ប្រទេស ម៉ាឡេស៊ី គឺជាវិនិយោគិនបរទេសធំជាងគេលំដាប់ទី ៤ នៅកម្ពុជា ជាមួយនឹងទុនវិនិយោគមានចំនួន ២,៧៤ ពាន់លានដុល្លារ។
បច្ចុប្បន្នម៉ាឡេស៊ីបាននិងកំពុងបង្កើនកិច្ចខិតខំប្រឹងប្រែងដើម្បីស្វែងរកសក្តានុពលវិនិយោគបន្ថែមនៅកម្ពុជាដែលជាគោលដៅទាក់ទាញវិនិយោគិនបរទេសដ៏សំខាន់នៅក្នុងរយៈពេលប៉ុន្មានឆ្នាំចុងក្រោយនេះ។
មិនដល់មួយខែផង បន្ទាប់ពីនាយករដ្ឋមន្ត្រីម៉ាឡេស៊ីលោក Mahathir Mohamad បានមកបំពេញទស្សនកិច្ចនៅកម្ពុជា គណៈប្រតិភូធុរកិច្ចជាន់ខ្ពស់ដឹកនាំដោយសាជីវកម្មពាណិជ្ជកម្ម និងអភិវឌ្ឍន៍ម៉ាឡេស៊ីបានមកដល់ទីក្រុងភ្នំពេញដើម្បីស្វែងរកឱកាសវិនិយោគបន្ថែម។
ឯកអគ្គរាជទូតម៉ាឡេស៊ីប្រចាំកម្ពុជា ឯកឧត្តម Eldeen Husiani Mohd Hashim ថ្លែងនៅក្នុងព្រឹត្តិការណ៍ជួបជុំក្រុមអ្នកធុរកិច្ចក្រោមប្រធានបទ «បេសកកម្មបង្កើនល្បឿននាំចេញមកកម្ពុជា» ដែលបានប្រារព្ធធ្វើឡើងនៅរាជធានីភ្នំពេញកាលពីថ្ងៃទី ៧-៩ ខែតុលាកន្លងទៅថា៖ «គោលបំណងរបស់បេសកកម្មធុរកិច្ចនេះគឺដើម្បីស្វែងរកកិច្ចសហការអាជីវកម្មយុទ្ធសាស្ត្រជាមួយក្រុមហ៊ុនក្នុងស្រុកជាទីផ្សារដែលកំពុងរីកលូតលាស់យ៉ាងឆាប់រហ័សសម្រាប់ផលិតផល និងសេវាកម្មជាច្រើននៅក្នុងប្រទេស កម្ពុជា»។
ក្រុមហ៊ុនចំនួន ២៥ ដែលតំណាងឱ្យវិស័យផ្សេងៗជាច្រើនរាប់ចាប់ពីវិស័យម្ហូបអាហារ ភេសជ្ជៈ សុខភាព សំណង់ គ្រឿងម៉ាស៊ីន ឧបករណ៍ផ្នែកវេជ្ជសាស្ត្រ និងវិស័យផ្សេងៗទៀតកំពុងស្វែងរកដៃគូក្នុងស្រុកដើម្បីចូលមកក្នុងទីផ្សារកម្ពុជា។
ឯកឧត្តម Eldeen បានបន្ថែមថា៖ «កិច្ចខិតខំប្រឹងប្រែង និងគំនិតផ្តួចផ្តើមផ្សេងៗត្រូវបានអនុវត្តដើម្បីពង្រីកទំនាក់ទំនងពាណិជ្ជកម្ម និងវិនិយោគទ្វេភាគីបន្ថែម។ ពួកគេជាក្រុមហ៊ុនដែលមានអាជ្ញាប័ណ្ណលក្ខណៈអន្តរជាតិ និងផលិតផលិតផលដែលមានគុណភាពខ្ពស់ ហើយបាននាំចេញផលិតផលរបស់ខ្លួនទៅកាន់ប្រទេសជាច្រើននៅលើពិភពលោក។ ក្រុមហ៊ុនទាំងនេះពិតជាចង់ធ្វើការរួមគ្នាជាមួយដៃគូកម្ពុជាដើម្បីចូលមកក្នុងទីផ្សារមួយនេះ»។
