ធនាគារ មេយប៊ែង បានពង្រីកសេវាធនាគាររូបវន្តបុគ្គលជាន់ខ្ពស់ Maybank Premier របស់ខ្លួននៅក្នុងប្រទេសកម្ពុជាជាមួយនឹងការសម្ពោធការិយាល័យ Premier Wealth ទី ៣ សម្រាប់បម្រើសេវាកម្មជូនអតិថិជន Maybank Premier នៅទីតាំងថ្មីនៃធនាគារ មេយប៊ែង សាខាទួលគោក រាជធានីភ្នំពេញកាលពីថ្ងៃទី ២៥ ខែឧសភា ឆ្នាំ ២០២០ កន្លងទៅ។
ដាតុ ម៉ូហាមាដ ហានីវស៊ូអាឌី នាយកប្រតិបត្តិនៃធនាគារ មេយប៊ែង បានមានប្រសាសន៍ថា ការផ្លាស់ប្តូរទីតាំងរបស់ធនាគារ មេយប៊ែង សាខាទួលគោក ទៅកាន់ទីតាំងថ្មីគឺមានភាពចាំបាច់ ដោយសារធនាគារបន្តពង្រីកសេវាធនាគាររូបវន្តបុគ្គលជាន់ខ្ពស់ Maybank Premier ក៏ដូចជាបង្កើននូវបទពិសោធន៍ធនាគារដ៏ល្អប្រសើរសម្រាប់អតិថិជនរបស់យើង។
«ខណៈពេលដែលពិភពលោកកំពុងប្រយុទ្ធប្រឆាំងនឹងការរីករាលដាលនៃជំងឺកូវីដ ១៩ ពួកយើងនៅតែបន្តប្តេជ្ញាដើរតួនាទីចូលរួមជួយដល់សេដ្ឋកិច្ចក្នុងប្រទេសកម្ពុជា។ សេវាធនាគាររូបវន្តបុគ្គលជាន់ខ្ពស់ MaybankPremier គឺជាផ្នែកដ៏សំខាន់សម្រាប់ធនាគារដូចដែលយើងបានឃើញថា ផ្នែកនេះកំពុងតែរីកចម្រើនយ៉ាងខ្លាំង ដោយទ្រព្យសកម្មដែលស្ថិតក្នុងការគ្រប់គ្រង (Asset Under Management) នៃផ្នែកធនាគាររូបវន្តបុគ្គលជាន់ខ្ពស់នេះស្មើនឹង ៤១% ទ្រព្យសកម្មដែលស្ថិតក្នុងការគ្រប់គ្រងសរុបនៃធនាគារ បើធៀបនឹងកំណើនអតិថិជនត្រឹមតែ ១៦% កាលពីឆ្នាំមុន ហើយយើងមានបំណងបង្កើនកំណើននេះទ្វេដងនៅក្នុងឆ្នាំនេះ។ ដូច្នេះហើយការិយាល័យ Premier Wealth ថ្មីនេះនឹងមិនត្រឹមតែអាចបម្រើសេវាកម្មជូនអតិថិជនថ្មីប៉ុណ្ណោះទេ ថែមទាំងផ្តល់ឲ្យធនាគារនូវភាពរហ័សរហួនក្នុងការផ្តល់ជូនផលិតផល និងសេវាកម្មប្រកបដោយភាពច្នៃប្រឌិតជូនចំពោះអតិថិជនយើងផងដែរ»។
ធនាគារមានផែនការបន្តអាជីវកម្មត្រឹមត្រូវ ដើម្បីធានាឲ្យប្រតិបត្តិការរបស់យើងមានភាពរលូន ទោះបីក្នុងករណីមានរឿងទាំងនេះកើតឡើងក៏ដោយ។ ក្នុងន័យនេះ វិធានការប្រុងប្រយ័ត្នផ្សេងៗនឹងនៅតែបន្តអនុវត្តនៅសាខាទួលគោកថ្មីផងដែរ។
ដាតុ ម៉ូហាមាដ ហានីវស៊ូអាឌី ក៏មានប្រសាសន៍ផងដែរថា៖ «ចាប់តាំងពីមានការរីករាលដាលនៃជំងឺកូវីដ-១៩ ធនាគារបានចាត់វិធានការ ការពារ និងរក្សាអនាម័យនៅគ្រប់ទីតាំងប្រតិបត្តិការទាំងអស់របស់ខ្លួន ដើម្បីកាត់បន្ថយហានិភ័យនានាដែលអាចកើតមានឡើងពីការរីករាលដាលនៃមេរោគនេះ។
ក្រៅពីការធ្វើអនាម័យនៅក្នុងការិយាល័យរបស់យើងជាប្រចាំ និយោជិតដែលប្រឈមមុខនឹងអតិថិជនទាំងអស់ត្រូវបានផ្តល់ជូននូវឧបករណ៍ការពារផ្ទាល់ខ្លួនផងដែរ។ ទឹកអាល់កុលសម្លាប់មេរោគត្រូវបានផ្តល់ជូននិយោជិតសម្រាប់ប្រើប្រាស់ហើយ ការត្រួតពិនិត្យសីតុណ្ហភាពក្នុងខ្លួនក៏ត្រូវបានអនុវត្តប្រចាំថ្ងៃក្នុងគោលបំណង ដើម្បីធានាឲ្យបាននូវសុខុមាលភាពរបស់និយោជិត និងអតិថិជនរបស់យើង។ ពួកយើងនឹងបន្តអនុវត្តវិធានការចាំបាច់ដែលតម្រូវឲ្យប្រតិបត្តិតាម ព្រោះថាការរក្សាសុវត្ថិភាពសម្រាប់អតិថិជន និងនិយោជិតរបស់យើងគឺមានសារៈសំខាន់ខ្លាំងណាស់»។
