.jpg)
លោក ធី សុកល ប្រធានគ្រប់គ្រងផ្នែកផលិតកម្ម ក្រុមហ៊ុន ខ្មែរ ប៊ែវើរីជីស។ ហេង ជីវ័ន
តើសិក្ខាសាលាស្តីពីការផលិតស្រាបៀរទីក្រុងបាងកក ២០១៩ គឺជាអ្វី? ហើយគណៈប្រតិភូដែលចូលរួមសិក្ខាសាលានេះ មកពីបណ្តាប្រទេសណាខ្លះ?
សិក្ខាសាលាស្តីពីការផលិតស្រាបៀរទីក្រុងបាងកក ២០១៩ គឺជាសិក្ខាសាលារយៈពេល ៣ ថ្ងៃ ដែលគេរៀបចំឡើងក្នុងទីក្រុងបាងកកដែលចូលរួមដោយអ្នកឯកទេសក្នុងវិស័យផលិតស្រាបៀរជុំវិញពិភពលោក ដែលពួកគាត់នឹងជុំគ្នាពិភាក្សាលើផលិតកម្ម ស្រាបៀរ និងភេសជ្ជៈក្នុងតំបន់អាស៊ីអាគ្នេយ៍ ដោយប្រធានបទក្នុងឆ្នាំ ២០១៩ នេះ គឺផ្តោតទៅលើ «ឱកាស និងបញ្ហាប្រឈមក្នុងវិស័យឧស្សាហកម្មផលិតស្រាបៀរក្នុងតំបន់អាស៊ីបាស៊ីហ្វិក»។
គណៈប្រតិភូទាំងនោះមកពីបណ្តាប្រទេសផ្សេងៗគ្នា រួមមានដូចជា ប្រទេស ថៃ ឡាវ វៀតណាម ភូមា បារាំង អាល្លឺម៉ង់ ហូឡង់ និងអេស្ប៉ាញ ជាដើម។
ហេតុអ្វីបានជាគេជ្រើសយករោងចក្រខ្មែរ ប៊ែវើរីជីស ជាគោលដៅសម្រាប់ដំណើរទស្សនកិច្ច នៃសិក្ខាសាលា ស្តីពីការផលិតស្រាបៀរទីក្រុងបាងកក ២០១៩?
នេះគឺជាលើកទី១ ហើយដែលពួកគេមកធ្វើទស្សនកិច្ចនៅរោងចក្រផលិតស្រាបៀរក្នុងប្រទេស កម្ពុជា។
បានជាគេជ្រើសយករោងចក្រ ខ្មែរ ប៊ែវើរីជីស គឺដោយសារតែរោងចក្រយើងមានលក្ខណៈពិសេសត្រង់ថា ផលិតកម្មរបស់យើងអាចផលិតបានទាំងស្រាបៀរ និងភេសជ្ជៈ ហើយក៏ជារោងចក្រផលិត ស្រាបៀរ មួយធំជាងគេក្នុងប្រទេស កម្ពុជា ផងដែរ។ រោងចក្រយើងវិនិយោគ និងផ្តោតខ្លាំងលើគ្រឿងចក្រ និងបច្ចេកវិទ្យាទំនើបៗ ដែលនាំចូលពីសហគមន៍អឺរ៉ុប ដើម្បីផលិតបានផលិតផលដែលមាន គុណភាពល្អ និងមានរសជាតិឆ្ងាញ់។
តើដំណើរទស្សនកិច្ចរោងចក្រនេះបានឆ្លុះបញ្ចាំងពីអ្វីខ្លះ?
ដំណើរទស្សនកិច្ចនេះឆ្លុះបញ្ចាំងអំពីសក្តានុពលនៃវិស័យឧស្សាហកម្មផលិតស្រាបៀរ និង ភេសជ្ជៈ ក្នុងប្រទេស កម្ពុជា ដោយរោងចក្រផលិតស្រាបៀរ និងភេសជ្ជៈរបស់ខ្មែរ ត្រូវបានគេទទួលស្គាល់ជា អន្តរជាតិខាងផ្នែកគុណភាព ដែលជាកត្តាធ្វើឲ្យផលិតផលស្រាបៀរ និងភេសជ្ជៈខ្មែរទទួលបានការគាំទ្រ ក្នុងទីផ្សារអន្តរជាតិ។ នេះគឺជាមោទនភាពមួយសម្រាប់ក្រុមហ៊ុន ខ្មែរ ប៊ែវើរីជីស ដែលអាចលើកមុខមាត់កម្ពុជា ក្នុងវិស័យនេះ។
តើយុទ្ធសាស្ត្រអ្វីដែលធ្វើឲ្យក្រុមហ៊ុន ខ្មែរ ប៊ែវើរីជីស អាចចាក់គ្រឹះយ៉ាងរឹងមាំក្នុងវិស័យឧស្សាហកម្ម ផលិតស្រាបៀរ និងភេសជ្ជៈ ក្នុងប្រទេស កម្ពុជា?
ផលិតផលយើងមានគុណភាពល្អ ដែលជាកត្តាធ្វើឲ្យយើងទទួលបានការគាំទ្រខ្លាំងពីទីផ្សារក្នុងស្រុក ដែលធ្វើឲ្យយើងអាចចាក់គ្រឹះបានយ៉ាងរឹងមាំក្នុងវិស័យនេះ។ ក្រុមហ៊ុន ខ្មែរ ប៊ែវើរីជីស វិនិយោគ លើកត្តា ៣ ធំៗ ដែលធ្វើឲ្យយើងផលិតបានផលិតផលខ្មែរ ដែលមានគុណភាពល្អ។
កត្តាទី១ គឺក្រុមហ៊ុនវិនិយោគលើគ្រឿងចក្រ និងបច្ចេកវិទ្យាចុងក្រោយបង្អស់ដែលនាំចូលពី សហគមន៍អឺរ៉ុប។ កត្តាទី២ គឺ ធនធានមនុស្ស ដែល បុគ្គលិកទាំងអស់សុទ្ធតែមានការបណ្តុះបណ្តាលពីអ្នកជំនាញ មកពីប្រទេស អាល្លឺម៉ង់ ហើយកត្តាទី៣ គឺគ្រឿងផ្សំដែលដើរតួនាទីសំខាន់ណាស់ក្នុងការផលិតបាននូវស្រាបៀរដែលមានគុណភាពល្អ ហើយមានរសជាតិឆ្ងាញ់។
កត្តាទាំងនេះហើយ ដែលអាចឲ្យក្រុមហ៊ុន ខ្មែរ ប៊ែវើរីជីស ឈរជើង ហើយទទួលបានការគាំទ្រពីអតិថិជន ដែលអាចឲ្យយើងចាក់គ្រឹះយ៉ាងរឹងមាំក្នុងវិស័យឧស្សាហកម្មផលិតស្រាបៀរ និងភេសជ្ជៈ ក្នុងប្រទេស កម្ពុជា៕
