.jpg)
លោក លឹម ៖ ប្រព័ន្ធឌីជីថលនឹងជួយពង្រឹងសេវារបស់ធនាគារស្ថាបនា។ ហេង ជីវ័ន
ធនាគារស្ថាបនាបានឈានជើងចូលទៅក្នុងពិភពឌីជីថល តាមរយៈការផ្លាស់ប្តូរមួយដែលផ្តោលើការវិនិយោគលើហេដ្ឋារចនាសម្ព័ន្ធសំខាន់ៗ ដែលជំរុញសមត្ថភាពវេទិកាបច្ចេកវិទ្យារបស់ខ្លួន។
លោក លឹម អូន ប្រធាននាយកប្រតិបត្តិធនាគារស្ថាបនាបានឲ្យកាសែតភ្នំពេញប៉ុស្តិ៍ដឹងថា៖ «ការវិវឌ្ឍទៅរកប្រព័ន្ធឌីជីថលនេះនឹងផ្តល់នូវសេវាហិរញ្ញវត្ថុធនាគារកាន់តែឆាប់រហ័ស និងងាយស្រួលសម្រាប់ទាំងអតិថិជនចាស់ និងអតិថិជនថ្មី។ យើងក៏រំពឹងផងដែរថាជាមួយនឹងការវិនិយោគហេដ្ឋារចនាសម្ព័ន្ធសំខាន់ៗជាបន្តបន្ទាប់ នឹងជួយបង្កើនសមត្ថភាពផ្នែកបច្ចេកវិទ្យាឌីជីថលធនាគាររបស់យើង ក៏ដូចជាអាចផ្តល់ជូននូវផលិតផលប្រកបដោយភាពច្នៃប្រឌិត និងដើម្បីទាក់ទាញអតិថិជនបន្ថែម»។
«នៅក្នុងបរិយាកាសធនាគារតាមប្រព័ន្ធឌីជីថលគ្មានហេតុផលណាដែលធនាគារត្រូវកំណត់ត្រឹមតែការផ្តល់សេវាធនាគារតាមបែបប្រពៃណីនោះទេ។ ជាការពិត អនាគតនៃវិស័យធនាគារ នឹងរួមបញ្ចូលទាំងផលិតផល និងសេវាកម្មពីធនាគារផ្សេងៗដែលផ្តោតលើការជួយអតិថិជនធ្វើឲ្យជីវិតប្រចាំថ្ងៃរបស់ពួកគាត់កាន់តែប្រសើរឡើង»។
លោក លឹម ថ្លែងថា ឧទាហរណ៍ដែលល្អបំផុតគឺកម្មវិធី Sathapana Mobile ជាកម្មវិធីដែលផ្តល់ជូនអតិថិជននូវប្រតិបត្តិការហិរញ្ញវត្ថុដែលងាយស្រួល និងមានសុវត្ថិភាពខ្ពស់ និងជាបទពិសោធដ៏អស្ទារ្យរបស់អតិថិជន។
លោក លឹម (រូបកណ្តាល) អមជាមួយនឹងមន្ត្រីធនាគារនៅក្នុងពិធីចុះហត្ថលេខាលើភាពជាដៃគូជាមួយក្រុមហ៊ុនទ្រូម៉ាន់នី ក្នុងរាជធានីភ្នំពេញកាលពីថ្ងៃទី ១៥ ខែ កក្កដា។
នៅក្នុងឆ្នាំនេះ កម្មវិធី Sathapana Mobile ត្រូវបានទទួលស្គាល់ថា ជាកម្មវិធី Mobile App ល្អបំផុតនៅកម្ពុជា ក្នុងកម្មវិធីប្រគល់ពានរង្វាន់ធនាគារ និងហិរញ្ញវត្ថុសកល ហើយទទួលបានពានរង្វាន់ពីទស្សនាវដ្តី Global Banking & Finance Review ដែលមានមូលដ្ឋាននៅអង់គ្លេស។
ជំរុញដោយយុទ្ធសាស្ដ្រឌីជីថលរបស់ខ្លួន ធនាគារស្ថាបនាមានទំនុកចិត្តខ្ពស់នៃកំណើនរឹងមាំនៅក្នុងឆ្នាំនេះទោះបីសេដ្ឋកិច្ចមានភាពមិនប្រាកដប្រជា ដោយសារបញ្ហាពាណិជ្ជកម្មអន្តរជាតិក្តី។ ជាមួយនឹងកំណើនសេដ្ឋកិច្ចដ៏រឹងមាំរបស់កម្ពុជាក្នុងរង្វង់ ៧ ភាគរយ ក្នុង ១ ឆ្នាំ លោក លឹម មានសុទិដ្ឋិនិយមខ្ពស់ចំពោះការរីកចម្រើនរបស់ធនាគារស្ថាបនា។
លោកថ្លែងថា៖ «ធនាគារស្ថាបនាមានកំណើនរឹងមាំ ១ ឆ្នាំទៀត សម្រាប់ ឆ្នាំ ២០១៩ នេះ ស្របតាមការព្យាករពីកំណើនសេដ្ឋកិច្ចនៅក្នុងឆ្នាំនេះ និងប៉ុន្មានឆ្នាំទៅមុខទៀតពីសំណាក់រាជរដ្ឋាភិបាលកម្ពុជា និងគ្រឹះស្ថានហិរញ្ញវត្ថុនានានៅលើពិភពលោក។ វិស័យធនាគារសេវាកម្មលក់រាយរបស់យើងមានដូចជាមីក្រូ និងសហគ្រាសធុនតូច និងមធ្យម (SME) ជួយជំរុញកំណើនរបស់ធនាគារស្ថាបនាក្នុងឆ្នាំ ២០១៩ នេះ»។
