.jpg)
តម្រូវការត្រាក់ទ័រទំនើប បន្តកើនឡើងខណៈដែលកសិករកាន់តែច្រើន ងាកទៅប្រើប្រាស់គ្រឿងចក្រ។ សហការី
ការប្រើប្រាស់បច្ចេកវិទ្យា គឺមិនមែនផ្តោតតែទៅលើវិស័យហិរញ្ញវត្ថុរបស់កម្ពុជាតែមួយប៉ុណ្ណោះទេ។ បច្ចុប្បន្នសូម្បីតែវិស័យកសិកម្មនៅក្នុងព្រះរាជាណាចក្រកម្ពុជាក៏កំពុងព្យាយាមប្រើប្រាស់បច្ចេកវិទ្យាទំនើបនេះដែរ ដើម្បីធ្វើឲ្យជីវភាពរបស់ប្រជាកសិករកាន់តែមានភាពល្អប្រសើរឡើងមួយកម្រិតថែមទៀត។
ក្រុមហ៊ុន គង់ នួន គ្រុប (Kong Nuon Group) គឺជាក្រុមហ៊ុនក្នុងស្រុក ១ ដែលកំពុងនាំយកបច្ចេកវិទ្យាដ៏ទំនើបនេះមកបម្រើដល់វិស័យមួយចំនួននៅក្នុងព្រះរាជាណាចក្រកម្ពុជាជាពិសេស គឺវិស័យកសិកម្មដែលជាកម្លាំងចលករដ៏សំខាន់សម្រាប់ទ្រទ្រង់សេដ្ឋកិច្ចជាតិដោយសារតែប្រជាពលរដ្ឋកម្ពុជាភាគច្រើនគឺជាកសិករ។
តាមរយៈការលក់ត្រាក់ទ័រដ៏ ទំនើបដល់កសិករនៅតាមជនបទ ក្រុមហ៊ុនក៏កំពុងព្យាយាមជួយបង្កើនផលិតភាពរបស់កសិករផងដែរតាមរយៈការប្រើប្រាស់ត្រាក់ទ័រទំនើបនេះដែលវានឹងជួយលើកកម្ពស់ស្ថានភាពសេដ្ឋកិច្ចរបស់ ប្រជាកសិករឲ្យកាន់តែប្រសើរ ហើយម្យ៉ាងវិញទៀតវាជួយសម្រួលដល់កង្វះកម្លាំងពលកម្មនៅក្នុងវិស័យមួយនេះដោយសារតែការចំណាកស្រុកមកកាន់ទីក្រុង។
ក្រុមហ៊ុន Yanmar Co., Ltd បានដាក់បង្ហាញត្រាក់ទ័រថ្មីទំនើបចុងក្រោយបំផុតម៉ូដែល YM នៅទីក្រុងបាងកកប្រទេស ថៃ កាលពីថ្ងៃទី ២៩ ខែមករា កន្លងទៅ ជាប្រភេទត្រាក់ទ័រមានមុខងារច្រើនយ៉ាងដែលអាចដំណើរការបានទាំងលើដីស្រែដែលមានទឹក និងចម្ការដែលមានដីស្ងួតសម្រាប់ដាំដំណាំផ្សេងៗដូចជាដំណាំអំពៅ ឬពោតជាដើម ដែលជាគ្រឿងចក្រកសិកម្មដ៏ទំនើប និងផ្តល់អត្ថប្រយោជន៍ច្រើនបំផុតដល់ប្រជាកសិករ។
ម៉ូដែល YM351A (51 HP) និងម៉ូដែល YM357A (57 HP) មិនមែនជាប្រភេទត្រាក់ទ័រសាមញ្ញធម្មតានោះទេ ប៉ុន្តែវាជាត្រាក់ទ័រដ៏ទំនើបមានបំពាក់ដោយកម្មវិធី Smart Assist Remote ដែលអាចផ្តល់ព័ត៌មានគ្រប់ជ្រុងជ្រោយដល់កសិករ ហើយរាល់ព័ត៌មានទាក់ទងនឹងត្រាក់ទ័រគឺកសិករអាចដឹងតាមរយៈទូរស័ព្ទរបស់ពួកគាត់ផ្ទាល់តែម្តង។
ម្យ៉ាងវិញទៀត ត្រាក់ទ័រម៉ូដែលដ៏ទំនើបនេះប្រើប្រាស់ម៉ាស៊ូត មានកម្លាំងខ្លាំង ពោរពេញដោយថាមពល និងមានប្រសិទ្ធភាពខ្ពស់ ស៊ីប្រេងតិច និងមានភាពធន់បំផុត។
