អស់រយៈពេលជិត ១ ទសវត្សរ៍នៃការផលិតកាបូបសម្រាប់នាំចេញ ក្រុមហ៊ុន Sino-Cambodian manufacturer - HK Burltex Manufactory Co Ltd បានផ្លាស់ទៅរកគំរូថ្មីមួយទៀត គឺការផលិតម៉ាស់ និងឧបករណ៍ការពារផ្ទាល់ខ្លួន (PPE) ។
លទ្ធផលនៃជំងឺរាតត្បាតកូវីដ១៩ បានធ្វើឱ្យប៉ះពាល់ដល់ឧស្សាហកម្មវាយនភណ្ឌជាទូទៅ ហើយសម្រាប់ក្រុមហ៊ុន ឬអាជីវកម្មដែលមានឯកទេសខាងផលិតសម្លៀកបំពាក់មួយចំនួនកាលពីឆ្នាំមុនក៏បានជួបប្រទេះនឹងបញ្ហាប្រឈមដោយសារតែវិបត្តិជំងឺរាតត្បាតសកលនេះដែរ។
«ទោះបីត្រូវបានបង្កើតឡើងដើម្បីផលិតកាបូបដៃ និងស្បែកជើងចាប់តាំងពីឆ្នាំ ២០១២ ក្តីក៏ការងាកមកផលិតម៉ាស់នេះគឺជារឿងដ៏ថ្មីសន្លាងសម្រាប់យើង។ ជាមួយនឹងការរីករាលដាលនៃជំងឺកូវីដ១៩ កាលពីដើមឆ្នាំមុន យើងបានជួបប្រទះនូវការធ្លាក់ចុះយ៉ាងខ្លាំងនៃទីផ្សារផលិតផលរបស់យើង»។
លោក Hong Kong Wai នាយកគ្រប់គ្រងក្រុមហ៊ុន HK Burltex Manufactory Co Ltd ថ្លែងថា៖ «ជាមួយនឹងតម្រូវការម៉ាស់ និងឧបករណ៍ការពារផ្ទាល់ខ្លួន (PPE) កំពុងកើនឡើងខ្ពស់ទាំងនៅក្នុងស្រុក និងសកល ដើម្បីឆ្លើយតបនឹងវិបត្តិរាតត្បាតនេះ ក្រុមហ៊ុនបានធ្វើការសម្រេចចិត្តជាយុទ្ធសាស្ត្រក្នុងការបន្ថែមការផលិតម៉ាស់ ដែលជាផលិតផលមួយផ្សេងទៀត ក្រៅពីខ្សែចង្វាក់ផលិតកម្មរបស់ខ្លួន»។
ការលើកឡើងនេះ មិនមែនជារឿងភ្ញាក់ផ្អើលនោះទេ ខណៈរបាយការណ៍របស់គេហទំព័រ MarketAndMarkets.com ដែលជាអ្នកស្រាវជ្រាវទីផ្សារឈានមុខគេនៅលើពិភពលោកបានព្យាករថា តម្រូវការម៉ាស់នៅលើពិភពលោកកើនឡើងពី ៧៣៧ លានដុល្លារ ក្នុងឆ្នាំ ២០១៩ ដល់ ២២ ពាន់លានដុល្លារក្នុងឆ្នាំ ២០២១ ដោយមានអត្រាកំណើនប្រចាំឆ្នាំប្រមាណជិត ៣០ ដង។
លើសពីនេះទៀត ទំហំម៉ាស់ផ្នែកវេជ្ជសាស្ត្រនៅទូទាំងពិភពលោកត្រូវបានរំពឹងថានឹងកើនឡើងដល់បរិមាណដ៏គួរឱ្យភ្ញាក់ផ្អើលគឺជាង ៥២ ពាន់លានម៉ាស់គិតត្រឹមចុងឆ្នាំ ២០២០ ដោយសារតែការផ្ទុះឡើងនៃជំងឺកូវីដ-១៩ ប៉ុន្តែរំពឹងថា ឆ្នាំ ២០២១នឹងមានស្ថិរភាព ហើយតម្រូវការម៉ាស់អាចឈានដល់ ២៩ ពាន់លានម៉ាស់ត្រឹមឆ្នាំ ២០២៥។
ខណៈប្រជាជនកម្ពុជាកំពុងបន្តប្រឈមនឹងការផ្លាស់ប្តូរការរស់នៅប្រចាំថ្ងៃដោយសារតែជំងឺរាតត្បាតធ្វើឱ្យក្រុមហ៊ុនផលិតម៉ាស់ទទួលបានការស្វាគមន៍យ៉ាងកក់ក្តៅ ហើយកាលពីឆ្នាំមុន ដោយសារតែការបារម្ភពីសុខភាពបានធ្វើឱ្យតម្រូវការម៉ាស់មានកំណើនខ្ពស់ ដែលរុញឱ្យតម្លៃម៉ាស់កើនឡើងខ្ពស់ផងដែរ។