សេដ្ឋកិច្ចរបស់កម្ពុជាត្រូវការការវិនិយោគផ្ទាល់ពីបរទេសបន្ថែមដើម្បីចាប់ផ្តើមវិស័យផលិតកម្មរបស់ខ្លួន បង្កើតការងារដល់ប្រជាជនវ័យក្មេងរាប់លាននាក់ ដើម្បីទ្រទ្រង់កំណើនសេដ្ឋកិច្ចដែលកំពុងរីកចម្រើននាប៉ុន្មានទសវត្សរ៍ចុងក្រោយនេះ និងការកែលម្អហេដ្ឋារចនាសម្ព័ន្ធដែលត្រូវការចាំបាច់ដើម្បីគាំទ្រសេដ្ឋកិច្ច។
លើសពីនេះទៀតកំណើនការប្រើប្រាស់ ជាពិសេសក្នុងចំណោមយុវជនក្នុងទីក្រុងនៅតែបន្តជំរុញឲ្យមានតម្រូវការខ្ពស់សម្រាប់ទំនិញ និងសេវាកម្ម។ ដូច្នេះព្រះរាជាណាចក្រកម្ពុជានៅតែជាទីកន្លែងដ៏មានសក្កានុពលដែលផ្តល់នូវឱកាសវិនិយោគសម្រាប់ក្រុមហ៊ុនបរទេស។
ឯកឧត្តម Eldeen ថ្លែងថា៖ «ខ្ញុំសូមស្វាគមន៍លោកអ្នកមកកាន់ទីផ្សារកម្ពុជាដែលកំពុងរីកចម្រើន។ ប្រាក់ចំណូលមធ្យមកំពុងមានកំណើនឡើងក្នុងចំណោមយុវជនជំនាន់ក្រោយ ហើយគោលនយោបាយ អាជីវកម្មដ៏អំណោយផលបានបន្តទាក់ទាញការវិនិយោគផ្ទាល់ពីបរទេសមកកាន់កម្ពុជាកាន់តែច្រើន ជាពិសេសគឺវាមិនមានពេលណាប្រសើរជាងពេលបច្ចុប្បន្ននេះទេក្នុងការស្វែងរកឱកាសធ្វើអាជីវកម្មនៅក្នុងទីផ្សារដ៏គួរឱ្យចាប់អារម្មណ៍មួយនេះ«។
ការវិនិយោគរបស់ម៉ាឡេស៊ីនៅកម្ពុជាមានតម្លៃ ២,៧៤ ពាន់លានដុល្លារ ពាក់ព័ន្ធនឹង ១៣៨ គម្រោង គិតចាប់ពីខែមករា ឆ្នាំ ១៩៩៤ រហូតដល់ខែ កក្កដា ឆ្នាំ ២០១៩។ វិស័យចម្បងៗមានដូចជាវិស័យទេសចរណ៍ ការអភិវឌ្ឍអចលនទ្រព្យ ផលិតកម្មឧស្សាហកម្ម កសិកម្ម និងសម្ភារប្រើប្រាស់ផ្សេងៗ។
លោក អ៊ុំ សេរីវុទ្ធ អនុប្រធានមជ្ឈមណ្ឌលផលិតភាពជាតិនៃក្រសួងឧស្សាហកម្ម និងសិប្បកម្មបានមានប្រសាសន៍ថា គណៈប្រតិភូធុរកិច្ចមកពីប្រទេសម៉ាឡេស៊ីនេះនឹងជួយបើកទីផ្សារថ្មីសម្រាប់ផលិតផលរបស់កម្ពុជា។
លោកថ្លែងថា៖ «វាជាឱកាសដ៏ល្អសម្រាប់ប្រទេសកម្ពុជា ពីព្រោះកម្ពុជានឹងមានទំនាក់ទំនងពាណិជ្ជកម្មកាន់តែច្រើនជាមួយប្រទេសម៉ាឡេស៊ី ហើយវានឹងផ្តល់នូវឱកាសនាំចេញជាពិសេសផលិតផលកសិកម្ម និងវត្ថុធាតុដើម»។
លោក សេរីវុទ្ធ បន្ថែមថា៖ «ប្រសិនបើម៉ាឡេស៊ីនាំចូលផលិតផលកសិកម្មកាន់តែច្រើន នោះនឹងជួយដល់កសិករ ហើយនឹងជួយបង្កើតការងារកាន់តែច្រើនក៏ដូចជាជួយកាត់បន្ថយភាពក្រីក្រ។ បេសកកម្មពាណិជ្ជកម្មនេះផ្តល់ឱកាសដល់ប្រទេសទាំង ២ ក្នុងការនាំចេញ និងនាំចូលទំនិញ»៕