ខណៈប្រទេសកម្ពុជាបានបើកដំណើរការឡើងវិញដោយប្រុងប្រយ័ត្ន បន្ទាប់ពីចាត់វិធានការដើម្បីប្រយុទ្ធប្រឆាំងនឹងជំងឺកូវីដ១៩ ប្រជាជនក៏កំពុងទន្ទឹងរង់ចាំវិលត្រឡប់ទៅកាន់កន្លែងកម្សាន្តដែលពួកគេចូលចិត្តវិញ។
អ្នកនៅក្នុងឧស្សាហកម្មភាពយន្តបានឲ្យភ្នំពេញប៉ុស្តិ៍ដឹងថា ប៉ុន្តែរោងភាពយន្តនៅតែបន្តបិទទ្វារជាបណ្តោះអាសន្ន ដែលកំពុងធ្វើឲ្យប៉ះពាល់ដល់វិស័យភាពយន្តដ៏រស់រវើករបស់កម្ពុជា។
កញ្ញា ឡៅ ផានី ប្រធានគ្រប់គ្រងទូទៅក្រុមហ៊ុន Westec Media Limited ដែលជាក្រុមហ៊ុនចែកចាយខ្សែភាពយន្តឈានមុខមួយនៅកម្ពុជាថ្លែងថា៖ «សព្វថ្ងៃយើងជម្រុះបុគ្គលិកសល់តែ ៣០ ភាគរយប៉ុណ្ណោះ ធៀបនឹងមុនពេលផ្ទុះជំងឺនេះឡើង។ បុគ្គលិករោងភាពយន្តនៅកម្ពុជានៅធ្វើការបច្ចុប្បន្នមានចន្លោះពី ៣០ ទៅ ៥០ ភាគរយប៉ុណ្ណោះ។ ពួកគេត្រូវការប្រាក់ខែ ដូច្នេះបើគ្មានចំណូលនោះយើងមិនអាចបន្តបានលើសពី ៤ ខែទេ ឥឡូវនេះយើងស្ថិតក្នុងខែទី ៣ ហើយ»។
ខណៈរោងភាពយន្តនៅប្រទេសវៀតណាមបានបើកដំណើរការជាថ្មីកាលពីថ្ងៃទី ៩ ខែឧសភា នៅពេលប្រទេសថៃ និងឡាវក៏បានបើកឡើងវិញកាលពីខែមុនផងដែរ។ កញ្ញា ផានី សង្ឃឹមថា រដ្ឋាភិបាលកម្ពុជានឹងអនុញ្ញាតឱ្យរោងភាពយន្តនៅកម្ពុជាចាប់ផ្តើមបើកដំណើរការឡើងវិញក្នុងពេលឆាប់ៗ។
«ពិតណាស់កត្តាសុវត្ថិភាពគឺជារឿងសំខាន់បំផុត។ ចំនួននឹងត្រូវបានកាត់បន្ថយដើម្បីឱ្យមនុស្សនៅឆ្ងាយពីគ្នា ខណៈបុគ្គលិក អ្នកទៅទស្សនាភាពយន្តតម្រូវឲ្យពាក់ម៉ាស់»។
កញ្ញា ផានី បន្តថា៖ «យើងយល់ពីការប្រុងប្រយ័ត្នរបស់រដ្ឋាភិបាល ប៉ុន្តែបើការបិទនៅតែបន្ដនោះវានឹងបង្កផលប៉ះពាល់យ៉ាងខ្លាំងដល់ខ្សែចង្វាក់រោងភាពយន្ត ដូចជារោងភាពយន្ត Legend Cinemas និងរោងភាពយន្ត Major Cineplex និងក្រុមហ៊ុនចែកចាយភាពយន្តជាដើម។ អាជីវកម្មក្នុងវិស័យពាក់ព័ន្ធ រួមទាំងចំណីអាហារ ភេសជ្ជៈ និងការដឹកជញ្ជូនក៏រងផលប៉ះពាល់ដែរ»។
ចំណាប់អារម្មណ៍បានកើតឡើងចំពោះរបាយការណ៍ដែលបង្ហាញ ថាឧស្សាហកម្មរោងភាពយន្តទាំងនៅក្នុងប្រទេសចិន និងសហរដ្ឋអាមេរិកកំពុងប្រឈមមុខនឹងវិបត្តិដោយសារតែជំងឺកូវីដ១៩។
