.jpg)
ស្នាក់ការកណ្តាលធនាគារ វឌ្ឍនៈ ស្ថិតនៅជាន់ទី ២ នៃវិមានវឌ្ឍនៈក្នុងរាជធានីភ្នំពេញ។
ធនាគារវឌ្ឍនៈកំពុងចាប់ផ្តើមអនុវត្តយុទ្ធសាស្ត្រចំនួន ២ គឺពង្រីកហេដ្ឋារចនាសម្ព័ន្ធឌីជីថល និងពង្រីកបណ្តាញសាខាដើម្បីក្លាយជាធនាគារផ្ទាល់ខ្លួនរបស់អតិថិជន និងត្រៀមខ្លួនសម្រាប់កំណើនប្រកបដោយចីរភាពនៅក្នុងវិស័យធនាគារដែលកំពុងមានការប្រកួតប្រជែង។
ធនាគារដែលបង្កើតឡើងដោយវិនិយោគិនក្នុងស្រុកមួយនេះបានចាប់ផ្តើមដាក់ឱ្យដំណើរការកម្មវិធីសេវាធនាគារចល័តដ៏ទំនើប និងមានសុវត្ថិភាពខ្ពស់បំផុតកាលពីសប្តាហ៍មុនដើម្បីជំរុញហេដ្ឋារចនាសម្ព័ន្ធធនាគារឌីជីថលរបស់ខ្លួនឱ្យកាន់តែរីកចម្រើន និងរក្សាឧត្តមភាពប្រកួតប្រជែងរបស់ខ្លួន។ លើសពីនេះទៀតធនាគារដែលមានអាយុកាល ១៧ ឆ្នាំមួយនេះ គ្រោងនឹងបន្ថែមសាខាចំនួន ៤ ទៀតនៅចុងឆ្នាំនេះគឺសាខាប៉ោយប៉ែត សាខាខេត្តប៉ៃលិន សាខាខេត្តកំពង់ធំ និងសាខាខេត្តកំពង់ឆ្នាំង។
ដោយមើលឃើញពីកំណើននៃតម្រូវការសេវាធនាគារឌីជីថល និងការហូរចូលនៃបច្ចេកវិទ្យាលើទូរស័ព្ទចល័តដែលកំពុងផ្លាស់ប្តូរដំណើរវិវឌ្ឍន៍នៃវិស័យធនាគារ ធនាគារវឌ្ឍនៈកំពុងបញ្ជ្រាបចូលទៅក្នុងប្រព័ន្ធសេវាធនាគារឌីជីថល ដើម្បីផ្តល់នូវសេវាកម្មកាន់តែមានប្រសិទ្ធភាពជូនអតិថិជនរបស់ខ្លួនដែលកំពុងមានចំនួនកើនឡើង។
លោក ចាន់ កុក ឆយ អគ្គនាយកនៃធនាគារវឌ្ឍនៈបានមានប្រសាសន៍ថា៖ «បច្ចុប្បន្នសេវាធនាគារចល័តគឺជាសេវាកម្មដ៏ចាំបាច់មួយនៅក្នុងប្រទេសកម្ពុជាហើយអតិថិជនជាច្រើនកំពុងប្រើប្រាស់សេវាកម្មនេះ។ សេវាធនាគារចល័តនឹងក្លាយជាផលិតផលដ៏សំខាន់មួយសម្រាប់យើង»។
លោក ចាន់ កុក ឆយ អគ្គនាយកនៃធនាគារវឌ្ឍនៈ។
«ធនាគារយើងបានពិនិត្យមើលអំពីតម្រូវការរបស់អតិថិជន ហើយស្ថានភាពបច្ចុប្បន្នគឺមានតម្រូវការចង់ធ្វើប្រតិបត្តិការធនាគារដោយគ្មានសាច់ប្រាក់ និងប្រតិបត្តិការដែលកាន់តែមានប្រសិទ្ធភាពជាងមុន ដោយមិនចាំបាច់តម្រូវឱ្យអតិថិជនមកធនាគារទេ។ ដូច្នេះយើងទទួលស្គាល់ថា ធនាគារឌីជីថលកាន់តែដើរតួនាទីសំខាន់ឡើងៗ»។
លោកបន្ថែមថា៖ «យើងអាចមើលឃើញថា នៅពេលដែលយើងពង្រីកប្រតិបត្តិការរបស់យើងនោះ ចាំបាច់ត្រូវមានសេវាធនាគារចល័តដើម្បីប្រកួតប្រជែងប្រកបដោយប្រសិទ្ធភាពជាមួយធនាគារដទៃទៀត។ យើងទទួលបានមតិត្រឡប់ជាវិជ្ជមានពីអតិថិជនរបស់យើងហើយចំណុចនេះនឹងជួយដល់កំណើនអាជីវកម្មរបស់យើង ជាពិសេសបណ្តាញសាខាយើងនៅខាងក្រៅទីក្រុងភ្នំពេញនៅពេលយើងពង្រីកសាខាបន្ថែមទៀត»។
កម្មវិធីសេវាធនាគារចល័ត ធនាគារ វឌ្ឍនៈ ត្រូវបានបង្កើតឡើងដោយក្រុមការងារធនាគារឌីជីថលផ្ទាល់ខ្លួនរបស់ធនាគារ។ កម្មវិធីនេះត្រូវបានរចនាឡើងដើម្បីបំពេញតាមតម្រូវការរបស់អ្នកប្រើប្រាស់ទាំងអស់សូម្បីអតិថិជនដែលមិនសូវពូកែប្រើប្រាស់បច្ចេកវិទ្យាក៏ដោយ ដោយសារថា កម្មវិធីនេះមានមុខងារ/របៀបប្រើគួរឱ្យទាក់ទាញ និងងាយស្រួលប្រើប្រាស់ដែលជួយកាត់បន្ថយពេលវេលាបានយ៉ាងច្រើន។