លោក ផា ប៊ុនណាត នាយកប្រតិបតិ្តក្រុមហ៊ុន គង់នួន គ្រុប បានឲ្យកាសែតភ្នំពេញប៉ុស្តិ៍ដឹងថា៖ «នេះគឺជាគ្រឿងចក្រម៉ូដែលថ្មីដែលមានលក្ខណពិសេសច្រើនយ៉ាង ហើយត្រាក់ទ័រម៉ូដែលនេះគឺជាគ្រឿងចក្រកសិកម្មដ៏ចាំបាច់បំផុតសម្រាប់កសិករ»។
លោក ប៊ុនណាត: គ្រឿងចក្រម៉ូដែលថ្មីនេះជួួយបង្កើនទិន្នផលកសិកម្ម។សហការី
លោក ប៊ុនណាត បានបន្ថែមថា៖ «តម្រូវការត្រាក់ទ័រនៅកម្ពុជាកំពុងកើនឡើងចន្លោះពី ១០ ទៅ ២០ ភាគរយជារៀងរាល់ឆ្នាំដោយសារតែកង្វះខាតកម្លាំងពលកម្មនៅតាមជនបទ ម្យ៉ាងវិញទៀតការធ្វើកសិកម្មតាមបែបប្រពៃណីដូចជាប្រើគោក្របីដើម្បីភ្ជួររាស់ក៏កំពុងធ្លាក់ចុះផងដែរ»។
Smart Assist Remote គឺជាកម្មវិធីមួយដែលត្រូវបានប្រើប្រាស់ដើម្បីបញ្ជូនព័ត៌មានលម្អិតទៅដល់កសិករឲ្យពួកគាត់ដឹងអំពីស្ថានភាពត្រាក់ទ័ររបស់ពួកគាត់ផ្សាយតាមរយៈផ្កាយរណប ហើយទិន្នន័យទាំងអស់នឹងត្រូវបញ្ជូនទៅកាន់ការិយាល័យរបស់ក្រុមហ៊ុន គង់នួន នៅរាជធានីភ្នំពេញ និងទៅកាន់ការិយាល័យកណ្តាលរបស់ក្រុមហ៊ុន Yanmar នៅក្នុងប្រទេស ជប៉ុន។
បន្ទាប់មកក្រុមហ៊ុននឹងជូនដំណឹងប្រាប់កសិករវិញអំពីភាពមិនប្រក្រតីណាមួយនៃម៉ាស៊ីនត្រាក់ទ័ររបស់គាត់ បានយ៉ាងច្បាស់លាស់ថាត្រាក់ទ័រនោះមានបញ្ហាអ្វីត្រូវជួសជុលបែបណាឬត្រូវថែទាំបែបណា? និយាយជារួមគឺព័ត៌មានទាំងអស់នឹងត្រូវបង្ហាញនៅលើអេក្រង់ទូរស័ព្ទដៃរបស់កសិករផ្ទាល់តែម្តង។
ការប្រើប្រាស់កម្មវិធី SR (Smart Assist Remote) នឹងជួយបង្កើនទិន្នផលនៅក្នុងវិស័យកសិកម្មហើយកសិករក៏អាចតាមដានមើលដឹងទីតាំងត្រាក់ទ័ររបស់គាត់បានយ៉ាងងាយស្រួលផងដែរ ជាពិសេសប្រសិនបើមាននរណាម្នាក់ព្យាយាមលួចត្រាក់ទ័រ ឬចង់លួចប្រេងម៉ាស៊ីនពីត្រាក់ទ័រគឺកម្មវិធីឆ្លាតវៃនេះនឹងបញ្ចេញសញ្ញាប្រាប់ម្ចាស់ឲ្យដឹងភ្លាមៗដូច្នេះត្រាក់ទ័រមានសុវត្ថិភាពខ្ពស់បំផុត។
លោក ប៊ុនណាត បន្ថែមទៀតថា៖ «កម្មវិធីនេះក៏នឹងផ្ញើសារទៅប្រាប់កសិករថា ដល់ពេលដែលត្រូវជួសជុល ឬត្រូវប្តូរប្រេងម៉ាស៊ីន [ខ្មៅ] ចេញ ពីព្រោះកម្មវិធី SR នេះអាចគណនាចំនួនហិកតាដែលត្រាក់ទ័រភ្ជួររាស់បានយ៉ាង [ជាក់លាក់] បំផុត ដើម្បីដឹងថាពេលណាត្រូវប្តូរប្រេងម៉ាស៊ីន ពេលណាត្រូវជួសជុលលើផ្នែកណាមួយ ដូច្នេះវាជាកត្តាមួយជួយឲ្យត្រាក់ទ័រធន់បានយូរ។
