.jpg)
គិតចាប់តាំងពីឆ្នាំ ២០១៤ មកប្រទេសកម្ពុជាត្រូវបានមើលឃើញថា ការនាំចូលពងត្រីកាវីយ៉ាបានកើនឡើងជាលំដាប់។
លោក Bernard Matter អគ្គនាយកក្រុមហ៊ុន Caviar and Traditions Caviar បានឲ្យកាសែតភ្នំពេញ ប៉ុស្តិ៍ដឹងថា ភាគច្រើននៃអតិថិជនរបស់លោកគឺជាកូនចៅនៅក្នុងគ្រួសារធូរធារដែលតែងស្វែងរកអាហារមានរសជាតិពិសេសនៅពេលធ្វើដំណើរកម្សាន្ត ឬទៅសិក្សានៅបរទេស។
នៅក្រោមក្រុមហ៊ុន Asia Gourmet (Cambodia) Co Ltd ក្រុមហ៊ុន Caviar & Tradition បានចូលមកក្នុងទីផ្សារកម្ពុជាក្នុងឆ្នាំ ២០១៧ និងក្លាយជាក្រុមហ៊ុនចែកចាយ ពងត្រីម៉ាក Comptoir du Caviar ផ្តាច់មុខនៅតំបន់អាស៊ីអាគ្នេយ៍ និងចែកចាយស្រាសំប៉ាញ Bollinger ផ្តាច់មុខនៅក្នុងប្រទេសកម្ពុជា។
អតិថិជនរបស់ Caviar & Traditions សុទ្ធតែបានទទួលស្គាល់ពីកេរ្តិ៍ឈ្មោះដ៏ល្បីល្បាញនៃពងត្រីម៉ាក Comptoir du Caviar នេះបើយោងតាមលោក Matter ។
លោក Bernard Matter (ឆ្វេង) និងលោក Gregoire Serrell។
ដូច្នេះនៅពេលដែលក្រុមហ៊ុន Caviar & Traditions ចាប់ផ្តើមនាំផលិតផលដែលមានប្រភពពិតប្រាកដមកពីទីក្រុងប៉ារីស វាទទួលបានការគាំទ្រយ៉ាងឆាប់រហ័សក្នុងចំណោមប្រជាជនកម្ពុជាដែលមានជីវភាពធូរធារ។
លោក Matter បានសង្កត់ធ្ងន់ថា៖ «នៅពេលយើងចាប់ផ្តើមអាជីវកម្មដំបូង យើងត្រូវតែអត់ធ្មត់ ពីព្រោះយើងពិតជាបានចាប់ផ្តើមពីចំណុចសូន្យ។ បញ្ហាប្រឈមចម្បងគឺមិនមែនថា ប្រជាជនមិនស្គាល់អំពីពងត្រីកាវីយ៉ានោះទេ ប៉ុន្តែផ្ទុយទៅវិញការធ្វើទីផ្សារផលិតផលឲ្យបានត្រឹមត្រូវទៅដល់អតិថិជន។
ការកុម្ម៉ង់យកទៅតាមគេហដ្ឋានមានប្រហែល ៧០ ភាគរយនៃអាជីវកម្មរបស់ក្រុមហ៊ុន Caviar & Traditions ដូច្នេះក្រុមហ៊ុនតែងតែបណ្តុះបណ្តាលបុគ្គលិកឲ្យចេះពីរបៀបរៀបចំមុខម្ហូបដ៏ពិសេសនេះ។
ក្រុមហ៊ុនទទួលបានកំណើនប្រមាណ ៤០ ភាគរយក្នុងអាជីវកម្មកាលពីឆ្នាំមុន ដែលភាគច្រើនដោយសារតែការច្នៃប្រឌិតថ្មីនៃគំរូចែកចាយ និងជំរុញឱ្យមានទំនាក់ទំនងរវាងគ្នានឹងគ្នាក៏ដូចជាការដឹកជញ្ជូនទំនិញទៅដល់អតិថិជនជាដើម។
ខណៈក្រុមហ៊ុន Caviar & Traditions សម្លឹងទៅរកការបន្ថែមស្រាសំប៉ាញទៅក្នុងបញ្ជីជាមួយនឹងជម្រើសបន្ថែមលោក Matter បានសង្កត់ធ្ងន់ថា ការផ្តោតចម្បងរបស់លោកគឺផ្តល់ជូននូវអ្វីដែលពិសេសសម្រាប់អតិថិជនរបស់លោក។
លោក Matter លើកឡើងថា៖ «អ្វីៗបានផ្លាស់ប្តូរយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះហើយប្រទេសកម្ពុជាមិនដូចកាលពីមុនទេ។ ជារៀងរាល់ថ្ងៃ រសជាតិកាន់តែពិសេស ហើយអតិថិជនរបស់យើងមានការយល់ដឹងកាន់តែច្រើនឡើងៗ»។
កំប៉ុងពងត្រីកាវីយ៉ារបស់ត្រី beluga ។
ក្រុមហ៊ុនក៏ផ្តល់ជូននូវផលិតផលជាច្រើនប្រភេទដើម្បីបង្កើនបទពិសោធខាងផ្នែកអាហារក្នុងនោះក៏មានបារីគុយបា ចានដាក់ពងត្រីកាវីយ៉ា ស្លាបព្រាពិសេសសម្រាប់ទទួលទានពងត្រីកាវីយ៉ាជាដើម។
ពងត្រីកាវីយ៉ាមានតម្លៃថ្លៃដោយសារតែវាជាពងត្រីកម្រ ហើយមនុស្សជាច្រើនចាត់ទុកវាជាអាហារប្រណីតនៅលើពិភពលោក។
វាមានតម្លៃចាប់ពី ៣៥ ដុល្លារសម្រាប់ពងត្រីកាវីយ៉ារបស់ត្រី baerii ២០ ក្រាម មានប្រភពមកពីប្រទេសប៉ូឡូញរហូតដល់ ៣៨៩ ដុល្លារសម្រាប់ពងត្រី កាវីយ៉ា របស់ត្រី beluga ដ៏ល្បីល្បាញមកពីប្រទេសអ៊ីរ៉ង់។
ក្រុមហ៊ុន Caviar & Traditions កំពុងសម្លឹងមើលការលក់ស្រាសំប៉ាញ Bollinger ឲ្យបានរហូតដល់ ១៥០០ ដបនៅក្នុងឆ្នាំនេះ។ ស្តាប់ទៅដូចជាចំនួនតិចតួច ប៉ុន្តែបើផ្អែកលើការផលិតមានចំនួនកំណត់ ដូច្នេះវាមិនមែនជាចំនួនតិចនោះទេ។
«ស្រាសំប៉ាញ Bollinger កម្រិតផលិតកម្មរបស់ខ្លួនយ៉ាងខ្លាំងដើម្បីធានាបាននូវគុណភាពដែលត្រូវផលិតយ៉ាងតិច ៨៥ ភាគរយពីផ្លែទំពាំងបាយជូរគុណភាពខ្ពស់ និងទំពាំងបាយជូរគុណភាពខ្ពស់បំផុត»។
លោក Matter បានបន្តថា៖ «មានរឿងមួយចំនួននៅក្នុងជីវិតដែលនាំអ្នកចេញពីពេលវេលា និងការពិត ហើយនាំអ្នកទៅកាន់កន្លែងដ៏រីករាយបំផុត ហើយមួយក្នុងចំណោមនោះគឺស្រាសំប៉ាញ និងពងត្រីកាវីយ៉ា»៕
