ថ្វីបើមានអាកាសធាតុត្រូពិកដ៏អំណោយផលសម្រាប់ផលិតស្រារសជាតិផ្អែមដ៏ឆ្ងុយឆ្ងាញ់ ប៉ុន្តែពីមុនប្រទេសកម្ពុជានៅមិនទាន់មានក្រុមហ៊ុន ផលិតស្រា rum នៅឡើយ។
ក្រុមហ៊ុន Samai Distillery ដែលត្រូវបានបង្កើតឡើងនៅទីក្រុងភ្នំពេញដោយអ្នកជំនាញផលិតស្រា rum ជនជាតិវេណេស៊ុយអេឡា ២ នាក់ លោកមិនត្រឹមតែផលិតស្រា rum នៅកម្ពុជាប៉ុណ្ណោះទេ ប៉ុន្តែថែមទាំងបាននាំយកស្រា rum គុណភាពខ្ពស់ដែលផលិតនៅកម្ពុជាទៅកាន់ទីផ្សារអន្តរជាតិថែមទៀតផង។
ស្រា rum មានប្រវត្តិយូរលង់ណាស់មកហើយ ដែលត្រូវបានគេស្គាល់ថាជា«rumbullion» ឬ «kill-divil» ហើយនៅក្នុងសតវត្សរ៍ទី ១៧ ស្រា rum ត្រូវបានគេអភិវឌ្ឍ និងកែច្នៃឲ្យក្លាយជាស្រាវីស្គីដែលកាន់តែមានរសជាតិឈ្ងុយឆ្ងាញ់ និងប្រណីត។
នៅក្នុងឆ្នាំ ២០១៤ លោក Daniel Pacheco និងលោក Antonio Lopez De Haro បានបើកដំណើរការក្រុមហ៊ុន Samai Distillery ក្នុងរាជធានីភ្នំពេញដើម្បីបង្ហាញពីបទពិសោធរសជាតិស្រា rum ដល់ប្រជាជនកម្ពុជា។
លោក Pacheco បានឲ្យកាសែតភ្នំពេញប៉ុស្តិ៍ដឹងថា៖ «ជាមួយនឹងវត្ថុធាតុដើមដ៏សម្បូរបែបនៅក្នុងប្រទេសកម្ពុជា យើងពិតជាភ្ញាក់ផ្អើលដែលគ្មានឧស្សហកម្មផលិតស្រា rum នៅក្នុងប្រទេសកម្ពុជា។ ដូច្នេះយើងបានចាត់ផ្តើមបង្កើតក្រុមហ៊ុនផលិតស្រា rum ដ៏ប្រណីតដំបូងគេឡើងនៅកម្ពុជា»។
លោក Pacheco ថ្លែងថាផលិតកម្មបច្ចុប្បន្នគឺ ៧០-៣០ សម្រាប់ទីផ្សារក្នុងស្រុក និងសម្រាប់នាំចេញ ប៉ុន្តែនៅទីបំផុតវានឹងកើនឡើងរហូតដល់ ៥០-៥០។
Samai ដែលបាននាំយករសជាតិស្រាបែបអាមេរិកឡាទីនមកកាន់កម្ពុជានឹងបង្កើនការធ្វើផែនការដើម្បីបង្កើនផលិតកម្មឲ្យបានដល់ ៦០ ០០០ ដបក្នុង ១ ឆ្នាំ។
លោក Pacheco លើកឡើងថា៖ «ទោះបីជាយើងកំពុងដំណើរការ ២៤/៧ ដោយសមត្ថភាពផលិតអាចផលិតបាន ៦ ០០០ ដបក្នុង ១ ឆ្នាំក្តី ប៉ុន្តែតម្រូវការកំពុងកើនឡើង។ យើងកំពុងស្ថិតនៅក្នុងដំណើរការពង្រីកដើម្បីបង្កើនសមត្ថភាពរបស់យើងប្រមាណ ១០ ដង។ ជោគជ័យរបស់យើងមកដល់ពេលនេះគឺគ្រាន់តែជាការចាប់ផ្តើមប៉ុណ្ណោះ»។
ជាមួយនឹងកត្តាបរិស្ថានដ៏ល្អរបស់ប្រទេសកម្ពុជា ដែលផលិតគ្រឿងផ្សំដ៏ល្អបំផុតសម្រាប់ស្រា rum ក្រុមហ៊ុន Samai បានឈ្នះពានរង្វាន់ជាង ១២ ដែលត្រូវបានទទួលស្គាល់ជាអន្តរជាតិ។
«ជោគជ័យដំបូងធំបំផុតរបស់យើង គឺនៅពេលមិត្តភក្តិម្នាក់រស់នៅទីនេះ ដែលធ្លាប់ធ្វើការឱ្យក្រុមហ៊ុនផលិតស្រាដ៏ល្បីល្បាញ Diageo ប្រាប់យើងថា ពួកគេមានកម្មវិធីដ៏ល្អសម្រាប់ផលិតស្រា ដូច្នេះគាត់ក៏ដាក់ពាក្យស្នើសុំឲ្យពួកយើង»។
«២-៣ខែក្រោយមក យើងទទួលបានអ៊ីមែលមួយដែលបានរៀបរាប់ថា៖ «សូមអបអរសាទរអ្នកត្រូវបានជ្រើសរើសក្នុងចំណោមក្រុមហ៊ុនទើបចាប់ផ្តើមដំបូងគេទាំង ១០ នៅលើពិភពលោក។ យើងចង់ឲ្យអ្នកក្លាយជាផ្នែកមួយនៃកម្មវិធីនេះ ដូច្នេះសូមមកទីក្រុងឡុងដ៍ ដើម្បីធ្វើបទបង្ហាញដល់គណៈកម្មាធិការវិនិយោគរបស់យើង។ យើងចូលចិត្តផលិតផលរបស់អ្នក»។
