.jpg)
ធនាគារ ព្រីនស៍ ទទួលបានពានរង្វាន់ «ធនាគារពាណិជ្ជល្អបំផុតនៅកម្ពុជា ២០២០»។
ថ្វីបើធនាគារ ព្រីនស៍ ទើបចូលមកក្នុងវិស័យធនាគារនៅកម្ពុជាប្រមាណ ៥ ឆ្នាំក្តី ប៉ុន្តែធនាគារដ៏រឹងមាំមួយនេះទទួលបានជោគជ័យយ៉ាងខ្លាំង និងទទួលបានពានរង្វាន់ជាច្រើន។ ដោយមានស្នាក់ការកណ្តាលស្ថិតនៅរាជធានីភ្នំពេញ និងមានដើមកំណើតចេញពីគ្រឹះស្ថានមីក្រូហិរញ្ញវត្ថុឯកជននៅក្នុងឆ្នាំ ២០១៥ ទើប ៣ ឆ្នាំក្រោយមក ស្ថាប័ននេះក៏ទទួលបានអាជ្ញាប័ណ្ណជាធនាគារពាណិជ្ជពេញលេញពីធនាគារជាតិនៃកម្ពុជា។ លោក ហ៊ន់ សុរចនា ប្រធាននាយកប្រតិបត្តិរបស់ធនាគារ ព្រីនស៍បានលើកឡើងអំពីផែនការ និងសមិទ្ធផលថ្មីៗរបស់ធនាគារមួយនេះដូចខាងក្រោម។
ប្រហែលជារឿងដ៏គួរឱ្យភ្ញាក់ផ្អើលចំពោះការវិវឌ្ឍដ៏លឿនរបស់ធនាគារ ព្រីនស៍ ក្នុងនោះធនាគារ ព្រីនស៍ បានក្លាយជាធនាគារដំបូងគេដែលដាក់ឱ្យដំណើរការបណ្ណឥណពន្ធ/ឥណទាន Mastercard និង VISA ដែលមានរយៈពេលមិនដល់ ២ ឆ្នាំផងបន្ទាប់ពីបានក្លាយជាធនាគារពាណិជ្ជ និងជាធនាគារដំបូងគេដែលបានបើកសាខាចំនួន ១៩ និងបញ្ជរសេវាកម្មដោយខ្លួនឯងចំនួន ៣២ ក្នុងរយៈពេលត្រឹមតែ ១២ ខែនៅទូទាំងប្រទេស។ លោក សុរចនា តើលោកអាចសម្រេចបានសមិទ្ធផលដ៏ធំក្នុងរយៈពេលដ៏ខ្លីនេះយ៉ាងដូចម្តេច?
លោក សុរចនា: សមិទ្ធផលដ៏គួរឱ្យកត់សម្គាល់ទាំងនេះអាចកើតឡើងបានគឺដោយសារចក្ខុវិស័យយុទ្ធសាស្ត្រច្បាស់លាស់របស់ធនាគារការប្តេជ្ញាចិត្តរបស់ម្ចាស់ភាគហ៊ុនការគាំទ្រដ៏រឹងមាំរបស់ក្រុមប្រឹក្សាភិបាលការណែនាំ និងការគាំទ្ររបស់និយតករ និងការខិតខំរបស់គណៈគ្រប់គ្រងក៏ដូចជាបុគ្គលិករបស់យើងទាំងអស់។
លោក ហ៊ន់ សុរចនា
ភាគទុនិក និងក្រុមប្រឹក្សាភិបាលបានផ្តល់ធនធានចាំបាច់ និងជឿជាក់លើការវិនិយោគរយៈពេលវែងដូច្នេះហើយទើបធនាគារមានលក្ខណពិសេសប្លែកពីគេនៅក្នុងឧស្សាហកម្មនេះ។ ជាក់ស្តែងល្បឿន និងទំហំកំណើនប្រកួតប្រជែងសម្រាប់ធនធាន គឺទាមទារឱ្យមានការបែងចែកធនធាន និងអាទិភាពការងារឱ្យបានត្រឹមត្រូវ។ នៅក្នុងបរិបទនេះសហការីរបស់ខ្ញុំបានខិតខំបំពេញការងារដោយមិនខ្លាចនឿយហត់ទាំងយប់ទាំងថ្ងៃដើម្បីអនុវត្តគម្រោងជាច្រើន ខណៈផ្តល់លទ្ធផលអាជីវកម្មក្នុងពេលតែមួយដើម្បីធានាថា យើងមានមូលដ្ឋានគ្រឹះគ្រប់គ្រាន់សម្រាប់ការរីកចម្រើនបន្ថែមទៅមុខទៀត។