មុខងារជាច្រើនត្រូវបានបញ្ចូលទៅក្នុងកម្មវិធីនេះ ដូចជាមុខងារមើលសមតុល្យគណនី ការផ្ទេរប្រាក់ ការទូទាត់វិក្កយបត្រសម្រាប់បង់ថ្លៃអគ្គិសនី និងទឹក ការជូនដំណឹង ការគ្រប់គ្រងកាត របាយការណ៍កាតឥណទាន និងការទូទាត់ព្រមទាំងមុខងារសំខាន់ៗជាច្រើនទៀត ដូចជាការបញ្ចូលទឹកប្រាក់ក្នុងទូរស័ព្ទដៃជាដើម។
«នេះគឺជាអ្វីដែលយើងមានមោទនភាព ពីព្រោះថាកម្មវិធីសេវាធនាគារចល័តរបស់យើងពិតជាមានភាពងាយស្រួល និងមានសុវត្ថិភាព! យើងបានយកចិត្តទុកដាក់ខ្ពស់ សូម្បីតែរឿងតូចតាចបំផុតនៅពេលដែលរចនាកម្មវិធីនេះឡើង។ មុខងារសំខាន់មួយគឺការផ្ទេរប្រាក់។ កម្មវិធីនេះមានលក្ខណៈផ្ទាល់ខ្លួនសម្រាប់អ្នកប្រើប្រាស់ស្របតាមពាក្យស្លាករបស់ធនាគារវឌ្ឍនៈគឺ «ធនាគារផ្ទាល់ខ្លួនរបស់លោកអ្នក»។
លោក ចាន់ បានបន្ថែមថា ធនាគារបានយកចិត្តទុកដាក់ខ្ពស់អំពីលក្ខណៈសុវត្ថិភាព។
«សុវត្ថិភាពគឺសំខាន់ណាស់ដើម្បីធានាថា សាច់ប្រាក់របស់អតិថិជនគឺមានសុវត្ថិភាព ហើយយើងបានវិនិយោគបង្កើតកម្មវិធីដែលមានសុវត្ថិភាពបំផុត។ កម្មវិធីសេវាធនាគារចល័តរបស់យើង បានឆ្លងកាត់ការធ្វើតេស្តយ៉ាងហ្មត់ចត់ ហើយទទួលបានវិញ្ញាបនបត្របញ្ជាក់ពីសុវត្ថិភាពពីក្រុមហ៊ុន Thales ដែលជាក្រុមហ៊ុនបច្ចេកវិទ្យាអន្តរជាតិល្បីល្បាញខាងការផ្តល់សេវាកម្មដំណោះស្រាយសុវត្ថិភាពទិន្នន័យ និងបច្ចេកវិទ្យាព័ត៌មាន។
លោក ចាន់ បានបន្តថា៖ «យើងពេញចិត្តជាមួយនឹងមុខងារការពារសុវត្ថិភាពនៃកម្មវិធីសេវាធនាគារចល័តរបស់យើង ហើយអ្វីដែលសំខាន់គឺថា កម្មវិធីនេះងាយស្រួលប្រើប្រាស់ ហើយត្រូវធ្វើឱ្យអ្នកប្រើប្រាស់យល់ឃើញថា ពិតជាងាយស្រួលប្រើប្រាស់មែន»។
លោក ចាន់ បានសង្កត់ធ្ងន់ថា ចាំបាច់ត្រូវអនុវត្តអភិក្រមសមតុល្យក្នុងការពង្រីកអាជីវកម្មមានន័យថា សមតុល្យរវាងការពង្រីកបណ្តាញសាខា ជាមួយនឹងការពង្រីកបច្ចេកវិទ្យាសេវាធនាគារទូទាត់ឌីជីថល។
លោក ចាន់ មានប្រសាសន៍ថា៖ «ត្រូវតែមានសមតុល្យរវាងវត្តមានសាខារបស់យើងជាមួយនឹងសេវាធនាគារចល័តនៅតាមបណ្តាខេត្តមួយចំនួន។ ក្នុងនាមជាធនាគារដែលបង្កើតឡើងដោយកូនខ្មែរ មហិច្ឆតារបស់យើងគឺចង់មានវត្តមាននៅទូទាំងប្រទេសកម្ពុជា»។
«ធនាគារមិនមែនជាការវិនិយោគរយៈពេលខ្លីទេ។ ក្នុងនាមជាធនាគារក្នុងស្រុក យើងមានចក្ខុវិស័យវែងឆ្ងាយ។ យើងមានវត្តមានដើម្បីគោលដៅយូរអង្វែង មិនមែនរយៈពេលខ្លីនោះទេ។ យើងជឿជាក់ថា ពេលនេះយើងបានត្រៀមខ្លួនរួចហើយ។ នេះគឺជាពេលវេលាដែលយើងត្រូវបើកសាខាថ្មីបន្ថែមទៀតហើយ»៕
