និងសម្រាប់ការអភិវឌ្ឍសេដ្ឋកិច្ចជាតិយើង»។
«មនុស្សកាន់តែច្រើនស្គាល់អំពីទីផ្សារឧបករណ៍និស្សន្ទពីព្រោះបេសកកម្មរបស់យើងគឺដើម្បីផ្សព្វផ្សាយដល់សាធារណជនអំពីទីផ្សារមួយនេះរួមជាមួយ គ.ម.ក និង CDX ក៏ដូចជាការបណ្តុះបណ្តាលផ្ទាល់តាមរយៈវីដេអូ និងហ្វេសប៊ុក ពោលគឺយើងបានរៀបចំសិក្ខាសាលានៅ ២៤ ខេត្ត-ក្រុង និងរាជធានីភ្នំពេញ»។
លោក សុធា សរុបថា៖ «យើងមានកម្លាំងក្រុមការងារដ៏រឹងមាំជាមួយសេវាកម្មអតិថិជន ការគ្រប់គ្រងហានិភ័យ និងក្រុមប្រឹក្សាហិរញ្ញវត្ថុ ដែលផ្តល់ការវិភាគប្រចាំថ្ងៃដល់អតិថិជនរបស់យើង ដូច្នេះពួកគេទទួលបានការជូនដំណឹងអំពីដំណើរការទីផ្សារយ៉ាងល្អ»។
ក្រុមហ៊ុន ហ្គោលដេន អេហ្វ អិកស៍លីង ឃែភីថល ប្រើកម្មវិធីវិនិយោគអេឡិចត្រូនិក MetaTrader 4 ជាដំណោះស្រាយតាមប្រព័ន្ធអនឡាញសម្រាប់វិនិយោគិនដែលអាចមើលឃើញពីលំហូរតម្លៃ និងគំនូសតារាង ការបញ្ជាទិញ និងការគ្រប់គ្រងគណនីរបស់ពួកគេ។
ប្រទេសកម្ពុជាកំពុងមើលឃើញនូវបាតុភូតថ្មីដ៏អស្ទារ្យដែលកំពុងតែបង្ហាញឱ្យឃើញថា ខ្លួនមានភាពរឹងមាំ ទោះបីមានបញ្ហាកើតឡើង ប៉ុន្តែទីផ្សារឧបករណ៍និស្សន្ទនៅតែបន្តរីកចម្រើន និងបានជួយគាំទ្រវិស័យហិរញ្ញវត្ថុរបស់ប្រទេសកម្ពុជាបន្ថែមទៀត៕