ក្រុមហ៊ុន គង់នួន គ្រោងនឹងអនុវត្តគម្រោងសាកល្បងដោយដាក់បង្ហាញត្រាក់ទ័រម៉ូដែលចុងក្រោយបំផុតនេះនៅទូទាំងប្រទេសក្នុងខែមីនាឲ្យកសិករសាកល្បងដើម្បីមានភាពងាយស្រួលក្នុងការគ្រប់គ្រង និងចេះពីរបៀបប្រើប្រាស់ត្រាក់ទ័រម៉ូដែលថ្មីនេះ។
លោក ប៊ុនណាត ឲ្យដឹងទៀតថា៖ «នៅខែមីនាខាងមុខយើងនឹងធ្វើតេស្តសាកល្បងរយៈពេលយូរ គឺចន្លោះពី ៦០០ ទៅ ១ ០០០ ម៉ោងក្នុងរយៈពេល ៣ ខែហើយនឹងផ្ញើមតិ ឬប្រតិកម្មឆ្លើយតបទៅផ្នែកស្រាវជ្រាវ និងអភិវឌ្ឍន៍របស់យើងនៅក្នុងប្រទេស ជប៉ុន។ នៅក្នុងខែសីហាយើងនឹងចាប់ផ្ដើមនាំចូលត្រាក់ទ័រនេះ ហើយកំណត់គោលដៅលក់ឲ្យបានប្រមាណ ២០០ គ្រឿងនៅក្នុង ឆ្នាំដំបូង»។
ក្រុមហ៊ុនYanmar ដែលមានមូលដ្ឋាននៅទីក្រុងអូសាកាមានផែនការលើកកម្ពស់គ្រឿងចក្រម៉ូដែល YM នៅក្នុងទីផ្សារអាស៊ីអាគ្នេយ៍ឲ្យបានរឹងមាំ ហើយចំពោះការចេញត្រាក់ទ័រម៉ូដែលថ្មីនេះនឹងក្លាយជាឆ្អឹងខ្នងដ៏រឹងមាំនៃស៊េរីត្រាក់ទ័ររបស់ក្រុមហ៊ុន Yanmar នៅក្នុងតំបន់។
លោកបន្តថា៖ «ត្រាក់ទ័រម៉ូដែល YM ជួយកសិករឲ្យសន្សំសំចៃបានច្រើន បង្កើនទិន្នផលបានខ្ពស់ ងាយស្រួលប្រើប្រាស់ និងងាយស្រួលត្រួតពិនិត្យស្រែចម្ការរបស់ពួកគាត់ជាមួយនឹងបច្ចេកវិទ្យា SR ដែលជាបច្ចេកវិទ្យាមួយដ៏ទំនើបនៅក្នុងសម័យឌីជីថលនេះ។
លោក Hiroaki Kitaoka ប្រធានកសិពាណិជ្ជកម្មរបស់ក្រុមហ៊ុន Yanmar បាននិយាយនៅក្នុងសេចក្តីថ្លែងការណ៍មួយបន្ទាប់ពីការដាក់បង្ហាញនៅក្នុងទីក្រុងបាងកកថា៖ «ជាមួយនឹងការបញ្ចូលត្រាក់ទ័រម៉ូដែល YM ទៅក្នុងទីផ្សារត្រាក់ទ័រនៅក្នុងតំបន់អាស៊ីអាគ្នេយ៍ដែលកំពុងរីកចម្រើននេះ ក្រុមហ៊ុន Yanmar បានត្រៀមខ្លួនរួចរាល់ដើម្បីឆ្ពោះទៅរកការលើកកម្ពស់ជីវភាពរស់នៅរបស់ប្រជាកសិករនៅក្នុងសតវត្សរ៍ទី ២១ នេះឲ្យកាន់តែមានប្រសិទ្ធភាព ជីវភាពធូរធារ និងផ្តល់គុណតម្លៃខ្ពស់ដល់កសិករនៅក្នុងតំបន់»។
សូមបញ្ជាក់ថា ក្រុមហ៊ុន គង់នួន គឺជាក្រុមហ៊ុនចែកចាយគ្រឿងចក្ររបស់ក្រុមហ៊ុន Yanmar តែមួយគត់នៅកម្ពុជា៕