បើគ្មានបុគ្គលិកដែលមានការប្តេជ្ញាចិត្ត និងមានសមត្ថភាពខ្ពស់ទេ នោះយើងនឹងមិនអាចនៅកន្លែងដែលយើងនៅសព្វថ្ងៃនេះទេ។ លើសពីនេះទៀត ដៃគូអាជីវកម្ម និងអតិថិជនរបស់យើងបានគាំទ្រយ៉ាងសកម្មនៅក្នុងដំណើរការរីកចម្រើនរបស់យើង។ សរុបមក អ្វីៗទាំងអស់គឺជាការខិតខំប្រឹងប្រែង និងការគាំទ្រដ៏ធំដល់ធនាគារពីភាគីពាក់ព័ន្ធផ្សេងទៀតរបស់យើង។
លក្ខណពិសេសដ៏លេចធ្លោមួយរបស់ធនាគារគឺចំនួនទឹកប្រាក់ដ៏ច្រើនសន្ធឹកសន្ធាប់ដែលលោកបានវិនិយោគលើកម្មវិធីបណ្តុះបណ្តាលបុគ្គលិក និងការអភិវឌ្ឍ។ លោក សុរចនា ហេតុអ្វីបានជាលោកចាត់ទុកវិស័យធនធានមនុស្ស (HR) មានសារៈសំខាន់ខ្លាំងបែបនេះ?
លោក សុរចនា: ដូចខ្ញុំបានលើកឡើងពីខាងដើមអ៊ីចឹង ធនធានមនុស្សគឺជាទ្រព្យដ៏សំខាន់បំផុតរបស់យើង និងបានគាំទ្រសមត្ថភាពក្នុងការអភិវឌ្ឍ និងពង្រីកប្រតិបត្តិការអាជីវកម្មរបស់យើងឱ្យកាន់តែរឹងមាំ។ សម្រាប់យើង ដើម្បីឱ្យអាចបន្តសម្ទុះ និងធ្វើឱ្យខ្លួនយើងមានលក្ខណពិសេសប្លែកពីគេនៅក្នុងឧស្សាហកម្មដែលកំពុងមានការប្រកួតប្រជែងកាន់តែខ្លាំងនេះគឺយើងត្រូវទាក់ទាញអ្នកដែលមានទេពកោសល្យដើម្បីអភិវឌ្ឍធនធានមនុស្សរបស់យើងឱ្យកាន់តែរីកចម្រើន។
ដូច្នេះធនាគារបានវិនិយោគដោយមនសិការ និងយ៉ាងសកម្មនៅក្នុងការបណ្តុះបណ្តាល និងអភិវឌ្ឍបុគ្គលិករបស់យើងរាប់ចាប់ពីសកម្មភាពខាងក្នុង និងខាងក្រៅរហូតដល់ការបណ្តុះបណ្តាលតាមអ៊ីនធឺណិត ការចាត់ចែងគម្រោងក៏ដូចជាការបណ្តុះបណ្តាលការងារ និងការហ្វឹកហាត់។ ខណៈពេលដែលធនាគារត្រូវការធនធានមនុស្សដែលមានផលិតភាពកាន់តែច្រើន យើងក៏យល់ច្បាស់ថាបុគ្គលិករបស់យើងត្រូវការបរិយាកាសអំណោយផល និងការគាំទ្រជាបន្តសម្រាប់ការអភិវឌ្ឍជំនាញរបស់ពួកគេ។ ក្នុងន័យនេះការវិនិយោគរបស់យើងនៅក្នុងកម្មវិធីបណ្តុះបណ្តាល និងអភិវឌ្ឍន៍គឺមានគោលបំណងបំពេញទាំងតម្រូវការរបស់ធនាគារ និងតម្រូវការរបស់បុគ្គលិក។
លោក សុរចនា តើអ្វីជាទិដ្ឋភាពដែលលោកពេញចិត្តបំផុតក្នុងនាមជាអ្នកដឹកនាំនៅធនាគារ ព្រីនស៍? ហើយតើលោកគិតថាអ្វីដែលជាបញ្ហាប្រឈមធំបំផុតនៅក្នុងរយៈពេល ១២ ទៅ ១៨ ខែខាងមុខ?
