.jpg)
ក្រុមហ៊ុនដែលនឹងចូលរួមតាំងពិព័រណ៍ទាំងខ្មែរនិងបរទេស បានចូលរួមសន្និសីទសារព័ត៌មានស្តីពីការតាំងពិព័រណ៍ «Cambuild'19» កាលពីថ្ងៃទី១ សីហា ក្នុងរាជធានីភ្នំពេញ។ សហការី
ពិព័រណ៍វិស័យសំណង់ និងអគារ Cambuild''19 លើកទី៩ នេះ គឺជាពិព័រណ៍ឧស្សាហកម្មសំណង់ និងអគារខ្នាតអន្តរជាតិធំជាងគេបំផុត នៅកម្ពុជា ដែលវាគឺជាសក្ខីភាពមួយបង្ហាញយ៉ាងច្បាស់ថា វិស័យសំណង់នៅកម្ពុជានៅតែជាទីផ្សារដ៏ទាក់ទាញសម្រាប់វិនិយោគិនទាំងក្នុងស្រុក និងបរទេស។
មានក្រុមហ៊ុនជាង ៥០០ ក្រុមហ៊ុន និងម៉ាកសញ្ញាមកពី ២៨ ប្រទេសនឹងមកបង្ហាញផលិតផល សេវា និងដំណោះស្រាយថ្មីបំផុតរបស់ពួកគេ សម្រាប់វិស័យសំណង់ក្នុងប្រទេស កម្ពុជា ដែលកំពុងរីកចម្រើនខ្លាំង។
លោក Andrew Siow ប្រធានក្រុមហ៊ុន AMB Tarsus ដែលជាអ្នករៀបចំការតាំងពិព័រណ៍នេះបានឲ្យកាសែតភ្នំពេញប៉ុស្តិ៍ដឹងថា៖ «វិស័យសំណង់បានចូលរួមចំណែកមួយយ៉ាងសំខាន់ចំពោះកំណើនសេដ្ឋកិច្ចរបស់ប្រទេស កម្ពុជា ហើយយើងមើលឃើញថាវិស័យនេះនឹងបន្តរីកចម្រើនច្រើនឆ្នាំទៅមុខទៀត ជាពិសេសវាក៏បានផ្តល់ឱកាសការងារកាន់តែច្រើនដល់ប្រជាជនកម្ពុជានៅក្នុងទីក្រុងផងដែរ»។
ព្រឹត្តិការណ៍រយៈពេល ៣ ថ្ងៃនេះ ត្រូវបានរំពឹងថា នឹងអាចទាក់ទាញអ្នកជំនាញការក្នុងឧស្សាហកម្មសំណង់បានជាង ៨ ០០០ នាក់មកពីទូទាំងប្រទេសរួមមានស្ថាបត្យករ អ្នករចនា អ្នកអភិវឌ្ឍន៍ វិស្វករផ្នែកមេកានិច និងអេឡិចត្រូនិក អ្នកម៉ៅការ អ្នកផ្គត់ផ្គង់ និងអ្នកចែកចាយ។
ការតាំងពិព័រណ៍នេះត្រូវបានរៀបចំឡើងចំពេលដែលវិស័យសំណង់កំពុងរីកលូតលាស់ ។
ផលិតផលជាច្រើន ដែលមានដូចជា ស៊ីម៉ងត៍ សម្ភារសំណង់គ្រប់ប្រភេទ ផលិតផលធ្វើពីឈើ ផលិតផលអេឡិចត្រូនិក ម៉ាស៊ីនត្រជាក់ អំពូលភ្លើងក៏ដូចជាសម្ភារជាច្រើនមុខផ្សេងទៀត នឹងត្រូវយកមកដាក់បង្ហាញនៅមជ្ឈមណ្ឌលពិព័រណ៍ និងសន្និបាតកោះពេជ្រ ចាប់ពីថ្ងៃទី ១៨-២០ ខែកញ្ញា។
នៅក្នុងពិធីតាំងពិព័រណ៍ Cambuild''19 ដ៏ធំនេះក៏មានពន្លាមកពីតំបន់ និងប្រទេសជាច្រើន ដូចជា ចិន ឥណ្ឌា សិង្ហបុរី អ៊ីតាលី ម៉ាឡេស៊ី តៃវ៉ាន់ ថៃ និងកូរ៉េខាងត្បូងជាដើម។
វិស័យសំណង់នៅក្នុងប្រទេស កម្ពុជា កំពុងមានកំណើនរឹងមាំ ដោយក្នុងរយៈពេល ៥ ខែ ដំបូងនៃឆ្នាំនេះ បានពង្រីកវិសាលភាពជាង ៦០ ភាគរយ បើធៀបទៅនឹងរយៈពេលដូចគ្នាក្នុង ឆ្នាំ ២០១៨។
