ខណៈដែលប្រជាជនកម្ពុជាដែលមានចំណូលមធ្យមកំពុងកើនឡើងតម្រូវការសម្ភារប្រើប្រាស់តាមគេហដ្ឋាន បន្ទប់ទឹក និងសម្ភារផ្សេងៗទៀតក៏កំពុងកើនឡើងផងដែរ។ ជាការពិតណាស់ ម៉ាកយីហោមកពីក្រៅប្រទេសល្បីៗមួយចំនួនបានឈរជើងយ៉ាងរឹងមាំនៅក្នុងទីផ្សារកម្ពុជា ហើយពេលនេះពួកគេកំពុងខិតខំរក្សាទីតាំងទីផ្សារឲ្យកាន់តែរឹងមាំថែមទៀត។
ក្រុមហ៊ុនឈានមុខ ២ ដែលជាក្រុមហ៊ុនផ្គត់ផ្គង់សម្ភារបន្ទប់ទឹក និងសម្ភារសម្រាប់គេហដ្ឋានគឺយីហោ Grohe និង Jorakay ក៏នឹងចូលរួមនៅក្នុងការតាំងពិព័រណ៍វិស័យសំណង់និងអគារ CAMBUILD 2019 នាពេលខាងមុខផងដែរ។
លោក Thongchai Phanuwongcharoen នាយកគ្រប់គ្រងក្រុមហ៊ុន LIXIL International Pte Ltd ប្រចាំកម្ពុជាថ្លែងថា៖ «ផលិតផលទាំងអស់របស់ម៉ាកយីហោ Grohe ដែលលក់នៅក្នុងប្រទេសកម្ពុជាគឺត្រូវបាននាំចូលមកពីប្រទេសអាល្លឺម៉ង់ ដូច្នេះរាល់ផលិតផលដែលលក់នៅទីនេះគឺបំពាក់ដោយបច្ចេកវិទ្យាដូចផលិតផលដែលលក់នៅក្នុងប្រទេសអាល្លឺម៉ង់ និងនៅទូទាំងពិភពលោកដែរ»។
«យើងមានអ្នកជំនាញអំពីផលិតផលយីហោ Grohe ដើម្បីជួយក្នុងការរចនា និងជ្រើសរើសផលិតផលសម្រាប់អតិថិជនដែលចង់កែលម្អបន្ទប់ទឹករបស់ពួកគេ។ ការបណ្តុះបណ្តាលអំពីផលិតផល និងចំណេះដឹងបច្ចេកទេសក៏ត្រូវបានផ្តល់ដល់អ្នកចែកចាយរបស់យើងផងដែរ ដើម្បីធានាថា យើងតែងតែផ្តល់ជូននូវសេវាកម្មល្អបំផុតបន្ទាប់ពីបានលក់ទៅដល់ដៃអតិថិជន»។
«ជាមួយនឹងផលិតផលដែលមានគុណភាពខ្ពស់ និងសេវាកម្មពិសេសរបស់អាល្លឺម៉ង់ បច្ចុប្បន្នផលិតផលយីហោ Grohe បានក្លាយជាម៉ាកយីហោសម្ភារបន្ទប់ទឹកលេខ ១ នៅកម្ពុជា»។
LIXIL គឺជាក្រុមហ៊ុនជប៉ុនដែលល្បីល្បាញនៅទូទាំងពិភពលោកជាមួយនឹងបច្ចេកវិទ្យាឈានមុខគេនៅក្នុងការផលិតសម្ភារសម្រាប់លំនៅឋាន សម្ភារសំណង់ និងសម្ភារជាច្រើនមុខទៀត។ ម៉ាកយីហោ Grohe គឺជាផ្នែកមួយនៃបច្ចេកវិទ្យា LIXIL Water Technology ។
គោលបំណងចម្បងរបស់យីហោ Grohe ក្នុងការចូលរួមនៅក្នុងពិធីតាំងពិព័រណ៍ CAMBUILD 2019 គឺដើម្បីណែនាំផលិតផលប្រណីត គុណភាពខ្ពស់ក៏ដូចជាបង្ហាញនូវបច្ចេកវិទ្យាចុងក្រោយរបស់ខ្លួនដល់អ្នកប្រើប្រាស់នៅក្នុងប្រទេសកម្ពុជា។