កំណើនភាពជាដៃគូធនាគារស្ថាបនាបានសហការជាមួយក្រុមហ៊ុនផ្ទេរប្រាក់វីង (កម្ពុជា) ក្រុមហ៊ុន Pi Pay ក្រុមហ៊ុន TrueMoney ភ្នាក់ងារផ្ទេរប្រាក់អន្តរជាតិ Western Union និងក្រុមហ៊ុនធានារ៉ាប់រងអាយុជីវិត Manulife។ ភាពជាដៃគូនេះមានគោលបំណងផ្តល់នូវភាពងាយស្រួល និងច្រើនជម្រើសសម្រាប់អតិថិជនរបស់ធនាគារ។
លោក លឹម បន្ថែមថា៖ «ជាការពិត សម្ព័ន្ធភាពអាជីវកម្មរបស់យើងជាមួយក្រុមហ៊ុននានា គឺសម្រាប់ប្រព័ន្ធអេកូទូទាត់របស់យើង នឹងដើម្បីរួមចំណែកដល់ការបង្កើនប្រសិទ្ធភាពប្រតិបត្តិការរបស់ធនាគារស្ថាបនា ហើយក៏ជាឱកាសដ៏ល្អសម្រាប់យើងក្នុងការបង្កើតប្រាក់ចំណូលផងដែរ។ ភាពជាដៃគូនេះអនុញ្ញាតឱ្យយើងបន្តបង្កើនចំនួនអតិថិជន និងផ្តល់ជូននូវបទពិសោធថ្មីដល់អតិថិជនសម្រាប់សេវាធនាគារក្នុងយុគឌីជីថល»។
ធនាគារស្ថាបនាជឿជាក់យ៉ាងមុតមាំថា ជាមួយដៃគូរបស់ខ្លួនពួកគេអាចលើកទឹកចិត្តប្រជាជនកម្ពុជាដែលមិនទាន់បានប្រើប្រាស់សេវាកម្មធនាគារ ដើម្បីនាំពួកគេទៅរកវិស័យហិរញ្ញវត្ថុផ្លូវការដែលផ្តល់ប្រយោជន៍ដល់មនុស្សគ្រប់គ្នា។
លោក លឹម (រូបកណ្តាល) អមជាមួយនឹងមន្ត្រីធនាគារនៅក្នុងពិធីចុះហត្ថលេខាលើភាពជាដៃគូជាមួយក្រុមហ៊ុនទ្រូម៉ាន់នី ក្នុងរាជធានីភ្នំពេញកាលពីថ្ងៃទី ១៥ ខែ កក្កដា។
ការពង្រីកសាខានៅក្នុងឆ្នាំ ២០១៩ ជាផ្នែកមួយនៃផែនការអាជីវកម្មរបស់ធនាគារស្ថាបនានៅក្នុងឆ្នាំនេះ គឺរក្សាការពង្រីកសាខា និងបង្កើនវត្តមានរបស់ខ្លួនយ៉ាងរឹងមាំនៅតាមតំបន់ណាដែលពួកគេជឿជាក់ថា មានអតិថិជនត្រូវការ។
«យើងកំពុងសម្លឹងទៅរកការពង្រីកសាខារបស់យើងមិនត្រឹមតែនៅក្នុងទីក្រុងភ្នំពេញប៉ុណ្ណោះទេប៉ុន្តែថែមទាំងនៅតាមបណ្តាខេត្តសំខាន់ៗផងដែរ»។
លោក លឹម បញ្ជាក់ថា៖ «ធនាគារស្ថាបនាតែងតែខិតខំបំពេញតម្រូវការហិរញ្ញវត្ថុអតិថិជនរបស់ខ្លួន មិនត្រឹមតែតាមរយៈសេវាកម្ម និងផលិតផលដ៏មានតម្លៃរបស់យើងប៉ុណ្ណោះទេ ប៉ុន្តែថែមទាំងតាមរយៈការិយាល័យសាខាដែលស្ថិតនៅទីតាំងដ៏ល្អ ហើយអាចនឹងពង្រីកម៉ោងធ្វើការផងដែរ។ ជាមួយនឹងបរិយាកាសវិជ្ជមាននាពេលបច្ចុប្បន្ន ដែលផ្តល់ដោយធនាគជាតិនៃកម្ពុជា ធនាគារស្ថាបនាមានការជឿទុកចិត្ត និងមានទំនុកចិត្តខ្ពស់នៅក្នុងវិស័យធនាគារ ដែលបានផ្តល់អត្ថប្រយោជន៍យ៉ាងច្រើនដល់ធនាគារស្ថាបនា»។
ធនាគារស្ថាបនា គឺជាធនាគារ ពាណិជ្ជឈានមុខគេនៅក្នុងប្រទេស កម្ពុជា ដែលមានទ្រព្យសកម្មសរុបលើស ១,៣ ពាន់លានដុល្លារអាមេរិក និងមានបុគ្គលិកបម្រើការងារជាង ៤ ០០០ នាក់។
ធនាគារនេះមានបណ្តាញសាខាធំជាងគេទី២ នៅក្នុងប្រទេស កម្ពុជា ចំនួន ១៧១ សាខា និងម៉ាស៊ីនអេធីអឹមចំនួន ១៦១ គ្រឿង ដែលមានសមត្ថភាពទទួលយកក្រដាសប្រាក់ដកប្រាក់ និងធ្វើការទូទាត់ប្រាក់៕