យោងតាមការរាយការណ៍របស់ BBC បានឲ្យដឹងថា តាមការស្ទាបស្ទង់របស់សមាគមភាពយន្តចិនបានព្រមានថា ៤០ ភាគរយនៃរោងភាពយន្តនៅក្នុងប្រទេសយក្សអាស៊ីមួយនេះអាចនឹងរងផលប៉ះពាល់ធ្ងន់ធ្ងរ។ ប្រជាជនចិនរាប់លាននាក់កំពុងរីករាយទស្សនាខ្សែភាពយន្តតាមប្រព័ន្ធអ៊ីនធឺណេត ក្នុងអំឡុងពេលបិទទ្វាររោងភាពយន្តដោយសារមានសេវាកម្មផ្សព្វផ្សាយភាពយន្តជាច្រើន ហើយរោងភាពយន្តរាប់ពាន់អាចនឹងបិទទ្វារជាអចិន្ត្រៃយ៍។
យោងតាមការស្ទាបស្ទង់ទីផ្សាររបស់ក្រុមហ៊ុន IBISWorld បាន បង្ហាញថា មានរោងភាពយន្តជាង ១២០០០ នៅក្នុងប្រទេសចិន។ ហើយយោងតាមការស្ទាបស្ទង់របស់សមាគមភាពយន្តចិនបានឲ្យដឹងថា រោងភាពយន្ត ៤ ក្នុងចំណោម ១០ បាននិយាយថា ពួកគេទំនងនឹងបិទទ្វារក្នុងពេលឆាប់ៗ។
BBC បានឲ្យដឹងថា នេះអាចមានន័យថា រោងភាពយន្តជិត ៥០០០ នឹងត្រូវបិទទ្វារដោយសារតែជំងឺរាតត្បាតសកលមួយនេះ។
CNN បានរាយការណ៍ថា នៅអាមេរិក AMC ដែលជាខ្សែចង្វាក់រោងភាពយន្ដធំជាងគេបំផុតនៅលើពិភពលោកបានឲ្យដឹងកាលពីខែមុនថាខ្លួនមាន «មន្ទិលយ៉ាងខ្លាំង» ថាតើវាអាចនៅតែបន្តមានអាជីវកម្មឬយ៉ាងណា បន្ទាប់ពីរោងភាពយន្តជាច្រើននៅទូទាំងពិភពលោកបានបិទទ្វារក្នុងអំឡុងវិបត្តិជំងឺកូវីដនេះ។
AMC ដែលបិទរោងភាពយន្តរបស់ខ្លួនកាលពីដើមឆ្នាំនេះរំពឹងថា នឹងខាតបង់ចន្លោះពី ២,១ ពាន់លានដុល្លារ ទៅ ២,៤ ពាន់លានដុល្លារនៅក្នុងត្រីមាសទី ១ នៃឆ្នាំនេះ។
កញ្ញា ផានី បានលើកឡើងថា ឧស្សាហកម្មភាពយន្ដដែលកំពុងរីកចម្រើននៅកម្ពុជាក៏កំពុងស្ថិតក្នុងគ្រោះថ្នាក់ផងដែរ។
លោក Simon Choo នាយកប្រតិបត្តិនៃក្រុមហ៊ុន Westec Media Limited ថ្លែងថា៖« ការអភិវឌ្ឍរោងភាពយន្តនៅកម្ពុជាហាក់ថមថយ។ ដូច្នេះយើងត្រូវយកឧស្សាហកម្មនេះចេញពីតំបន់គ្រោះថ្នាក់»។
រោងភាពយន្តកំពុងប្រើប្រាស់ពេលវេលាបិទទ្វារនេះដើម្បីកែលម្អទីកន្លែង និងរៀបចំកាលវិភាគបញ្ចាំង ខណៈរោងភាពយន្តនៅកម្ពុជាកំពុងទន្ទឹងរង់ចាំការបើកដំណើរការឡើងវិញ។
«ប្រភេទភាពយន្តសំខាន់ៗដែលយើងកំពុងផ្តោតសំខាន់គឺភាពយន្តបែបភ័យរន្ធត់ រ៉ូមែនទិក វាយប្រហារ និងភាពយន្តបែបកំប្លែង។ មានទាំងភាពយន្តបរទេស និងភាពយន្តខ្មែរ ហើយ ៧០ ភាគរយប៉ះពាល់ដោយសារវិបត្តិជំងឺកូវីដ១៩ ខណៈ ៣០ ភាគរយនឹងដំណើរការឡើងវិញ»។
កញ្ញា ផានី បានបន្ថែមថា៖ «យើងបានត្រៀមខ្លួនរួចជាស្រេចដើម្បីផ្តល់ការកម្សាន្តនៅកម្ពុជាជាថ្មីម្តងទៀត ហើយយើងមានការប្រុងប្រយ័ត្នខ្ពស់អំពីបញ្ហាសុវត្ថិភាព ដោយរំពឹងថានឹងបញ្ចាំងរឿង Mulan របស់ Disney នៅចុងខែនេះ។ យើងកំពុងរង់ចាំភ្លើងខៀវ»៕