ចាប់តាំងពីពេលនោះមកក្រុមហ៊ុន Samai បានឈ្នះពានរង្វាន់អន្ដរជាតិជាច្រើន រួមមានពានរង្វាន់នៅឯកម្មវិធី San Francisco World Spirits Competition, កម្មវិធី London International Spirits Challenge, កម្មវិធី Singapore World Spirits Competition និងកម្មវិធី Miami International Rum Conference។
លោក Pacheco ថ្លែងថា៖ «នៅក្នុងកម្មវិធីប្រកួតប្រជែងខ្លះ យើងថែមទាំងទទួលបានមេដាយមាស ២ (Double Gold Medals) ដែលមានន័យថា ស្រារបស់យើងត្រូវបានគេចាត់ទុកថា ជាស្រា rum ដែលល្អបំផុតនៅលើពិភពលោក សម្រាប់ប្រភេទរបស់វា ទាំងសម្រាប់ស្រា Samai Gold Rum និងស្រា Samai Kampot Pepper Rum»។
Samai មានមោទនភាពក្នុងការផលិតស្រា rum បែបប្រពៃណីដោយប្រើធុងចំណុះ ៥០០ លីត្រចំនួន ២ ដែល ១០០ ភាគរយធ្វើពីស្ពាន់ ហើយផលិតដោយដៃនៅក្នុងប្រទេសព័រទុយហ្គាល់ដែលជាការរចនាដូចគ្នាទៅនឹងសតវត្សរ៍ទី ១៩។
លោក Pacheco បន្តថា៖ « ស្រា rum មានអាយុកាល និងដំណើរការផលិតផ្សេងៗគ្នា។ ប៉ុន្តែជាធម្មតាអាយុកាលស្រា rum របស់យើងយ៉ាងហោចណាស់គឺមានអាយុកាល ២ ឆ្នាំដែលផ្អាប់នៅក្នុងធុងផ្សេងៗគ្នា។ ស្រា rum របស់យើងខ្លះមានអាយុកាលរហូតដល់ ៤ ឆ្នាំ»។
ជាមួយនឹងឧត្តមភាពនេះ ក្រុមហ៊ុន Samai បាននាំចេញទៅប្រទេស សិង្ហបូរីនិងបារាំងអស់រយៈពេល ៣ ឆ្នាំមកហើយ ហើយពេលថ្មីៗនេះក្រុមហ៊ុនបាននាំចូលទៅកាន់ទីផ្សារអេស្ប៉ាញ។
លោក Julie Hedon ប្រធានទីផ្សាររបស់ក្រុមហ៊ុន Samai បានឲ្យដឹងថា៖ «បច្ចុប្បន្នប្រទេសបារាំង និងសិង្ហបុរីគឺជាទីផ្សារពេញនិយមបំផុតសម្រាប់ស្រា rum របស់យើងនៅខាងក្រៅប្រទេសកម្ពុជា។ ស្រា rum ដ៏ល្អប្រណីតរបស់យើងត្រូវបានគេទទួលស្គាល់យ៉ាងខ្លាំងរួមទាំងនៅតាមហាងស្រាក្រឡុកល្បីៗជាច្រើននៅតំបន់អាស៊ីផងដែរ។
ដើម្បីបង្ហាញពីស្រា rums និង «បដិវត្តន៍ស្រាក្រឡុក» របស់ខ្លួននៅកម្ពុជា ក្រុមហ៊ុន Samai Distillery កាលពីមុនពេលផ្ទុះឡើងនៃជំងឺកូវីដ-១៩ បានបើកដល់សាធារណជននៅយប់ថ្ងៃព្រហស្បតិ៍ ដើម្បីផ្តល់ឱ្យពួកគេនូវឱកាសមកទស្សនាកន្លែងផលិតដើម្បីស្វែងយល់ពីដំណើរការផលិតកម្ម និងទទួលទានស្រាក្រឡុកដ៏សម្បូរបែបរបស់ Samai។
ទោះយ៉ាងណាលោក Pacheco សង្ឃឹមថា ឆាប់ៗពេលមានការអនុញ្ញាតជាផ្លូវការ អ្នកចូលចិត្តស្រា rum នៅទីក្រុងភ្នំពេញ នៅតែអាចរីករាយជាមួយនឹងផលិតផលក្រុមហ៊ុន Samai ពីហាងលក់ស្រារបស់ពួកគេនៅទល់មុខក្រុមហ៊ុន។
«ដោយគ្មានកន្លែងផលិតស្រា rum ណាផ្សេងទៀតនៅកម្ពុជា ដូច្នេះយើងត្រូវសម្លឹងទៅបរទេសដើម្បីស្វែងរកអ្នកជំនាញខាងដំណើរការផលិត ហើយជាសំណាងល្អយើងទទួលបានបេក្ខជនកម្ពុជាម្នាក់ឈ្មោះ Moang Darachampich។ លោកស្រីមានសញ្ញាបត្រអនុបណ្ឌិតផ្នែកវិស្វកម្មគីមី ជំនាញខាងផលិតកម្មចំណីអាហារ និងបានសរសេរនិក្ខេបបទស្តីពីការផ្អាប់ (fermentation) ដូច្នេះយើងដឹងថា គាត់មានជំនាញដែលយើងត្រូវការ ហើយបច្ចុប្បន្នគាត់កំពុងបម្រើការងារជាមួយយើង»៕