លោក សុរចនា: ការមើលឃើញធនាគារ ព្រីនស៍ គឺជាស្ថាប័នក្នុងស្រុកមួយដែលមានការរីកលូតលាស់យ៉ាងឆាប់រហ័សក៏ដូចជាបុគ្គលិករបស់យើងដែលកំពុងមានការអភិវឌ្ឍធ្វើឱ្យខ្ញុំពេញចិត្តក្នុងនាមជាប្រធាននាយកប្រតិបត្តិ។ ខ្ញុំមានមោទនភាពចំពោះធនាគារ ព្រីនស៍ ដែលក្លាយជាធនាគារឌីជីថល ដែលមានការរីកចម្រើនក្នុងលឿនបំផុតនៅក្នុងប្រទេសក្នុងរយៈពេលដ៏ខ្លី។
សមិទ្ធផលរបស់ធនាគារកើតឡើងដោយសារចក្ខុវិស័យយុទ្ធសាស្ត្រច្បាស់លាស់។
ជាពិសេស ខ្ញុំរីករាយចំពោះការទទួលស្គាល់ជាអន្តរជាតិដែលធនាគារ ព្រីនស៍ ទទួលបានក្នុងនោះរួមមានពានរង្វាន់ «Asia''s Top 100 Best Employer Brands for 2019» ពានរង្វាន់ «Cambodia''s Best Employer Brands for 2020» ពានរង្វាន់ «Global Best Employer Brands for 2020» ពីវិទ្យាស្ថាន Employer Branding Institute ពីក្រុមហ៊ុន World HRD Congress និងពីក្រុមហ៊ុន Stars of the Industry Group។
ហើយបច្ចុប្បន្នអ្វីដែលខ្ញុំកាន់តែរំភើបថែមទៀតនោះ គឺធនាគារយើងទទួលបានពានរង្វាន់ «ធនាគារ ពាណិជ្ជល្អបំផុតនៅកម្ពុជាឆ្នាំ ២០២០» ពីទស្សនាវដ្ដី International Banker។ បើក្រឡេកទៅមើលរយៈពេល ១២ ទៅ ១៨ ខែខាងមុខ ខ្ញុំមានអារម្មណ៍ថាបញ្ហាប្រឈមធំបំផុតគឺថាតើត្រូវបន្តសម្ទុះកំណើនរបស់យើងបែបណា ក្រោយកូវីដ១៩។
រាល់អាជីវកម្ម និងប្រទេសទាំងអស់បានរងផលប៉ះពាល់យ៉ាងធ្ងន់ធ្ងរដោយសារជំងឺរាតត្បាតមួយនេះ។រៀបចំខ្លួនយើងសម្រាប់ការងើបឡើងវិញ និងការរីកចម្រើនជាបន្តបន្ទាប់ក្នុងល្បឿនដែលយើងមាន គឺជាគន្លឹះដើម្បីកំណើនខ្ពស់ជាងធនាគារផ្សេងទៀត។ ទោះយ៉ាងណា នេះគឺជាឧបសគ្គដ៏ធំដែលយើងត្រូវមានយុទ្ធសាស្ត្រដើម្បីជម្នះលើបញ្ហាប្រឈមទាំងនេះ៕
អត្ថបទនេះកែសម្រួល និងដកស្រង់ចេញពីគេហទំព័រ www.internationalbanker.com
