.jpg)
ប្រធានគ្រប់គ្រងម៉ាកយីហោនៃក្រុមហ៊ុន Sandara កញ្ញា ប៊ុន កុលសាលីតា ។
មិនមែនអ្វីៗទាំងអស់ដែលមានពន្លឺចែងចាំងសុទ្ធតែមាសនោះទេ ប៉ុន្តែទស្សនវិស័យរបស់ក្រុមហ៊ុន Sandara Industry and Development Company Ltd កំពុងមានពន្លឺចែងចាំងបន្ទាប់ពីបានលក់នូវគ្រឿងអលង្ការម៉ាកយីហោរបស់ដាណឺម៉ាកដ៏ល្បីល្បាញចំនួន ២ យីហោ។
ក្រុមហ៊ុនទទួលបានសិទ្ធិចែកចាយផ្តាច់មុខក្នុងប្រទេសកម្ពុជានូវគ្រឿងអលង្ការម៉ាក Pandora និងនាឡិកាម៉ាក Bering Time ក្នុងឆ្នាំ ២០១៨ ហើយបានពង្រីកវត្តមានលក់រាយយ៉ាងឆាប់រហ័សក្នុងរយៈពេលប្រមាណ ១៨ ខែមកនេះ។
លោក Thierry Tea អគ្គនាយកក្រុមហ៊ុនបានថ្លែងប្រាប់កាសែតភ្នំពេញ ប៉ុស្តិ៍ ពីការិយាល័យរបស់លោកនៅក្នុងខណ្ឌដូនពេញថា៖ «ផ្នែកមួយនៃបេសកកម្មរបស់ក្រុមហ៊ុន Sandara គឺនាំយកផលិតផលដែលមានតម្លៃដ៏សមរម្យមកកាន់ទីផ្សារកម្ពុជា ហើយបេសកកម្មនេះត្រូវបានអនុវត្តយ៉ាងសកម្មជាមួយហាង Pandora និង Bering ។
ទាក់ទងនឹងផលប៉ះពាល់នៃជំងឺកូវីដចំពោះហាងលក់រាយ លោកថ្លែងថា៖ «យើងមានគម្រោងបើកហាងថ្មីៗ ប៉ុន្តែយើងកំពុងរង់ចាំមើលថា តើទីផ្សារនឹងមានកំណើនខ្លាំងដែរឬទេនៅឆ្នាំក្រោយ?»។
«យើងបានសង្កេតឃើញថាឥរិយាបទរបស់អ្នកទិញមានការផ្លាស់ប្តូរ ដោយការលក់ជាទូទៅធ្លាក់ចុះ ដោយសារការធ្លាក់ចុះអតិថិជនក្នុងផ្សារទំនើប និងប្រាក់ចំណូលធ្លាក់ចុះ។ អ្នកទិញទំនិញភាគច្រើនគឺពួកគាត់ស្វែងរកផលិតផលដែលមានគុណភាពល្អ និងមានការប្រុងប្រយ័ត្នក្នុងការជ្រើសរើសទិញផលិតផលណាមួយ»។
Pandora គឺជាក្រុមហ៊ុនលក់រាយគ្រឿងអលង្ការធំជាងគេបំផុតនៅលើពិភពលោក បើគិតអំពីបរិមាណលក់សរុប និងនៅពីក្រោយ Cartier និង Tiffany & Co បើគិតពីចំណូលលក់សរុប។
លោក Tea មានប្រសាសន៍ថា កាលពីឆ្នាំមុនប្រទេសកម្ពុជាបានក្លាយជាទីផ្សារដែលរីកលូតលាស់លឿនបំផុតសម្រាប់ផលិតផលម៉ាក Pandora នៅក្នុងតំបន់អាស៊ីអាគ្នេយ៍។
ដោយមានឈ្មោះល្បីល្បាញនៅទូទាំងពិភពលោករួចទៅហើយផលិតផលរបស់ Pandora បានទាក់ទាញដួងចិត្តយុវវ័យ និងអ្នករស់នៅក្នុងទីក្រុង ដោយសារតែភាពស្រស់ស្អាតរបស់វា និងការរចនាដែលមានភាពទាក់ទាញ។
អគ្គនាយកក្រុមហ៊ុន Sandara លោក Thierry Tea ។
លោក Tea ថ្លែងថា Pandora លេចធ្លោនៅក្នុងទីផ្សារកម្ពុជាដោយសារការប្រើប្រាស់ប្រព័ន្ធឌីជីថល និងការប្តេជ្ញាចិត្តរបស់ខ្លួនចំពោះក្នុងការនាំយកមកនូវ «ផលិតផលប្រណីតជាមួយតម្លៃសមរម្យ»។
ផលិតផលដែលលក់ដាច់ជាងគេរបស់ Pandora នោះគឺជាប្រភេទ charm ខូឡិកសិន ដែលជំរុញអតិថិជនក្នុងការចងចាំល្អៗដាក់ទៅក្នុងខ្សែដៃរបស់ពួកគេ ។