«ដើម្បីឆ្លើយតបទៅនឹងការផ្តោតរបស់អតិថិជនទៅលើគុណភាព និងកម្រិតនៃការការពារពីផលិតផលរបស់យើង យើងបានផ្តោត និងខិតខំប្រឹងប្រែងយ៉ាងខ្លាំងក្នុងរយៈពេលពី ៥ ទៅ ៧ ខែដើម្បីបង្កើតផលិតផលដែលឆ្លើយតបទៅនឹងតម្រូវការសុខភាព និងសុវត្ថិភាព ហើយត្រូវបានអនុវត្តបន្ទាប់ពីការដាក់ពាក្យស្នើសុំផលិតម៉ាស់ត្រូវបានរដ្ឋាភិបាលអនុម័តកាលពីខែមេសាឆ្នាំមុន»។
លោក Hong បន្តថា៖ «ជាលទ្ធផល យើងអាចនិយាយដោយទំនុកចិត្តថាផលិតផលម៉ាស់ទាំងអស់ដែលផលិតនៅក្នុងស្រុកដោយក្រុមហ៊ុន HK Burltex គឺស្ថិតក្នុងចំណោមផលិតផលម៉ាស់មួយចំនួនតូចប៉ុណ្ណោះដែលត្រូវបានបញ្ជាក់ដោយក្រសួងសុខាភិបាលកម្ពុជា ថាបានបំពេញតាមស្តង់ដាសុខភាព និងសុវត្ថិភាពអន្តរជាតិ»។
សម្រាប់ការលក់រាយនៅផ្សារទំនើប និងតាមហាងមួយចំនួនគឺមានតម្លៃចាប់ពី ៨ ដុល្លារក្នុង ១ ប្រអប់ដែលមាន ៥០ ម៉ាស់ជាប្រភេទម៉ាស់ ៣ ស្រទាប់ដែលផលិតដោយប្រើវត្ថុធាតុដើមគុណភាពខ្ពស់នាំចូលមកពីប្រទេស ចិន។ លោក Hong ជឿជាក់ថា តម្លៃសមរម្យនេះនឹងផ្តល់អត្ថប្រយោជន៍ដល់ប្រជាជនកម្ពុជាទាំងមូល និងរួមចំណែកដល់ស្ថិរភាពនៃតម្លៃម៉ាស់នៅកម្ពុជា។
ក្រៅពីម៉ាស់ ៣ ស្រទាប់ ក្រុមហ៊ុន HK Burltex ក៏ផលិតម៉ាស់ផ្សេងទៀតដែរដូចម៉ាស់ ៤ ស្រទាប់ និងម៉ាស់សម្រាប់វះកាត់ N95 ផងដែរ។ តាមរយៈខ្សែចង្វាក់ផលិតកម្មចំនួន ១០ និងមានបុគ្គលិកចំនួន ៧០០ នាក់ ក្រុមហ៊ុនអាចផលិតម៉ាស់បានរហូតដល់ ១ លានម៉ាស់ក្នុង ១ ថ្ងៃ។
ដោយមានចំណាប់អារម្មណ៍ខ្លាំងទៅលើចង្វាក់ផលិតកម្មម៉ាស់របស់ខ្លួន ទើបពេលថ្មីៗនេះក្រុមហ៊ុនបានណែនាំផលិតកម្ម OEM សម្រាប់អតិថិជនសាជីវកម្មដែលផលិតផលរបស់ខ្លួនត្រូវបានផលិត និងប្តូរតាមតម្រូវការរបស់អតិថិជន ហើយក៏គ្រោងនឹងពង្រីកប្រតិបត្តិការបន្ថែមទៀតនៅប៉ុន្មានខែខាងមុខ ជាមួយនឹងខ្សែចង្វាក់ផលិតកម្មចំនួន ១០ បន្ថែមទៀតនឹងជួយបង្កើនផលិតផលរបស់ក្រុមហ៊ុនកើនដល់ ២ លានម៉ាស់ក្នុង ១ ថ្ងៃ។
លោក Frankie Yeung ប្រធានគ្រប់គ្រងទូទៅបានថ្លែងថា៖ «ផ្អែកលើគុណភាពនៃផលិតផលរបស់យើងក៏ដូចជាការស្នើសុំកំណត់តម្លៃសមរម្យសម្រាប់ដៃគូលក់រាយ និងអតិថិជនសាជីវកម្ម យើងរំពឹងថានឹងចាប់យកចំណែកទីផ្សារបាន ១០ ភាគរយនៃទីផ្សារម៉ាស់ក្នុងស្រុក នៅក្នុងរយៈពេល ២ ឆ្នាំខាងមុខ»៕