ផលិតផលមួយក្នុងចំណោមផលិតផលចុងក្រោយបំផុតរបស់ក្រុមហ៊ុនគឺ Grohe Sensia Arena ជាបង្គន់ដ៏ទំនើបជាមួយនឹងបច្ចេកវិទ្យាសេរ៉ាមិក Aqua ប្រកបដោយភាពច្នៃប្រឌិតមានផាសុកភាពដែលបំពេញតាមតម្រូវការរបស់អ្នកប្រើប្រាស់ និងធានាបាននូវអនាម័យខ្ពស់ ១០០ ភាគរយ។
បង្គន់ Grohe Sensia Arena មានមុខងារស្វ័យប្រវត្តិដែលអាចភ្ជាប់ទៅនឹងឧបករណ៍ចល័តតាមរយៈកម្មវិធីទូរស័ព្ទ Grohe សម្រាប់ការបញ្ជាពីចម្ងាយ។
ចំណែកឯលោក Chalitpon Jiamtiranat ប្រធានគ្រប់គ្រងផ្នែកលក់របស់ក្រុមហ៊ុន Jorakay ថ្លែងថាការផ្តោតអារម្មណ៍របស់ក្រុមហ៊ុន Jorakay នៅក្នុងការតាំងពិព័រណ៍ CAMBUILD 2019 នេះគឺដើម្បីបង្ហាញពីផលិតផលកែលម្អគេហដ្ឋាន [ជួសជុលគេហដ្ឋាន]។
លោកបន្ថែមថា៖ «យើងនឹងបង្ហាញ និងណែនាំផលិតផលរបស់យើងដល់ពាណិជ្ជករ និងអ្នកប្រើប្រាស់នៅក្នុងពិព័រណ៍នោះដើម្បីបង្កើនការយល់ដឹងពីម៉ាកយីហោនេះ។ លើសពីនេះទៀតក៏ដើម្បីបន្ថែមការគាំទ្រដល់អ្នកចែកចាយរបស់យើងនៅកម្ពុជាផងដែរ»។
ផលិតផលពិសេសមួយក្នុងចំណោមផលិតផលជាច្រើនទៀតរបស់ក្រុមហ៊ុន Jorakay នៅឯពិធីតាំងពិព័រណ៍ CAMBUILD 2019 នេះគឺស៊ីម៉ង់ត៍ការពារជម្រាបទឹក Crocodile Flex Shield។ វាជាផលិតផលដែលអាចប្រើដើម្បីការពារជម្រាបទឹកនៅតាមដំបូល រានហាល បន្ទប់ទឹក អាង ហែលទឹក ដំបូលសួនច្បារ និងរចនាសម្ព័ន្ធរក្សាទឹកផ្សេងៗ។
លោក Chalitpon ក៏បានចង្អុលបង្ហាញផងដែរថា ទោះបីក្រុមហ៊ុន Jorakay មានរោងចក្រផលិតតែនៅក្នុងប្រទេសថៃក្តី ក៏ក្រុមហ៊ុនមានសមត្ថភាពផលិតបានផលិតផលគ្រប់គ្រាន់សម្រាប់តំបន់អាស៊ានដែរ។
«យើងនាំចេញផលិតផលរបស់យើងទៅកាន់បណ្តាប្រទេសអាស៊ានទាំងអស់លើកលែងតែប្រទេសឥណ្ឌូនេស៊ី។ នៅតំបន់ផ្សេងទៀតនៃទ្វីបអាស៊ី ផលិតផលរបស់យើងមានលក់នៅប្រទេសបង់ក្លាដែស ឥណ្ឌា ម៉ាល់ឌីវ និងកូរ៉េខាងត្បូង»។
លោកពន្យល់ថា៖ «ផលិតផលរបស់យើងភាគច្រើនមានទម្ងន់ធ្ងន់ ដូច្នេះយើងផ្តោតលើទីផ្សារអាស៊ានពីព្រោះប្រសិនបើយើងនាំចេញទៅតំបន់ឆ្ងាយៗជាងនេះ នោះថ្លៃដឹកជញ្ជូនអាចខ្ពស់ជាងថ្លៃផលិត»។
លោកបន្ថែមថាក្រុមហ៊ុន Jorakay មានផែនការបង្កើតចង្វាក់ផលិតកម្មនៅប្រទេសអាស៊ានផ្សេងទៀត ប៉ុន្តែលោកមិនបានបង្ហាញថា ប្រទេសណាទេ ខណៈផែនការនេះកំពុងស្ថិតក្នុងដំណាក់កាលដំបូងនៅឡើយ៕