ដាតុ ម៉ូហាមាដ ហានីវស៊ូអាឌី បន្ថែមថា៖ «ក្នុងនាមជាគ្រឹះសា្ថនមួយដែល មានបេសកកម្មផ្តល់នូវសេវាហិរញ្ញវត្ថុប្រកបដោយអរិយភាព យើងតែងតែធានាថាតួនាទីរបស់យើង មិនត្រឹមតែជំរុញកំណើនសេដ្ឋកិច្ចសម្រាប់ប្រទេស និងតំបន់ប៉ុណ្ណោះទេ ប៉ុន្តែថែមទាំងធានាដល់សុខុមាលភាពសហគមន៍របស់យើងគ្រប់ពេលវេលា ហើយលើសពីនេះគឺក្នុងពេលមានអាសន្នដូចជាស្ថានភាពជំងឺកូវីដ១៩ បច្ចុប្បន្ន»។
ទន្ទឹមគ្នានេះដែរធនាគារ មេយប៊ែង ក៏កំពុងផ្តោតការយកចិត្តទុកដាក់របស់ខ្លួនក្នុងការជួយប្រជាជនឲ្យរួចផុតពីវិបត្ដិនេះ ហើយក៏បានជួយបញ្ចៀសការធ្លាក់ចុះនៃសេដ្ឋកិច្ចដែលបណ្តាលមកពីការរីករាលដាលនៃជំងឺឆ្លងនេះដែរ។ ចាប់តាំងពីមានការរីករាលដាលនៃជំងឺកូវីដ១៩ មកធនាគារ មេយប៊ែង បានចាប់ផ្តើមផ្តល់សេវាប្រឹក្សាហិរញ្ញវត្ថុ សម្រាប់អតិថិជនរបស់ខ្លួនដែលរងផលប៉ះពាល់ដោយរោគរាតត្បាតនេះ បន្ថែមពីលើកញ្ចប់ជំនួយហិរញ្ញវត្ថុតាមរយៈការរៀបចំឥណទានឡើងវិញ និងការកំណត់ពេលវេលាឡើងវិញសម្រាប់ការសងឥណទាន ក៏ដូចជាការផ្អាកការសងប្រាក់កម្ចីជាដើម។
ធនាគារ មេយប៊ែង ក៏បានចាប់ដៃគូជាមួយធនាគារសហគ្រាសធុនតូច និងមធ្យមតាមរយៈគម្រោងសហហិរញ្ញប្បទានដល់សហគ្រាសធុនតូច និងមធ្យម ដើម្បីជួយសម្រួលដល់ការផ្តល់ឥណទានដល់សហគ្រាសធុនតូច និងមធ្យមប្រកបដោយប្រសិទ្ធភាព និងចីរភាពក៏ដូចជាគាំទ្រដល់សហគ្រាសធុនតូច និងមធ្យមក្នុងគោលបំណងបង្កើនកំណើនសេដ្ឋកិច្ច និងជួយជំរុញសហគ្រាសធុនតូច និងមធ្យមនៅប្រទេសកម្ពុជាក្នុងពេលមានបញ្ហាប្រឈមនេះ។
«យើងក៏កំពុងជំរុញដល់អតិថិជនរបស់យើងឲ្យប្រើប្រាស់សេវាកម្មធនាគារតាមអ៊ីនធឺណិតដោយផ្អែកលើស្ថានភាពបច្ចុប្បន្ន និងផ្តោតការយកចិត្តទុកដាក់ខ្ពស់ក្នុងការថែរក្សាសុវត្ថិភាពខ្លួន និងសហគមន៍ ដោយចៀសវាងកន្លែងអ៊ូអរ និងរក្សាគម្លាតក្នុងការប្រាស្រ័យទាក់ទងក្នុងសង្គមផងដែរ» ដាតុ ម៉ូហាមាដ ហានីវស៊ូអាឌី បានបន្ថែម។
បច្ចុប្បន្នធនាគារ មេយប៊ែង មានផ្តល់ជូនសេវាកម្មធនាគារតាមអ៊ីនធឺណិត និងតាមទូរស័ព្ទដៃ Maybank2u ដើម្បីជួយសម្រួលដល់ប្រតិបត្តិការធនាគារកិច្ចបុគ្គលផ្សេងៗ។
ថ្មីៗនេះសេវាធនាគារតាមទូរស័ព្ទដៃ Maybank2u ក៏បានធ្វើការផ្លាស់ប្តូររូបរាង និងមានបន្ថែមមុខងារមួយចំនួន ដើម្បីធ្វើឲ្យបទពិសោធរបស់អ្នកប្រើប្រាស់ មានភាពកាន់តែប្រសើរឡើងដែលផ្តល់នូវភាពសាមញ្ញ លឿន និងងាយស្រួលក្នុងការប្រើប្រាស់។
សម្រាប់ប្រតិបត្តិការអាជីវកម្ម ធនាគារ មេយប៊ែង ក៏មានផ្តល់ជូននូវប្រព័ន្ធគ្រប់គ្រងសាច់ប្រាក់ Maybank2e ដែលផ្តល់ជូននូវដំណោះស្រាយលើការគ្រប់គ្រងសាច់ប្រាក់តាមអ៊ីនធឺណិតដ៏ទូលំទូលាយដូចជា ការគ្រប់គ្រងព័ត៌មាន ការគ្រប់គ្រងលើសាច់ប្រាក់ត្រូវទូទាត់ និងគ្រប់គ្រងសាច់ប្រាក់ត្រូវទទួលបាន៕