«គ្រប់ការរចនាគ្រឿងអលង្ការរបស់ Pandora នីមួយៗគឺមានបង្កប់អត្ថន័យរបស់វាដែលទាក់ទងទៅនឹងក្តីស្រឡាញ់ ក្រុមគ្រួសារ មិត្តភក្តិ និងពេលវេលាដ៏មានតម្លៃ។ ជាពិសេសគ្រប់គ្រាប់ charm ដែលទាក់ទាញ អតិថិជនឲ្យបន្តប្រើប្រាស់ពីខូឡិកសិនមួយទៅខូឡិកសិនថ្មីមួយទៀត ដោយពួកគាត់គ្រាន់តែបន្ថែមគ្រាប់ charm ថ្មីក្នុងខ្សែដៃរបស់ពួកគាត់»។ នេះជាការលើកឡើងរបស់កញ្ញា ប៊ុន កុលសាលីតា អ្នកគ្រប់គ្រងម៉ាកយីហោ។
ទន្ទឹមនឹងលក់គ្រឿងអលង្ការ ក្រុមហ៊ុន Sandara ក៏មានហាងនាឡិកាម៉ាក Bering Time ចំនួន ៣ កន្លែងផងដែរ ដែលយីហោរបស់ដាណឺម៉ាកមួយនេះ ផលិតនាឡិកាដ៏ទំនើប និងទាន់សម័យ។
«Pandora មានភាពល្បីល្បាញនៅទូទាំងពិភពលោកដោយឡែកដំបូងខ្ញុំទទួលស្គាល់ថា យើងមានភាពស្ទាក់ស្ទើរបន្តិចជាមួយនឹងនាឡិកាម៉ាក Bering ប៉ុន្តែក្រោយមកយើងពិតជាមានការភ្ញាក់ផ្អើលយ៉ាងខ្លាំង ដែលវាទទួលបានការគាំទ្រច្រើននៅក្នុងទីផ្សារកម្ពុជាដោយសាភាពប្រណីត និងគុណតម្លៃម៉ាកយីហោរបស់វា»។ ចំណូលសរុបសម្រាប់ម៉ាក Pandora និង Bering នៅកម្ពុជា សរុបមានជាង ១ លានដុល្លារកាលពីឆ្នាំមុន។
លោកបន្ថែមថា Sandora មាន កំណើនពីមួយឆ្នាំទៅមួយឆ្នាំប្រមាណ ៨០ ភាគរយនៅក្នុងរយៈពេល ២ ឆ្នាំកន្លងមកនេះ។ ក្រុមហ៊ុនគ្រោងនឹងបើកសាខាថ្មីចំនួន ២ នៅក្នុងឆ្នាំនេះ ប៉ុន្តែដោយសារជំងឺរាតត្បាតសកលកូវីដ ១៩ បានបង្អាក់ដល់ផែនការពង្រីកនេះ។ ផ្ទុយទៅវិញវាបានផ្តល់ពេលវេលាដល់ក្រុមការងារក្នុងការវិភាគ និងរៀបចំផែនការច្បាស់លាស់សម្រាប់ពេលអនាគត។ ពួកយើងបានខិតខំក្នុងការរក្សាប្រតិបត្តិការក្នុងហាងដោយមានសុវត្ថិភាពខ្ពស់បំផុត និងបំពេញនូវតម្រូវការអតិថិជន។ ពួកយើងនៅតែឈរត្រង់នេះដើម្បីនាំមកនូវការអភិវឌ្ឍស្ទីលនៃការរស់នៅរបស់ប្រជាជនកម្ពុជា»។
ជាលទ្ធផល ក្រុមហ៊ុនបានធ្វើឱ្យប្រសើរឡើងនូវវេទិកាលក់តាមប្រព័ន្ធឌីជីថលរបស់ខ្លួនគឺតាមរយៈប្រព័ន្ធហ្វេសប៊ុក និងគេហទំព័រ។
លោកបន្តថា៖ «ក្នុងឆ្នាំ ២០១៨ ដល់ឆ្នាំ ២០១៩ យើងសម្រេចបានកំណើន ៨០ ភាគរយពីមួយឆ្នាំទៅមួយឆ្នាំ។ នៅក្នុងឆ្នាំនេះពីដំបូងយើងបានព្យាករថានឹងមានកំណើន ៣០ ភាគរយ។ ប៉ុន្តែដោយសាវិបត្តិជំងឺកូវីដ១៩ យើងប្រហែលត្រូវដក ៣០ ភាគរយ [ឬ] ដក ៥០ ភាគរយបើធៀបនឹងឆ្នាំ ២០១៩។
លោក Tea ថ្លែងថា ប៉ុន្តែទោះយ៉ាងណាយើងមានទំនុកចិត្តខ្ពស់ថា ម៉ាកយីហោទាំងនេះនឹងមានកំណើនឡើងវិញកាន់តែខ្លាំងជាងមុន»។
លោក Tea បន្ថែមថា៖ «នេះគឺជាពេលវេលាដ៏ល្អដើម្បីរៀបចំយុទ្ធសាស្ត្រសម្រាប់សកម្មភាពបន្ទាប់របស់យើង ពីព្រោះសហគមន៍ជំនួញទាំងមូលគឺស្ថិតនៅក្នុងទូកតែមួយ។ អាជីវកម្មលក់រាយជាទូទៅនៅលើពិភពលោក សុទ្ធតែរងផលប៉ះពាល់។ យើងនៅរក្សាបុគ្គលិករបស់យើង និងចាត់វិធានការដើម្បីសុវត្ថិភាពរបស់ពួកគេក៏ដូចជាសុវត្ថិភាពរបស់អតិថិជនរបស់យើងផងដែរ»៕