គេសង្កេតឃើញមានអគារខ្ពស់ៗ គម្រោងអភិវឌ្ឍចម្រុះ អគារពាណិជ្ជកម្ម ហេដ្ឋារចនាសម្ព័ន្ធសំខាន់ៗដូចជាស្ពានផ្លូវថ្នល់ជាដើម គឺកំពុងរីកចម្រើនយ៉ាងខ្លាំង ដែលធ្វើឱ្យឧស្សាហកម្មមួយនេះរួមចំណែកដល់ការអភិវឌ្ឍសេដ្ឋកិច្ចរបស់ប្រទេស កម្ពុជា ដែលជាប្រទេសកំពុងមានកំណើនសេដ្ឋកិច្ចលឿនបំផុតមួយនៅក្នុងតំបន់អាស៊ាន។
ការតាំងពិព័រណ៍នេះក៏កំពុងទទួលបានការរីកចម្រើនផងដែរដោយសារតែវិស័យសំណង់នៅកម្ពុជាកំពុងមានភាពរឹងមាំ ជាពិសេសសំណង់អគារខ្ពស់ៗនៅក្នុងរាជធានីភ្នំពេញកំពុងធ្វើឲ្យទីក្រុងមួយនេះកាន់តែស្រស់ស្អាត និងមានភាពទាក់ទាញខ្លាំងឡើង។
ការតាំងពិព័រណ៍ Cambuild កាលពីឆ្នាំមុនក៏បានទាក់ទាញក្រុមហ៊ុនបរទេសជាច្រើនផងដែរ ។
«ពីមុនមានតែអគារទាបៗ ប៉ុន្តែបច្ចុប្បន្នមានអគារខ្ពស់ៗ ដូច្នេះយើងចាំបាច់ត្រូវកែលម្អគុណភាព និងសុវត្ថិភាព ក៏ដូចជាប្រសិទ្ធភាពសម្រាប់ឧស្សាហកម្មមួយនេះ»។
លោក Andrew បានបន្ថែមថា៖ «យើងមិនត្រឹមតែសម្លឹងមើលការផ្គត់ផ្គង់ប៉ុណ្ណោះទេ ប៉ុន្តែយើងក៏ត្រូវសម្លឹងមើលទៅលើបច្ចេកវិទ្យាដែលធ្វើឲ្យអគារទាំងនោះកាន់តែមានគុណភាពខ្ពស់ផងដែរ»។
ជាមួយគ្នាដែរ ក្រុមហ៊ុន An Cuong ដែលមានមូលដ្ឋាននៅទីក្រុងហូជីមិញ និងជាក្រុមហ៊ុនផ្តត់ផ្គង់សម្ភារ ដេគ័រគ្រប់ប្រភេទ ជាពិសេសក្តារសម្រាប់ដេគ័រ និងតុបតែង ដែលភាគច្រើនផ្តោតលើអគារខុនដូ និងគម្រោងអគារការិយាល័យបានរំពឹងថានឹងមានស្តង់តាំងបង្ហាញផលិតផលរបស់ខ្លួនរហូតដល់ ៨ ស្តង់ឯណោះ នៅក្នុងពិធីតាំងពិព័រណ៍នេះ។
លោក សឿង សុធានី ប្រធានការិយាល័យតំណាងរបស់ក្រុមហ៊ុន An Cuong ប្រចាំកម្ពុជាបានថ្លែងថា៖ «យើងចង់ពង្រីកទីផ្សាររបស់យើងនៅកម្ពុជា ដើម្បីបង្ហាញអតិថិជននៅកម្ពុជាឲ្យស្គាល់ពីសក្តានុពល និងផលិតផលរបស់ក្រុមហ៊ុន។ យើងរំពឹងថា នឹងមានអតិថិជនជាច្រើនមកចូលរួមក្នុងការតាំងពិព័រណ៍ដ៏ធំនេះ ហើយនឹងទទួលបានអតិថិជនជាបុគ្គលក៏ដូចអតិថិជនជាគម្រោងខុនដូ ឬអាផាតមិនជាដើម ជាពិសេសរំពឹងថានិងមានការបញ្ជាទិញសម្ភាររបស់ក្រុមហ៊ុនច្រើន បន្ទាប់ពីការតាំងពិព័រណ៍រួច»។
លោកបន្ថែមថា៖ «ក្រុមហ៊ុន An Cuong ជាក្រុមហ៊ុនដ៏ធំមានបុគ្គលិកជាង ៤ ០០០ នាក់ នៅវៀតណាម ដែលជាក្រុមហ៊ុនផ្គត់ផ្គង់សម្ភារដេគ័រគ្រប់ប្រភេទ»៕
